

Bota
Uashington, Agjencia e Mbrojtjes së Konsumatorit urdhërohet të ndërpresë punën
Published
4 months agoon
By
UBTnewsUASHINGTON – Administrata e Presidentit Trump ka urdhëruar Byronë e Mbrojtjes Financiare të Konsumatorëve (CFPB) që të ndërpresë pothuajse të gjithë funksionet e saj, duke mbyllur praktikisht një agjenci që u krijua për të mbrojtur konsumatorët pas krizës financiare të vitit 2008 dhe skandalit të kredive për blerjen e shtëpive.
Russell Vought, drejtori i ri i Zyrës së Menaxhimit dhe Buxhetit, udhëzoi CFPB-në, në një email të konfirmuar nga agjencia e lajmeve Associated Press të dërguar mbrëmjen e së shtunës, të ndalë punën për proceset në vijim dhe të mos fillojë asnjë hetim të ri. Agjencia ka tërhequr vëmendjen e konservatorëve që kur ish-Presidenti Barack Obama këmbënguli për krijimin e saj me legjislacionin e reformës financiare të vitit 2010, që pasoi krizën financiare të periudhës 2007-2008.
Mesazhi i dërguar me email gjithashtu urdhëroi CFPB-në të “ndërpriste të gjitha aktivitetet e mbikëqyrjes dhe ekzaminimit”.
Meqenëse CFPB-ja është krijuar nga Kongresi, do të duhej një akt i veçantë i Kongresit për ta eliminuar atë zyrtarisht. Por drejtuesi i agjencisë vendos sidoqoftë në lidhje me veprimtarinë e saj ligjzbatuese.
Në platformën e mediave sociale X, Elon Musk komentoi të premten: “U prehtë në paqe CFPB-ja” (“CFPB RIP”). Dhe faqja kryesore në internet e CFPB-së nuk funksionoi të dielën, e zëvendësuar me një mesazh se “faqja nuk gjendet”.
Ndërkohë në orët e vona të së shtunës, zoti Vought tha në një postim në mediat sociale se CFPB-ja nuk do të tërhiqte shumën e ardhshme të financimit nga Rezerva Federale, duke shtuar se rezervat e saj aktuale prej 711.6 milionë dollarësh janë “të tepruara”. Kongresi pati vendosur që buxheti i kësaj byroje të jepej nga Rezerva Federale, për ta mbrojtur atë nga trysnia politike.
Ky mekanizëm “që kontribuon prej kohësh për mos-përgjegjshmërinë e CFPB-së, tashmë po mbyllet”, tha zoti Vought në rrjetin ‘X’.
CFPB-ja thotë se ka arritur të lehtësojë financiarisht me rreth 20 miliardë dollarë konsumatorët amerikanë, që nga themelimi i saj, në formën e borxheve të anuluara, kompensimit dhe kredive të reduktuara. Muajin e kaluar, byroja paditi bankën Capital One me akuza për mashtrimin e konsumatorëve në lidhje me ofertat e saj për llogaritë e kursimeve me interes të lartë, duke përfituar për rrjedhojë mbi 2 miliardë dollarë që duhet t’u kishin shkuar klientëve në formën e interesit.
Dennis Kelleher, president i organizatës “Better Markets”, tha se, “kjo është arsyeja përse bankat më të mëdha të Wall Street-it dhe aleatët miliarderë të Trump-it e urrejnë byronë: pasi është një zbatuese efektive e ligjeve për financat dhe ka qëndruar krah për krah me qindra miliona amerikanë – republikanë dhe demokratë – përballë financierëve grabitqarë, mashtruesve dhe shkelësve”.
Masa ndaj CFPB-së gjithashtu vë në dukje tensionet mes premtimeve më populiste të Presidentit Trump për të ulur kostot për familjet e klasës punëtore dhe premtimit të tij për të reduktuar rregullat e qeverisë.
Gjatë fushatës, Presidenti Trump tha se do t’i kufizonte normat e interesit të kartave të kreditit në 10%, pasi ato u rritën në nivele mesatare rekord mbi 20%, kur Rezerva Federale rriti normat e interesit në 2022 dhe 2023. CFPB-ja kishte filluar punën për zbatimin e këtij propozimi.
Byroja mund të vazhdojë të pranojë ankesa, por nuk mund të fillojë hetime ose të vazhdojë me ato ekzistuese, sipas një personi në dijeni të proceseve të agjencisë, që kërkoi t’i ruhet anonimiteti. Memorandumi lë të kuptohet se ndalohet gjithashtu komunikimi me kompanitë, organizatat e konsumatorëve ose grupe të tjera të jashtme.
Ekipi i zotit Musk do të kishte gjithashtu qasje tek ankesat, hetimet dhe të dhënat e mbikëqyrjes rregullatore. Qasja do të ngrinte pikëpyetje të pakëndshme nëse kompania X e zotit Musk krijon një sistem të ri pagesash, pasi CFPB-ja ka të dhëna për kompani të ngjashme që do të ishin konkurrente me të, si Cash App, tha personi.
Email-i i zotit Vought u dërgua pasi një direktivë e ngjashme u dha nga Sekretari i Thesarit, Scott Bessent më 3 shkurt dhe është masa më e fundit e administratës së Presidentit Trump për të kufizuar me shpejtësi punën e agjencive federale që i ka konsideruar të tepërta.
Ish-Presidenti Obama udhëhoqi përpjekjet për krijimin e byrosë në vazhdën e krizës së strehimit dhe asaj financiare të viteve 2007-2008, e cila u shkaktua pjesërisht nga dhënia e huave të parregullta për blerjen e shtëpive. Ideja për krijimin e kësaj byroje ishte propozuar nga senatorja demokrate nga Massachusetts, Elizabeth Warren. Ndaj byrosë janë ngritur padi nga banka të mëdha dhe shoqatat e sektorit financiar.
“Vought po u hap bankave të mëdha dhe korporatave gjigante dritën jeshile për të mashtruar familjet“, tha senatorja Warren.
Javën e kaluar, senatorja Warren i bëri thirrje Presidentit Trump që të punojë me byronë për të mbrojtur amerikanët nga praktika e bankave që mbyllin llogaritë e klientëve sepse besojnë se ato paraqesin rreziqe financiare, ligjore apo për reputacionin e bankave.
Në email-in e zotit Vought thuhej se Presidenti Donald Trump e kishte ngarkuar atë të premten me detyrën e drejtorit të përkohshëm të CFPB-së. Presidenti Trump shkarkoi drejtorin e mëparshëm të byrosë, Rohit Chopra, më 1 shkurt. Zoti Vought ishte ndër hartuesit e Projektit 2025, një plan politikash për Shtëpinë e Bardhë, plan që Presidenti Trump u përpoq ta mohonte gjatë fushatës së vitit të kaluar.
Nën drejtimin e zotit Chopra, CFPB-ja miratoi rregulla për të kufizuar tarifat bankare dhe ka propozuar kufizime për kompanitë ndërmjetëse që kanë qasje tek informacione personale, si numrat e Sigurimeve Shoqërore.
Bota
Von der Leyen: Evropa duhet të forcojë mbrojtjen, të pranojë Ukrainën në BE
Published
12 hours agoon
May 30, 2025By
UBTnews
Presidentja e Komisionit Evropian, Ursula von der Leyen, ka theksuar se Evropa duhet të mbrojë pavarësinë e saj duke rritur shpenzimet për mbrojtjen dhe duke integruar Ukrainën në Bashkimin Evropian.
Ajo ka përmendur katër detyrat kryesore që BE-ja duhet të realizojë për të arritur këto synime, duke përfshirë forcimin e kapacitetit të mbrojtjes, rritjen e inovacionit për rritjen ekonomike, zgjerimin e BE-së dhe forcimin e demokracisë për të mbrojtur shtetet anëtare nga kërcënimet e brendshme dhe të jashtme.
Sipas von der Leyen, një nga arritjet më të mëdha është angazhimi për të ofruar deri në 800 miliardë euro fonde për mbrojtjen, një veprim që, siç tha ajo, ishte i pamundur vetëm pak vite më parë.
“Fakti që tani po ofrojmë deri në 800 miliardë euro fonde për mbrojtjen ishte i pamundur vetëm pak vite më parë,” theksoi Presidentja e Komisionit Evropian. “Po e bëjmë këtë sepse duam të mbrojmë paqen me të gjitha forcat tona.”
Von der Leyen paralajmëroi gjithashtu se një rend i ri ndërkombëtar do të shfaqet deri në fund të kësaj dekade, dhe se Evropa duhet të luajë një rol aktiv në formësimin e këtij rendi të ri për të shmangur pasojat e tij për kontinentin dhe për botën.
Ajo theksoi se zgjerimi i BE-së është një detyrë kyçe, duke e konsideruar anëtarësimin e Ukrainës, Moldavisë, vendeve të Ballkanit Perëndimor dhe Gjeorgjisë si një hap të rëndësishëm për forcimin e Bashkimit Evropian.
“Jam thellësisht e bindur se historia tani po na thërret. Ashtu si në vitin 1989, kur era e ndryshimit përfshiu Evropën,” përfundoi von der Leyen, duke sugjeruar se momenti aktual është një mundësi për ndryshime thelbësore në rajon.
Bota
Meloni vizitë në Kazakistan, nënshkruhen marrëveshje në vlerën 4 miliardë euro
Published
13 hours agoon
May 30, 2025By
UBTnews
Italia dhe Kazakistani kanë nënshkruar një sërë marrëveshjesh me vlerë 4 miliardë euro gjatë një vizite të kryeministres italiane Giorgia Meloni në Astana.
Marrëveshjet ishin në një sërë sektorësh, duke përfshirë naftën dhe gazin, energjinë e rinovueshme dhe menaxhimin e ujit.
Meloni tha se nuk e konsideronte vizitën e saj “thjesht një formalitet, por thelbësor”.
“Italia ishte vendi i parë i BE-së që vendosi të investonte në marrëdhëniet me Azinë Qendrore dhe shtetet anëtare të saj individuale, duke krijuar një format të qëndrueshëm për shkëmbimin e ideve”, vazhdoi Meloni.
Kryeministrja italiane shtoi se Samiti BE-Azi Qendrore i mbajtur në prill kishte rritur marrëdhëniet midis rajoneve.
Bota
Kina: SHBA të shmangë tensionet dhe të ndalojnë shitjen e armëve Tajvanit
Published
14 hours agoon
May 30, 2025By
UBTnews
Çështja e Tajvanit është në thelb të interesave themelore të Kinës dhe është vija e parë e kuqe që nuk duhet të kalohet në marrëdhëniet Kinë-SHBA, deklaroi zëdhënësi i Ministrisë së Jashtme kineze, Lin Jian.
Jiang komentoi mbi disa raporte të mediave ndërkombëtare se Uashingtoni synon të rrisë shitjet e armëve në Taipei përtej 18,3 miliardë dollarëve të arritur gjatë mandatit të parë të presidentit Donald Trump.
”Pekini kundërshton fuqimisht shitjet e armëve amerikane në rajonin e Tajvanit pasi kjo çon në një përshkallëzim”, theksoi ai.
”Shtetet e Bashkuata të Amerikës duhet të shmangin faktorët e rinj të tensionit me ne”, theksoi Jiang./atsh
Bota
Kina do të rifillojë importet e produkteve të detit nga Japonia
Published
15 hours agoon
May 30, 2025By
UBTnews
Kina ka rënë dakord të fillojë procedurat për të rifilluar importet e produkteve të detit nga Japonia, tha një zyrtar japonez të premten, sipas raporteve të mediave lokale.
“Të dy vendet kanë rënë dakord për ‘kërkesat teknike për rifillimin e eksporteve të produkteve të detit’ drejt Kinës“, citoi Agjencia e Lajmeve Kyodo Sekretarin e Përgjithshëm të Kabinetit, Yoshimasa Hayashi.
Sipas saj, pritet që Kina të lëshojë gjithashtu një njoftim për lehtësimin e ndalimit të përgjithshëm, i cili është në fuqi që nga viti 2023.
Kina vendosi një ndalim të plotë të importeve të produkteve të detit nga Japonia menjëherë pasi filloi lëshimi i ujit radioaktiv të trajtuar nga centrali bërthamor i dëmtuar në Fukushima, në gusht të vitit 2023.
Ndalimi u vendos për të mbrojtur shëndetin e konsumatorëve dhe për të parandaluar ndotjen e mundshme, shkruan Anadolu.
Në shtatorin e kaluar, Kina ra dakord të rifillojë importet e produkteve të detit nga Japonia me kusht që vende të treta, përfshirë edhe vetë Kinën, të marrin pjesë në monitorimin e shkarkimit të ujit të trajtuar radioaktiv nga centrali i Fukushima-s në det./kosovapress

Lajm i mirë për pronarët e automjeteve elektrike

“Ëndrra pa kufi, Opera pa mure” – publikohen datat e Ramë Lahaj International Opera Festival

Këto zakone po ju pengojnë të jeni më inteligjent, ja cilat duhen shmangur

UBT International Smart Schools diplomon nxënësit e brezit të ri teknologjik – Ceremonia mbahet këtë të shtunë në Parkun Shkencor

Vitamina D mund të ngadalësojë plakjen

Von der Leyen: Evropa duhet të forcojë mbrojtjen, të pranojë Ukrainën në BE

Profesorët e UBT-së prezantuan projektin COWEB në takimin “Cluster” të organizuar nga Erasmus Plus Kosova

Studentët e programit Inxhinieri e Ndërtimit dhe Infrastrukturë në UBT realizojnë vizitë studimore në kuadër të moduleve “Mekanika e Dherave” dhe “Siguria në Punë”

Studentët e vitit të tretë në Menaxhment, Biznes dhe Ekonomi në UBT përfundojnë me sukses trajnimin praktik “Micro Business Game”
Të kërkuara
-
Lajmet nga UBT1 month ago
Profesori, Arsim Hajdari, doktoron me temën “New Perspective of Biological Therapy in Treatment of Age-Related Macular Degeneration”
-
Lajmet2 months ago
Studentët e Psikologjisë në UBT zhvilluan një vizitë studimore në qendrën psikologjike “Radix” dhe Asociacionin Kosovar për Psikoterapi Trupore
-
Kulturë2 months ago
Shkëlqeu me rolin e tij në ‘Kontesha Arduini’, intervistë me Mirsad Ferati
-
Kulturë2 months ago
27 marsi/Dita Ndërkombëtare e Teatrit! Mitrovica sjell shfaqjen “Kontesha Arduini”, histori magjepëse që nuk duhet humbur