Qeveria e Turqisë e ka paralajmëruar të premten partinë kryesore opozitare kundër thirrjeve “të jashtëligjshme” për protesta në rrugë, në lidhje me arrestimin e kryetarit të Stambollit, Ekrem Imamoglu. Mijëra njerëz protestuan në dy ditët e fundit në gjithë vendin.

Ministri i Brendshëm i Turqisë, Ali Yerlikaya, tha se 53 njerëz janë arrestuar dhe 16 oficerë policorë janë lënduar në protestat që filluan në kampuse universitare, selinë qendrore të komunës së Stambollit dhe në pjesë të tjera të vendit të enjten.

Imamoglu, rivali kryesor politik i presidentit Recep Tayyip Erdogan, u arrestua të mërkurën nën akuzat për korrupsion dhe mbështetje të një grupi terrorist.

Partia kryesore opozitare e Imamoglut, Partia Popullore Republikane (CHP), ka thënë se arrestimi i tij është i nxitur politikisht dhe u ka bërë thirrje njerëzve të dalin për të protestuar ligjërisht.

Arrestimi i Imamoglut është dënuar nga liderët evropianë.

Yerlikaya dhe ministri i Drejtësisë, Yilmaz Tunc, i kritikuan thirrjet për veprim nga lideri i CHP-së, Özgür Özel, duke i quajtur “të papërgjegjshme”.

“Grumbullimi dhe marshimi në protestë janë të drejta themelore. Por thirrja për të dalë në rrugë për një hetim të vazhdueshëm ligjor është e paligjshme dhe e papranueshme”, tha Tunc në X të premten.

Presidenti francez Emmanuel Macron tha të enjten se liderët e një koalicioni të mbështetësve të Ukrainës do të takohen sërish në Paris javën e ardhshme për të finalizuar planet për sigurimin e një armëpushimi të mundshëm në konfliktin Rusi-Ukrainë.

“Ne do të mbajmë një takim tjetër të koalicionit të të vullnetit të enjten e ardhshme në Paris në prani të presidentit Volodymyr Zelenskyy”, u tha Macron gazetarëve pas një samiti të BE-së në Bruksel.

“Ne do të finalizojmë punën tonë për mbështetjen afatshkurtër për ushtrinë ukrainase, për mbrojtjen e një modeli të qëndrueshëm për forcat e armatosura të Ukrainës për të parandaluar pushtimet ruse dhe për garancitë e sigurisë që ushtritë evropiane mund të ofrojnë. I gjithë procesi do të finalizohet në ditët në vijim”, tha ai.

Macron, së bashku me kryeministrin britanik Keir Starmer, ka udhëhequr përpjekjet për të formuar një koalicion në mbështetje të Ukrainës që kur Presidenti i SHBA Donald Trump hapi negociatat e drejtpërdrejta me Rusinë muajin e kaluar për t’i dhënë fund konfliktit trevjeçar.

“Ne kemi bërë shumë punë me britanikët për mënyrat për të mbështetur armëpushimin”, tha Macron. “Kjo është e rëndësishme për të siguruar që çdo armëpushim është i besueshëm, si dhe kur të vijë. Ky do të jetë një shans për të diskutuar dhe rregulluar,” shtoi lideri francez.

Në Mbretërinë e Bashkuar, të gjitha fluturimet për nga aeroporti Heathrow janë anuluar deri në mesnatën e sotme pas një zjarri në nënstacionin elektrik pranë North Hyde.

Aeroporti është mbyllur pasi një zjarr shpërtheu në një qendër nënstacioni elektrik që furnizon aeroportin, duke shkaktuar një “ndërprerje të konsiderueshme të energjisë elektrike”, njoftoi aeroporti në një deklaratë.

Në deklaratë iu rekomandua të gjithë pasagjerëve që të mos udhëtojnë në aeroport. “Për të garantuar sigurinë e pasagjerëve dhe kolegëve tanë, Heathrow do të jetë i mbyllur deri në orën 23:59 më 21 mars“, theksoi deklarata.

Mbyllja e aeroportit Heathrow vjen pasi një zjarr në një nënstacion elektrik në perëndim të Londrës la shumë shtëpi pa energji elektrike.

Kryeministri i Izraelit, Benjamin Netanyahu ka shkarkuar kreun e shërbimit të sigurisë së vendit për dështimin e tij për të parashikuar sulmin e 7 tetorit 2023 nga Hamasi.

Kabineti izraelit u takua të enjten në mbrëmje për të miratuar zyrtarisht shkarkimin e parakohshëm të Ronen Bar, i cili u emërua në tetor 2021 për një mandat pesë-vjeçar si shefi i Shin Bet.

Netanyahu njoftoi qëllimin e tij për të shkarkuar zotin Bar në një deklaratë video të dielën, duke përmendur një “mosbesim të vazhdueshëm” midis dy burrave që ai tha se ishte “rritur me kalimin e kohës”.

Masa ngjalli zemërim dhe ndezi më tej demonstratat antiqeveritare në Jerusalem, të cilat panë mijëra izraelitë të bashkojnë forcat me protestuesit që kundërshtonin sulmin e ri të Izraelit në Gaza.

Është hera e parë në historinë e Izraelit që një qeveri shkarkon liderin e Shin Bet.

Një letër dërguar nga Netanyahu anëtarëve të qeverisë së tij përpara takimit i referohej një “humbjeje të vazhdueshme të besimit profesional dhe personal” midis kryeministrit dhe z. Bar dhe propozoi përfundimin e mandatit të tij më 20 prill.

“Humbja e besimit profesional është konsoliduar gjatë luftës, përtej dështimit operacional të 7 tetorit 2023, dhe veçanërisht në muajt e fundit,” tha ai, duke iu referuar sulmeve të Hamasit ndaj Izraelit që ndezën luftën Izrael-Gaza.

Shin Bet është agjencia e brendshme e inteligjencës e Izraelit dhe luan një rol kyç në luftë. Aktivitetet dhe anëtarësimi i saj janë sekrete shtetërore të mbajtura ngushtë.