Ministrja e Kulturës dhe Turizmit, Saranda Bogujevci, mori pjesë në ceremoninë përmbyllëse të programit GENESIS, i cili synon fuqizimin profesional të të rinjve në fushën e animacionit dhe zhvillimin e këtij sektori në Kosovë.

Programi u realizua nga Anibar në bashkëpunim me Institut français du Kosovo dhe me mbështetjen e Ministrisë së Punëve të Jashtme të Francës, duke përfshirë trajnime, masterclass-e, mentorim dhe prezantime projektesh me mundësi edhe për promovim ndërkombëtar.

Gjatë ceremonisë përmbyllëse u prezantuan projektet e pjesëmarrësve dhe u shpërndanë certifikatat, ndërsa ministrja Bogujevci theksoi rëndësinë e këtij programi për zhvillimin e industrisë kreative dhe përkrahjen e të rinjve.

Ndërkohë, Anibar vazhdon të mbështetet nga Ministria e Kulturës dhe Turizmit me një program trevjeçar, duke dëshmuar rolin e saj të rëndësishëm në skenën kulturore dhe kreative në vend.

Në Ditën Botërore të Teatrit, Teatri Kombëtar i Kosovës prezantoi premierën e shfaqjes “Bidermani dhe Zjarrvënësit”, duke i dhënë publikut një mbrëmje të veçantë artistike.

Nën regjinë e Agon Myftarit, vepra e Max Frisch-it u interpretua me mjeshtëri nga aktorët, duke trajtuar dilema të thella morale dhe ekzistenciale, dhe duke reflektuar mbi përgjegjësinë individuale dhe shoqërore përmes simbolikës së zjarrvënësve.

Shfaqjen e ndoqën ministri i Arsimit, Hajrulla Çeku, zëvendësministrja e Kulturës, Nora Arapi Krasniqi, zëvendësministrja e Kulturës, Tijana Veljković, si dhe kryesuesja e Këshillit të Teatrit Kombëtar, Visare Aliu.

Kjo premierë është edhe një dëshmi e energjisë krijuese dhe përkushtimit të aktorëve dhe të gjithë profesionistëve të teatrit, që vazhdojnë të sjellin vepra që nxisin reflektim dhe dialog.

Provat e përbashkëta në Otto-Braun-Saal për koncertin e 31 marsit 2026 në Filharmoninë e Berlinit tashmë kanë filluar, duke sjellë së bashku një bashkëpunim të jashtëzakonshëm artistik.

Kori i Filharmonisë së Kosovës, Choralspace Festival Choir dhe Konzertchor Münster po përgatisin një mbrëmje të veçantë muzikore, nën drejtimin e dirigjentes Marion Wood. Në këtë koncert, Kori dhe Orkestra e Filharmonisë së Kosovës do të prezantojnë një program të pasur vokalo-instrumental.

Në pjesën e parë të koncertit do të interpretohen:
Valton Beqiri – “Ballin lartë!”
Robert Schumann – “Requiem für Mignon”, op. 98b

Solistë:
Kaltrina Miftari -soprano
Elona Sadiku – soprano
Flaka Goranci – alto
Simon Robinson – bas

Në pjesën e dytë, në një përvojë unike korale në format 360°, do t’i bashkohet edhe Choralspace Festival Choir, duke sjellë në skenë rreth 400 këngëtarë që do të interpretojnë veprën monumentale:
Antonín Dvořák – “Stabat Mater”, op. 58

Solistë:
Kaltrina Miftari – soprano
Flaka Goranci – alto
André Khamasmie – tenor
Simon Robinson – bariton

Ky koncert shënon debutimin e Filharmonisë së Kosovës në Berlin – një moment i rëndësishëm për skenën muzikore kosovare në arenën ndërkombëtare.

Orkestra e fëmijëve dhe të rinjve “Amadeus” ka arritur një sukses të jashtëzakonshëm në arenën ndërkombëtare, duke u shpërblyer me çmimin kryesor “Grand Prix” dhe vendin e parë në Festivalin Ndërkombëtar “Spring Symphonies 2026”, të mbajtur në Spanjë.

Nën dirigjimin e Vehbi Shoshollit, përballë dhjetëra orkestrave nga vende të ndryshme, të rinjtë nga Kosova përfaqësuan denjësisht vendin, duke dëshmuar talent, përkushtim dhe pasion të rrallë për muzikën.

Ky sukses i madh nuk përfaqëson vetëm një çmim, por është dëshmi e punës së palodhshme, sakrificës dhe ëndrrave të mëdha që i bashkojnë të gjithë anëtarët e orkestrës.

Nën udhëheqjen vizionare të drejtoreshës Hana Petrovci, Orkestra “Amadeus” po vazhdon të korrë suksese dhe të bëjë krenar gjithë Kosovën me talentët e saj të rinj.

Nga ekipi i orkestrës është shprehur mirënjohje për të gjithë ata që kanë kontribuar dhe i kanë mbështetur në këtë rrugëtim të suksesshëm.