Personat që vërtetohet se kanë cenuar vullnetin e qytetarëve në zgjedhjet e 28 janarit 2025 mund të dënohen nga 3 deri në 5 vjet. Kështu thonë njohësit e çështjeve juridike të cilët theksojnë se falsifikimi i rezultatit zgjedhor përbën vepër të rëndë penale, raporton KosovaPress.

Sipas tyre manipulimi i votave e ka cenuar integritetin zgjedhor, prandaj kërkojnë edhe rinumërim të plotë.

Hulumtuesi në Institutin e Kosovës për Drejtësi, Gëzim Shala, i ka cilësuar manipulimet me vota si një nga skandalet më të mëdha që ka cenuar integritetin e procesit zgjedhor në Kosovë.

Ai thekson se falsifikimi i rezultateve zgjedhore është vepër penale e sanksionuar qartë me ligj, ku dënimi parashihet deri në tre vjet burg, ndërsa në rastet e rënda apo të kualifikuara mund të arrijë deri në pesë vjet burg.

“Në raport me falsifikimin e rezultatit zgjedhor, përcakton dënueshmërinë prej tre vite dhe forma e kualifikuar e saj është pesë vite. Definitivisht se kjo çfarë ka ndodhur është një prej skandaleve më të mëdha në kuptim të procesit të integritetit të zgjedhjeve që pas zgjedhjeve të vitit 2000 e 2010. Dhe në rastin konkret definitivisht se duhet të ketë veprim të prokurorit. Do të thotë nuk mund të lidhemi në numra të caktuar. Modus operandi apo mënyra e veprimit është e njëjta tek të gjitha partitë politike ku gjinden këto, këto gabime”,deklaroi ai.

Shala ka kritikuar ashpër mungesën e reagimit proaktiv të Prokurorisë së Shtetit, duke theksuar se ajo zakonisht vepron vetëm pasi rasti bëhet publik dhe merr vëmendjen e gjerë të opinionit.

“Prokuroria duhet të veprojë. Fatkeqësia në Kosovë është se prokuroria nuk reagon në mënyrë proaktive, mirëpo vetëm kur të merr vesh, do të thotë krejt Kosova se ka ndodhur diçka, atëherë aktivizohet edhe prokuroria. Dhe definitivisht se prokuroria duhet të aktivizohet në këtë drejtim për të, ëh, për të hetuar, do të thotë si komisionerët, si vëzhguesit, si kandidatët nëse kanë pasur gisht në këtë drejtim e të gjitha çështjet e tjera për t’i hetuar në kuptim të ekzistimit apo mos ekzistimit të përgjegjësisë penale. Laura Pula, do të thotë prokurore, është koordinatore kombëtare lidhur me procesin e zgjedhjeve dhe që definitivisht ajo duhet të ketë guxim profesional që nuk e kemi parë deri më tani dhe të dalë në konferencë për media dhe të tregojë se cilat janë gjetjet, cilat janë situatat dhe çfarë do të bëjë prokurori i shtetit me këtë situate”, tha ai.

Vullnet Bugaqku nga Instituti Demokratik i Kosovës deklaron se manipulimi i votave është dukuri e papranueshme dhe cenon rëndë integritetin zgjedhor.

Sipas Bugaqkut, veprime të tilla janë të ndëshkueshme me ligj dhe kërkojnë reagim të menjëhershëm nga institucionet përgjegjëse.

“Absolutisht është një dukuri e kundërligjshme, e papranueshme. Kjo për faktin se mund ta lëndojë dhe mund ta cenojë rëndë integritetin zgjedhor në vend, ose më mirë të themi integritetin e zgjedhjeve në vend, për shkak se Kosova siç e dini shquhet si një vend që organizon procese zgjedhore mjaft të qeta, kredibile, ku rezultatet pranohen nga ana e subjekteve politike. Megjithatë, ka një kohë të gjatë që pasi të përfundojë dita e votimit fillojnë disa probleme sa i përket numërimit të votave, qoftë të partive apo qoftë edhe të kandidatëve për deputetë”, u shpreh ai.

Bugaqku ka kërkuar rinumërim të plotë të votave, duke u bazuar në parregullsitë e evidentuara gjatë procesit aktual të verifikimit.

“Kemi kërkuar që të ketë rinumërim të plotë për faktin se nga 40% që po numërohen tani të vendvotimeve të tërësishme të Kosovës, po vërehet që ka mospërputhje dhe diskrepancë të madhe mes votave të numëruara në KQZ dhe atyre që po verifikohen tani në QNR. Prandaj, mendojmë që është e udhës që të paktën të ketë një transparencë, një qartësi dhe vullneti i qytetarëve të shkojë në vendin e duhur, aty ku ata kanë shprehur në ditën e zgjedhjeve dhe assesi që kjo të mbetet në dorën dhe vullnetin e komisionerëve të KQZ-së”, u shpreh Bugaqku.

Ndërsa, zëdhënësi i KQZ-së, Valmir Elezi ka deklaruar për KosovaPress se varësisht nga gjetjet gjatë rinumërimit në këto 28 komuna, KQZ mund të marrë vendim të ri për rinumërim të vendvotimeve të tjera.

Gjatë ditës së djeshme, Prokurori Themelore e Prizrenit ka reaguar duke theksuar se Kryeprokurori i Prokurorisë Themelore në Prizren, Petrit Kryeziu, me vetiniciative ka lëshuar autorizim me shkrim për Policinë e Kosovës që të identifikojnë personat përgjegjës, të sigurojnë prova relevante, përfshirë procesverbalet dhe nënshkrimet që ndërlidhen me procesin e rinumërimit të rezultateve zgjedhore në këtë komunë.

“Prokuroria Themelore në Prizren, njofton opinionin publik se, si institucion i Prokurorit të Shtetit, ka monitoruar nga jashtë procesin e rinumërimit të rezultateve zgjedhore.Tani që rinumërimi po i afrohet fundit, janë evidentuar keqpërdorime të dukshme të votave gjatë numërimit brenda subjekteve politike në rajonin e Prizrenit. Në këtë drejtim, sot, Kryeprokurori i Prokurorisë Themelore në Prizren, Petrit Kryeziu, me vetiniciative ka lëshuar autorizim me shkrim për Policinë e Kosovës që të identifikojnë personat përgjegjës, të sigurojnë prova relevante, përfshirë procesverbalet dhe nënshkrimet. Manipulimi i votës dhe falsifikimi i dokumenteve zgjedhore janë krim dhe do të ndëshkohen pa kompromis”, kanë deklaruar nga Prokuroria Themelore e Prizrenit.

Pas rinumërimit të votave në 10 komuna, Prizreni del komuna me mospërputhjet më të mëdha të votave. Manipulimi i votës ka ndodhur kryesisht brenda listës zgjedhore të një partie. Rinumërim të 100% të votave pati edhe Dragash, Kaçanik, Lespoaviq, Skënderaj, Shtime, Ferizaj, Vushtrri, Mamushë dhe Ranillug, ndërsa 10% e votave u rinumëruan edhe në 28 komuna të tjera si: Deçan, Gjakovë, Gllogoc, Gjilan, Istog, Klinë, Fushë Kosovë, Kamenicë, Mitrovicë e Jugut, Lipjan, Novobërdë, Obiliq, Rahovec, Pejë, Podujevë, Prishtinë, Shtërpcë, Suharekë, Viti, Zubin Potok, Zveçan, Malishevë, Junik, Hani i Elezit, Graçanicë, Partesh, Kllokot dhe Mitrovicë e Veriut.

Deri në orën 11:00 të ditës së hënë janë rinumëruar 559 vendvotime nga gjithsej914 vendvotime që janë në rinumërim.

Presidentja e Kosovës, Vjosa Osmani ka shprehur ngushëllimet e saj për humbjen e të paktën 39 viktimave nga aksidenti hekurudhor në Spanjë.

“Shpreh ngushëllimet tona më të sinqerta për familjet që kanë humbur më të dashurit e tyre dhe u dëshirojmë shërim të shpejtë të gjithë të lënduarve. Kosova qëndron në solidaritet me popullin e Spanjës në këtë kohë të vështirë”, ka shkruar ajo në platformën “X”.

Të paktën 39 persona kanë humbur jetën në një përplasje trenash në jug të Spanjës dhe dhjetëra të tjerë janë plagosur në aksidentin më të rëndë hekurudhor të vendit në më shumë se një dekadë, njoftoi Garda Civile e Spanjës.

Vagonët e një treni që po udhëtonte drejt Madridit dolën nga shinat dhe kaluan në binarët e kundërt, duke u përplasur me një tren që po vinte përballë në Adamuz, të dielën në mbrëmje.

Sipas rrjeteve hekurudhore, në të dy trenat ndodheshin rreth 400 pasagjerë dhe anëtarë të stafit. Shërbimet e emergjencës trajtuan 122 persona, ndërsa 48 prej tyre, përfshirë pesë fëmijë, ndodhen ende në spital. Nga këta, 11 të rritur dhe një fëmijë janë në gjendje intensive.

Prokuroria e Prishtinës e ka konfirmuar se është duke u zhvilluar një aksion ndaj katër personave, dy prej tyre zyrtarë të Ministrisë së Punëve të Brendshme, për keqpërdorim të detyrës zyrtare dhe dy të tjerëve për pranim ryshfeti në sektorin privat.

Kallxo.com merr vesh se dy persona të kompanisë së armëve “Reload” po dyshohen për pranim ryshfeti ndërsa nga informacione brenda Policisë ka mësuar edhe emrat e të dyshuarve në MPB.B.H dhe S.B janë dy personat që aktualisht janë duke u intervistuar ndërsa ende nuk ka vendim për ndalim.

Të dy janë zyrtarë në Departamentin e Armëve në MPB.

“Pa pasë diçka konkrete, hala ne nuk kemi as vizita as kurgjo, pa pasë diçka konkrete nuk mundemi me deklaru kurgjo. Nuk kem kurgjo konkrete, nuk e dimë as për çka është t’u u bo fjalë, veç përmes gazetave e kemi pa”, thanë përmes telefonit nga Reload SH.P.K.

Ndaj katër personave, dy zyrtarëve në Ministrinë e Punëve të Brendshme po ndërmerren veprime hetimore për keqpërdorim të detyrës apo autoritetit zyrtar e dy të tjerëve për pranim ryshfeti në sektorin privat.

Prokuroria Themelore e Prishtinës ka autorizuar policinë për të kryer një aksion policor i cili prek edhe Ministrinë e Punëve të Brendshme.“Konfirmojmë se është duke u zhvilluar një aksion ndaj dy personave për veprën penale “Keqpërdorim i pozitës apo autoritetit zyrtar” ne baze te nenit 414 par.1 te Kodit Penal te Republikës se Kosovës, si dhe dy persona te tjerë për veprën penale “Pranimi i ryshfetit ne sektorin privat” ne baze te nenit 309 te KPRK-se. Për me shume detaje ju njoftojmë me kohe”, thuhet në përgjigjen e zëdhënëses së Prokurorisë së Prishtinës, Kaltrina Shala.

Policia e Shtetit shqiptar njoftoi se ka arrestuar dy persona, banues në Tiranë, pasi ishin shpallur në kërkim nga Misioni i OKB-së në Kosovë, UNMIK, të akuzuar për trafikim të qenieve njerëzore.

“Në qytetin e Tiranës, u bë kapja dhe ndalimi i shtetasve R. B. dhe G. H., banues në Tiranë. Këta dy shtetas ishin të shpallur në kërkim ndërkombëtar, pasi Përfaqësuesi Special i Sekretarit të Përgjithshëm të UNMIK/Kosovë, më datë 13.01.2026, ka lëshuar urdhër arresti ndërkombëtar për këta dy shtetas, si të dyshuar për kryerjen e veprave penale “Pjesëmarrje ose organizim i grupit të strukturuar kriminal”, në fushën e trafikimit të qenieve njerëzore, parashikuar nga Kodi Penal i Kosovës”, tha policia.

Shtetasit u ndaluan me qëllim ekstradimin drejt autoriteteve të Kosovës. Vijon puna për finalizimin e procedurës së ekstradimit të këtyre shtetasve drejt Kosovës.