Në një mbrëmje plot emocion dhe respekt, UBT ka nderuar 18 bashkëpunëtorë profesionistë për përkushtimin e tyre të vazhdueshëm dhe kontributin e jashtëzakonshëm gjatë një dekade bashkëpunimi. Ceremonia u mbajt në kuadër të eventit festiv të fundvitit, ku u vlerësua puna dhe përkushtimi i këtyre individëve që kanë ndihmuar në ndërtimin dhe zhvillimin e suksesit të UBT-së.

Rektori i UBT-së, Prof. Dr. Edmond Hajrizi, gjatë ndarjes së çmimeve falënderoi të pranishmit dhe theksoi rëndësinë e punës së përbashkët për arritjen e vizionit të institucionit.

“Këta individë janë shembull i angazhimit profesional dhe vizionit të përbashkët për edukimin cilësor dhe zhvillimin e vazhdueshëm. Ju faleminderit për dekadën e përkushtimit që e keni dedikuar UBT-së dhe për ndikimin tuaj në formimin e një institucioni lider”, tha Hajrizi.

Të nderuarit vlerësuan lart këtë moment dhe shprehën mirënjohjen për mundësinë për të qenë pjesë e rrugëtimit të UBT-së, duke e cilësuar atë si një shtëpi të dytë ku puna dhe përkushtimi janë shpërblyer gjithmonë.

Kjo iniciativë është një tjetër dëshmi e angazhimit të UBT-së për të vlerësuar dhe fuqizuar burimet njerëzore si shtyllë kryesore e suksesit të saj. Në një atmosferë festive, ceremonia u mbyll me një mesazh të fuqishëm për vazhdimin e bashkëpunimit dhe përballjen me sfidat e reja që sjell 2025-a./UBTNEWS/

UBT organizoi mbrëmë ceremoninë e fundvitit, një ngjarje e mbushur me festë, mirënjohje dhe reflektim mbi arritjet e vitit 2024. Ceremonia, e cila u mbajt në ambientet e UBT-së, mblodhi studentë, profesorë dhe bashkëpunëtorë, duke krijuar një atmosferë të ngrohtë dhe festive për të mbyllur një vit plot suksese.

Në fjalën e tij përshëndetëse, rektori i UBT-së, Prof. Dr. Edmond Hajrizi, vlerësoi angazhimin dhe punën e palodhur të stafit akademik dhe studentëve gjatë vitit 2024. Ai theksoi rëndësinë e vizionit 20-vjeçar të UBT-së, i cili u prezantua me krenari në mbi 50 vizita ndërkombëtare këtë vit. Gjithashtu, Prof. Hajrizi nënvizoi rezultatet e jashtëzakonshme që UBT ka arritur në rangime ndërkombëtare dhe në aktivitetet e shumta akademike e shkencore.

“Po kthehemi pas me krenari për të reflektuar mbi dekadat e suksesshme të UBT, të cilat janë shënuar nga përkushtimi, arritjet dhe sfidat që na kanë formuar. Nga fillimet tona, kemi ndërtuar një komunitet akademik të fortë dhe një bazë të qëndrueshme për të ardhmen. Ndërkohë, përpara nesh shtrihet një vizion 20-vjeçar me mundësi për të ndihmuar çdo student të arrijë potencialin e tij më të madh. UBT do të vazhdojë të jetë një lider në edukimin e brezave të rinj, duke krijuar mundësi që do të ndërtojnë një të ardhme më të ndritur dhe të qëndrueshme për shoqërinë dhe vendin tonë. UBT është këtu për Kosovën, për Shqipërinë dhe për të gjithë shqiptarët, duke siguruar që brezat e së ardhmes të jenë të përgatitur për sfidat dhe mundësitë që na presin”, theksoi Rektori Hajrizi

Ceremonia përfshiu edhe ndarjen e çmimeve për individët që kanë kontribuar në suksesin e institucionit për më shumë se një dekadë. Rektori Hajrizi vlerësoi lartë në skenë kontributin e 18-të profesionistëve që vepruan bashkë dhe për UBT-ën. Në këtë moment të veçantë, mirënjohja dhe përkushtimi i stafit u vlerësuan me duartrokitje të ngrohta nga të pranishmit të cilët u ngjitën në skenë për certifikatën e nderit dhe mirënjohjes!

Pjesa artistike ishte një ndër pikat kulmore të mbrëmjes. Nën organizimin e Fakultetit të Muzikës, Kori dhe Bendi i UBT-së, nën drejtimin e profesorëve dhe studentëve të talentuar, sollën një program muzikor të pasur me këngë festive si “Carol of the Bells”, “Let it Snow”, “O Holy Night”, dhe shumë performana të tjera me instrumente muzikore të ndryshme.

Interpretimet e studentëve dhe profesorëve krijuan një atmosferë të paharrueshme, duke reflektuar energjinë dhe pasionin që e karakterizojnë UBT-në.

Ceremonia u mbyll me mesazhin e bashkimit dhe shpresës për vitin 2025, ndërsa pjesëmarrësit u argëtuan me një koncert festiv dhe momente të shumta gëzimi. UBT vazhdon të jetë një shembull i lidershipit në arsim, duke përmbushur moton e tij “Leading the Way” në çdo hap.

Në mesin e qindra pjesëmarrësve, kjo natë magjike ishte një tjetër dëshmi e përkushtimit të UBT-së për të nxitur suksesin dhe për të krijuar një mjedis që frymëzon brezat e ardhshëm./UBTNEWS/

Fakulteti Media dhe Komunikim në UBT është duke realizuar një mundësi për studentët, duke ofruar mundësinë për të ndjekur praktikën profesionale në ‘UBT Media Group’. Ky program është një mundësi e rëndësishme për zhvillimin profesional të studentëve, pasi synon të ofrojë eksperiencë praktike në një ambient dinamik dhe inovativ.

Dekani i Fakultetit, Prof. Dr. Selimi, thekson se ‘UBT Media Group’ është një laborator multimedial, që ofron kushte optimale për realizimin e projekteve brenda institucionit. Ai thekson se ky laborator mundëson studentët të punojnë me pajisjet më të avancuara dhe të realizojnë projektet e tyre në mënyrën më profesionale të mundshme. “Ky është një hap i rëndësishëm në përgatitjen e studentëve për kërkesat dhe standardet e industrisë mediatike, duke u mundësuar atyre të përdorin teknologjinë më të fundit dhe të përgatiten për tregun e punës”.

Sipas këtij planifikimi, çdo javë, dy studentë të vitit të dytë dhe dy të vitit të tretë do të kenë mundësinë të zhvillojnë praktikën në ‘UBT Media Group’.

“Qëllimi kryesor është që studentët të zhvillojnë aftësitë e tyre praktike dhe profesionale, për t’u përgatitur për tregun e punës. Ata do të kenë mundësinë të punojnë në projekte reale, të bashkëpunojnë me profesionistë të fushës dhe të aplikojnë njohuritë teorike, që kanë fituar gjatë studimeve”, thotë Dekani, Selimi.

Praktika ka për qëllim zhvillimin e aftësive të tyre teknike dhe kreative, për të forcuar besimin në aftësitë e tyre dhe për t’u bërë pjesë e një rrjeti të rëndësishëm profesional. Përfundimisht, ky program i praktikës synon t’i ndihmojë studentët të krijojnë një bazë të fortë profesionale, duke i përgatitur për sfidat dhe mundësitë e tregut të punës në fushat e medias dhe të komunikimit.

Në një ceremoni solemne të mbajtur në UBT, u nënshkrua një marrëveshje bashkëpunimi ndërmjet UBT-së dhe Sam Houston State University, duke hapur horizonte të reja për shkëmbime akademike, projekte kërkimore dhe zhvillime inovative. Marrëveshja përfaqëson një angazhim të përbashkët për të promovuar cilësinë në arsim, lidershipin dhe ndërtimin e ekosistemeve të qëndrueshme në fushën e arsimit të lartë.

Në kuadër të kësaj ngjarjeje të rëndësishme, UBT nderoi me çmimin më të lartë institucional Major Gjeneral David P. Glaser, një figurë emblematike në lidershipin ushtarak dhe mbrojtjen e vlerave të paqes dhe sigurisë. Gjeneral Glaser ka një karrierë të jashtëzakonshme, duke shërbyer në pozita kyçe si Provost Marshal General of the Army dhe Komandant i U.S. Army Criminal Investigation Command, ku ai ka dëshmuar përkushtim dhe integritet të pashoq në misionet ndërkombëtare për paqe dhe stabilitet.

Në fjalën e tij, Rektori i UBT-së, Prof. Dr. Edmond Hajrizi, theksoi rëndësinë e bashkëpunimeve ndërkombëtare për fuqizimin e edukimit dhe ndërtimin e urave të reja mes institucioneve prestigjioze si UBT dhe Sam Houston State University. Ai vlerësoi gjithashtu kontributin e Gjeneral Glaser në promovimin e vlerave universale të drejtësisë, sigurisë dhe bashkëpunimit global.

“Sot, ndërsa nderojmë me çmimin më të lartë institucional “Leadership Excellence Award”, një vlerësim që i jepet personaliteteve të shquara për arritje të jashtëzakonshme dhe kontribut të spikatur, sikurse është Gjeneral Major David P. Glaser, ne japim respekt dhe mirënjohje për rolin e tij të pashoq në shërbim të paqes, sigurisë dhe bashkëpunimit ndërkombëtar. Ky çmim simbolizon njohjen e përkushtimit të tij të palodhur dhe frymëzimit që ai ka dhënë për breza të tërë liderësh dhe profesionistësh, duke ndikuar jo vetëm në përmirësimin e standardeve të lidershipit, por edhe në avancimin e vlerave humane që forcojnë lidhjet mes kombeve dhe institucioneve globale”, u shpreh Rektori Hajrizi.

Gjeneral Glaser, i cili ka luajtur një rol të rëndësishëm në stabilizimin e Kosovës gjatë periudhave të vështira, u shpreh mirënjohës për këtë vlerësim, duke theksuar rëndësinë e edukimit dhe bashkëpunimit ndërkombëtar për ndërtimin e një bote më të sigurt dhe më të drejtë.

Major General David P. Glaser, një figurë e njohur për angazhimin e tij ndërkombëtar, pranoi me nder çmimin “Honor Degree Leadership Excellence Award” të dhënë nga UBT. Në një fjalim pas marrjes së çmimit, Glaser shprehu mirënjohjen e tij për këtë nder dhe theksoi rëndësinë e angazhimit për paqe dhe stabilitet global.

“Jam shumë i nderuar për këtë njohje dhe është një kënaqësi e vërtetë të jem përsëri në Kosovë. Herën e fundit që kam qenë këtu ishte në vitin 2002, dhe është jashtëzakonisht emocionuese të shoh se si ky vend ka arritur të transformohet dhe të bëhet diçka speciale dhe unike,” u shpreh Glaser.

Ai theksoi se gjatë karrierës së tij ka pasur mundësinë të mbështesë shtete të ndryshme, duke përfshirë edhe Gjermaninë për katër vjet, si dhe të angazhohet në misione paqeje në Ballkan. “Të ndihmosh njerëzit është ajo që ka rëndësi. Ky angazhim ndryshon jetët tona dhe është thelbësor për të siguruar paqe dhe stabilitet,” shtoi ai.

Në fund, Glaser falënderoi UBT për këtë nder dhe e pranoi çmimin me shumë mirënjohje, duke theksuar se ky moment përfaqëson një hap tjetër të rëndësishëm në lidhjen e tij me Kosovën dhe me përpjekjet globale për një botë më të drejtë e të sigurt.

Pas nënshkrimit të Memorandumit të Bashkëpunimit, Dekanja e Fakultetit të Sam Houston University shprehu mirënjohjen për pritjen e ngrohtë dhe vlerësimin për bashkëpunimin ndërinstitucional. Ajo tha:

“Faleminderit shumë për pritjen e ngrohtë. Është një nder i madh të takoj Rektorin Edmond Hajrizi. Ai është një vizionar, më shumë vizionar sesa e kisha kuptuar thjesht duke parë faqen tuaj të internetit. Pra, faleminderit për mirëseardhjen dhe urime, David.”

Dekanja gjithashtu theksoi rëndësinë e njohjes së punës së David Glazier: “Faleminderit për njohjen e gjithë punës që ka bërë David Glazier. Kontributi i tij është i jashtëzakonshëm dhe ka pasur një ndikim të rëndësishëm në përpjekjet për paqe dhe stabilitet ndërkombëtar.”

Marrëveshja e nënshkruar dhe ceremonia e nderimit shënojnë një moment historik për UBT-në, duke forcuar rolin e saj si një lider në arsimin e lartë në rajon dhe përtej tij. Me këtë bashkëpunim, UBT dhe Sam Houston State University synojnë të krijojnë mundësi të reja për studentët, profesorët dhe komunitetet që përfaqësojnë, duke kontribuar në zhvillimin e qëndrueshëm dhe përparimin e shoqërisë./UBTNEWS/