Filmi aksion-dramë “Tërmeti 3:54 AM”, me skenar dhe regji nga Koloreto Cukali, është shfaqur në kuadër të Tirana International Film Festival (TIFF).

Filmi rrëfen historinë e pesë njerëzve që mbeten të bllokuar nën rrënojat e një pallati pas tërmetit në Durrës. Në hapësirën e ngushtë, mes frikës dhe pasigurisë, ata presin shpëtimin ndërsa përballen me një luftë të vështirë për mbijetesë.

Në rolet kryesore interpretojnë Sara Hoxha, Besmir Bitraku, Giulio Neglia dhe Nika Perrone.

Pas shfaqjes në TIFF, filmi do të shfaqet në Kinema “Republika” në Shkodër nga 23 shtatori deri më 1 tetor, ndërsa nga 8 tetori do të nisë shfaqjen në kinematë e Shqipërisë./A.K/

Presidenti i SHBA-së, Donald Trump, ka pritur homologun e tij kinez, Xi Jinping, me një ceremoni të veçantë në Bazën e Përbashkët Andrews, duke shënuar nisjen e samitit tre-ditor mes dy liderëve.

Trump dhe Zonja e Parë, Melania Trump, pritën Xi Jinping dhe bashkëshorten e tij, Peng Liyuan, në Maryland. Ceremonia përfshiu një qilim të kuq rreth 30 metra të gjatë, një bandë ushtarake dhe flamujt e SHBA-së dhe Kinës.

Në kuadër të ceremonisë, dy avionë B-1 fluturuan mbi bazë, ndërsa Banda e Forcave Ajrore interpretoi himnin kombëtar amerikan. Pas përshëndetjeve dhe fotografive zyrtare, dy çiftet u larguan drejt Uashingtonit me automjete të veçanta.

Vizita e Xi Jinping në SHBA është e para që nga viti 2015 dhe pritet të shoqërohet me takime të mbyllura dhe një darkë shtetërore.

Në axhendën e bisedimeve pritet të jenë disa çështje të rëndësishme në marrëdhëniet SHBA-Kinë, përfshirë inteligjencën artificiale, Iranin, Tajvanin dhe marrëdhëniet tregtare mes dy vendeve.

Sipas raportimeve, kjo është hera e parë që nga viti 1962 që një president amerikan pret personalisht një lider të huaj në një bazë ushtarake amerikane. /Reuters/

Kryeministri i Kosovës, Albin Kurti, ka përkujtuar rreshterin e Policisë së Kosovës, heroin Afrim Bunjaku, në përvjetorin e sulmit terrorist në Banjskë të Zveçanit, duke theksuar se Republika e Kosovës ka triumfuar mbi agresionin dhe krimin.

Përmes një shkrimi në facebook, Kurti vlerësoi lart sakrificën e Bunjakut, i cili ra në krye të detyrës në mbrojtje të sovranitetit shtetëror dhe tërësisë territoriale të vendit, ndërsa vuri në dukje profesionalizmin e organeve të sigurisë në neutralizimin e planit për destabilizimin e veriut.

“Grupi terrorist paraushtarak i organizuar, dirigjuar dhe financuar nga Beogradi, së cilit i printe kryekrimineli Millan Radoiçiq, dështoi në sulmin tinzar që kishte për qëllim konflikt të armatosur e gjakderdhje në manastir ortodoks të shekullit XIV, dhe mandej aneksimin e veriut të Kosovës”, ka deklaruar Kurti.

Shefi i qeverisë rikujtoi se rruga ku ndodhi sulmi sot mban emrin e heroit Afrim Bunjaku, ndërsa konfirmoi përkushtimin e shtetit për t’i çuar të gjithë përgjegjësit para drejtësisë.

“Është e vërtetë, ata na kanë bërë dëm e shkaktuar vuajtje, por ne kemi fituar. Shteti ynë i pavarur, Republika e Kosovës, ka ngadhnjyer mbi agresionin dhe krimin, heroi mbi terroristët”, nënvizoi kryeministri.

Historiku i ngjarjes në Banjskë

Në orët e hershme të mëngjesit të 24 shtatorit 2023, një grup i armatosur dhe mirëorganizuar paraushtarak vuri prata bllokuese në hyrje të fshatit Banjskë të Zveçanit. Gjatë përpjekjes së Policisë së Kosovës për të hequr barrikadat, grupi terrorist hapën zjarr me armë të rënda dhe mjete shpërthyese, ku mbeti i vrarë rreshteri Afrim Bunjaku dhe u plagosën dy zyrtarë të tjerë policorë.

Pas sulmit fillestar, pjesëtarët e grupit terrorist u barrikaduan brenda kompleksit të Manastirit të Banjskës. Njësitë Speciale të Policisë së Kosovës ndërmorën një operacion të gjerë kundërterrorist, nga i cili mbetën të vrarë tre pjesëtarë të grupit të armatosur, ndërsa disa të tjerë u arrestuan. Pjesa më e madhe e grupit, përfshirë udhëheqësin e tyre Milan Radoiçiq, u arratis drejt territorit të Serbisë, duke lënë prapa një arsenal të madh ushtarak me vlerë miliona eurosh. Ngjarja u dënua ashpër nga komuniteti ndërkombëtar, SHBA-ja dhe Bashkimi Evropian.

Protestat në Prishtinë do të vazhdojnë edhe sonte, duke shënuar ditën e tetë radhazi.

Qytetarët pritet të mblidhen në orën 21:00 në sheshin “Skënderbeu”, në kundërshtim me vendimin e Dhomave të Specializuara në Hagë ndaj ish-krerëve të UÇK-së.

Protestat kanë nisur pas vendimit të 16 shtatorit dhe kanë vazhduar çdo ditë në Prishtinë./A.K/