Këngëtarja shqiptare me famë botërore, Dua Lipa, ka publikuar episodin e plotë të podcastit Service95 Book Club, ku zhvillon një bisedë me autoren dhe akademiken shqiptare Lea Ypi për librin e saj të vlerësuar ndërkombëtarisht “Free”, i cili është përzgjedhur si leximi i muajit korrik.

Duke prezantuar librin, Dua Lipa kujtoi se Lea Ypi ishte vetëm 11 vjeçe kur ra komunizmi në Shqipëri dhe se në fëmijëri ajo e kishte parë figurën e liderëve të regjimit përmes këndvështrimit të një fëmije, me një besim të plotë ndaj sistemit të kohës.

Libri “Free” sjell historinë e një Shqipërie të izoluar politikisht, përmes kujtimeve të Ypit nga fëmijëria dhe periudha e tranzicionit pas rënies së komunizmit. Në rrëfim përfshihen edhe momente simbolike të jetës së përditshme, si historia e një kanaçeje Coca-Cola, e cila në atë kohë shihej si një simbol i rrallë i Perëndimit.

Megjithatë, vepra nuk fokusohet vetëm në kujtimet e fëmijërisë, por edhe në sfidat që solli periudha e pas-komunizmit: mbylljen e fabrikave, humbjen e vendeve të punës, ndarjet familjare dhe trazirat shoqërore të tranzicionit.

Gjatë bisedës në podcast, Dua Lipa dhe Lea Ypi trajtojnë tema si historitë familjare të pathëna, mbikëqyrja shtetërore, protestat, ndryshimet politike dhe ndikimi i sistemeve shoqërore në jetën e njerëzve.

“Free më zbuloi gjëra për një vend që e njoh dhe e dua shumë. Historia është kaq e afërt, por përvoja e jetuar ka ndryshuar kaq shumë brenda vetëm një brezi”, ka shkruar Dua Lipa.

Përzgjedhja e librit “Free” në Service95 Book Club ka rikthyer vëmendjen ndërkombëtare te një rrëfim shqiptar që përmes historisë personale ngre një pyetje universale: çfarë do të thotë në të vërtetë të jesh i lirë?/A.K/

Aktori i njohur Tom Cruise ka befasuar fansat me transformimin e tij të plotë në filmin e ri “Digger”, duke nxitur diskutime se ky rol mund t’i sjellë atij çmimin e parë Oscar.

Cruise, 64 vjeç, interpreton miliarderin e industrisë së naftës, Digger Rockwell, një personazh që përpiqet të shpëtojë njerëzimin nga një katastrofë mjedisore të cilën vetë e ka shkaktuar.

Për këtë rol, aktori është shndërruar përmes protezave në fytyrë dhe trup, duke u paraqitur më i moshuar, me peshë të shtuar dhe me flokë të thinjura, një pamje krejt ndryshe nga rolet aksion që e kanë bërë të famshëm.

Pas publikimit të trailerit të parë, rrjetet sociale u mbushën me reagime nga fansat, të cilët vlerësuan transformimin dhe interpretimin e tij.

“Tom Cruise duket krejtësisht i panjohshëm. Zëri, mënyra e interpretimit dhe prania në ekran janë krejt ndryshe”, shkroi një komentues.

Të tjerë theksuan se aktori ka marrë një sfidë të re, duke lënë pas rolet e mbushura me aksion dhe duke u fokusuar në një paraqitje më dramatike.

Filmi “Digger” pritet të jetë një nga projektet më të diskutuara të Cruise, ndërsa performanca e tij tashmë ka nisur të përmendet si një nga rolet që mund ta afrojë me garën për një çmim prestigjioz të kinemasë./A.K/

Rina Lipa, motra më e vogël e këngëtares Dua Lipa, ka nisur një bashkëpunim të ri me gjigantin e modës online ASOS, i cili ka publikuar një seri fotografish ku modelja dhe kërcimtarja prezanton kombinime të ndryshme veshjesh.

25-vjeçarja, e cilësuar më parë si një nga “Gen Z It Girls”, vazhdon të tërheqë vëmendjen në botën e modës, ndërsa në kuadër të këtij bashkëpunimi do të mbajë rolin e Drejtoreshës Kreative për Dilemat e Stilit.

Në këtë rol, Rina do t’i ndihmojë ndjekësit të zgjidhin dilemat e përditshme të stilit përmes përmbajtjeve që do të publikohen në TikTok dhe Instagram, duke ofruar ide dhe kombinime të ndryshme mode.

“Drejtoresha jonë e Dilemave të Stilit sapo zbuloi vendin që ka të gjitha përgjigjet. Gardëroba juaj e verës tashmë është gati, e stiluar nga @rinalipa”, thuhet në postimin e ASOS.

Rina pason influenceren irlandeze Olivia O’Neill, e njohur si Out of Office Director e ASOS, e cila ia dorëzon simbolikisht rolin në videon promovuese të bashkëpunimit.

Në fotografitë e publikuara, Rina shfaqet me disa kombinime elegante verore. Në njërën prej tyre ajo vesh një fustan mini me grep në ngjyrë të verdhë, të zbukuruar me thekë argjendi, ndërsa në një tjetër paraqitet me një fustan mini ngjyrë argjendi, të kombinuar me këpucë të zeza dhe flokët e lëshuara.

Në një stil më casual, ajo pozon me një bluzë kafe me lidhje pas qafe, pantallona të shkurtra xhins dhe atlete Nike.

Përzgjedhja e Rinës për këtë rol nuk vjen rastësisht. Revista Tatler e ka cilësuar më parë si një nga emrat më premtues të brezit të ri në modë, ndërsa gjatë karrierës së saj ka modeluar për Red Valentino, ka bashkëpunuar me Nasty Gal dhe së fundmi ka siguruar edhe rolin e saj të parë të rëndësishëm në një film horror./A.K/

Filmi biografik “Michael”, i bazuar në jetën e legjendës së muzikës Michael Jackson, është bërë filmi më i suksesshëm në historinë e studios Lionsgate, duke kaluar shifrën e 1 miliard dollarëve në arkëtimet globale (rreth 876 milionë euro).

Me këtë rezultat, “Michael” është filmi i parë i Lionsgate që arrin këtë sukses, duke lënë pas rekordet e mëparshme të “The Hunger Games: Catching Fire” dhe “The Twilight Saga: Breaking Dawn – Part 2”.

Lionsgate ka prodhuar filmin dhe është kujdesur për shpërndarjen në Amerikën e Veriut, ndërsa Universal Pictures ka realizuar shpërndarjen ndërkombëtare.

Presidenti i Lionsgate Motion Picture Group, Adam Fogelson, tha se publiku e ka përqafuar filmin që nga dita e parë, duke e kthyer atë në një fenomen kulturor global dhe duke dëshmuar popullaritetin e vazhdueshëm të Michael Jackson.

“Michael” është një nga filmat e paktë që kanë kaluar kufirin e 1 miliard dollarëve në vitin 2026. Para tij, këtë sukses e kishte arritur vetëm “Super Mario Galaxy Movie”, ndërsa “Toy Story 5” pritet t’i bashkohet këtij grupi, pasi deri më tani ka arkëtuar rreth 770 milionë euro.

Filmi është drejtuar nga Antoine Fuqua dhe rrëfen jetën e Michael Jackson, nga ditët me grupin Jackson 5 deri në ngritjen e tij si “Mbreti i Popit”. Rolin kryesor e interpreton Jaafar Jackson, kushëriri i artistit, ndërsa Colman Domingo dhe Nia Long luajnë rolet e prindërve të tij, Joe dhe Katherine Jackson.

Sipas raportimeve, Lionsgate po shqyrton realizimin e të paktën edhe një filmi tjetër të bazuar në jetën e Michael Jackson./A.K/