Komisioni Qendror i Zgjedhjeve (KQZ) në mbledhjen e djeshme ka prezantuar raportin lidhur me përgatitjet e procesit zgjedhor, me theks të veçantë për fillimin e periudhës së votimit jashtë Kosovës.

Kjo vlen për 43.933 shtetasit e Kosovës, të cilët janë regjistruar për të votuar përmes postës në Zgjedhjet Lokale për Kryetarë të Komunave dhe për Kuvende Komunale.

Drejtori i Zyrës për Regjistrim, Certifikim dhe Kontrollim Financiar të Partive Politike në KQZ, Besnik Buzhala bëri të ditur se deri më tani, rreth 10 mijë pako individuale me fletëvotime janë dërguar jashtë Kosovës, ndërsa edhe 5 mijë të tjera janë kompletuar dhe do të dërgohen më tutje.

“Sot më datë 17 shtator në orën 13:00 janë kompletuar rreth 15 mijë pako individuale me fletëvotime dhe sipas konfirmimit nga posta dhe Telekomi i Kosovës rreth 10,000 pako tashmë janë dërguar jashtë Kosovës, ku pjesa më e madhe e tyre janë për shtetet Austri dhe Gjermani. Nëse marrim për bazë numrin e votuesve të regjistruar suksesshëm që në total është 43 mijën e 993, i bie se janë proceduar rreth 34 për qind të votuesve të regjistruar suksesshëm”, tha ai.

Ai po ashtu theksoi se nëse vazhdojnë me këtë ritëm të punës, dërgimi i të gjitha fletëvotimeve për qytetarët e regjistruar jashtë vendit do të përfundojë deri në fundjavë.

Në këtë mbledhje, KQZ konfirmoi adresat e kutive postare për votimin me postë nga jashtë Kosovës.

Me qëllim të ofrimit të mundësisë për votim për shtetasit që janë regjistruar për të votuar përmes postës, kutitë postare janë funksionale në këto shtete: Australi, Austri, Belgjikë, Çeki, Danimarkë, Francë, Gjermani, Holandë, Hungari, Itali, Kanada, Kosovë, Kroaci, Mali i Zi, Maqedonia e Veriut, Mbretëria e Bashkuar, Norvegji, ShBA, Shqipëri, Slloveni, Suedi, Turqi dhe Zvicër.

Përveç kësaj, gjatë takimit të sotëm u diskutua edhe për pjesëmarrjen e Komisionit Qendror të Zgjedhjeve në vëzhgim të zgjedhjeve që do të mbahen në Maqedoninë e Veriut, të cilat do të mbahen një javë pas atyre në Kosovë dhe po ashtu për pjesëmarrjen e disa anëtarëve të KQZ në një konferencë në Tiranë./S.K/KP/

Moti me diell dhe vranësira te shpërndara pritet të mbajë edhe sot në vendin tonë.

Sipas Institutit Hidrometeorologjik të Kosovës, temperaturat minimale do të sillen ndërmjet 7-10 gradë Celsius, ndërsa ato maksimale ndërmjet 24 dhe 27 gradë Celsius.

Era do të fryjë nga verilindja 1-5 m/s. /S.K/KP/

UBT ka shpallur hapjen zyrtare të thirrjes për dorëzimin e abstrakteve për Konferencën Ndërkombëtare për Stomatologji (IC-DS 2025), e cila do të zhvillohet në kuadër të aktiviteteve të edicionit të 14-të të Konferencës Ndërkombëtare të UBT-të.

Kjo konferencë synon të bashkojë studiues, profesionistë dhe praktikues të fushës së stomatologjisë nga vende të ndryshme të botës, për të ndarë njohuri, përvoja dhe rezultatet më të fundit kërkimore në këtë fushë gjithnjë në zhvillim.

Fokusimi tematik

IC-DS 2025 mbulon një spektër të gjerë temash nga fusha e shkencave dentare dhe disiplinave të ndërlidhura, përfshirë:

• Stomatologji e Përgjithshme
• Mjekësi Orale
• Kërkime në Stomatologji
• Inovacione dhe Avancime në Stomatologji
• Stomatologji me Laser
• Nano-Stomatologji
• Stomatologji Kozmetike
• Kirurgji Orale dhe Maksilofaciale
• Stomatologji Pediatrike
• Shëndeti Publik Dentar
• Stomatologji Restauruese
• Anesteziologji Dentare
• Higjiena Dentare
• Pedodontikë dhe Stomatologji Preventive
• Ortodontikë dhe Ortopedi Dentofaciale

Datat e rëndësishme për aplikuesit:

Dorëzimi i abstrakteve: deri më 10 tetor 2025

Njoftimi për pranim: më 17 tetor 2025

Rishikimi shkencor (peer-reviewed): më 17 tetor 2025

Regjistrimi i hershëm: deri më 17 tetor 2025

Regjistrimi i vonuar: deri më 20 tetor 2025

Dorëzimi i punimeve të plota: deri më 14 nëntor 2025

Dorëzimi i punimeve

Punimet që do të prezantohen në konferencë duhet të jenë origjinale, të papublikuara më parë dhe të mos jenë në shqyrtim në ndonjë konferencë apo revistë tjetër. Gjatësia maksimale e punimit është 6 faqe.

Të gjitha punimet që nuk përputhen me formatin e kërkuar do të refuzohen automatikisht. Për udhëzime më të detajuara rreth formatimit dhe dorëzimit, pjesëmarrësit inkurajohen të vizitojnë faqen zyrtare të konferencës në faqen e UBT-së.

UBT ka kënaqësinë t’i ftojë të gjithë të interesuarit – akademikë, profesionistë të shëndetit, studiues dhe studentë – të marrin pjesë në IC-DS 2025 dhe të kontribuojnë me punimet e tyre në këtë ngjarje me karakter ndërkombëtar dhe me rëndësi të veçantë për zhvillimin e shkencave dentare në rajon dhe më gjerë.

Për më shumë informacione, vizitoni faqen zyrtare të konferencës në UBT: KONFERENCA E UBT-së

Real Madridi ka marrë një lajm të keq pas ndeshjes së djeshme kundër Marsejës në Ligën e Kampionëve. Mbrojtësi anglez Trent Alexander-Arnold u detyrua të largohej nga fusha që në minutat e para për shkak të një dëmtimi.

Testet mjekësore të kryera kanë zbuluar një këputje muskulore në bicepsin femoris të këmbës së majtë.

Sipas raportimeve nga klubi madrilen, kohëzgjatja e rikuperimit pritet të jetë rreth dy muaj, çka nënkupton se lojtari do të humbasë disa ndeshje tepër të rëndësishme.

Alexander-Arnold nuk do të jetë i gatshëm për derbin e Madridit kundër Atlético Madridit, për El Clásicon ndaj Barcelonës në La Liga, si dhe për ndeshjen e fazës së grupeve në Ligën e Kampionëve kundër Juventusit më 22 tetor.

Ky është një problem serioz për trajnerin Carlo Ancelotti, i cili duhet të gjejë zgjidhje alternative për repartin defensiv në një periudhë të ngjeshur dhe vendimtare të sezonit./S.K/KP/