Presidenti i Ukrainës, Volodymyr Zelensky, pritet të shfrytëzojë Samitin e NATO-s në Turqi për t’u kërkuar aleatëve të përshpejtojnë dërgimin e sistemeve të mbrojtjes ajrore Patriot, mes intensifikimit të sulmeve ruse ndaj qyteteve ukrainase.

Kërkesa e tij vjen pasi Kievi është goditur dy herë brenda më pak se një jave nga sulme me raketa ruse, të cilat kanë goditur ndërtesa banimi dhe kanë shkaktuar mbi 50 viktima civile.

Gjatë samitit në Ankara, Zelensky synon gjithashtu të zhvillojë një takim me presidentin amerikan Donald Trump, duke argumentuar se sulmet e fundit të Rusisë nuk tregojnë forcë, por dobësi, dhe se presidenti rus Vladimir Putin duhet të detyrohet të ulet në bisedime për një paqe të drejtë dhe të qëndrueshme.

Në të njëjtën kohë, Ukraina ka shtuar sulmet me dronë me rreze të gjatë veprimi ndaj objektivave ushtarake dhe rafinerive të naftës në Rusi, duke shkaktuar ndërprerje të furnizimit me karburant dhe energji. Kryebashkiaku i Moskës, Sergei Sobyanin, tha se mbrojtja ajrore ruse ka rrëzuar shumicën e 430 dronëve ukrainas të lëshuar drejt kryeqytetit gjatë natës.

Sekretari i Përgjithshëm i NATO-s, Mark Rutte, u bëri thirrje vendeve anëtare të vazhdojnë mbështetjen për Ukrainën dhe të sigurojnë mjetet e nevojshme për mbrojtjen e sovranitetit të saj.

Megjithëse forcat ukrainase po arrijnë të neutralizojnë pjesën më të madhe të dronëve rusë, situata mbetet kritike përballë raketave balistike. Sipas forcave ajrore ukrainase, në sulmin e fundit nuk u arrit të interceptohej asnjë raketë balistike.

Zelensky tha se Ukraina nuk ka numër të mjaftueshëm sistemesh Patriot dhe u bëri thirrje aleatëve evropianë të dërgojnë rezervat e tyre, duke theksuar se këto sisteme janë më të dobishme në mbrojtje të jetëve civile sesa të ruajtura në depo.

Ai shtoi se, me mbështetjen e NATO-s, Ukraina synon të zhvillojë edhe kapacitetet e veta për mbrojtje kundër raketave balistike.

Sipas Zelenskyt, presioni ushtarak dhe ekonomik ndaj Rusisë duhet të vazhdojë për ta detyruar Kremlinin të angazhohet në negociata paqeje pa kushte që cenojnë integritetin territorial të Ukrainës./A.K/

Një raport i Wall Street Journal ka ngritur polemika të forta, duke pretenduar se administrata e presidentit amerikan Donald Trump ndërhyri te presidenti i FIFA-s, Gianni Infantino, për të anuluar pezullimin e sulmuesit të SHBA-së, Folarin Balogun, pas kartonit të kuq të marrë në ndeshjen ndaj Bosnje-Hercegovinës.

Sipas raportit, zyrtarë të lartë të Shtëpisë së Bardhë e konsideruan përjashtimin e Balogun si një goditje për shanset e kombëtares amerikane në Botëror dhe bindën Trump të kontaktonte drejtpërdrejt Infantinon. Pas bisedimeve, FIFA vendosi të anulonte pezullimin, duke u mbështetur në një dispozitë të rregullores që i jep Komisionit Disiplinor diskrecion për rishikimin e sanksioneve.

Vendimi ka shkaktuar reagime të forta në botën e futbollit. Federata Belge e Futbollit e quajti zhvillimin “tronditës” dhe njoftoi se po shqyrton opsionet ligjore, ndërsa trajneri i Belgjikës, Rudi Garcia, dhe ai i Norvegjisë, Ståle Solbakken, kritikuan ashpër FIFA-n, duke paralajmëruar se vendimi dëmton besueshmërinë e Kupës së Botës.

Sipas Wall Street Journal, Trump u bind të telefononte Infantinon pasi u informua nga Sekretari i Tregtisë Hoëard Lutnick dhe Andreë Giuliani, drejtues i grupit të punës së Shtëpisë së Bardhë për Kupën e Botës dhe djali i ish-kryebashkiakut të Nju Jorkut, Rudy Giuliani.

Ata argumentuan se kartoni i kuq ndaj Balogun ishte i padrejtë dhe se mungesa e sulmuesit kryesor do të dëmtonte seriozisht shanset e SHBA-së në ndeshjen vendimtare ndaj Belgjikës. Raporti shton se Trump, i cili e konsideron organizimin e Botërorit në SHBA si një çështje prestigji kombëtar dhe personal, urdhëroi bashkëpunëtorët e tij të gjenin një mënyrë për të kundërshtuar vendimin, përpara se të kontaktonte presidentin e FIFA-s, Gianni Infantino.

Nga ana e saj, FIFA mohoi se ka pasur ndikim politik, duke këmbëngulur se vendimi është marrë në mënyrë të pavarur nga Komisioni Disiplinor. Shtëpia e Bardhë nuk komentoi mbi raportin. Nëse pretendimet e Wall Street Journal konfirmohen, rasti mund të hapë një debat të gjerë mbi kufijtë e ndërhyrjes politike në vendimmarrjen e institucioneve sportive ndërkombëtare. /E.A/

Dhjetëra mijëra qytetarë morën pjesë në ceremoninë mortore të Ajatollah Ali Khameneit në Teheran, ku arkivoli i tij, i mbështjellë me flamurin iranian, u transportua me një kamion përgjatë një rruge rreth 10-kilometërshe që kalonte përmes sheshit Enghelab. Procesioni u zhvillua pasi trupi i liderit qëndroi për dy ditë për homazhe në Xhaminë e Madhe Mosalla, raportoi BBC.

Sipas BBC, tre nga djemtë e Khameneit u panë duke u lutur pranë arkivolit të tij, ndërsa Mojtaba Khamenei, i cili e pasoi në postin e Udhëheqësit Suprem, nuk ishte i pranishëm. Ai nuk është parë në publik që nga raportimet se ishte plagosur rëndë në sulmin ajror izraelit në Teheran më 28 shkurt, ku mbetën të vrarë edhe babai dhe bashkëshortja e tij.

Gjatë funeralit shtetëror, pjesëmarrësit zhvilluan edhe ceremoninë simbolike të njohur si “goditja me gurë e djallit”, duke hedhur gurë të vegjël mbi një fotografi të presidentit amerikan Donald Trump, sipas pamjeve të publikuara nga agjencia shtetërore iraniane Mizan. Ky ritual është pjesë e Haxhit dhe simbolizon refuzimin e së keqes.

Në rrugët e kryeqytetit, burra, gra dhe fëmijë mbanin flamuj iranianë dhe fotografi të liderit të ndjerë. Sipas CNN, një grua mbante një pankartë me fotografinë e Donald Trump dhe mbishkrimin “Vriteni Trumpin”, ku premtohej një shpërblim prej 20 milionë dollarësh për atentat ndaj tij.

Shfaqjet kundër Shteteve të Bashkuara, përfshirë thirrjet “Vdekje Amerikës” dhe djegien e flamurit amerikan, vazhdojnë të jenë pjesë e tubimeve të organizuara nga autoritetet iraniane që nga Revolucioni Islamik i vitit 1979.

Ndërkohë, zhvillime janë shënuar edhe në Ngushticën e Hormuzit. Sipas të dhënave të agjencisë së monitorimit detar MarineTraffic, pothuajse një e treta e anijeve që kaluan këtë korridor strategjik gjatë ditëve të fundit përdorën rrugën detare pranë bregdetit të Omanit.

Nga e premtja deri të dielën, nëpër ngushticë kaluan 108 anije, ndërsa 30 prej tyre, përfshirë cisterna të naftës dhe gazit të lëngshëm (LPG), zgjodhën korridorin pranë Omanit. Të dhënat tregojnë se të premten kaluan 43 anije, të shtunën 34 dhe të dielën 31./A.K/

Turqia do të jetë mikpritëse e Samitit të NATO-s për herë të parë pas 22 vitesh, duke mbledhur në Ankara liderët e vendeve anëtare në një periudhë të shënuar nga sfida të mëdha të sigurisë globale.

Samiti i 36-të i krerëve të shteteve dhe qeverive të NATO-s konsiderohet një nga takimet më të rëndësishme të aleancës, ku pritet të diskutohen çështje kyçe që lidhen me të ardhmen e sigurisë ndërkombëtare dhe forcimin e bashkëpunimit mes vendeve anëtare.

Zyrtarët turq e kanë cilësuar samitin si një takim që zhvillohet në një “epokë pasigurish”, duke theksuar se ai synon të forcojë koordinimin dhe unitetin brenda aleancës.

Ankaraja e sheh organizimin e samitit si një mundësi për të theksuar rolin e saj diplomatik dhe ndikimin në rritje brenda NATO-s, si dhe për të prezantuar kontributin në fushën e mbrojtjes, industrinë ushtarake, menaxhimin e krizave dhe diplomacinë.

Një nga temat kryesore të diskutimit pritet të jetë ndarja e barrës financiare dhe ushtarake mes vendeve anëtare të NATO-s.

Në samit pritet të marrin pjesë liderët e 32 shteteve anëtare të aleancës, përfshirë presidentin e Shteteve të Bashkuara, Donald Trump, si dhe ministrat e Jashtëm dhe të Mbrojtjes.

Të ftuar do të jenë edhe partnerët indo-paqësorë të NATO-s – Australia, Japonia, Zelanda e Re dhe Koreja e Jugut – duke zgjeruar diskutimet mbi sfidat globale të sigurisë./A.K/