Përzgjedhja e profesionit është një nga vendimet më të rëndësishme në jetë. E ardhmja dhe suksesi në jetë varen drejtpërdrejt nga kjo zgjedhje. Për këtë arsye, orientimi i duhur në karrierë është thelbësor për të parë dhe zhvilluar aftësitë tuaja në përputhje me kërkesat aktuale të tregut të punës duke siguruar që të rinjtë të kenë mundësi për punësim të shpejtë dhe sukses në profesionet e zgjedhura.

UBT, si një institucion i arsimit të lartë që gjithmonë ka sjellë risi në kurrikulat dhe programet e studimit, ofron profesionet më të kërkuara në gjithë globin. Ky institucion u mundëson studentëve të jenë në hap me kërkesat e tregut të punës dhe të barabartë me të gjithë të rinjtë e botës.

Në UBT, ju mund të studioni në disa nga fushat më të kërkuara, duke përfshirë:

Inxhinieria e Agrikulturës dhe Mjedisit:

Ky program përgatit studentët për të adresuar sfidat e prodhimit të ushqimit dhe menaxhimit të burimeve natyrore, duke kombinuar njohuritë e inxhinierisë, agronomisë dhe shkencave mjedisore. Duke studiuar në këtë fakultet ju mund të punësoheni si inxhinier agrikulturor, menaxher i mjedisit dhe specialist në teknologjitë e qëndrueshme bujqësore.

Muzika Moderne, Prodhimi Digjital dhe Menaxhimi:

Studentët mësojnë të krijojnë, prodhojnë dhe menaxhojnë projekte muzikore duke përdorur teknologji të avancuara. Profesionet përfshijnë producent muzikor, menaxher artistik, kompozitor digjital, etj.

Arti dhe Mediat Digitale:

Ky program përgatit studentët për të krijuar përmbajtje artistike dhe mediatike duke përdorur mjete digjitale. Profesionet përfshijnë dizajner grafik, menaxher i medieve digjitale, animator, etj.

Inxhinieri Ndërtimore (Ndërtimtari) dhe Infrastrukturë:

Programi trajnon studentët në projektimin dhe ndërtimin e strukturave dhe infrastrukturës. Profesionet përfshijnë inxhinier ndërtimi, menaxher projekti, specialist në zhvillimin e infrastrukturës, etj.

Aktrim:

Ky program përgatit studentët për karrierë në teatër, film dhe media. Profesionet përfshijnë aktor, regjisor, producent teatri, etj.

Media dhe Komunikim:

Programi fokusohet në strategjitë e komunikimit dhe mediat bashkëkohore. Profesionet përfshijnë specialist i marrëdhënieve publike, menaxher i mediave sociale, gazetar, fotograf, montazhier, kameraman, etj.

Gjuhë Angleze:

Studentët mësojnë gjuhën dhe kulturën angleze dhe aftësitë për mësimdhënie dhe përkthim. Profesionet përfshijnë mësimdhënës i gjuhës angleze, përkthyes, redaktor, etj.

Juridik:

Ky program ofron njohuri të thelluara në drejtësi dhe ligj. Profesionet përfshijnë avokat, gjykatës, këshilltar ligjor, etj.

Studime të Sigurisë:

Studentët përgatiten për karrierë në sektorin e sigurisë dhe mbrojtjes. Profesionet përfshijnë analist i sigurisë, specialist i inteligjencës, ekspert i sigurisë kibernetike, menaxher i sigurisë, etj.

Shkenca të Sportit dhe të Lëvizjes:

Programi ofron njohuri në shkencat e sportit dhe rehabilitimin fizik. Profesionet përfshijnë trajner sportiv, fizioterapist, specialist i rehabilitimit, etj.

Shkenca Politike:

Studentët mësojnë për sistemet politike dhe politikat publike. Profesionet përfshijnë analist politik, këshilltar politik, diplomat, etj.

Menaxhim i Patundshmërive dhe Infrastrukturë:

Ky program përgatit studentët për menaxhimin e pronave dhe zhvillimin e infrastrukturës. Profesionet përfshijnë menaxher patundshmërish, zhvillues i pronave, specialist i planifikimit urban, etj.

Psikologji:

Studentët mësojnë për teoritë dhe praktikat psikologjike. Profesionet përfshijnë psikolog klinik, këshilltar, hulumtues psikologjik, etj.

Shkenca të Ushqimit dhe Bioteknologji:

Programi fokusohet në prodhimin dhe sigurinë e ushqimit dhe teknologjitë biologjike. Profesionet përfshijnë nutricionist, shkencëtar ushqimi, bioteknolog dhe specialist i kontrollit të cilësisë ushqimore.

Shkenca Kompjuterike dhe Inxhinieri:

Studentët mësojnë për zhvillimin e software-it dhe sistemeve kompjuterike. Profesionet përfshijnë inxhinier software, zhvillues aplikacionesh, specialist i rrjeteve kompjuterike, etj.

Sisteme të Informacionit:

Ky program trajnon studentët në menaxhimin dhe analizën e të dhënave. Profesionet përfshijnë analist i sistemeve informatike, menaxher i të dhënave, specialist i sigurisë kibernetike, etj.

Inxhinieri e Mekatronikës:

Studentët mësojnë për integrimin e mekanikës, elektronikës dhe informatikës. Profesionet përfshijnë inxhinier mekatronik, dizajner robotik, specialist i automatizimit industrial, etj.

Infermieri:

Programi ofron trajnime për kujdesin shëndetësor të pacientëve. Profesionet përfshijnë infermier, menaxher shëndetësor, specialist i kujdesit të pacientëve, etj.

Stomatologji:

Ky program përgatit studentët për të ofruar kujdes dentar. Profesionet përfshijnë dentist, kirurg oral,  specialist ortodont, etj.

Farmaci:

Studentët mësojnë për prodhimin dhe shpërndarjen e barnave. Profesionet përfshijnë farmacist, menaxher farmaceutik, specialist i barnave klinike, etj.

Teknik Dentar:

Programi trajnon studentët për të krijuar dhe mirëmbajtur pajisje dentare. Profesionet përfshijnë teknik dentar, dizajner protezash, specialist laboratorik dentar, etj.

Teknik i Radiologjisë:

Studentët mësojnë të përdorin teknologjinë e imazherisë mjekësore për diagnozë dhe trajtim. Profesionet përfshijnë teknik radiologjisë, specialist imazherie, teknolog radiologjik, etj.

Arkitekturë dhe Planifikim Hapësinor:

Programi përgatit studentët për të dizajnuar ndërtesa dhe hapësira urbane. Profesionet përfshijnë arkitekt, planifikues urban, dizajner peisazhi, etj.

Menaxhment, Biznes dhe Ekonomi:

Studentët zhvillojnë aftësi për menaxhimin e organizatave dhe ekonomisë. Profesionet përfshijnë menaxher biznesi, kontabilist, analist ekonomik,  konsulent menaxhimi, etj.

Këto programe janë hartuar në përputhje me profesionet më të kërkuara në tregun e punës, duke u mundësuar të rinjve punësim më të shpejtë dhe sukses në profesionin që ata kanë zgjedhur.

UBT është unike dhe ofron një qasje multidisiplinare me ofertën më të mirë dhe programet më moderne, në harmoni me universitetet më të mëdha të Evropës.

Zgjedh UBT-në dhe bëhu pjesë e një institucioni lider që ju drejton drejt suksesit!

Leading the Way

#jointheLEADER

Në një ceremoni solemne të organizuar në Prishtinë për të nderuar 25-vjetorin e çlirimit të Kosovës, Asociacioni i Gazetarëve të Kosovës (AGK) ka ndarë mirënjohje të veçanta për më shumë se 400 profesionistë të medias nga Kosova, Shqipëria dhe Maqedonia e Veriut, si dhe për gazetarë ndërkombëtarë të cilët kontribuan në raportimin nga Kosova gjatë periudhës së okupimit dhe luftës në vitet 1998-1999.

Mirënjohjet u ndanë për të njohur dhe vlerësuar kontributin e jashtëzakonshëm të këtyre individëve në rrugën drejt lirisë së shtypit dhe të informimit gjatë kohës kur Kosova përballej me sfidat më të mëdha historike. Çdo mirënjohje u shoqërua me fjalë falenderimi dhe përshëndetje për të gjithë ata që me profesionalizmin dhe vendosmërinë e tyre, kontribuan në dokumentimin dhe shpërndarjen e lajmeve në një kohë të vështirë për vendin.

Ferid Selimi, dekan i Fakultetit të Medias dhe Komunikimit në UBT, u nderua me një nga mirënjohjet për kontributin e tij në fushën e gazetarisë gjatë kësaj periudhe të vështirë. Ai ka shprehur emocionin e tij për këtë vlerësim dhe ka falënderuar Asociacionin e Gazetarëve të Kosovës për vlerësimin dhe për njohjen e punës së tij dhe të të gjithë atyre që bashkëpunuan me të.

“Ishte fund korriku a fillim gushti i vitit 1983, (asokohe, unë 20 vjeçar) kur së bashku me Qani Mehmedin (Redaktor i atëhershëm në revistën javore “Zëri i Rinisë”, Qaniu tashmë i ndjerë) zhvilluam intervistën e parë me Nerimane Kamberin (aso kohe 16 vjeçare) që sapo kishte botuar romanin e saj të parë në gjuhën frënge në Belgjikë. Për kohën ishte sensacion, sepse Nerimanja 16 vjeçare ishte bërë autorja më e re shqiptare që kishte botuar roman.  Intervista me titull: “Vasha e ambicieve të mëdha” u botua në Zëri i Rinisë. Ishte ky shkrimi i parë imi më serioz në gazetari, e që më hapi udhë për gazetar.  Pas 41 viteve angazhim në gazetari, në fillim si ndjekës dhe shkrues i ngjarjeve, e më pas edhe në edukimin e brezave të rinj, në vitin 2024, AGK më ndan Mirënjohje me motivin: “Për kontribut të jashtëzakonshëm në gazetari dhe media, në rrethana të okupimit, para dhe gjatë luftës në Kosovë 1998-99” Faleminderit!”, shkruan Selimi.

Safet Zejnullahu, ligjërues në Fakultetin Media dhe Komunikim në UBT, është një nga ata gazetarë që kontribuoi gjatë periudhës së okupimit dhe luftës në Kosovë në vitet 1998-1999. Ai është nderuar me çmimin për “kontributin e jashtëzakonshëm në gazetari dhe media, në rrethana të okupimit, para dhe gjatë luftës në Kosovë”.

Përveç kontributit në fushën e gazetarisë, Zejnullahu vlerëson dhe përmend me respekt dhe mirënjohje kolegët dhe udhëheqësit e tjerë të QIK-ut dhe të zyrave të Kosovës nëpër botë, që ndihmuan në shpërndarjen e lajmeve dhe mundën terrin informativ.

“1990-1999 – koha kur gazetarët shqiptarë e fituan betejën e tyre kundër Serbisë. Më erdhi sot mirënjohja nga AGK për kontribut në gazetarinë e Kosovës në rrethana okupimi, aparteidi e lufte.  Faleminderit AGK! Kontributin më të madh në këtë periudhë (edhe jetësor, sepse nuk besoj se do ta kaloj asnjëherë atë angazhim, përkushtim e, mbi të gjitha, sukses e arritje kulmore si media) e kam dhënë në Qendrën për Informim të Kosovës (QIK). Bashkë me kolegët e medieve të tjera, atyre vendore e atyre ndërkombëtare, e mundëm terrin informative të imponuar nga Serbia. Një luftë e fituar edhe në fushën e medias, një detyrë e kryer me nder nga të gjitha gazetarët”, shkruan Zejnullahu.

Zejnullahu duke falënderuar AGK-në, kujton edhe bashkëpunëtorët e asaj kohe të cilëve me emër e mbiemër ia rikujtoi dhe vlerësoi kontributin.

“Ndjej për borxh (për gjeneratat e reja) të sjell këtu emrat e të gjithë atyre që dhanë kontribut në QIK: Nismëtarët: Ibrahim Berisha, Mehmet Kraja, Avni Spahiu, Lindita Aliu. Ekipi që barti barrën më të madhe në kohën më të vështirë: Enver Maloku, Xhemail Mustafa, Sabedin Haliti, Muhamet Hamiti, Skender Hyseni, Hilmi Zogiani, Shefki Ukaj, Bajram Mjeku, Safet Zejnullahu, Vjosa Sadriu, Refki Morina, Nazim Lleshi, Ibrahim Gashi, Ramadan Muçolli, Sanije Berisha, Fatmir Hadri, Adnan Ruhani, Remzi Ademi, Edmond Hajrullaaga, Mujë Ferati, Behram Krasniqi, Ismet Berisha”, shkruan ligjëruesi Zejnullahu në rrjetin e tij social në Facebook. Pa harruar asnjëherë kontributin e udhëheqësve dhe personelit të zyrave të Kosovës anekënd globit, të cilët i shpërndanë lajmet tona (në shqip, anglisht, gjermanisht e frëngjisht). Kontribut i veçantë: të gjithë kryetarët e Komisioneve për Informim nëpër të gjitha vendbanimet e Kosovës. Pa ta, informatat nuk do të arrinin me kohë dhe do të duhej kohë për t’i verifikuar. Shënim: Le të mos harrojmë se, në krye me Enver Malokun, QIK-u nxori gazetën e parë të mbrëmjes në Kosovë”, shkruan Zejnullahu.

Musa Sabedini, ligjërues në Fakultetin Media dhe Komunikim në UBT, u nderua po ashtu me çmimin për “kontributin e jashtëzakonshëm në gazetari dhe media, në rrethana të okupimit, para dhe gjatë luftës në Kosovë”. Sabedini shprehet se ky vlerësim i jep vlerë dhe kuptim punës sfiduese të të bërit gazetari në Kosovë.

“Kjo është një mirënjohje e dhënë nga AGPK-ja, një falënderim nga zemra. Realisht ditën kur janë ndarë mirënjohjet isha në Tiranë dhe nuk kisha mundësi të isha prezent edhe pse realisht nuk më kanë informuar që do të marrë mirënjohje. Megjithatë pas katër çmimeve të fituara për gazetari hulumtuese dhe shumë mirënjohje e shpërblime tjera, që ndërlidhën me punën time profesionale në gazetari, edhe kjo mirënjohje i jep vlerë dhe kuptim punës sonë shumë sfiduese, e të dobishme për shoqërinë dhe vet ngritjen e cilësisë, në të bërit gazetari në Kosovë”, shkruan Sabedini në rrjetin e tij social.

Në këtë ceremoni, me mirënjohje u nderuan mbi 400 gazetarë, kameramanë e fotoreporterë, nga Kosova, Shqipëria e Maqedonia e Veriut, si dhe ata ndërkombëtarë që kanë raportuar në atë kohë nga Kosova./UBTNews/

D.E

UBT ka nënshkruar një marrëveshje bashkëpunimi me Bashkinë e Kukësit. Kjo marrëveshje siguron programe të përbashkëta bashkëpunimi në zhvillimin dhe implementimin e programeve për zhvillim ekonomik, urban dhe industrial të Bashkisë Kukës dhe aktiviteteve të tjera në interes të përbashkët.

Bashkëpunimi mes UBT-së dhe Bashkisë së Kukësit parasheh zhvillimin e qëndrueshëm lokal duke përpiluar strategji, plane dhe projekte zhvillimore, urbane dhe sektorë të ndryshëm të jetës, përkrahjen e të rinjve në ngritjen e kapaciteteve profesionale, në punësim, ndërmarrësi dhe aktivitete të tjera inovative, organizimin e përbashkët të eventeve me interes për komunitetin, përgatitjen dhe pjesëmarrjen e përbashkët në projekte zhvillimore në kontekst lokal, rajonal, evropian dhe ndërkombëtar.

Kjo marrëveshje përforcon përpjekjet e UBT-së për të kontribuar në zhvillimin e komuniteteve lokale dhe për të krijuar mundësi të reja për të rinjtë dhe profesionistët në rajonin e Kukësit.

Në një ceremoni të mbajtur me rastin e ndarjes së Çmimit Tradicional të UBT-së “Leadership Excellence Award”, kryetari i Bashkisë së Portos, Rui Moreira, u nderua për kontributin e tij të shquar në zhvillimin dhe udhëheqjen e qytetit të Portos.

Vendimi për të ndarë këtë çmim u mor nën patronatin e Presidentit të UBT-së, Prof. Dr. Edmond Hajrizi, dhe u bë i ditur nga Këshilli Akademik i Universitetit.

Rektori Hajrizi u përqendrua në rëndësinë e roli të liderëve në përmirësimin e jetës shoqërore dhe zhvillimin e komuniteteve gjatë një deklarate të tij të fundit. Ai vlerësoi kontributin themelor të kryetarit Rui Moreira në avancimin dhe transformimin e qytetit të Portos, duke e cilësuar atë si një model frymëzimi për liderët e tjerë në Evropë dhe më gjerë.

Hajrizi theksoi se kryetari Moreira ka shërbyer si një shembull i mirë për të treguar se si një lider mund të ndikojë në zhvillimin e qytetit dhe të kontribuojë në rritjen e cilësisë së jetës për banorët e tij. Ai gjithashtu e përshkroi kryetarin si një person frymëzues për të tjerët, duke inkurajuar liderët e tjerë të marrin masa dhe të promovojnë inovacionin dhe përparimin në komunitetet e tyre.

Në këtë kontekst, rektori Hajrizi theksoi se bashkëpunimi dhe shkëmbimi i përvojave me liderë të suksesshëm si Rui Moreira ka qenë një nga elementët kyç për suksesin dhe avancimin e UBT-së si një universiteti i inovacionit dhe arsimit të lartë në Kosovë dhe rajon.

Në anën tjetër, kryetari Rui Moreira, duke pranuar këtë çmim të lartë, shprehu mirënjohjen e tij për njohjen e dhënë dhe theksoi rëndësinë e bashkëpunimit të ngushtë mes institucioneve akademike dhe autoriteteve lokale.

Rui Moreira theksoi se UBT është një institucion i arsimit të lartë që ndihmon në promovimin e një shoqërie të bazuar në dije dhe zhvillimin e kapitalit njerëzor për të krijuar prosperitet dhe cilësi të jetës për popullatën. Ai vlerësoi rolin e UBT-së si një nga institucionet më inovative jo vetëm në Kosovë, por edhe në rajonin e gjerë.

UBT, sipas kryetarit Moreira, është një universitet prestigjioz që ka një rol kyç në përmirësimin e cilësisë së arsimit dhe në zhvillimin e një mjedisi të përshtatshëm për rritjen e aftësive akademike dhe profesionale të studentëve të saj. Ky institucion është konsideruar si një shembull i suksesshëm për inovacionin dhe përparimin e arsimit të lartë në rajon.

“UBT është padyshim një nga institucionet më inovative të arsimit të lartë, jo vetëm në Kosovë por në rajon. Është një universitet prestigjioz me rëndësi qendrore për rajonin, domethënë për promovimin e një shoqërie të bazuar në njohuri dhe trajnimin e kapitalit njerëzor të aftë për të gjeneruar prosperitet, qëndrueshmëri dhe cilësi të jetës për popullatën”, u shpreh Moreira, kryetari i Portos.

Ky akt nderi tregon për respektin dhe vlerësimin e shfaqur ndaj kontributit të kryetarit Moreira në përmirësimin e jetës urbane dhe si model tek qytetarët për zhvillim të qëndrueshëm dhe frymëzim të tjerëve në fushën e udhëheqjes./UBTNews/