Kancelari gjerman Olaf Scholz do të udhëtojë në Paris më 24 janar për një takim me Presidentin francez Emmanuel Macron, vetëm dy ditë pasi Donald Trump do të marrë detyrën si president i SHBA-së. Takimi pritet të zhvillohet në Pallatin Elysee rreth mesditës, dhe në fokus të bisedimeve do të jenë pozicionimi i ardhshëm i Bashkimit Evropian ndaj Shteteve të Bashkuara, situata në Ukrainë, si dhe zhvillimet në Lindjen e Mesme.

Scholz nuk është i vetmi politikan gjerman që do të udhëtojë në Paris në këtë periudhë. Anke Rehlinger, presidente e dhomës së lartë të parlamentit gjerman, Bundesrat, ndodhet në Paris për një vizitë nga 21 deri më 24 janar, ku do të takohet me kryetarët e dy dhomave të parlamentit francez. Po ashtu, Ministri i Mbrojtjes, Boris Pistorius, do të zhvillojë një takim me homologun e tij francez, Sébastien Lecornu, më 25 janar. Takimet e këtyre liderëve kanë për qëllim forcimin e marrëdhënieve dhe koordinimin mes dy shteteve evropiane në përgjigje të sfidave globale./UBTNews/

Parlamenti i Irakut ka miratuar një set amendamentesh për statusin personal që kritikët thonë se mund të çojnë në legalizimin e martesave të të miturve. Amendamentet u japin gjykatave islame autoritet më të gjerë në çështje të tilla si martesat, divorci dhe trashëgimia. Aktivistët e të drejtave të njeriut paralajmërojnë se kjo do të cenojë Ligjin e Statusit Personal të vitit 1959, që kishte unifikuar kodin e familjes dhe ofronte mbrojtje për gratë.

Ndryshimet e miratuara, të cilat u mbështetën nga ligjvënësit konservatorë shiitë, mundësojnë që klerikët të udhëhiqen sipas interpretimit të tyre të ligjit islamik, duke përfshirë mundësinë e martesës së vajzave që në moshën 9-vjeçare, sipas shkollës Jaafari të ligjit islamik. Ndërsa mbështetësit e ndryshimeve thonë se ato do ta bëjnë ligjin më të përputhshëm me vlerat islamike dhe do të pakësojnë ndikimin e kulturës perëndimore, aktivistët kritikojnë se kjo do të dëmtojë të drejtat e grave dhe vajzave, duke i ekspozuar ato ndaj martesave të hershme dhe duke minuar mbrojtjen e të drejtave të tyre për divorcin dhe trashëgiminë.

Përveç këtyre ndryshimeve, Parlamenti miratoi një amnisti të përgjithshme për të burgosurit sunni dhe ndihmoi në zhvillimin e një plani për rikompensimin e tokave të kontestuara, të lidhura me pretendimet territoriale kurde. Gjatë seancës, disa parlamentare shprehen kundër procedurës së votimit, duke e konsideruar atë të paligjshëm./UBTNews/