Fakulteti për Sistemet e Informacionit në UBT ka zhvilluar me sukses Akademinë Verore 2025, e cila u mbajt më 7 dhe 8 korrik në hapësirat moderne të UBT-së, duke ofruar një platformë të specializuar për studentë, profesionistë dhe të apasionuar pas teknologjisë së informacionit, sigurisë kibernetike dhe tregut digjital.

Ngjarja u karakterizua me diskutime të thelluara mbi aplikimin e Inteligjencës Artificiale (IA) në fushën e sigurisë kibernetike, si dhe me njohuri praktike rreth monetizimit të platformave digjitale si TikTok, YouTube dhe Spotify.

Akademia u hap me fjalën përshëndetëse të Prof. Dr. Blerton Abazit, dekan i Fakultetit të Sistemeve të Informacionit në UBT, i cili theksoi rëndësinë e edukimit të avancuar në fushën e teknologjisë dhe mbrojtjes digjitale në një epokë të dominuar nga kërcënimet kibernetike dhe zhvillimet e shpejta teknologjike.

Në vijim, ai mbajti një ligjëratë të zgjeruar mbi aplikimin e IA-së në sigurinë kibernetike, duke ilustruar mënyrën sesi sistemet inteligjente po përdoren për të identifikuar sulmet në kohë reale, për të analizuar sjelljet e përdoruesve dhe për të rritur qëndrueshmërinë e infrastrukturës digjitale. Me shembuj praktikë dhe qasje ndërdisiplinore, pjesëmarrësit patën mundësinë të kuptojnë më thellë sfidat dhe potencialin që sjell inteligjenca artificiale në këtë fushë kritike.

Dita e dytë e akademisë u përqendrua në aspektet e ekonomisë digjitale dhe krijimtarisë online, me një ligjëratë praktike nga Enesa Hamiti, menaxhere e platformave digjitale në Onima Co., një kompani lidere në menaxhimin e përmbajtjes dhe strategjive të monetizimit.

Në ligjëratën me temë: “Si të kthesh klikimet në të ardhura: Sekretet e monetizimit në TikTok, YouTube, Spotify dhe më gjerë”, Hamiti ndau përvojat dhe strategjitë më të suksesshme për krijuesit e përmbajtjes, sipërmarrësit digjitalë dhe të rinjtë që dëshirojnë të ndërtojnë karrierë përmes platformave sociale. Ligjërata trajtoi temat si: algoritmet, ndërveprimi me audiencën, monetizimi përmes reklamave, sponsorizimeve dhe përmbajtjeve të paguara.

Akademia Verore për Sistemet e Informacionit 2025 në Dukagjin konfirmoi sërish vizionin e UBT-së për të ofruar edukim praktik dhe të orientuar drejt së ardhmes, duke e bërë teknologjinë të kuptueshme, të dobishme dhe të qasshme për të gjithë.

Departamenti për Edukim dhe Zhvillim Profesional në UBT organizoi me sukses Akademinë Verore 2025, e cila u mbajt në formatin online më 8 korrik, duke ofruar një platformë të hapur për diskutime dhe shkëmbim njohurish në fusha të rëndësishme si edukimi, teknologjia, psikologjia, zhvillimi i karrierës dhe kërkesat e tregut të punës.

Ngjarja u hap nga Rektori i UBT-së, Prof. Dr. Edmond Hajrizi, i cili theksoi rëndësinë e përgatitjes profesionale dhe të përshtatjes së arsimit me zhvillimet teknologjike dhe ekonomike në nivel global. Ai vlerësoi se Akademia Verore po shndërrohet në një traditë të dobishme për zhvillimin institucional dhe personal të pjesëmarrësve.

Programi i akademisë përfshiu ligjërata nga ekspertë të njohur vendorë dhe ndërkombëtarë, ndër të cilët:

• Dr. Denis Celcima, i cili trajtoi ndikimin e inteligjencës artificiale në psikologjinë njerëzore;
• MSc. Venera Kamberaj, e cila foli për rëndësinë e praktikës profesionale për studentët e rinj;
• Dr. Besnik Skenderi, që prezantoi trendet e reja në menaxhimin e projekteve;
• Dr. Blerton Abazi, i cili diskutoi mbi sfidat dhe rëndësinë e sigurisë kibernetike në epokën digjitale;

Si dhe ekspertë të tjerë që trajtuan tema mbi ekosistemin e UBT-së, zhvillimin e kompetencave në raport me industrinë dhe teknologjitë e avancuara si inteligjenca artificiale dhe realiteti virtual.

Përmes kësaj Akademie, UBT dëshmoi edhe një herë përkushtimin e saj për të ofruar arsim bashkëkohor, të lidhur ngushtë me tregun e punës dhe me sfidat e kohës moderne. Pjesëmarrësit u angazhuan në diskutime aktive dhe patën mundësi të përfitojnë nga eksperiencat e ligjëruesve, duke marrë njohuri të reja dhe ide praktike për zhvillimin e mëtejshëm profesional.

Në kuadër të aktivitetit më të madh akademik dhe kulturor në vend, Global UBT Fest 2025, u bë hapja zyrtare e Akademive Verore të Fakultetit të Arkitekturës dhe Planifikimit Hapësinor, si dhe të Fakultetit të Inxhinierisë së Ndërtimit dhe Infrastrukturës në ambientet e Kampusit Inovativ të UBT-së në Lipjan.

Ceremonia u hap nga Dekani i Fakultetit të Arkitekturës, Prof. Dr. Binak Beqaj, dhe Dekani i Fakultetit të Inxhinierisë së Ndërtimit dhe Infrastrukturës, Prof. Dr. Visar Krelani, të cilët theksuan rëndësinë që kanë këto akademi verore në përgatitjen profesionale të studentëve dhe në nxitjen e mendimit kritik, kreativ dhe bashkëkohor në fushat përkatëse.

Gjatë javës së parë të akademisë, studentët e arkitekturës dhe ndërtimit do të marrin pjesë në punëtori kreative, ligjërata nga profesionistë vendorë dhe ndërkombëtarë, si dhe do të punojnë në grupe për zgjidhjen e sfidave reale urbane dhe inxhinierike.

Projektet e zhvilluara gjatë akademisë do të prezantohen në fund të edicionit para një paneli vlerësues, ndërsa pjesëmarrësit do të pajisen me certifikata dhe do të kenë mundësi për të fituar praktika profesionale në kompani partnere të UBT-së.

Ky edicion i akademive verore përfaqëson përkushtimin e UBT-së për të ofruar arsim modern, të orientuar drejt praktikës, teknologjisë dhe kreativitetit, duke ndihmuar studentët të ndërtojnë një të ardhme të qëndrueshme në fushat e arkitekturës dhe inxhinierisë.

Në kuadër të Global UBT Fest 2025, u hap zyrtarisht Akademia Verore e Dizajnit, një prej aktiviteteve më frymëzuese të kësaj vere, ku studentët patën mundësinë të angazhohen në sesione praktike dhe diskutime kreative me fokus në dizajnin e veshjeve dhe shprehjen vizuale.

Aktiviteti u zhvillua në Kampusin e UBT-së në Lipjan dhe nisi më 7 korrik, me fjalën përshëndetëse dhe prezantimin e strukturës nga Furkan Rada, i cili udhëhoqi tërë ditën e parë të akademisë me tema motivuese dhe praktike.

Furkan Rada foli për:

• Rëndësinë e dizajnit të veshjeve si formë shprehjeje vizuale,
• Procesin kreativ nga koncepti deri te produkti final në treg,
• Përfitimet praktike dhe profesionale për studentët pjesëmarrës, si dhe
• Udhëzime për përgatitjen e punimeve për publikim online – duke nënvizuar rëndësinë e ndërtimit të portofolios digjital për karrierën e të rinjve në industrinë e modës dhe dizajnit.

Dita e dytë, më 8 korrik, solli në skenë profesorët Uran Krasniqi dhe Besfort Salihu, të cilët drejtuan një seancë reflektuese me vetë studentët:

• Prezantime të punimeve të realizuara nga vetë pjesëmarrësit,
• Komente dhe vlerësime profesionale nga juria akademike,
• Këshilla për përmirësimin e teknikave të dizajnit dhe
• Diskutim të hapur mbi rrugën e zhvillimit të mëtejshëm në këtë fushë.

Akademia Verore e Dizajnit në UBT është krijuar për të nxitur shprehjen artistike, të zhvillojë aftësitë praktike të studentëve dhe për t’i përgatitur ata për sfidat reale të industrisë kreative. Përmes një kombinimi të ligjëratave, punës praktike dhe vlerësimeve profesionale, studentët përfitojnë njohuri të vlefshme që tejkalojnë teorinë dhe i afron drejt tregut të punës.

Kjo akademi mbetet një shembull i përkushtimit të UBT-së për edukim cilësor, inovativ dhe të orientuar drejt suksesit të studentit.