Kulturë

Yjet e së ardhmes: Shkëlqimi i kinemasë shqiptare në Itali

Published

on

Filmi shqiptar “Yjet e së ardhmes” është shpallur “Filmi më i Mirë Ndërkombëtar” në edicionin e 8-të të Festivalit Ndërkombëtar të Filmit “Castelli Romani” (CRoFFI), i cili u zhvillua nga data 4 deri më 11 tetor në Ariccia, afër Romës. Kjo vlerësim vjen si një njohje e rëndësishme për kinemanë shqiptare dhe përpunimin artistik që ofron ky film.

Me skenar të Uli Bree dhe në regji të Edmond Topit, “Yjet e së ardhmes” shpalos një histori emocionuese që ndjek aventurat e një bande të moshuarish, të quajtur “Robi dhe Trinitrina”, dhe vullnetin e tyre për të jetuar çdo moment të jetës deri në fund, pavarësisht sfidave që u vijnë përballë. Filmi karakterizohet nga një kualitet të lartë artistik, me një ekip të shkëlqyer në përbërje: nga drejtori i fotografisë Leonard Qendro, deri te kompozitori Saimir Çili dhe ekipi i grimit dhe kostumeve i udhëhequr nga Bebeka Alla.

 

Interpretime të paharrueshme vijnë nga emra të njohur të kinematografisë shqiptare, si Tinka Kurti, Reshat Arbana, Margarita Xhepa dhe Luftar Paja, të cilët me mjeshtëri sjellin në jetë karakteret e tyre, duke e bërë audiencën të identifikohet me ndjenjat dhe aspiratat e këtyre protagonistëve të veçantë.

Historia qendrore përqendrohet te Robi, një artist i papërmbushur që përpiqet të bëhet i njohur përmes muzikës. Pas një incidenti në një lokal, ai detyrohet të punojë në një shtëpi për të moshuar, ku fillon një marrëdhënie intriguese me banorët. Dëshira e tij për të formuar një grup muzikor me ta e çon në aventura të papritura dhe komike, për të krijuar një atmosferë të ngrohtë dhe mbështetëse, pavarësisht pengesave që hasin.

Publiku romak u ndjend i emocionuar nga mesazhi i filmit, i cili nxit një reflektim mbi jetën, moshën dhe vlerën e marrëdhënieve njerëzore. Kjo temë universale e bën “Yjet e së ardhmes” një film të veçantë, që arrin të prekë zemrat e të gjithëve, pa marrë parasysh moshën.

Festivali “Castelli Romani”, i njohur për fokusimin në produksionet e pavarura, u zhvillua në mjedise të mrekullueshme, duke ofruar një përvojë unike për adhuruesit e kinemasë. Ceremonia e ndarjes së çmimeve u mbajt në Pallatin dukal të Ariccia, një shembull i shkëlqyer i arkitekturës barokë, i njohur për rolin e tij në historinë e kinemasë italiane. Ky kontekst historik e bënte evenimentin akoma më të veçantë dhe magjepsës.

Konkurrimi përfilmin e shkurtër dhe atë me metrazh të gjatë përfshiu 54 filma nga mbi 15 vende, me një juri të përbërë nga emra të njohur të industrisë kinematografike. Në fund, “Yjet e së ardhmes” doli me sukses si një dëshmi e potencialit të filmit shqiptar në arenën ndërkombëtare, duke sjellë një dritë të re në kinemanë e rajonit dhe duke hapur horizonte të reja për krijuesit e saj./UBTNews/

Continue Reading

Lajmet

54 vjet nga Kongresi i Drejtshkrimit të Gjuhës Shqipe

Published

on

Sot shënohen 54 vjet nga hapja e punimeve të Kongresit të Drejtshkrimit të Gjuhës Shqipe, i cili nisi më 20 nëntor 1972 në Tiranë, me pjesëmarrjen e albanologëve nga të gjitha trevat shqiptare.

Në Kongres morën pjesë 87 delegatë nga Shqipëria, Kosova, Maqedonia e Veriut, Mali i Zi dhe arbëreshët e Italisë.

Qëllimi i këtij tubimi ishte përcaktimi i parimeve dhe drejtimeve kryesore për hartimin e një sistemi të njësuar të drejtshkrimit, me synimin e krijimit të një standardi të përbashkët të gjuhës shqipe.

Në këtë proces, rol të rëndësishëm luajti edhe delegacioni nga Prishtina. Kongresi u parapri nga një takim me rëndësi i mbajtur në Prishtinë, ku ishin diskutuar dhe përcaktuar disa nga standardet gjuhësore.

Kongresi i vitit 1972 shënoi një moment të rëndësishëm në historinë e gjuhës shqipe dhe në përpjekjet për njësimin e saj në të gjitha trevat shqiptare./A.K/

Continue Reading

Lajmet

Reka dhe Çitaku diskutojnë promovimin e filmave kosovarë në garën për Oscar

Published

on

Ambasadori i Kosovës në Shtetet e Bashkuara të Amerikës, Blerim Reka, ka pritur në Konsullatën e Përgjithshme të Kosovës në Nju-Jork, Lum Çitakun, drejtor i Programeve në Qendrën Kinematografike të Kosovës. Në takim është diskutuar promovimi ndërkombëtar i kinematografisë kosovare.

Në fokus të takimit ishte filmi “DUA”, me regji të Blerta Bashollit, i cili po shfaqet këto ditë në Nju-Jork dhe është propozimi zyrtar i Kosovës për edicionin e 99-të të çmimeve Oscar, në kategorinë “Filmi më i mirë ndërkombëtar”.

Në të njëjtën kategori garon edhe filmi “Shame and Money”, me regji të Visar Morinës, i cili, sipas raportimit të Telegrafit, është kualifikuar drejtpërdrejt pas fitimit të çmimit kryesor të jurisë, World Cinema Grand Jury Prize, në Festivalin e Filmit Sundance në janar të këtij viti.

Gjatë takimit, Reka theksoi rëndësinë e mbështetjes institucionale për krijimtarinë filmike dhe promovimin e kulturës së Kosovës në arenën ndërkombëtare. Ai vlerësoi kinematografinë si një nga mënyrat e rëndësishme për përfaqësimin dhe afirmimin e vendit në botë./A.K/

Continue Reading

Lajmet

Vazhdojnë punimet për rinovimin e teatrit ODA në Prishtinë

Published

on

Ministrja e Kulturës, Saranda Bogujevci, ka njoftuar se po vazhdojnë punimet për rinovimin e teatrit ODA në Prishtinë, duke bërë të ditur se kjo hapësirë së shpejti do të jetë e gatshme për artistët dhe publikun.

Përmes një njoftimi, Bogujevci ka theksuar se rinovimi i teatrit ODA është pjesë e investimeve në infrastrukturën teatrore në vend.

Ajo ka përmendur edhe projektet e përfunduara, përfshirë rinovimin e teatrit të qytetit “Muharrem Qena” në Mitrovicë dhe të hapësirave teatrore në Pallatin e Rinisë në Prishtinë, si dhe ndërtimin e Shtëpisë së Kulturës në Suharekë.

Sipas ministres, punimet po vazhdojnë edhe në Teatrin Kombëtar të Kosovës dhe në teatrin “Adriana” në Ferizaj, ndërsa Qendra për Arte në Rahovec ndodhet në fazën përfundimtare të ndërtimit.

Ndërkaq, Teatri i Operës dhe Baletit në Prishtinë është në fazën e fundit të projektimit./A.K/

Continue Reading

Lajmet

“Palimpsest”, projekt artistik që rikthen në vëmendje trashëgiminë muzikore shqiptare

Published

on

Teatri Kombëtar i Operës, Baletit dhe Ansamblit Popullor ka prezantuar projektin artistik “Palimpsest”, i cili synon të rikthejë në vëmendje trashëgiminë muzikore shqiptare të viteve ’30, ’40 dhe ’50.

Përmes krijimeve origjinale dhe përpunimeve të këngëve popullore, projekti sjell vepra të kompozitorëve Antonio Muçi, Karlo Pali, Muharrem Xhediku, Koço Uçi, Ramadan Sokoli dhe Çesk Zadeja.

Në këtë mbrëmje artistike do të interpretojnë Ardita Bufaj në piano, Armando Likaj në bariton dhe Maida Resulbegoviç në soprano, ndërsa e ftuar speciale do të jetë pianistja Norena Gaxha.

Koncepti artistik, hulumtimi arkivor dhe mbledhja e partiturave janë realizuar nga pedagogia Ardita Bufaj.

Projekti organizohet në bashkëpunim me Teatrin Kombëtar të Operës, Baletit dhe Ansamblit Popullor, në kuadër të Festivalit “Netët e Muzikës Shqiptare”, me synimin për të promovuar vlerat e trashëgimisë muzikore dhe për t’i përcjellë ato te brezat e rinj./A.K/

Continue Reading

Të kërkuara