Kosova ka arritur një sukses të jashtëzakonshëm në garën botërore të robotikës që u mbajt në Athinë, duke u renditur si ekipi i parë nga rajoni. Ekipi kosovar i përgatitur dhe udhëhequr nga UBT, FIRST Global Kosova, arriti të jetë në vendin e 65 nga 180 ekipe që morën pjesë, duke e kaluar me sukses Slloveninë, Kroacinë, Serbinë, Bosnjën dhe Hercegovinën, Malin e Zi, Maqedoninë e Veriut dhe Shqipërinë.

Roboti i dizajnuar nga ekipi kosovar, nën udhëheqjen e mentores Elita Hajrizi, u vlerësua për performancën e tij të shkëlqyer. Ai ishte stabil, pa defekte dhe shumë produktiv, çka tregon për nivelin e lartë të aftësive dhe profesionalizmit të ekipit. Kjo përformancë e shkëlqyer është një dëshmi e punës së palodhur dhe përkushtimit të ekipit, që ka punuar me intensitet për të arritur këtë rezultat.

Mentorja Elita Hajrizi dhe anëtarja e ekipit, Harisa Haziri, u intervistuan nga televizioni grek, ERT News, ku theksuan rëndësinë e pjesëmarrjes në këtë garë ndërkombëtare.

Ekipi i Kosovës ka fituar po ashtu dy çmime globale për promovimin e STEAM dhe Robotics: Njëri për Video Story Telling dhe çmimi i dytë për kontributin në Social Media.

Zyra përfaqësuese e Kosovës ishte e pranishme gjatë gjithë ngjarjes, duke marrë pjesë në ceremoninë e hapjes dhe përfundimit të garës, duke e bërë të qartë angazhimin e Kosovës në promovimin e shkencës dhe teknologjisë.

Në përfundim të ngjarjes, Rektori i UBT-së, Prof. Dr. Edmond Hajrizi, është takuar Presidenti i FIRST Global Challenge, Dean Kamen, të cilit i ka bërë një kërkesë zyrtare për të organizuar këtë garë në vendin tonë në të ardhmen, duke synuar që të inkurajojë dhe mbështesë më tej zhvillimin e talenteve në fushën e robotikës. Ky hap do të ishte një mundësi e shkëlqyer për të nxitur pasionin e të rinjve për teknologjinë dhe inovacionin.

Në kuadër të shënimeve për Ditën Botërore të Turizmit 2024, Fakulteti i Turizmit i UBT-së, mori pjesë në një ngjarje të rëndësishme të organizuar nga Oda e Hotelierisë dhe Turizmit të Kosovës. Tema e këtij viti, “Turizmi dhe Paqja,” sjell në vëmendje rëndësinë e turizmit si një mjet për promovimin e mirëkuptimit dhe bashkëpunimit ndërkombëtar.

Gjatë këtij eventi, stafi akademik i Fakultetit të Turizmit, i përfaqësuar nga Prof.Ass.Dr. Kushtrim Dreshaj, u angazhua në një diskutim të thelluar mbi ndikimin e turizmit në zhvillimin ekonomik dhe social. Profesor Dreshaj, në fjalën e tij të hapjes, falenderoi organizatorët për mundësinë e organizimit të këtij eventi dhe për punën e tyre të palodhur në promovimin e turizmit si një faktor kyç për zhvillimin e Kosovës.

Ai theksoi se industria e turizmit jo vetëm që ofron mundësi për krijimin e vendeve të punës, por gjithashtu kontribuon në forcimin e lidhjeve kulturore dhe ekonomike mes vendeve. Sipas tij, sektori i turizmit ofron një gamë të gjerë mundësish punësimi, duke përfshirë hotelet, restoranet, agjencitë turistike, transportin dhe menaxhimin e destinacioneve turistike. Ai gjithashtu përmendi rëndësinë e shërbimeve kulturore, që janë thelbësore për tërheqjen e turistëve dhe për promovimin e kulturës vendase.

Në përfundim, Prof.Ass.Dr. Kushtrim Dreshaj ftoi të gjitha shoqatat, institucionet lokale dhe qendrore, si dhe aktorët e industrisë së turizmit, të bashkëpunojnë me Fakultetin e Turizmit në UBT. Ai nënvizoi angazhimin e Fakultetit për të ofruar mbështetje teorike dhe praktike, për të formuar ekspertë dhe njohës të fushës së turizmit.

Bashkëpunimi i tillë do të ndihmojë në zhvillimin e kapaciteteve të reja, në rritjen e standardeve të shërbimit dhe në promovimin e një turizmi të qëndrueshëm dhe të përgjegjshëm. Në këtë mënyrë, UBT qëndron i angazhuar për të kontribuar në një të ardhme më të ndritur për sektorin e turizmit në Kosovë, duke e bërë atë një motor të zhvillimit ekonomik dhe një urë lidhëse mes kulturave të ndryshme./UBTNews/

UBT ka njoftuar për iniciativën e veçantë për të mbështetur punonjësit e institucioneve të ndryshme. Të gjithë ata që punojnë në institucione të caktuara kanë mundësinë të përfitojnë një zbritje prej 20% në tarifat e regjistrimit për disa nga programet e ofruara.

Zbritjet e aplikuara përfshijnë:

Programi në Menaxhment Biznes dhe Ekonomi (M.B.E): Punonjësit e institucioneve bankare, qoftë ato publike apo private, mund të regjistrohen me një zbritje prej 20%.

Gazetarët në media: Të gjithë gazetarët që punojnë në media dhe portale (publike dhe private) do të përfitojnë një zbritje të ngjashme prej 20%.

Programet e drejtësisë: Punonjësit zyrtarë në institucionet e drejtësisë do të gëzojnë një zbritje prej 20% për programet e Drejtësisë, përfshirë E Drejtën Civile dhe të Pronës, si dhe E Drejta Penale.

Akademia e Policisë dhe Forca e Sigurisë së Kosovës (FSK): Anëtarët e Akademisë së Policisë dhe FSK-së do të përfitojnë gjithashtu një zbritje prej 20% në regjistrimin në programet e Masterit.

Shëndeti dhe Aktiviteti Fizik: Të gjithë punonjësit shëndetësorë do të kenë mundësinë të regjistrohen në programin Master në Shëndet dhe Aktivitet Fizik me një zbritje prej 20%.

UBT inkurajon të gjithë punonjësit e këtyre institucioneve të shfrytëzojnë këtë mundësi për të avancuar kualifikimet e tyre dhe për të kontribuar në zhvillimin e mëtejmë të fushave përkatëse. Regjistrimet janë të hapura dhe do të vazhdojnë për një periudhë të caktuar, ndaj është e rekomandueshme që të interesuarit të veprojnë sa më shpejt për të përfituar nga këto oferta të volitshme.

Për më shumë informacion dhe detaje mbi programet e ofruara, vizitoni faqen zyrtare të UBT-së ose kontaktoni me zyrën e informacioneve./UBTNews/

Rektori i UBT-së, Prof. Dr. Edmond Hajrizi, ishte folës në konferencën e organizuar nga platforma Improvate në Budapest për Qytetet e Mençura në Evropën Qendrore dhe Lindore. Kjo ngjarje prestigjioze mblodhi ekspertë, politikanë, inovatorë, kryetarë e nënkryetarë qytetesh, nga e gjithë bota për të eksploruar zgjidhje për zhvillimin urban të qëndrueshëm.

Rektori Hajrizi prezantoi ekosistemin e UBT-së të krijuar duke u mbështetur në kërkim dhe inovacion, i cili ndër tjerash shërben për zhvillim të qëndrueshëm për qytetet e mençura përmes aplikimit të teknologjive të reja dhe ideve inovative.

Rektori Hajrizi nënvizoi kontributin e UBT-së në ofrimin e zgjidhjeve të mençura në qytete të ndryshme në Kosovë e më gjerë, ndërsa kompanive pjesëmarrëse në konferencë i ofroi pikëtakim së shpejti në Qytetin e Mençur të UBT-së në Lipjan, për të bashkëbiseduar për krijimin e sinergjive të përbashkëta për aplikimin e përbashkët të zgjidhjeve të mençura në rajonin e Ballkanit Perëndimor.

Rektori Hajrizi gjithashtu vizitoi Ambasadën e Kosovës në Hungari, me ç’rast u takua me Ambasadorin Delfin Pllana, me të cilin diskutoi për mundësitë e rritjes së bashkëpunimit ndërmjet dy vendeve.