Krerët e shtetit kanë bërë homazhe në Kompleksin Memorial “Adem Jashari” në shënim të Epopesë së lavdishme të Ushtrisë Çlirimtare të Kosovës. Ata nderuan sakrificën e familjes Jashari për liri dhe pavarësi.

Presidentja e vendit, Vjosa Osmani tha se sakrifica, trimëria dhe guximi i pashoq i kësaj familje, ka bërë që kulla e Jasharëve të shndërrohet në simbol të një kalaje të lirisë “e cila edhe sot mbron pavarësinë dhe sovranitetin e vendit tonë”.

Vjosa Osmani u shpreh se nga Prekazi, brezat e ri inspirohen për rrugën përpara drejt mbrojtjen e lirisë së arritur me sakrificë dhe gjak.

“Sot, sikurse çdo vit, përkujtojmë Epopenë të Ushtrisë Çlirimtare të Kosovës e cila i dedikohet përkujtimit tonë të përbashkët në këtë kohë lirie, për secilin dëshmor, për secilin hero, secilin martir që ka dhënë jetën për Kosovë. Por, mbi të gjitha i kushtohet sakrificës, guximit dhe trimërisë së pashoq të treguar nga familja Jashari me 5, 6 dhe 7 mars të vitit 1998, në krye me legjendarin Adem Jashari. Ata luftuan shumë më gjatë sesa përgjatë viteve të luftës duke u shndërruar kështu në emblemë të UÇK -së. Dhe njëkohësisht duke i shndërruar kullat e Jasharëve në simbol të një kalaje të lirisë e cila edhe sot e mbron Kosovën, lirinë, pavarësinë dhe sovranitetin e saj. Nga këtu jo vetëm ne që e përjetuam luftën, por edhe brezat e ri edhe fëmijët tanë inspirohen për rrugën përpara për mbrojtjen e lirisë së arritur me sakrificë dhe gjak. Por, mbi të gjitha na përkujtohet secilit se sa i lartë ka qenë çmimi i paguar për lirinë tonë. Asnjëherë nuk duhet të harrojmë, asnjëherë nuk të devijomë nga rruga e shtruar nga kjo sakrificë e heronjve, dëshmorëve dhe martirëve”, tha Osmani.

Kryetari i Kuvendit, Glauk Konjufca tha se familja Jashari është krijuese e Ushtrisë Çlirimtare të Kosovës. Ai shtoi se “si popull i detyrohemi më së shumti për lirinë dhe çlirimin e Kosovës, familjes Jashari”.

“Familja Jashari është krijuese e Ushtrisë Çlirimtare të Kosovës. Është esenca e UÇK -së. Po ashtu e ka bërë edhe aktin më të lartë, më sublim, të sakrificës për lirinë e vendit tonë. Ata si familje e kanë pasur të mishëruar në zemrat dhe në shpirtin e tyre një të vërtetë e cila e ka shpëtuar popullin e Kosovës. E kjo e vërtetë është se liria nuk fitohet pa armë në dorë, duke luftuar me armë në dorë dhe nuk fitohet pa i dhënë dëshmorët e vetë. Kështu veproi familja Jashari dhe për këtë arsye ne si komb, si popull i detyrohemi më së shumti për lirinë dhe çlirimin e Kosovës, familjes Jashari”, tha Konjufca.

Kryeministri në detyrë, Albin Kurti tha se Epopeja e Ushtrisë Çlirimtare të Kosovës i dha një hov të pandalshëm kryengritjes së armatosur dhe luftës çlirimtare.

“Tre breza të Jasharëve, 59 veta gjithsej, rreth gjysma gra e fëmijë, u flijuan me 5, 6 dhe 7 mars të vitit 1998 për çlirimin e Kosovës, për lirinë, pavarësinë dhe bashkimin. Epopeja e UÇK -së i dha një hov të pandalshëm kryengritjes së armatosur dhe luftës çlirimtare. Shpërthyen demonstratat gjithë popullore dhe solidariteti i parë historikisht ndërmjet shqiptarëve në Ballkan por gjithandej në mërgatë. Njëkohësisht edhe u vetëdijesua e ndërgjegjësua edhe publiku kundërkombëtar dhe diplomacia botërore. Sot, baca Shaban do të ishte 100 vjeç, e sivjet Hamza do të bëhej 75 vjeç e Ademi 70 vjeç. Ata nuk i kemi më fizikisht por ata kanë vetëm ditëlindje. E kanë 2 prillin, 19 prillin dhe 28 nëntorin. Ndërkaq, vdekja e tyre, rënia e tyre heroike është Epopeja e UÇK -së”, u shpreh Kurti.

Jasharët, zhvilluan rezistencë më 5, 6 dhe 7 mars, ku u përballën me forcat serbe, më 1998. Ai ishte sulmi i tretë ndaj tyre por që mori jetën e 55 personave – 22 prej të cilëve ishin të familjes së ngushtë të Adem Jasharit.

Pesë, gjashtë dhe shtatë marsi shënon Epopenë e Ushtrisë Çlirimtare të Kosovës – manifestim që mbledh në Prekaz qytetarë, organizata e përfaqësues të institucionev

Me rastin e Epopesë së Ushtrisë Çlirimtare të Kosovës, përfaqësues të Organizatës së Veteranëve të Luftës së UÇK-së, kanë bërë homazhe në Kompleksin Memorial “Adem Jashari” në Prekaz.

Kryetari i Shoqatës së Familjeve të Dëshmorëve, Xhavit Jashari bëri kërkesë tek institucionet që luftës së UÇK-së t’i jepet vendi meritor. Sipas tij, qeveria duhet të respektojë rrugën e bërjes së lirisë.

Jashari para mediave tha se arsyeja pse nuk kanë bashkëpunuar me Qeverinë e Kosovës për shënimin e Epopesë është se “ky institucion ka njerëz anti-UÇK”.

“I nderojmë dhe i respektojmë të gjithë të gjithë dëshmorët, të pandalshëm edhe të periudhave kohore të historisë sonë të lavdishme, në përgjithësi, por në veçanti të luftës së lavdishme të Ushtrisë Çlirimtare të Kosovës. Duke i nderuar, duke i respektuar bëjmë kërkesë tek institucionet që secilës veprimtari, secilës luftë, përpjekje në përgjithësi, por në veçanti të luftës së UÇK -së t’i jepet vendi meritor. Kërkesë tjetër është që këto institucione sidomos në tri ulëset, kryetari i parlamentit, qeveria të respektojnë rrugën e bërjes së lirisë, sepse duke respektuar rrugën e bërjes së lirisë, duke respektuar të gjithë ata që kanë dhënë diçka për të ardhur deri këtu qëndrojmë mirë dhe ecim bindshëm në rrugën dhe amanetin e dëshmorëve. Përveç lirisë dhe çlirim, kishin synim edhe bashkimin…Arsyeja pse nuk jemi bashkë në shënimin e epopesë së UÇK-së është sepse ne si organizata kemi menduar dhe kemi vepruar që mos t’i fyejmë dëshmorët…Por brenda kësaj qeverie ka njerëz anti-UÇK që e kanë thyer luftën”, tha Jashari.

Bashkë me OVL-UÇK -në, homazhe kanë bërë edhe përfaqësues të Organizatës së Veteranëve nga Shkodra.

Përfaqësuesi i kësaj organizate, Zamir Llozani tha se heroizmi i familjes Jashari është i pashembullt.

Ai u shpreh se sakrifica e familjes Jashari është një ngjarje që do t’i bëjë gjithmonë krenar pasardhësit e kombit shqiptar.

“Vijmë nga qyteti i Shkodrës, përfaqësues të organizatës të veteranëve dhe pasardhësve dhe të qytetit të Shkodrës për të qenë të pranishëm në këtë ngjarje të madhe, në këtë epope. Është një ngjarje e pashembullt, është një heroizëm i pa shembull, që në të gjithë kombet edhe të shtetit të Evropës nuk mund të haset një ngjarje e tillë, të flijimit të 59 heronjve të kombit tonë nga një familje. Është një ngjarje që na bënë dhe do të na bëjë tërë jetën tonë krenar sepse jemi pasardhëse të kësaj gjenerate, të kësaj AND-je, që janë përfaqësuesit më dinjitoz të kombit shqiptar”, tha Llozani.

5,6 dhe 7 marsi njihet si Epopeja e Ushtrisë Çlirimtare të Kosovës, ku u vranë 59 anëtarë të familjes Jashari pas rezistencës tri ditore.

Një simbol me emrat e 1432 fëmijëve të vrarë gjatë luftës në Kosovë është vendosur sot në Prekaz, duke shërbyer si një kujtesë e dhimbshme për tragjedinë dhe padrejtësinë e pësuar.

Fëmijët, ëndrrat e të cilëve u ndërprenë në gjysmë, mbeten një plagë e hapur për familjet dhe shoqërinë kosovare. Drejtësia për ta ende nuk është arritur, ndërsa kujtimi për ta mbetet i paharruar.

Nxënës të shkollave fillore nga mbarë Kosova kanë vizituar sot Prekazin dhe këtë simbol, duke lexuar me dhembshuri emrat e moshatarëve të tyre, të cilët nuk patën mundësinë të rriten, të mësojnë e të ndërtojnë të ardhmen e tyre.