Botë

Trump thotë se armëpushimi mes Izraelit dhe Iranit është në fuqi tani

Published

11 months ago

June 24, 2025

UBTnews

Izraeli dhe Irani e kanë pranuar të martën armëpushimin e thirrur nga presidenti i Shteteve të Bashkuara, Donald Trump, për t’i dhënë fund luftës 12-ditore që e tronditi Lindjen e Mesme.

Pranimi i marrëveshjes nga të dyja palët erdhi pasi Teherani e kreu sulmin e fundit raketor ndaj Izraelit, si pasojë e të cilët humbën jetën katër njerëz në orët e hershme të mëngjesit të së martës, ndërkohë që Izraeli kreu bombardime në të gjithë Iranin para agimit.

Kryeministri i Izraelit, Benjamin Netanyahu, tha se Izraeli është pajtuar armëpushimin dypalësh me Iranin, në bashkërendim me Trumpin.

Netanyahu tregoi se të hënën në mbrëmje e kishte njoftuar kabinetin e sigurisë së Izraelit se vendi ka arritur të gjitha synimet ushtarake në operacionin 12-ditor kundër Iranit, përfshirë eliminimin e kërcënimit nga programet bërthamore dhe raketore balistike të Iranit.

Izraeli gjithashtu ka dëmtuar udhëheqjen ushtarake iraniane dhe disa objekte qeveritare, si dhe mori kontrollin mbi hapësirën ajrore të Teheranit, tha Netanyahu.

“Izraeli do të përgjigjet me forcë ndaj çdo shkeljeje të armëpushimit”, tha Netanyahu.

Trump ka thënë mëngjesin e së martës se armëpushimi midis Izraelit dhe Iranit është tani në fuqi dhe u kërkoi të dyja vendeve të mos e shkelin atë.

“ARMËPUSHIMI TANI ËSHTË NË FUQI. JU LUTEM MOS E SHKELNI!” shkroi Trump në një postim në Truth Social.

Televizioni shtetëror i Iranit raportoi se armëpushimi hyri në fuqi në orën 7:30 të mëngjesit, por zyrtarët iranianë nuk kanë folur ende pas njoftimit të Trumpit për hyrjen e armëpushimit në fuqi.

Disa orë më parë, diplomati më i lartë i Iranit deklaroi se vendi ishte i gatshëm të ndalte sulmet ajrore.

Abbas Araqchi tha herët të martën se nëse Izraeli e ndal “agresionin e tij të paligjshëm” kundër popullit iranian jo më vonë se në orën 4 të mëngjesit me orën e Teheranit të martën, Irani nuk e ka ndër mend të vazhdojë me përgjigje ushtarake më pas.

“Operacionet ushtarake të Forcave tona të Armatosura të fuqishme për të ndëshkuar Izraelin për agresionin e tij vazhduan deri në minutën e fundit, në orën 4 të mëngjesit. Së bashku me të gjithë iranianët, i falënderoj Forcat tona të Armatosura të guximshme, të cilat mbeten të gatshme të mbrojnë vendin tonë të dashur deri në pikën e fundit të gjakut të tyre dhe që iu përgjigjën çdo sulmi të armikut deri në minutën e fundit“, shkroi Araqchi në X.

Kur njoftoi pas mesnatës për një armëpushim të plotë për t’i dhënë fund një lufte, siç e quajti ai, 12-ditore, Trump la të kuptohej se Izraeli dhe Irani do të kishin kohë t’i përfundonin misionet që ishin në zhvillim e sipër, pas së cilave armëpushimi do të hynte në fuqi.

Dëshmitarët thanë se dëgjuan shpërthime pranë Tel Avivit dhe Beershebas në jug të Izraelit, para se armëpushimi të hynte në fuqi.

Ushtria izraelite tha se gjashtë valë raketash u lëshuan nga Irani dhe shërbimi kombëtar i ambulancës në Izrael tha se katër njerëz u vranë në Beersheba, viktimat e para të raportuara në Izrael që nga shpallja e armëpushimit nga Trump.

Agjencia gjysmë-zyrtare e lajmeve në Iran, SNN, raportoi të martën në mëngjes se Teherani lëshoi valën e fundit të raketave para se të hynte në fuqi armëpushimi.

Kryeministri i Katarit, Sheikh Mohammed bin Abdulrahman Al Thani, e siguroi marrëveshjen e Teheranit gjatë një telefonate me zyrtarë iranianë, tha për Reuters të martën një zyrtari të informuar për negociatat.

Në të njëjtën kohë, nënpresidenti amerikan JD Vance, sekretari i Shtetit Marco Rubio dhe i dërguari i posaçëm amerikan Steve Witkoff ishin në kontakt të drejtpërdrejtë dhe të tërthortë me iranianët, tha një zyrtar i Shtëpisë së Bardhë.

Disa orë më parë, tre zyrtarë izraelitë kishin sinjalizuar se Izraeli po kërkonte të përfundonte fushatën e tij në Iran së shpejti dhe ua kishin përcjellë këtë mesazh Shteteve të Bashkuara.

Armëpushimi vjen pasi SHBA-ja i goditi centralet bërthamore të Iranit dhe Teherani u përgjigj duke sulmuar bazën ajrore amerikane në Katar.

Situata në Lindje të Mesme është e tensionuar prej sulmit të befasishëm të Izraelit në qendra bërthamore dhe ushtarake të Iranit më 13 qershor.

Izraeli ngul këmbë se Irani nuk mund të ketë armë bërthamore sepse ia rrezikon ekzistencën.

Irani mohon se ka pasur ndonjëherë program për armë bërthamore, por udhëheqësi suprem, Ali Khamenei, ka thënë se, nëse do të donte ta kishte një të tillë, liderët botërorë “nuk do të mund të na ndalonin”.

Izraeli, i cili nuk është palë e Traktatit Ndërkombëtar për Mospërhapjen e Armëve Bërthamore, është vendi i vetëm në Lindjen e Mesme që besohet të ketë armë bërthamore.

Izraeli as nuk e pranon e as nuk e mohon këtë./REL/

Aktualitet

Irani po rindërton shpejt kapacitetet ushtarake pas sulmeve amerikano-izraelite

Published

17 hours ago

May 21, 2026

UBTNews

Irani ka rifilluar tashmë një pjesë të prodhimit të dronëve gjatë armëpushimit gjashtëjavor që nisi në fillim të prillit, ndërsa inteligjenca amerikane vlerëson se Teherani po rikthen kapacitetet ushtarake shumë më shpejt sesa ishte parashikuar fillimisht.

Sipas burimeve të njohura me raportet e inteligjencës amerikane, Irani po punon në zëvendësimin e bazave raketore, lëshuesve dhe kapaciteteve të prodhimit të armëve që u dëmtuan nga sulmet e përbashkëta të SHBA-së dhe Izraelit.

Raportet paralajmërojnë se Irani mbetet një kërcënim serioz për aleatët rajonalë në rast se presidenti amerikan Donald Trump vendos të rifillojë fushatën ushtarake kundër Teheranit.

Burime amerikane thonë se Irani mund të rikthejë plotësisht kapacitetin e sulmeve me dronë brenda gjashtë muajsh. Sipas tyre, Teherani ka tejkaluar pritjet e inteligjencës amerikane për shpejtësinë e rindërtimit ushtarak.

Ndërkohë, raportohet se Rusia dhe Kina po ndihmojnë Iranin në rikuperimin e kapaciteteve ushtarake. Sipas inteligjencës amerikane, Kina ka vazhduar furnizimin me komponentë që mund të përdoren për prodhimin e raketave, megjithëse kjo ndihmë është kufizuar nga bllokada amerikane.

Kryeministri izraelit Benjamin Netanyahu ka deklaruar se Kina po i jep Iranit pjesë për prodhimin e raketave, por Pekini i ka mohuar këto akuza, duke i quajtur “të pabazuara”.

Raportet e inteligjencës tregojnë gjithashtu se Irani ende ruan një pjesë të konsiderueshme të arsenalit të raketave balistike, dronëve dhe sistemeve kundërajrore, pavarësisht dëmeve të mëdha nga sulmet amerikano-izraelite.

Megjithëse ushtria amerikane pretendon se operacionet ushtarake kanë dëmtuar rëndë industrinë ushtarake iraniane, burime të inteligjencës thonë se dëmi mund ta ketë vonuar Iranin vetëm për disa muaj dhe jo për vite të tëra./CNN/

Aktualitet

Trump dhe Netanyahu përplasen për qasjen ndaj Iranit

Published

23 hours ago

May 21, 2026

UBTNews

Presidenti amerikan Donald Trump zhvilloi një bisedë të tensionuar me kryeministrin izraelit Benjamin Netanyahu të martën, duke reflektuar dallimet mes tyre për mënyrën se si duhet të vazhdohet me luftën dhe tensionet ndaj Iranit, raportojnë burime amerikane sipas CNN.

Sipas një zyrtari amerikan, kjo nuk ishte biseda e parë mes dy liderëve gjatë ditëve të fundit. Gjatë një telefonate të zhvilluar të dielën, Trump kishte bërë të ditur se kishte gjasa të vazhdonte me sulme të reja të targetuara ndaj Iranit në fillim të javës. Operacioni, sipas raportimeve, pritej të quhej “Operacioni Sledgehammer”.

Megjithatë, rreth 24 orë pas asaj bisede, Trump njoftoi se po pezullonte sulmet e planifikuara për të martën, me kërkesë të aleatëve të Gjirit Persik, përfshirë Katarin, Arabinë Saudite dhe Emiratet e Bashkuara Arabe.

Burime amerikane dhe persona të njohur me situatën thanë se vendet e Gjirit kanë qenë në kontakt të vazhdueshëm me Shtëpinë e Bardhë dhe ndërmjetës pakistanezë për të krijuar një kornizë që mund të hapte rrugë për negociata të mëtejshme diplomatike me Iranin.

“Jemi në fazat përfundimtare me Iranin. Do të shohim çfarë do të ndodhë,” deklaroi Trump para gazetarëve të mërkurën.

“Do të kemi ose një marrëveshje, ose do të bëjmë disa gjëra paksa të ashpra. Por shpresoj që kjo të mos ndodhë,” shtoi ai.

Negociatat në vazhdim kanë shkaktuar pakënaqësi te kryeministri izraelit Benjamin Netanyahu, i cili prej kohësh ka mbështetur një qasje më agresive ndaj Teheranit. Sipas burimeve amerikane dhe izraelite, Netanyahu beson se çdo vonesë vetëm sa i jep avantazh Iranit.

Gjatë bisedës njëorëshe të së martës, Netanyahu i shprehu Trumpit zhgënjimin e tij për shtyrjen e sulmeve dhe argumentoi se presidenti amerikan duhet të vazhdonte sipas planit fillestar.

Burime izraelite thanë se Netanyahu kërkoi rifillimin e veprimeve ushtarake, ndërsa dallimet mes dy liderëve u bënë të qarta: Trump dëshiron të shohë nëse mund të arrihet një marrëveshje diplomatike, ndërsa Netanyahu priste vazhdimin e aksioneve ushtarake kundër Iranit./CNN/

Aktualitet

Xi: Partneriteti Kinë-Rusi është forcë stabilizuese globale

Published

2 days ago

May 20, 2026

UBTNews

Presidenti i Kinës, Xi Jinping, deklaroi se bota rrezikon të rikthehet në “ligjin e xhunglës”, ndërsa e cilësoi marrëdhënien mes Kinës dhe Rusisë si një forcë stabilizuese globale gjatë takimit me presidentin rus Vladimir Putin në Pekin.

Xi priti Putinin me ceremoni shtetërore madhështore në Sallën e Madhe të Popullit, vetëm pak ditë pasi kishte mirëpritur edhe ish-presidentin amerikan Donald Trump. Ushtarët kinezë dhe banda ushtarake interpretuan himnet kombëtare të dy vendeve, ndërsa fëmijë me flamuj rusë dhe kinezë brohorisnin për liderët.

Takimi mes Xi dhe Putin nisi me një mbledhje të ngushtë për çështje sensitive dhe më pas vijoi me bisedime më të gjera mes delegacioneve të të dyja vendeve. Në përfundim, palët nënshkruan një sërë marrëveshjesh në fusha si teknologjia, tregtia, kërkimi shkencor dhe pronësia intelektuale.

Sipas mediave shtetërore kineze, një nga dokumentet kryesore ishte vazhdimi i “Traktatit të fqinjësisë së mirë dhe bashkëpunimit miqësor Kinë-Rusi”, i nënshkruar fillimisht 25 vite më parë.

Pas ceremonisë së nënshkrimit, Xi tha se marrëdhëniet mes Pekinit dhe Moskës kanë arritur “nivelin më të lartë të partneritetit strategjik gjithëpërfshirës”, duke bërë thirrje që të dy vendet të kundërshtojnë “çdo formë të bullizmit unilateral” në arenën ndërkombëtare.

Ai paralajmëroi gjithashtu se tensionet globale po e shtyjnë botën drejt “ligjit të xhunglës”, ndërsa theksoi se përshkallëzimi i konfliktit në Lindjen e Mesme është “i papranueshëm” dhe se një armëpushim i plotë është urgjent.

Nga ana tjetër, Putin e cilësoi marrëdhënien me Kinën si “në një nivel të paprecedentë”, duke shtuar se Rusia mbetet një furnizues i besueshëm energjie në kohën e krizave globale. Ai ftoi Xi të vizitojë Rusinë vitin e ardhshëm.

Marrëdhëniet mes Pekinit dhe Moskës janë forcuar ndjeshëm vitet e fundit, me të dy liderët që shpesh i referohen njëri-tjetrit si “mik i dashur” dhe “mik i vjetër”. Gjatë takimit, Putin përdori edhe një proverb kinez për të përshkruar pritjen e tij për takimin me Xi: “Edhe nëse nuk shihemi për një ditë, duket sikur kanë kaluar tre vjeshta.”

Ndërkohë, ekonomia ruse, e goditur nga sanksionet për shkak të luftës në Ukrainë, mbetet e varur nga bashkëpunimi ekonomik me Kinën, e cila është partneri më i madh tregtar i Moskës dhe blen pothuajse gjysmën e eksporteve ruse të naftës.

Takimi Xi-Putin po shihet gjithashtu në kontekstin e rivalitetit mes Kinës dhe SHBA-së, sidomos pas vizitës së fundit të Donald Trump në Pekin. Kremlini deklaroi se rëndësia e samitit nuk qëndron tek ceremonia, por tek përmbajtja dhe rezultatet e bisedimeve. /The Guardian/

Aktualitet

SHBA planifikon të zvogëlojë forcat e gatshme për NATO-n

Published

2 days ago

May 20, 2026

UBTNews

Administrata e Donald Trump po planifikon t’u bëjë të ditur aleatëve të NATO se do të zvogëlojë kapacitetet ushtarake që Shtetet e Bashkuara do të kenë në dispozicion për të ndihmuar vendet evropiane të aleancës në rast krizash të mëdha ose konfliktesh ushtarake.

Sipas burimeve të njohura me çështjen, vendimi pritet të prezantohet gjatë një takimi të shefave të politikave të mbrojtjes në Bruksel. Ky veprim lidhet me strategjinë e Trumpit që vendet evropiane të marrin më shumë përgjegjësi për sigurinë e kontinentit dhe të mos varen aq shumë nga mbështetja amerikane.

Në kuadër të modelit të njohur si “NATO Force Model”, shtetet anëtare përcaktojnë një numër forcash që mund të aktivizohen në rast lufte, sulmi ndaj një vendi anëtar apo ndonjë krize tjetër madhore. Megjithatë, Pentagoni ka vendosur të zvogëlojë ndjeshëm angazhimin amerikan në këtë strukturë, edhe pse detajet e plota mbeten ende sekrete.

Burimet thanë se administrata amerikane ende nuk ka sqaruar se sa shpejt do të transferohen këto përgjegjësi tek aleatët evropianë, por ky ndryshim shihet si një sinjal konkret i politikës së re të Uashingtonit ndaj NATO-s. Zyrtarët amerikanë kanë bërë të ditur se SHBA-ja do të vazhdojë të ofrojë mbrojtjen bërthamore për aleancën, edhe nëse Evropa merr rol më të madh në forcat konvencionale.

Ky zhvillim vjen në një kohë tensionesh në rritje brenda aleancës. Javët e fundit, administrata Trump ka njoftuar për tërheqjen e rreth 5 mijë trupave amerikane nga Evropa dhe anulimin e një dislokimi ushtarak në Poloni, vendime që kanë shkaktuar shqetësim te aleatët evropianë dhe kritikë në Kongresin amerikan.

Disa vende evropiane kanë shprehur frikën se Uashingtoni mund të reduktojë më tej praninë e tij ushtarake në kontinent, megjithëse diplomatët e NATO-s besojnë se SHBA-ja do të vazhdojë të mbështesë Evropën në rast rreziku serioz. Nga ana tjetër, aleatët evropianë argumentojnë se po rrisin shpenzimet ushtarake dhe kapacitetet mbrojtëse, por theksojnë se ky proces kërkon kohë. /Reuters/