Kompania e Elon Musk e cila synon të vendosë çipet kompjuterike në trurin e njeriut, Neuralink, ka marrë aprovimin e autoriteteve amerikane për lansimin e studimit të parë te njeriu.

Një gjë e tillë i ka hapur rrugë vendosjes së pajisjeve nga Neuralink te njeriu dhe lajmi vjen pasi Elon Musk pretendoi gjatë muajit nëntor se kompania e tij është vetëm gjashtë muaj larg nga testimi i parë.

Por kush do të ishte i gatshëm të pranonte vendosjen e një pajisje të tillë në trurin e tij? A do të jetë dikush që ka një gjendje shëndetësore prej së cilës do të kishte përfitime nëse vendos një çip nga Neuralink?

Kompania është akuzuar vazhdimisht se ka abuzuar me testet e bëra te majmunët, akuza që kompania vazhdimisht i mohon dhe aktualisht është nën hetime.

Administrata Amerikane e Ushqimit dhe Barnave (FDA) refuzoi kërkesën e parë të Neuralink në fillim të 2022 për testime te njeriu. Por nuk është kompania e parë që e pretendon të bëjë një gjë të tillë. Synchron u aprovua nga FDA për të nisur testimet në vitin 2021 dhe korrikun e vitit të kaluar zbuloi implantin e parë kompjuterik./PCWorld Albanian

Meta Platforms vazhdoi me raundin e fundit të largimeve nga puna, tha një burim i njohur me çështjen, si pjesë e një plani që u shpall gjatë muajit mars nga kompania.

Gjatë muajit mars, Meta u bë kompania e parë Big Tech që njoftoi një raund të dytë pushimesh masive nga puna.

Shefi Ekzekutiv i Metas, Mark Zuckerberg tha gjatë muajit mars se pjesa më e madhe e pushimeve nga puna në raundin e dytë të kompanisë do të ndodhin në tri “momente” gjatë disa muajve, kryesisht duke përfunduar në maj./UBTNews/

Pronari i WhatsApp, Instagram dhe Facebook është dënuar me një gjobë rekord prej 1.2 miliard eurosh nga rregullatori irlandez për mbrojtjen e të dhënave.

Është gjoba më e madhe e vendosur ndonjëherë për shkelje të rregulloreve të përgjithshme për mbrojtjen e të dhënave (GDPR), të cilat kërkojnë lejen e mbajtësit të të dhënave përpara se të përdorin informacionin e tyre personal.

Meta është gjobitur për transferimin e të dhënave të përdoruesve të BE-së në Shtetet e Bashkuara për përpunim, pavarësisht vendimit të vitit 2020 të dhënë nga gjykata më e lartë e BE-së, duke thënë se të dhënat nuk ishin mjaftueshëm të mbrojtura nga agjencitë amerikane të spiunazhit.

Facebook është urdhëruar të ndalojë praktikën dhe iu është dhënë të paktën pesë muaj për të pezulluar transferimet e ardhshme dhe gjashtë muaj për të ndaluar përpunimin dhe ruajtjen e paligjshme të të dhënave në SHBA. Instagram dhe WhatsApp nuk i nënshtrohen porosisë.

Çështja ka vazhduar për një dekadë pasi aktivisti i privatësisë Max Schrems nxiti procedura ligjore në vitin 2013 kundër Facebook, tani e quajtur Meta./UBTNews/

Montana është bërë shteti i parë amerikan që e ka ndaluar aplikacionin kinez të videove të shkurtra, TikTok.

Guvernatori i Montanas, Greg Gianforte, e ka nënshkruar dokumentin në ligj, të mërkurën.

“Për të mbrojtur banorët e Montanas, të dhënat personale dhe private nga Partia Komuniste Kineze, e kam ndaluar TikTok-un në Montana”, ka thënë Gianforte, pas nënshkrimit të ligjit.

Vendimi i ri ua ndalon kompanive ofrimin e këtij aplikacioni nga 1 janari i vitit të ardhshëm, si dhe e parandalon TikTok-un nga operimi si biznes në shtet.

Për secilën ditë që kjo platformë do të jetë e qasshme, pas fuqizimit të ligjit, ofruesit e aplikacionit do të duhet të paguajnë gjobë prej 10.000 dollarëve.

Përdoruesit nuk do të gjobiten, dhe ata që e kanë përdorur aplikacionin në të kaluarën nuk do të preken nga vendimi.

TikTok-u nuk ka reaguar ende ndaj këtij ndryshimi ligjor.

Në ditët në vijim pritet të ketë ankesa ose padi që sfidojnë këtë vendim, me arsyetimet e lirisë së shprehjes.

Në pronësi të kompanisë kineze, ByteDance, TikTok veçse është ndaluar në pajisjet qeveritare të Kanadasë, Australisë, Zelandës së Re, Britanisë, dhe Shteteve të Bashkuara.

Të gjitha këto shtete i kanë përmendur shqetësimet për sigurinë kibernetike, si arsye për vënie të ndalesës.

Aplikacioni ka më shumë se një miliard përdorues në gjithë botën, dhe përdoret gjerësisht në SHBA dhe Evropë.

Ekzistojnë shqetësime se autoritetet kineze dhe shërbimet sekrete, mund ta përdorin aplikacionin për të mbledhur informacion nga përdoruesit, dhe të përhapin më pas ndikim.

Kompania, në anën tjetër, i ka hedhur poshtë këto sugjerime./REL