Zyrtarët rusë kanë akuzuar Perëndimin për orkestrimin e vrasjes së Gjeneralit Kirillov, duke theksuar rolin e tij në “zbulimin e krimeve të anglo-saksonëve.” Kryetari i Komitetit të Mbrojtjes të Dumës së Shtetit, Andrei Kartapolov, ka premtuar se do të gjenden dhe dënohen ata që janë përgjegjës për organizimin dhe kryerjen e vrasjes, “pa marrë parasysh se kush janë dhe ku mund të jenë.”

Në një postim në Telegram, zëdhënësja e Ministrisë së Jashtme ruse, Maria Zakharova, shkroi se Kirillov “kaloi shumë vite duke ekspozuar sistematikisht krimet e anglo-saksonëve.”

Deputeti i Dumës së Shtetit dhe gjenerali i ushtrisë në pension, Andrei Gurulyov, theksoi se Kirillov ishte një person që “kuptoi dhe gjurmoi të gjithë veprimtarinë kriminale të SHBA-së dhe satelitëve të saj,” duke përfshirë biolabatorët dhe përhapjen e armëve kimike dhe biologjike.

Gurulyov kërkoi një “përgjigje të ashpër” ndaj vrasjes, duke sugjeruar “goditje kundër zyrtarëve anglo-saksonë.”

Siç njoftohet, Mbretëria e Bashkuar e sanksionoi Kirillovin në tetor, duke e cilësuar atë “një zëdhënës të rëndësishëm për dezinformimin e Kremlinit,” dhe duke e akuzuar për përhapjen e gënjeshtrave për të mbuluar veprimet e rrezikshme të Rusisë. Dje, ai u akuzua nga autoritetet ukrainase për mbikëqyrjen e përdorimit të armëve kimike në Ukrainë.

Presidenti i Koresë së Jugut, Yoon Suk-yeol, i cili është pezulluar nga ushtrimi i kompetencave pasi Parlamenti votoi për shkarkimin e tij, mohon akuzat për kryengritje, por është i gatshëm të bashkëpunojë me hetimin, raporton agjencia e lajmeve Yonhap, duke cituar avokatët e Yoon.

“Presidenti do të paraqesë qëndrimin e tij në mënyrë të qartë dhe të drejtë në gjykatë. Ne nuk jemi të sigurt nëse seancat e shkarkimit do të jenë të hapura për publikun, por nëse janë, kjo është ajo që presidenti synon të bëjë,” tha një nga avokatët.

Yoon është i dyshuar për kryengrite nga Policia dhe Prokuroria.

Ligji i Koresë së Jugut lejon ndjekjen penale të një presidenti në detyrë për këtë akuzë.

“Hetimi për çështjen e kryengritjes dhe seancat e shkarkimit janë dy çështje të ndara; dy ekipe të ndryshme ligjore do të trajtojnë secilin”, tha avokati.

Avokati i presidentit nuk mund të konfirmonte nëse Yoon do të merrte pjesë në pyetjen nga prokurorët më 21 dhjetor.

Presidenti nuk u paraqit për t’u marrë në pyetje më 15 dhjetor.

Avokati theksoi se nuk kishte baza ligjore për rastin e kryengritjes, pasi presidenti nuk kishte tentuar të merrte pushtetin.

Sipas avokatit, nuk ka pasur incidente pas shpalljes së ligjit ushtarak afatshkurtër që mund të lidhej me kryengritje.

Më 14 dhjetor, Parlamenti i Koresë së Jugut votoi për të fajësuar Yoon për vendimin e tij për të shpallur ligjin ushtarak, i cili u pa si shkelje e Kushtetutës së vendit.

Gjykata Kushtetuese tani duhet të vendosë nëse do të mbështesë mocionin e shkarkimit ose do të rivendosë presidentin./REL/

Një oficer i rangut të lartë i ngarkuar me Trupat e Mbrojtjes Bërthamore, Biologjike dhe Kimike të Rusisë (RKhBZ) është vrarë në një shpërthim në Moskë, tha Komiteti Hetues i Rusisë.

Gjeneral-lejtnant Igor Kirillov dhe ndihmësi i tij u vranë nga një bombë e fshehur në një skuter jashtë hyrjes së një ndërtese në Moskë herët më 17 dhjetor, tha komiteti në një deklaratë, duke shtuar se një hetim është hapur.

Incidenti ndodhi një ditë pasi shërbimi i sigurisë SBU i Ukrainës raportoi se prokurorët ukrainas ngritën një akuzë kundër Kirillov, duke e akuzuar atë si përgjegjës për përdorimin e armëve kimike kundër trupave ukrainase gjatë luftës së nisur nga pushtimi i paprovokuar i Ukrainës nga Rusia.

Komiteti hetimor tha se shpërthimi ndodhi jashtë një pallati në Ryazansky Prospekt, një rrugë në kryeqytetin rus që fillon rreth 7 kilometra në juglindje të Kremlinit.

“Igor Kirillov, kreu i forcave të mbrojtjes kimike, biologjike dhe nga rrezatimi, të forcave të armatosura të Federatës Ruse, dhe ndihmësi i tij u vranë”, tha komiteti hetimor.

Fotot e postuara në kanalin rus Telegram Astra treguan atë që dukej se ishin dy trupa të shtrirë në dëborë jashtë derës së dëmtuar të një ndërtese apartamentesh.

Pas analizimit të imazheve të një makine të parkuar pranë ndërtesës së banesës, Astra raportoi se automjeti ishte i Kirillovit.

RKhBZ janë forca speciale që veprojnë në kushte të kontaminimit radioaktiv, kimik dhe biologjik.

Sipas biografisë së tij zyrtare, Kirillov mori pjesë në krijimin dhe miratimin e sistemit të flakëhedhësve të rëndë TOS-2 “Tosochka” nga Ushtria Ruse, si dhe në luftën kundër pandemisë COVID-19.

Ukraina nuk ka komentuar ende mbi informacionin.

Kirillov dhe RKhBZ u vendosën në listën e sanksioneve të Britanisë në tetor për përdorimin e agjentëve të kontrollit të trazirave dhe raporteve të shumta për përdorimin e agjentit toksik vdekjeprurës, kloropicrin, në fushën e betejës./REL/

Kancelari i Gjermanisë, Olaf Scholz, e ka humbur votëbesimin në Parlamentin e vendit të hënën, me çfarë i ka hapur vendit rrugën për mbajtjen e zgjedhjeve të parakohshme në fund të shkurtit.

Scholzi e fitoi besimin e 207 ligjvënësve në Bundestag, por 394 të tjerë votuan kundër tij, ndërsa 116 abstenuan.

Atij i nevojitej një shumicë prej 367 votash për ta fituar votëbesimin.

Scholzi udhëheq një qeveri pakicë, pasi koalicioni i tij qeverisës trepartiak dështoi më 6 nëntor, për shkak të mosmarrëveshjeve për mënyrën se si ta ringjallin ekonominë e ngecur të vendit.

Liderët e disa partive të mëdha u pajtuan që zgjedhjet parlamentare të mbahen më 23 shkurt, shtatë muaj më herët se koha e zgjedhjeve të rregullta.

Votëbesimi ishte i nevojshëm sepse Kushtetuta e Gjermanisë nuk e lejon Parlamentin të shpërbehet vetvetiu.

Tani i takon presidentit Frank-Walter Steinmeier të vendosë për shpërbërjen apo jo të Bundestagut dhe për të thirrur zgjedhje të reja.

Ai ka 21 ditë kohë për ta marrë atë vendim, dhe sapo të shpërbëhet Parlamenti, zgjedhjet duhet të mbahen brenda 60 ditëve.

Sondazhet tregojnë se partia e Scholzit është mbrapa partisë kryesore opozitare, blloku i Unionit i Friedrich Merzit. Nënpresidenti Robert Habeck, të Gjelbërit e të cilit ngelin edhe më mbrapa, do të garojë për kancelar gjithashtu.

Partia e ekstremit të djathtë, Alternativa për Gjermaninë, e cila po shënon rritje në sondazhe, e ka nominuar Alice Weidelin për kancelare, por ajo nuk ka gjasa për këtë post sepse partitë e tjera nuk duan të bashkëpunojnë me këtë parti.