Lajmet

Vitia: Deri më 17 tetor fokusi im do të jetë në Ministrinë e Shëndetësisë

Published

5 years ago

August 20, 2021

UBT news

Ministri i Shëndetësisë, Arben Vitia pret që Kosova të tregojë rezultate të mira në luftën me pandeminë deri në tetor të këtij viti, koha kur ai synon të dalë në krye të Komunës së Prishtinës.

Vitia, i cili është kandidati i Lëvizjes Vetëvendosje për të parin e kryeqytetit, ka thënë se 17 tetori nuk do ta gjejë në krye të Ministrisë së Shëndetësisë, por që deri atëherë do të bëjë maksimumin për menaxhimin e pandemisë.

Edhe pse synon t’i futet garës për kryetar të Prishtinës, Arben Vitia ka thënë se aktualisht fokusin e ka në Ministrinë e Shëndetësisë.

“Unë jam në Ministrinë e Shëndetësisë dhe i gjithë fokusi im është në Mistrinë e Shëndetësisë dhe i gjithë fokusi im do të jetë në Ministrinë e Shëndetësisë derisa të jenë rezultatet e mira në raport me pandeminë. Ta keni parasysh që 17 tetori natyrisht që nuk do të më gjejë si ministër të Shëndetësisë, por deri në atë kohë do ta bëjë maksimumin ashtu siç jam duke bërë tani”, ka thënë Vitia.

Lidhur me procesin e vaksinimit, ministri i Shëndetësisë ka thënë se pritet që të shtohen ekipet edhe nëpër komunat e tjera të Kosovës.

“Procesi i vaksinimit po shkon mirë, komunat kanë shprehur gatishmërinë për të shtuar numrin e ekipeve të vaksinimit, por natyrisht për shkak edhe të logjistikës, për shkak edhe të sistemit të regjistrimit e-kosova, kjo po shkon në bashkëpunim me Ministrinë e Shëndetësisë dhe natyrisht që kjo merr kohë, mirëpo me ritmin qysh jemi duke u vaksinuar tani dhe me interesimin e qytetarëve, ky procesi vaksinimit mund të them që është më i shpejti për momentin, jo vetëm në rajon por edhe vende të tjera”, ka thënë ai.

Ndërsa për tollovitë e krijuara para qendrave të vaksinimit, Vitia ka thënë se situate do të menaxhohet në bashkëpunim me Policinë e Kosovës e cila do të sigurohet që të mbahet rendi.

“Kemi folur dhe jemi në kontakt vazhdimisht me Ministrinë e punëve të Brendshme, aty do të jenë edhe forca policore në mënyrë që ta mbahet rendi, në të njëjtën kohë apeloj të qytetarët që bëjnë termin sepse kjo është mënyrë më e mirë për të shmangur tollovitë dhe mënyra më e mirë për t’u administruar dhe regjistruar në sistem ata që e marrin vaksinën”, ka thënë Vitia.

Edhe njëherë ai theksoi se nga nesërm qytetarët do të mund të vaksinohen edhe ditën e shtunë.

Lajmet

Plenkoviq nga OKB-ja kritikon Serbinë: Glorifikimi institucional i Mlladiqit, fyerje ndaj viktimave

Published

2 minutes ago

September 23, 2026

UBTNews

Kryeministri i Kroacisë, Andrej Plenkoviq, gjatë fjalimit të tij në Asamblenë e Përgjithshme të OKB-së, ka dënuar ashpër nderimet zyrtare që Serbia po i bën të dënuarit për krime lufte, Ratko Mlladiq. Plenkoviq i cilësoi këto veprime si fyerje të drejtpërdrejtë ndaj viktimave dhe vendimeve të gjykatave ndërkombëtare, duke nënvizuar se pajtimi në Evropë kërkon përballje reale me të kaluarën dhe ndaljen e lartësimit të kriminelëve nga ana e institucioneve.

“Pajtimi në Evropë kërkon përballjen me krimet e së kaluarës, respektimin e viktimave dhe refuzimin e glorifikimit institucional të autorëve të krimeve”, deklaroi Plenkoviq para përfaqësuesve botërorë.

Kreu i qeverisë kroate rikujtoi sulmet e urdhëruara nga Mlladiqi mbi qytetet kroate, vrasjet e civilëve dhe shkatërrimin e infrastrukturës e trashëgimisë kulturore, duke theksuar se këto mizori kulmuan me gjenocidin e Srebrenicës në vitin 1995. Mlladiq u dënua me burgim të përjetshëm nga Gjykata e Hagës për gjenocid, krime lufte dhe krime kundër njerëzimit gjatë konfliktit në Bosnje-Hercegovinë.

Gjatë fjalimit të tij në Nju Jork, Plenkoviq u ndal edhe te situata në Lindjen e Mesme, ku bëri thirrje për zbatimin e standardeve ndërkombëtare për mbrojtjen e civilëve dhe garantimin e ndihmës humanitare në Gaza. Ai ritheksoi mbështetjen e Kroacisë për një zgjidhje të negociuar me dy shtete, me qëllim që izraelitët dhe palestinezët të jetojnë pranë njëri-tjetrit në paqe dhe siguri.

Lajmet

Hyseni u dorëzohet autoriteteve në Vërmicë: Ish-shefja e SHISH në arrest shtëpie pas shkarkimit nga Rama

Published

11 minutes ago

September 23, 2026

UBTNews

Kreu i Shërbimit Informativ të Shtetit (SHISH), Vlora Hyseni, u është dorëzuar autoriteteve shqiptare në pikën kufitare Vërmicë-Morinë, pasi gjatë ditës ka qëndruar në territorin e Kosovës.

Paraqitja e saj në pikën kufitare erdhi menjëherë pas vendimit të Gjykatës së Posaçme (GJKKO), e cila me kërkesë të SPAK-ut ka caktuar ndaj saj masën e sigurisë “arrest në shtëpi” dhe pezullimin e menjëhershëm nga detyra. Hyseni po hetohet nga Struktura e Posaçme për veprat penale “përkrahje e autorit të krimit” dhe “nxjerrje e sekretit hetimor”.

Ekzekutimi i masës së sigurisë nuk arriti të kryhej gjatë orëve të mëngjesit, pasi zyrtarja e lartë ndodhej në Baku të Azerbajxhanit, ku po merrte pjesë në një konferencë ndërkombëtare të drejtuesve të shërbimeve informative.

Në vijim të këtyre zhvillimeve, kryeministri i Shqipërisë, Edi Rama, ka njoftuar zyrtarisht shkarkimin e saj nga detyra e drejtueses së SHISH-it.

Lajmet

Godet këmbësoren me veturë, arrestohet i dyshuari në Prishtinë

Published

23 minutes ago

September 23, 2026

UBT News

Një person është arrestuar në Prishtinë pasi dyshohet se, gjatë drejtimit të veturës nga pakujdesia, ka goditur një këmbësore.

Rasti ka ndodhur më 22 shtator, rreth orës 12:50. Si pasojë e aksidentit, këmbësorja ka pësuar lëndime trupore dhe është dërguar për trajtim mjekësor në QKUK.

Në konsultim me prokurorin është iniciuar rasti, ndërsa i dyshuari është dërguar në mbajtje./A.K/