Botë

Trupat ruse në Siri kanë mungesë ushqimi dhe uji, thotë Ukraina

Published

1 year ago

December 16, 2024

UBTnews

Personeli ushtarak rus që ndodhet ende në Siri po përballet me mungesë të ushqimit dhe ujit të pijshëm, përderisa atje po vazhdon evakuimi i trupave dhe pajisjeve, sipas Drejtorisë Kryesore të Inteligjencës së Ministrisë së Mbrojtjes së Ukrainës (GUR).

Personeli rus po përballet me këto probleme në bazat ushtarake në Tartus dhe Hmeimim dhe në anijet e ankoruara në det pranë bregdetit të Mesdheut, tha shërbimi për shtyp i GUR-it në një deklaratë në Telegram më 15 dhjetor.

GUR-i gjithashtu tha se pjesëtarët e mbetur të shërbimit rus po prisnin avionë transporti ushtarak, të cilët supozohej të sillnin ushqime.

Në atë deklaratë thuhej tutje se Rusia po vazhdon të tërheqë kontingjentin e saj nga zonat e largëta të Sirisë.

“Njëkohësisht, në disa rrugë, rusët shoqërohen nga grupe të armatosura që kundërshtojnë regjimin e Assad-it”, tha GUR-i.

Deklarata shtoi se ka zëra që qarkullojnë mes ushtarëve rusë se Moska ka rënë dakord të mbajë praninë e saj në dy bazat, ku numri i personelit ushtarak arrin deri në 3.000.

Radio Evropa e Lirë nuk nuk ka arritur t’i verifikojë në mënyrë të pavarur këto informacione, të cilat nuk janë komentuar nga autoritetet ruse.

Ministria e Jashtme ruse tha në Telegram se kishte evakuuar një pjesë të personelit të saj diplomatik nga Siria më 15 dhjetor. Ajo tha se tërheqja u krye me një fluturim të posaçëm të Forcave Ajrore Ruse nga baza ajrore Hmeimim.

Avionët transportues rusë janë larguar nga baza ajrore Hmeimim në ditët e fundit si pjesë e evakuimit pas rrëzimit të liderit sirian, Bashar al-Assad.

Assad u rrëzua javën e kaluar pas një ofensivë të udhëhequr nga grupi islamik, Hayat Tahrir al-Sham (HTS). Assad u largua drejt Rusisë, që ishte mbështetësja kryesore e regjimit të tij.

Pamje satelitore të marra më 13 dhjetor nga kompania e teknologjisë hapësinore Maxar duket se tregonin që Rusia po përgatitej për tërheqjen e pajisjeve ushtarake nga baza ajrore Hmeimim. Pamjet tregonin të paktën dy avionë ngarkese Antonov An-124 në pistë.

Rusia gjithashtu ka dërguar disa anije në Siri, sipas informacioneve të siguruara.

Në Damask, HTS-ja ka emëruar një qeveri të përkohshme, dhe lideri i saj, Riad al-Asaad, i tha AFP-së më 15 dhjetor se është i bindur se fraksionet që ndihmuan në rrëzimin e Assadit do të bashkohen si një forcë e vetme. HTS-ja dhe qeveria kalimtare kanë insistuar se të drejtat e të gjithë sirianëve do të mbrohen.

Sekretari amerikan i Shtetit, Antony Blinken, foli me Sekretarin e Jashtëm britanik, David Lammy, për situatën në Siri, tha zëdhënësi i Departamentit të Shtetit, Matthew Miller, më 15 dhjetor.

Blinken dhe Lammy diskutuan situatën “dhe parimet e miratuara nga Shtetet e Bashkuara dhe vendet e rajonit që duhet të zbatohen gjatë procesit të tranzicionit dhe formimit të një qeverie të re”, tha Miller në një deklaratë.

Më 14 dhjetor, Blinken mori pjesë në një takim urgjent në Jordani të ministrave të Jashtëm nga Liga Arabe, Turqia dhe zyrtarë të lartë nga Bashkimi Evropian dhe Kombet e Bashkuara.

Ai tha më pas se Shtetet e Bashkuara kishin bërë “kontakte të drejtpërdrejta” me HTS-në dhe palët e tjera. Ai refuzoi të diskutojë detajet e këtyre kontakteve, por tha se është e rëndësishme që Shtetet e Bashkuara të përcillnin mesazhe për grupin mbi sjelljen e tij dhe mënyrën se si synon të qeverisë gjatë periudhës së tranzicionit.

Blinken tha se një deklaratë e përbashkët ishte rënë dakord në takimin në Jordani që përcakton parimet që vendet e tjera duan të shohin në tranzicionin politik të Sirisë, duke përfshirë gjithëpërfshirjen dhe respektimin e minoriteteve dhe grave, si dhe sigurimin që grupet terroriste të mos marrin kontrollin në vend./REL/

Aktualitet

Trump zgjat armëpushimin me Iranin, por mban në fuqi bllokadën detare pas anulimit të bisedimeve në Pakistan

Published

3 hours ago

April 22, 2026

UBTNews

Dy ditët e fundit janë përcjellë me zhvillime dramatike dhe kthesa të papritura lidhur me konfliktin në Lindjen e Mesme.

Edhe pse të martën skadoi afati i armëpushimit gati dy-javor mes SHBA-së dhe Iranit, Presidenti amerikan, Donald Trump, vendosi ta zgjasë atë, pavarësisht kërcënimeve të tij të mëparshme për rifillimin e bombardimeve në rast të mungesës së një marrëveshjeje.

Kjo kthesë u bë e ditur përmes një njoftimi të Trumpit në orët e vona të së martës, ku ai sqaroi se armëpushimi do të vazhdojë derisa Teherani të paraqesë një “propozim të unifikuar” për të çuar përpara negociatat e paqes.

Brenda 24 orëve të fundit, situata diplomatike ishte tejet e paqartë. Fillimisht pritej që Zëvendëspresidenti amerikan, JD Vance, së bashku me ekipin negociator, të udhëtonte drejt Islamabadit për bisedime me palën iraniane.

Megjithatë, Irani shfaqi hezitim, duke deklaruar përmes Ministrisë së Jashtme se ende nuk kishte vendosur për dërgimin e një delegacioni në Pakistan. Ambasadori i Iranit në OKB, Amir Saeid, e bëri të qartë se negociatat do të ndodhnin vetëm nëse SHBA-ja jepte shenja konkrete për përfundimin e bllokadës së porteve iraniane.

Pavarësisht këtij kushtëzimi, Presidenti Trump deklaroi për CNBC se Irani “nuk ka zgjidhje tjetër” përveçse të ulet në tryezën e bisedimeve, duke përsëritur se opsioni i bombardimeve mbetet mbi tavolinë nëse nuk arrihet përparim.

Tensioni u rrit kur u raportua se Vance kishte pezulluar udhëtimin e tij drejt Islamabadit, ndërkohë që zyrtarët e lartë amerikanë ishin mbledhur në Shtëpinë e Bardhë për të përcaktuar hapat e radhës.

Në fund, Trump njoftoi zgjatjen e armëpushimit, por konfirmoi se bllokada e marinës amerikane mbi portet iraniane do të mbetet në fuqi. Ai theksoi se ky vendim u mor me kërkesë të Pakistanit, veprim për të cilin u falënderua nga kryeministri pakistanez.

Ndërkohë, Sekretari i Thesarit, Scott Bessent, nënvizoi se vazhdimi i bllokadës detare synon të dobësojë sistematikisht aftësinë e Teheranit për të qarkulluar dhe riatdhesuar fonde. Deri më tani, përveç disa reagimeve jozyrtare në rrjetet sociale, Teherani nuk ka dhënë ende një përgjigje zyrtare ndaj këtyre zhvillimeve.

Aktualitet

Trump kundër zgjatjes së armëpushimit: SHBA synon një “marrëveshje të shkëlqyer” me Iranin

Published

21 hours ago

April 21, 2026

UBTNews

Presidenti amerikan, Donald Trump, ka bërë të ditur se nuk ka ndërmend të zgjasë afatin e armëpushimit me Iranin, duke argumentuar se koha në dispozicion është e kufizuar.

Gjatë një interviste për CNBC këtë të martë, Trump theksoi se Shtetet e Bashkuara ndodhen në një pozicion mjaft të fortë negociues, gjë që sipas tij do të çojë drejt arritjes së një marrëveshjeje tejet të favorshme.

Pavarësisht këtij qëndrimi të prerë të presidentit, zyrtarë në Uashington mbeten optimistë se bisedimet do të vijojnë në Pakistan.

Nga ana tjetër, burime nga Teherani konfirmojnë se autoritetet iraniane po shqyrtojnë mundësinë për t’u bërë pjesë e raundit të ardhshëm të negociatave.

Aktualitet

Trump pretendon se Irani ka ‘shkelur’ marrëveshjen e armëpushimit ‘shumë herë’

Published

23 hours ago

April 21, 2026

UBTNews

Në një postim jashtëzakonisht të shkurtër në Truth Social, presidenti i SHBA-së, Donald Trump, ka thënë se “Irani e ka shkelur armëpushimin shumë herë”, pa specifikuar se cilat ishin këto shkelje.

Komentet e tij vijnë mes pasigurisë së vazhdueshme nëse raundi i dytë i bisedimeve të paqes midis Iranit dhe SHBA-së do të zhvillohet sot në Pakistan.

Të dielën, Trump akuzoi Iranin për gjuajtje ndaj anijeve që kalonin nëpër Ngushticën e Hormuzit, veprim ky që sipas tij përbënte shkelje të marrëveshjes së armëpushimit, e cila pritet të skadojë nesër.

Sidoqoftë, një zëdhënës i Ministrisë së Jashtme të Iranit tha se ishte bllokada e Uashingtonit në këtë rrugë ujore ajo që përbënte shkelje të marrëveshjes. Trump deklaroi të premten se bllokada detare e porteve iraniane do të vazhdojë derisa të arrihet një marrëveshje. /The Guardian/

Aktualitet

Trump optimist për marrëveshje me Iranin: “Po fitojmë me diferencë të madhe”

Published

1 day ago

April 21, 2026

UBTNews

Edhe pse ka qëndruar larg kamerave, Presidenti Donald Trump ka zgjedhur rrjetet sociale për të shpërfaqur një dozë të lartë optimizmi përpara bisedimeve të paqes me Iranin, që pritet të nisin këtë javë në Pakistan. Përmes platformës së tij, Truth Social, Trump ka bërë të ditur se SHBA-ja ndodhet në një pozicion shumë të favorshëm negociues.

Sipas Presidentit, bllokada detare e SHBA-së në Ngushticën e Hormuzit po i shkakton Iranit humbje prej 500 milionë dollarësh në ditë, duke e rënduar ndjeshëm ekonominë e këtij vendi. Trump pretendon se ky presion po funksionon dhe se çdo marrëveshje e re do të jetë shumë më e favorshme se akordi i vitit 2015 (JCPOA) i arritur gjatë administratës Obama.

“Nuk jam nën presion” -Trump hodhi poshtë raportimet se ai po nxiton drejt një marrëveshjeje për shkak të presioneve të brendshme apo ndërkombëtare.

“Lexoj lajmet e rreme që thonë se jam nën presion. Kjo nuk është e vërtetë! Nuk jam nën asnjë lloj presioni, megjithëse çdo gjë do të ndodhë relativisht shpejt,” ka deklaruar ai.

Përkundër toneve triumfuese, mbeten shumë pikëpyetje. Ende nuk ka një konfirmim zyrtar nëse të dyja palët do të ulen vërtet në tryezën e bisedimeve në Pakistan. Gjithashtu, Trump përballet me presionin e tij ekonomik për të rihapur Ngushticën e Hormuzit për tregtinë ndërkombëtare, ndërkohë që opinioni publik në Amerikë mbetet gjerësisht kundër përfshirjes në një konflikt të ri të armatosur.

Megjithatë, për Presidentin Trump, situata po shkon “shumë mirë” dhe ai beson se Amerika do të dalë me një marrëveshje historike që tejkalon të gjitha marrëveshjet e mëparshme./BBC/