Bota

Zelanda e Re: Paralajmërim bregdetar pas tërmetit 6.7 ballë

Published

on

Një tërmet i fuqishëm me magnitudë 6.7 ballë ka goditur ishullin jugor të Zelandës së Re, duke shkaktuar një paralajmërim bregdetar dhe duke tronditur mijëra njerëz në zonat përreth. Tërmeti, i cili u regjistrua të martën, ka shkaktuar lëkundje të forta dhe ka bërë që shumë objekte të bien nga raftet dhe ndërtesat të lëkunden.

Pas tërmetit, autoritetet në Zelanden e Re, përmes Agjencisë Kombëtare të Menaxhimit të Emergjencave, paralajmëruan banorët që jetojnë në zonat bregdetare, përfshirë rajonet e Southland dhe Fiordland, të largohen nga plazhet dhe të dalin nga uji. Ky paralajmërim është bërë për shkak të mundësisë së rrymave të forta dhe të pazakonta, që mund të përbëjnë një rrezik të mundshëm për jetën dhe sigurinë e qytetarëve.

Gjithashtu, banorët që ndodhen në barka, anije apo marina janë udhëzuar të braktisin mjetet e tyre dhe të lëvizin sa më shpejt në breg. Agjencia kërkoi që ata të mos kthehen në barka deri sa të marrin udhëzime nga autoritetet përkatëse.

Tërmeti i ndodhur në një thellësi prej 33 kilometrash, ka pasur epiqendrën rreth 160 kilometra në veriperëndim të ishujve Snares, një grup ishujsh subantarktik në jug të Zelandës së Re. Sipas monitoruesit sizmik të qeverisë, Geonet, më shumë se 4,700 persona e kanë ndjerë tërmetin, ndërsa mediat lokale raportojnë për ndodhi të shumta, si objekte që bien nga raftet dhe ndërtesa që lëkunden në mënyrë të dukshme.

Një përdorues i mediave sociale ka postuar: “Gjërat po bien nga raftet tona. Tavolina e jashtme prej druri po kërcen”, duke përshkruar pasojat e goditjes së fuqishme sizmike në zonën e tij. Për fat të mirë, Byroja Kombëtare e Meteorologjisë e Australisë ka konfirmuar se nuk ka pasur kërcënim cunami për kontinentin, ishujt apo territoret e rajonit, duke qetësuar kështu një pjesë të shqetësimeve të ngritura pas ngjarjes.

Zelanda e Re ndodhet në “Unazën e Zjarrit”, një zonë sizmikisht aktive e njohur për aktivitetin e shpeshtë vullkanik dhe sizmik, që rrethon Oqeanin Paqësor, duke e bërë këtë vend një nga më të prekurit nga tërmetet në botë./UBTNews/

 

Bota

Bayrou niset t’ia dorëzojë dorëheqjen Macronit

Published

on

By

Kryeministri i rrëzuar i Francës, François Bayrou, raportohet është nisur drejt Pallatit Elysee për t’ia dorëzuar dorëheqjen presidentit Emmanuel Macron.

Ai dështoi të sigurojë votëbesimin në Parlament të hënën, të cilin e kishte kërkuar vetë, pasi propozimet e tij për shkurtime buxhetore ngjallën pakënaqësi të mëdha.

Qeveria e Bayrou u rrëzua me 364 vota kundër dhe 194 pro, duke shkaktuar një tjetër krizë politike në Francë. Tani, presidenti Macron detyrohet për të katërtën herë brenda një viti të emërojë një kryeministër të ri, në një situatë të rënduar nga polarizimi politik dhe mungesa e një shumice të qëndrueshme në Asamblenë Kombëtare./D.B/EO

Continue Reading

Bota

Finlanda: Koncesionet territoriale ndaj Rusisë nuk do të sjellin paqe

Published

on

By

Finlanda hodhi poshtë të martën çdo koncesion territorial ndaj Rusisë si pjesë e një marrëveshjeje diplomatike për Ukrainën dhe paralajmëroi se veprime të tilla nuk do të sjellin paqe, por përkundrazi do të inkurajojnë “agresionin” e mëtejshëm rus në rajon, shkruan Anadolu.

Ministrja finlandeze e Jashtme, Elina Valtonen, tha në një konferencë vjetore të ambasadorëve në Berlin se sulmet ajrore të fundit të Rusisë mbi Ukrainën – më të ashpra që nga fillimi i luftës – tregojnë qartë se Rusia nuk është gati për një armëpushim, e lëre më për negociata.

Nëse gjatë negociatave do të sakrifikoheshin pjesë të territorit ukrainas ose elemente të sovranitetit të saj, nuk do të zgjidhnim problemin thelbësor, por përkundrazi potencialisht do të thellonim agresionin e Rusisë”, paralajmëroi ministrja.

Presidenti rus Putin po zhvillon luftë hibride në të gjithë Evropën – duke ndikuar në zgjedhje, duke ndërprerë sistemet GPS për trafikun ajror, dhe duke vendosur një flotë të errët në rajonin e Detit Baltik. Problemi me Putin nuk mund të zgjidhet në kurriz të Ukrainës”, shtoi ajo.

Valtonen argumentoi se shtetet perëndimore duhet të ruajnë mbështetjen e fortë për Ukrainën, të kufizojnë strategjikisht ambiciet e Rusisë dhe të ngushtojnë opsionet e Moskës duke vendosur sanksione më të rrepta tregtare dhe ekonomike dhe duke aplikuar takse mbi të gjitha eksportet ruse në tregun e brendshëm të BE-së./D.B/KP

Continue Reading

Bota

Bombardimet e sotme në Gaza, vriten 11 persona, 20 rezultojnë të zhdukur

Published

on

By

Të paktën 11 persona janë vrarë dhe mbi 20 rezultojnë të zhdukur pas sulmeve ajrore izraelite në Rripin e Gazës që nga agimi i ditës së sotme.

Sipas Al Jazeera, sulmet kanë shkaktuar shkatërrime të mëdha dhe rritje të shqetësimeve për gjendjen humanitare në rajon./D.B/EO

Continue Reading

Bota

Humbin jetën të paktën 8 persona pasi Treni përplaset me autobusin në Meksikë

Published

on

Të paktën 8 persona kanë vdekur kur një tren u përplas me një autobus pasagjerësh me dy kate në Meksikë duke lënë të plagosur të paktën edhe 45 të tjerë, tha Mbrojtja Civile e Shtetit të Meksikës.

Aksidenti ndodhi në një autostradë në komunën Atlacomulco, sipas autoriteteve shtetërore, shkruan CNN.

Trafiku është i mbyllur në të dyja drejtimet për të lejuar shërbimet e emergjencës të reagojnë.

Shkaku i përplasjes nuk dihet ende./S.K/KP/CNN/

Continue Reading

Të kërkuara