Aktualitet

Turqia përgatitet për mbylljen e parë të plotë

Published

4 years ago

April 29, 2021

Betim Gashi

Rrugët janë të mbushura me qytetarë, e po ashtu edhe qendrat tregtare dhe trafiku është i ngarkuar.

Disa po nxitojnë te stacioni kryesor i autobusëve për të dal nga Stambolli, ndërsa të tjerët po blejnë sasi të alkoolit.

Kjo është atmosfera në Turqi ndërsa po përgatitet që sot më vonë të futet në mbylljen e parë të plotë si pasojë e pandemisë, për të frenuar rritjen e fundit të numrit të rasteve pozitive me koronavirus dhe rasteve të vdekjes si pasojë e COVID-19.

Grupet e WhatsAppit janë dominuar me mesazhet se si do të jetë jeta në ditët në vijim.

Në këtë periudhë vitin e kaluar, Turqia ishte parë si storie e suksesit për masat e hershme të marra për të luftuar koronavirusin dhe madje edhe ishte përgëzuar nga Organizata Botërore e Shëndetësisë.

Një vit më pas, Turqia është një nga vendet që është prekur më së rëndi nga COVID-i, me përqindjen më të lartë të infeksionit aktualisht në Evropë.

Ankara është ende krenare për shifrën relativisht të ulët të numrit të vdekjeve, rreth 39 mijë, dhe autoritetet thonë se pandemia është ende nën kontroll, fal sistemit të fortë shëndetësor në vend. Por rritja e numrit të rasteve është shqetësuese.

Pas një periudhe të dytë të masave kufizuese në nëntorin e kaluar, numri i rasteve ditore ka rënë në rreth 6000 në një periudhë në mesin e shkurtit.

Por, me të nisur zbutja e masave në mars, ka goditur vala e re në Turqi.

Qeveria mori vendim për të rikthyer masat kufizuese në fillim të prillit, por nuk ka mjaftuar për të parandaluar përhapjen.

Në kulmin në prill, kishte më tepër se 60 mijë raste të reja pozitive në ditë dhe më tepër es 300 vdekje.

Sipas kritikëve, Qeveria ka hequr masat tepër herët dhe procesi i vaksinimit nuk ka shkuar mjaftueshëm shpejt.

Më tepër se 22 milionë persona janë vaksinuar deri më tash në Turqi, një shtet me 82 milionë banorë.

Turqia kryesisht përdor vaksinën kineze Sinovac, si dhe ka edhe një sasi relativisht të vogël të dozave të vaksinës Pfizer/BioNTech.

Ministri i Shëndetësisë, Fahrettin Koca, dje ka njoftuar se është arritur marrëveshja për të blerë 50 milionë doza të vaksinës ruse Sputnik V, dhe se pritet të aprovohet kjo vaksinë për përdorim emergjent së shpejti.

Shkencëtarët besojnë se varianti i ri, veçanërisht ai britanik, ka ndikuar në rritje të nivelit të infeksionit.

Cilado të jetë arsyeja për valën e re, presidenti i Turqisë, Recep Tayyip Erdogan, më në fund ka vendosur për mbyllje të plotë, që do të hyjë në fuqi nga sot në ora 19:00 me kohë lokale dhe do të jetë në fuqi deri më 17 maj.

Sipas masave të reja qytetarët duhet të qëndrojnë në shtëpi me përjashtim të daljeve esenciale, si blerje të ushqimeve apo tretman emergjent mjekësor, udhëtimet mes qyteteve do të mund të bëhen vetëm me një aprovim zyrtar, shkollat do të mbyllen dhe do të lejohet numër i kufizuar i qytetarëve në transport publik, shitja e alkoolit do të kufizohet.

Shumë ekspertë janë të lumtur me këtë mbyllje të re, pasi thonë se është e nevojshme.

Mirëpo, disa thonë se mbyllja nuk do të zgjasë mjaftueshëm për të luftuar rritjen e rasteve.

Qeveria e Turqisë në anën tjetër ka një shënjestër të qartë.

“Në një kohë kur Evropa është duke u futur në fazën e rihapjes, ne duhet të reduktojmë në mënyrë të shpejtë rastet në nën 5000, e jo të mbesim prapa”, ka thënë Erdogan.

Masat do të vazhdojnë përgjatë gjithë muajit të Ramazanit e po ashtu festës së Fitër Bajramit.

Vitin e kaluar Turqia ka parë një rënie prej 70 për qind të vizitorëve të huaj. Industria e turizmit shpreson që mbyllja do të ndihmojë për të rihapur më pasa vendin në kohën për sezonën verore.

Bota

Kuba goditet nga një tërmet me magnitudë 5.9, s’ka raportime për dëme

Published

7 hours ago

December 23, 2024

UBT NEWS

Një tërmet me magnitudë 5.9 goditi Kubën të hënën, sipas Qendrës Sizmologjike Evropiane-Mesdhetare (EMSC). Autoritetet lokale kanë njoftuar se nuk ka pasur dëme serioze dhe nuk ka raporte për të vdekur apo të lënduar. Tërmeti u regjistrua në një thellësi prej 25 km (15.53 milje). Shërbimi Sizmologjik Kombëtar Kuban e ka raportuar ngjarjen si një tërmet me magnitudë 6.1 ballë, me pasgoditje të shumta në orët e para të mëngjesit, të ndodhura në brigjet lindore të Santiago de Kubës.

Në muajin nëntor, një tërmet me magnitudë 6.9 goditi brigjet e provincës fqinje Granma, duke shkaktuar disa dëme strukturore, por pa viktima. Zona e Santiago de Kubës është e njohur për aktivitetin sizmik, pasi aty kalon një vijë thyerje që ndan pllakën e Amerikës së Veriut dhe pllakën e Karaibeve. Kryeqyteti kuban, Havana, nuk është prekur nga tërmeti./UBTNews/

Bota

Shefi i NATO-s i shqetësuar për sigurinë afatgjate të aleancës

Published

7 hours ago

December 23, 2024

UBTnews

Sekretari i Përgjithshëm i NATO-s, Mark Rutte, ka thënë se aktualisht nuk sheh rrezik të ndonjë sulmi rus në territorin e aleancës, mirëpo e sheh të ardhmen me shqetësim.

“Nuk ka vend për frikë tani”, ka thënë ai në një intervistë për agjencinë e lajmeve dpa, i pyetur nëse vendet e NATO-s duhet të frikësohen nga Rusia, mirëpo ka shtuar se “nëse nuk shpenzojmë më shumë dhe nuk prodhojmë më shumë, do të kemi problem serioz në katër, pesë vjet”.

Rusia e ka zgjeruar në masë të madhe prodhimin për qëllime të mbrojtjes, pas nisjes së luftës në Ukrainë.

Sipas Ruttes, aleatët e NATO-s nuk janë duke bërë shumë për ta luftuar këtë gjë.

“Na duhet ta rrisim prodhimin për mbrojtje, bazën industriale të mbrojtjes”, ka thënë ai.

“Duhet krijuar linja të reja prodhimi, ndërrime shtesë, sepse nuk jemi duke prodhuar mjaftueshëm pajisje ushtarake për t’u mbrojtur në afat të gjatë”.

Rutte pret edhe presion prej presidentit të zgjedhur amerikan, Donald Trump, i cili ka kërcënuar me tërheqje prej NATO-s përgjatë mandatit të parë, nëse aleatët nuk shpenzojnë për mbrojtje 2 për qind të bruto prodhimit të brendshëm.

“Ai do të kërkojë që të bëjmë më shumë. Dhe ka të drejtë. Duhet të bëjmë më shumë”, ka thënë Rutte.

“Aleatët e NATO-s janë të përkushtuar që të investojnë 2 për qind të bruto prodhimit të brendshëm në mbrojtje. Dhe shumë vende evropiane tani e kanë arritur atë synim”, ka thënë Rutte.

Megjithatë, ai ka thënë se sheh problem në mbrojtje kundër Rusisë, nëse nuk rriten shpenzimet edhe më shumë.

Rutte nuk ka thënë nëse aleatët e NATO-s duhet të shpenzojmë 3 për qind të bruto prodhimit të brendshëm, apo edhe më shumë.

Vendimi për shpenzime pritet të merret në samitin e radhës të aleancës, që do të mbahet në qershor.

Përgjatë fushatës zgjedhore në SHBA, Trump pati thënë se e konsideron të domosdoshme që vendet anëtare të aleancës të shpenzojnë 3 për qind të buxhetit të tyre.

Ka raportime që Trump mund ta rrisë kërkesën në 5 për qind./REL/

Bota

Sulmi në tregun e Krishtlindjes, rritet presioni ndaj autoriteteve gjermane

Published

8 hours ago

December 23, 2024

UBTnews

Ministrja e Brendshme e landit të Saksonisë Anhalt ka mbrojtur masat e sigurisë të marra në Magdeburg, pak ditë pasi një person vërshoi me makinë në tregun e Krishtlindjes duke vrarë 5 persona dhe plagosur rreth 200 të tjerë. Ministrja tha se prania e policisë kishte qenë e lartë në mbarë rajonin.

“Policia bëri përgatitje intensive për të siguruar tregun e Krishtlindjes në të gjithë shtetin. Në Magdeburg në veçanti ne ushtruam të gjitha të drejtat ligjore për kontrolle rutinë të valixheve dhe çantave të shpinës në tregun e Krishtlindjes, për të parandaluar aksesin me armë apo thika”, tha Tamara Zieschang, ministre e Brendshme e landit të Saksonisë Anhalt.

I dyshuari, i njohur vetëm si Taleb A., është një shtetas saudit që u zhvendos në Gjermani në 2006-n. Ai akuzohet për vrasje dhe tentativë vrasjeje.

Por autoritetet gjermane tani ndodhen nën presion për të sqaruar përse nuk vepruan më shpejt pas informacioneve që kishin marrë mbi të vitin e kaluar.

Kreu i Policisë Kriminale Federale pranoi marrjen e informacioneve nga Arabia Saudite dhe theksoi se mori ndaj të dyshuarit masat e duhura hetimore. Por ai shtoi se të dhënat nuk ishin specifike.

“Ai nuk njihej për akte të dhunshme, gjë që do të përbënte një sinjal alarmi. Në këtë aspekt unë besoj se do të na duhet të kontrollojmë sërish për të verifikuar nëse ndonjë detaj na shpëtoi nga duart”, u shpreh Holger Münch, shef i Policisë Kriminale Federale.

Edhe Zyra Federale për Emigracionin dhe Refugjatët tha se kishte marrë të dhëna për të dyshuarin verën e vitit të kaluar, por insistoi se nuk është një autoritet hetimor dhe se ia kishte kaluar informacionin zyrtarëve përgjegjës.

Ndërkohë, tregu i Krishtlindjes në Magdeburg është hapur sërish, me një prani policore të shtuar.

Bota

Franca mban ditë zie për vdekjet nga cikloni Mayotte

Published

8 hours ago

December 23, 2024

UBTnews

Franca po mban një ditë zie kombëtare pasi cikloni Chido shkatërroi territorin e saj në Oqeanin Indian të Mayotte në fillim të këtij muaji.

Presidenti francez Emmanuel Macron drejtoi homazhet e së hënës duke mbajtur një minutë heshtje për viktimat e stuhisë.

Ai bëri thirrje për përkujtim mbarëkombëtar gjatë vizitës së tij në ishull javën e kaluar, ku u përballë me kritikat e disa banorëve të ishullit që kritikuan shpërndarjen e ngadaltë të ndihmës.

Dyshohet se qindra, ndoshta mijëra njerëz vdiqën kur Chido zbarkoi në brigjet juglindore të Afrikës më 14 dhjetor, duke sjellë erëra deri në 260 km/h (160 mph) dhe 250 mm reshje në 24 orët e para.

Duke folur pasi u mbajt një minutë heshtje, kryeministri francez François Bayrou tha se ishte “simbol i solidaritetit tonë me të gjithë ata që po vuajnë”.

“Është një angazhim për të siguruar që komuniteti kombëtar është i pranishëm, për të rindërtuar Mayotte dhe për të siguruar që njerëzit e Mayotte të ndjehen të rrethuar nga një vend i tërë,” shtoi ai.

Flamujt u ulën në gjysmështizë në shenjë solidariteti në qytetet franceze, përfshirë Parisin, Marsejën dhe Lionin.

Momenti i heshtjes është vërejtur edhe në Mayotte, ku më shumë se një javë pas stuhisë, të mbijetuarit po përballen me vështirësi pa ujë, komunikim dhe energji elektrike, ndërsa ekipet e shpëtimit përpiqen të ofrojnë ndihmën e nevojshme urgjente.