Komisioni Evropian ka thënë të premten se e vlerëson si të paarsyeshëm propozimin e presidentit të Shteteve të Bashkuara, Donald Trump, për tregti reciproke dhe theksoi se do të reagojë “ashpër dhe menjëherë” nëse ka rritje të tarifave.

Komisioni, i cili bashkërendon politikën tregtare për të gjitha 27 vendet anëtare të Bashkimit Evropian, e përshkroi propozimin e Trumpit si hap në drejtimin e gabuar.

“Tarifat e BE-së janë ndër më të ulëtat në botë dhe ajo nuk sheh asnjë arsye për rritjen e tarifave amerikane ndaj eksporteve të saj”, tha Komisioni Evropian në një komunikatë.

Dega ekzekutive e BE-së tha se tarifa mesatare e aplikuar nga Bashkimi Evropian për mallrat e importuara është ndër më të ulëtat globalisht, dhe se mbi 70 për qind e importeve hyjnë pa tarifa doganore në vendet e bllokut.

“Sulmi ndaj Çernobilit dëshmon se Putini nuk dëshiron paqe, të paktën në rrethanat aktuale dhe në këtë situatë aktuale. Ai ndihet ‘rehat’ për të sulmuar Çernobilin. Nëse ai ishte nën presion të madh – ai nuk do ta bënte atë. Ai nuk do ta bënte nëse do të donte paqe dhe dialog”, u tha Zelenskyy gazetarëve në Mynih, ku po merr pjesë në Konferencën e Sigurisë.

Kryeministri i Mbretërisë së Bashkuar, Sir Keir Starmer, ka zhvilluar mëngjesin e kësaj të premteje, një bisedë me presidentin ukrainas Volodymyr Zelensky, ku ka ritheksuar mbështetjen e vendit për Ukrainën “për aq kohë sa do të jetë e nevojshme”. Starmer gjithashtu ka theksuar angazhimin e Mbretërisë së Bashkuar për të mbështetur aspiratat e Ukrainës për anëtarësimin në NATO.

Në një komunikatë të shpërndarë nga zëdhënësja e kryeministrit britanik, u tha se Starmer përsëriti angazhimin për të siguruar që Ukraina të jetë në një “rrugë të pakthyeshme” drejt anëtarësimit në NATO, siç ishte rënë dakord nga aleatët gjatë Samitit të Uashingtonit vitin e kaluar.

Ky angazhim vjen në një periudhë kur Ukraina po lufton për të mbrojtur sovranitetin e saj ndaj agresionit rus.

Komentet e kryeministrit vijnë pas deklaratave të Sekretarit të Mbrojtjes të SHBA-së, Pete Hegseth, i cili në Bruksel këtë javë hodhi poshtë idenë e anëtarësimit të menjëhershëm të Ukrainës në NATO, duke theksuar se ky proces është i komplikuar dhe ka nevojë për më shumë diskutime.

Kujtojmë se biseda mes Zelenskyt dhe Starmer u zhvillua në nisje të Konferencës së Sigurisë në Mynih, ku liderët globalë janë mbledhur për të diskutuar mbi çështjet e sigurisë, me fokus kryesor tek Ukraina.

Në konferencën e Sigurisë nuk do të ketë asnjë delegacion rus, sipas zëdhënëses së Ministrisë së Jashtme të Rusisë, Maria Zakharova.

Kryeministri i Indisë, Narenda Modi, ka sinjalizuar një “mega partneritet” me SHBA-të, ndërsa ai dhe presidenti i SHBA-ve Donald Trump bënë marrëveshje që Delhi të importojë vaj dhe gaz amerikan.

Modi vizitoi SHBA-të për dy ditë, ndërsa Trump urdhëroi tarifa të reja mbi partnerët tregtarë, përfshirë Indinë. Gjatë takimit, Trump kritikoi Indinë për tarifat e larta tregtare, ndërsa Modi u shpreh i hapur për uljen e tyre, riatdhesimin e emigrantëve dhe blerjen e avionëve luftarakë amerikanë.

Në një konferencë të përbashkët, Modi krijoi sloganin “Make India Great Again, MIGA”, duke e lidhur me “MAGA” të Trump, duke e quajtur një “mega partneritet për prosperitet”.

Trump theksoi marrëveshjet e energjisë dhe armatimeve, duke shtuar se India do të blejë më shumë naftë dhe gaz për të ulur mungesën tregtare.

“Atyre ju nevojitet, dhe ne e kemi”, u shpreh Trump, shkruan BBC News.

Në çështjet e emigracionit, SHBA deportoi 104 indianë të paligjshëm dhe pritet një grup i dytë. Trump gjithashtu njoftoi ekstradimin e një të dyshuari për sulmin terrorist në Mumbai.

Ndërkohë, SHBA hoqi përjashtimet nga tarifat e çelikut dhe aluminit dhe planifikon tarifa të reja mbi partnerët tregtarë, duke argumentuar se do të ndihmojnë industrinë amerikane dhe punësimin. Tarifat mbi Indinë priten në të ardhmen, ndërsa analistët paralajmërojnë për ndikime ekonomike nga çmimi më i lartë i naftës dhe gazit amerikan.