Ushtria amerikane ka kryer sulme të reja ndaj Iranit, duke goditur një objekt ushtarak në Bandar Abbas, një qytet-port strategjik.

Komanda Qendrore e SHBA-së (Centcom) tha se forcat amerikane gjithashtu rrëzuan katër dronë iranianë vetëvrasës “që përbënin kërcënim rreth Ngushticës së Hormuzit”.

Sipas Centcom, objekti në Bandar Abbas u godit ndërsa po përgatitej të lëshonte një dron të pestë. Mediat iraniane raportuan se shpërthime u dëgjuan në lindje të qytetit.

Këto sulme ndodhin në mes të një armëpushimi të brishtë mes SHBA-së dhe Iranit, si dhe gjatë negociatave të gjata për t’i dhënë fund luftës tremujore që ka bllokuar trafikun në Ngushticën e Hormuzit dhe ka rritur çmimet globale të energjisë.

Kjo është hera e dytë brenda tre ditësh që SHBA-ja sulmon objektiva në Iran, duke thënë se sulmet janë kryer në vetëmbrojtje. Përplasjet e reja rrezikojnë armëpushimin.

Centcom i përshkroi veprimet si “të matura, thjesht mbrojtëse dhe të synuara për të ruajtur armëpushimin”.

Më herët këtë javë, Centcom konfirmoi një valë të mëparshme sulmesh “në vetëmbrojtje” në jug të Iranit, ku u goditën baza raketore iraniane dhe anije që po përpiqeshin të vendosnin mina në Ngushticën e Hormuzit, ku mijëra anije cisternë tregtare kanë mbetur të bllokuara për shkak të konfliktit.

Centcom tha se ato sulme kishin për qëllim “mbrojtjen e trupave tona nga kërcënimet e forcave iraniane”.

Irani i dënoi sulmet si “një shkelje të rëndë të armëpushimit” dhe premtoi se qeveria iraniane “nuk do të lërë pa përgjigje asnjë akt armiqësor”.

Të enjten, ushtria e Kuvajtit tha se mbrojtja ajrore e saj po interceptonte “kërcënime armiqësore me raketa dhe dronë”, pa dhënë detaje të mëtejshme.

SHBA-ja gjithashtu vendosi sanksione ndaj “Autoritetit të Ngushticës së Gjirit Persik” – institucioni iranian përgjegjës për mbledhjen e pagesave nga anijet që kalojnë përmes Ngushticës së Hormuzit.

Departamenti amerikan i Thesarit tha në një deklaratë se çdo anije që paguan këtë autoritet mund të “ekspozohet ndaj rrezikut të sanksioneve”.

Rreth një e pesta e gazit natyror të lëngshëm dhe naftës në botë zakonisht kalojnë përmes kësaj rruge detare, dhe mbyllja e saj ka ndikuar në tregtinë globale të karburanteve.

Zëdhënësi i Ministrisë së Jashtme iraniane, Esmaeil Baqaei, tha të hënën se Teherani po mbledh tarifa për “shërbime navigimi” dhe do të vazhdojë të menaxhojë trafikun në këtë rrugë ujore.

Sekretari amerikan i Thesarit, Scott Bessent, e përshkroi këtë si “përpjekjen më të fundit të ushtrisë iraniane për të zhvatur tregtinë detare globale” dhe si “provë” se Irani është “i dëshpëruar për para”

Irani ka akuzuar Shtetet e Bashkuara të Amerikës për “shkelje të rëndë” të armëpushimit, pas sulmeve të reja ajrore të kryera gjatë 48 orëve të fundit.

Komanda Qendrore Amerikane (CENTCOM) njoftoi se kishte goditur lokacione raketore iraniane dhe mjete detare që dyshohej se po vendosnin mina në jug të Iranit, duke i cilësuar sulmet si “veprime vetëmbrojtëse”.

Ministria e Jashtme iraniane deklaroi se SHBA-ja mban përgjegjësi për pasojat e “veprimeve agresive dhe të pajustifikuara” në rajonin Hormozgan, përgjatë Ngushticës së Hormuzit, një nga rrugët më të rëndësishme të transportit të naftës në botë.

Irani paralajmëroi se nuk do të lërë “asnjë veprim armiqësor pa përgjigje” dhe se do të mbrojë interesat e vendit.

Ndërkohë, sekretari amerikan i Shtetit, Marco Rubio, deklaroi se një marrëveshje për përfundimin e konfliktit mbetet ende e mundur, megjithëse negociatat mund të zgjasin edhe disa ditë.

Bisedimet për konfliktin po ndërmjetësohen kryesisht nga Pakistani, ndërsa këtë javë negociatorët iranianë po zhvillojnë takime edhe në Katari./BBC/

Katër njerëz, përfshirë dy fëmijë, kanë humbur jetën të martën pasi treni e goditi një autobus shkolle në veri të Belgjikës, tha zëvendëskryeministri i vendit, Maxime Prevot.

“Një përplasje tragjike midis një treni dhe një autobusi shkolle ndodhi këtë mëngjes në Bugenhout. Katër persona kanë humbur jetën, përfshirë dy fëmijë”, shkroi Prevot në X.

Kryeministri Bart De Wever ka se është “thellësisht i prekur nga aksidenti i tmerrshëm… Në këto çaste bashkëndiejmë me familjet e prekura”.

Pamjet nga vendngjarja në rajonin e Flandrës shfaqin autobusin e rrokullisur dhe dëmtuar në skaj të një rrugë pranë vijës hekurudhore. Treni i udhëtarëve mbeti i ndalur mbi shina.

Zëdhënësja e Policisë, An Berger, u tha mediave belge se në autobus ndodheshin shtatë fëmijë, një mbikëqyrës dhe shoferi, duke shtuar se askush në tren nuk ishte lënduar.

“Përplasja ishte jashtëzakonisht e dhunshme”, tha për AFP Frederic Sacre, zëdhënës i agjencisë hekurudhore belge, Infrabel, duke shtuar se treni po udhëtonte rreth 120 kilometra në orë kur ndodhi aksidenti.

“Autobusi u hodh rreth 15 metra drejt një shtylle metalike”, tha ai.

Sacre tha se pamjet nga vendi i ngjarjes tregonin se barrierat në kalimin hekurudhor kishin qenë të mbyllura dhe se semafori i kuq ishte ndezur në momentin e aksidentit.

Mediat belge raportuan se nxënësit vinin nga një shkollë për fëmijë me vështirësi në të nxënë.

Ministri i Brendshëm, Bernard Quintin, shprehu trishtimin e tij të thellë për “aksidentin tragjik”.

Presidentja e Komisionit Evropian, Ursula von der Leyen, iu bashkua reagimeve ngushëlluese të politikanëve, duke thënë se ka mbetur “me zemër të thyer” nga përplasja.

“Ngushëllimet e mia më të sinqerta shkojnë për familjet e viktimave dhe të dashurit e tyre”, shkroi ajo në internet.

“Sot, Evropa vajton me Belgjikën”. /REL/