Federata Ndërkombëtare e Basketbollit tha se e ka nisur një hetim lidhur me thirrjet antishqiptare që shpërthyen gjatë një ndeshjeje basketbolli mes Maqedonisë së Veriut dhe Rumanisë gjatë fundjavës.

“Në këtë fazë, jemi duke mbledhur raportet dhe deklaratat përkatëse, duke punuar në përputhje të ngushtë me federatat kombëtare të përfshira, si dhe me autoritetet lokale dhe forcat e rendit”, tha FIBA për REL.

Sipas politikanëve shqiptarë në Maqedoninë e Veriut, në turmën e tifozëve në ndeshjen e fazës së dytë parakualifikuese për Kupën e Botës që do të mbahet në Katar më 2027, janë dëgjuar thirrje si “Shqiptari i mirë është shqiptari i vdekur”, “Dhoma gazi për shqiptarët” dhe “Maqedoni e pastër”.

FIBA tha se e dënon pa rezerva dhe me vendosmëri gjuhën e urrejtjes dhe çdo formë diskriminimi apo gjuhe raciste.

“Ne promovojmë në mënyrë aktive krijimin e një mjedisi gjithëpërfshirës dhe me respekt për të gjithë lojtarët, ekipet dhe tifozët, si një përparësi kryesore në sport”, tha ajo.

Zyrtarë të lartë të Qeverisë së Maqedonisë së Veriut ku shqiptarët përbëjnë gati një të katërtën e popullsisë prej 1.8 milionë banorësh ndodheshin në sallë gjatë ndeshjes.

Incidenti ka shkaktuar gjithashtu reagime të ashpra në Kosovë dhe Shqipëri, vende me popullsi kryesisht shqiptare.

Kryeministri i Maqedonisë së Veriut, Hristijan Mickoski, një nga zyrtarët që morën pjesë në ndeshje, dënoi “thirrjet nacionaliste dhe ksenofobike” në një deklaratë më 4 gusht, dy ditë pas ndeshjes.

Ai tha se, ndonëse ishte i pranishëm në arenë, “nuk i kishte vënë re” thirrjet e tifozëve, duke pretenduar se ato ishin bërë nga “një grup i vogël njerëzish”.

“Dua ta shfrytëzoj këtë rast për t’iu bashkuar dënimit të nacionalizmit dhe ksenofobisë  së pari për atë që ndodhi gjatë ndeshjes së basketbollit ndërmjet Maqedonisë dhe Rumanisë, e më pas për të dërguar një mesazh te të gjitha grupet e tifozëve: të mbështesin në mënyrë sportive, ta përkrahin ekipin e tyre dhe përfaqësuesen kombëtare të Maqedonisë”, tha Mickoski.

Partia shqiptare në opozitë në Maqedoni të Veriut, Bashkimi Demokratik për Integrim (BDI), tha se në këtë ngjarje “u dëgjuan kore antishqiptare, thirrje raciste dhe gjuhë e pastër e urrejtjes etnike ndaj shqiptarëve”.

Ministri i Sportit i Maqedonisë së Veriut, Borko Ristovski, tha se kjo Ministri nuk mund të reagojë konkretisht ndaj kësaj ngjarjeje, “sepse nuk vjen nga ndonjë subjekt sportiv vjen nga tifozë në tribunë dhe nuk kemi asnjë kompetencë për të reaguar kur bëhet fjalë për tifozët”.

“Megjithatë, le ta shfrytëzoj këtë rast për të bërë një apel: në Maqedoni nuk ka nevojë për brohoritje të tilla, as nga njëra anë, as nga tjetra, nga askush, nga cilado anë që të vijë”.

Kodi Penal i Maqedonisë së Veriut parasheh dënime për thirrjet raciste dhe gjuhën e urrejtjes në disa nene, ndërsa më i rëndësishmi është neni 319, i cili parashikon se kushdo që nxit ose përhap publikisht urrejtje, përçarje apo jotolerancë mbi baza racore, fetare, etnike apo kombëtare, dënohet me burgim nga një deri në pesë vjet.

Klubi i fëmijërisë së futbollistëve portugezë Diogo Jota dhe Andre Silva ua ka dedikuar uniformën e tyre për këtë sezon vëllezërve që vdiqën në një aksident me makinë më 3 korrik në Spanjë.

Skuadra e kategorisë së katërt, Gondomar SC, ka stampuar në fanellat e saj fotografi të sulmuesit të Liverpoolit dhe Portugalisë, Jota, dhe vëllait të tij Silva, i cili luajti për ekipin portugez Panafiel.

Në pjesën e sipërme të pjesës së pasme të fanellave janë shkruar emrat e dy lojtarëve nën një simbol të pafundësisë.

“Më shumë se një fanellë, një homazh i përjetshëm”, tha Gondomar SC, që luan në Kampionatin e Portugalisë, në një postim në rrjetet sociale. “Sepse futbolli është më shumë se fitore dhe gola, është trashëgimi, është familje, është dashuri për tokën tonë. Sa herë që atletët tanë veshin këtë fanellë, është sikur të dalin në fushë me të.”

Liverpool njoftoi muajin e kaluar se lojtarët e tyre do të mbajnë emblemën “Forever 20” në fanellat dhe xhaketat e tyre këtë sezon të Premier League.

Pas konsultimit me familjen e Jotës, fanella e tij me numër 20 do të tërhiqet nga përdorimi në të gjitha nivelet e klubit nga “Anfield”, duke përfshirë ekipet e femrave dhe ato të akademisë.

Jota dhe Silva u rritën në Gondomar, një qytet në periferi të Portos.

Tifo-grupi “Dardanët” ka njoftuar se do t’i bashkohet protestës të së enjtes kundër Gjykatës Speciale, në shenjë kundërshtimi ndaj asaj që e cilësojnë padrejtësi ndaj ish-krerëve të Ushtrisë Çlirimtare të Kosovës.

Në një deklaratë publike, “Dardanët” theksojnë se përkrahja e tyre vjen jo vetëm për shkak të lidhjes me ish-pjesëtarët e UÇK-së, por edhe për shkak të madhështisë dhe drejtësisë së luftës për liri.

“Ftojmë secilin anëtar të Dardanëve që të jetë pjesë e kësaj proteste, në atë mënyrë që të përçojmë mesazh të qartë se qëndrojmë përkrah njerëzve që zgjodhën lirinë e vendit si të vetmen alternativë,” thuhet ndër të tjera në njoftim.

Protesta është thirrur pas zhvillimeve të fundit që lidhen me proceset gjyqësore ndaj disa prej figurave kryesore të UÇK-së në Hagë.

Klubi i futbollit Ballkani ka mësuar emrat e kundërshtarëve të mundshëm në fazën play-off të UEFA Conference League, në rast se kalon me sukses turin e tretë kundër Shamrock Rovers.

Skuadra nga Suhareka do të përballet me fituesin e përballjes mes Larne FC nga Irlanda e Veriut dhe CD Santa Clara nga Portugalia.

Ndeshja e parë e play-off-it do të luhet më 21 gusht si mysafir, ndërsa ajo kthyese do të zhvillohet një javë më vonë në stadiumin “Fadil Vokrri” në Prishtinë.