Botë

Trump e kritikon vendimin për ta lejuar Ukrainën të sulmojë thellë brenda Rusisë

Published

on

Presidenti i zgjedhur amerikan, Donald Trump, e ka kritikuar administratën Biden pse i dha leje Ukrainës të kryejë sulme thellë brenda Rusisë me raketa të fuqishme amerikane, duke thënë se kjo gjë vetëm sa e përshkallëzon luftën.

Unë nuk pajtohem aspak me dërgimin e raketave, qindra raketave në Rusi. Pse po e bëjmë këtë? Ne vetëm sa po e përshkallëzojmë këtë luftë dhe po e përkeqësojmë. Kjo gjë nuk duhej lejuar të ndodhte”, tha Trump gjatë një interviste me revistën Time, që u publikua të enjten.

Pas një ngurrimi mbi njëvjeçar, administrata e presidentit Joe Biden përfundimisht vendosi në nëntor t’i japë leje Ukrainës për të kryer sulme ndaj aseteve ushtarake brenda Rusisë duke përdorur raketa të prodhimit amerikan, Sisteme të Raketave Taktike Ushtarake (ATACMS).

Këto raketa të fuqishme dhe precize mund ta godasin shënjestrën deri hiç më pak se 300 kilometra larg.

Administrata e Bidenit e arsyetoi vendimin duke thënë se Rusia e ka përshkallëzuar konfliktin duke dërguar rreth 11.000 ushtarë koreanoveriorë në vijë të frontit.

Vetëm disa ditë pasi Ukraina i përdori për herë të parë raketat ATACMS kundër Rusisë, Kremlini u kundërpërgjigj duke goditur Ukrainën me një raketë të re balistike ndërkontinentale, e cila është e aftë të bartë kokë bërthamore. Kremlini deklaroi se përdorimi i kësaj rakete ishte mesazh për Perëndimin.

Trump nuk ka treguar nëse do ta shfuqizojë njëanshëm vendimin për ta lejuar Ukrainën t’i përdorë kët raketa brenda territorit rus, pasi ta ketë marrë detyrën më 20 janar, apo nëse do ta përdorë atë si mjet për të negociuar me Kremlinin.

Ai ka thënë se mund t’i japë fund luftës pothuajse trevjeçare mes Rusisë dhe Ukrainës brenda “24 orëve,” gjë që ka ngjallur shqetësime se mund ta detyrojë Kievin të dorëzojë territore që aktualisht janë të pushtuara nga forcat ruse.

Presidenti i Ukrainës, Volodymyr Zelensky, ka kërkuar që zotimet e Perëndimit për sigurinë e vendit të tij të bëhen pjesë e çdo marrëveshjeje të negociuar. Zelensky – dhe shumica e ukrainasve – duan anëtarësimin në NATO, sepse thonë se vetëm kjo do të parandalojë Rusinë të mos e pushtojë vendin e tyre përsëri në të ardhmen.

Trump nuk u pyet për anëtarësimin e Ukrainës në NATO, por ka kritikuar organizatën ushtarake të udhëhequr nga SHBA në të kaluarën, duke thënë se ajo është barrë për financat e SHBA. Shtetet e Bashkuara përbëjnë rreth 60 për qind të shpenzimeve ushtarake të NATO-s.

Gjatë një fjalimi të enjten, sekretari i Përgjithshëm i NATO-s, Mark Rutte, u bëri thirrje evropianëve t’u bëjnë trysni qeverive të veta për t’i rritur shpenzimet në mbrojtje.

Rusia po përgatitet për konfrontim afatgjatë. Me Ukrainën, dhe me ne”, shtoi ai.

Lajmet

​Izraeli fillon tërheqjen e trupave ushtarake në disa pjesë të Gazës

Published

on

Mediat e huaja kanë raportuar se Izraeli ka filluar tërheqjen e tij të pjesshme ushtarake në Gaza shkruan BBC.

Ushtria izraelite thotë se një armëpushim është tani në fuqi pasi forcat e saj u tërhoqën në disa pjesë të Gazës.

“Trupat janë pozicionuar përgjatë vijave të dakorduara sipas planit të Trumpit, por do të vazhdojnë të largojnë çdo kërcënim të menjëhershë”, tha ushtria.

Kjo vjen pasi qeveria izraelite miratoi një marrëveshje me Hamasin, e cila parasheh gjithashtu lirimin e pengjeve. Hamasi tani ka 72 orë për të liruar të gjithë pengjet izraelite, ndërsa Izraeli do të lirojë qindra të burgosur palestinezë.

Kamionët e ndihmës pritet që më pas të vërshojnë për të ndihmuar dy milionë banorët e Gazës, shumica e të cilëve janë zhvendosur./S.K/KP/

Continue Reading

Lajmet

Tërmet i fuqishëm me magnitudë 7.6 godet Filipinet, alarm për cunami

Published

on

Paralajmërime për cunami janë lëshuar për disa vende pasi një tërmet me magnitudë 7.4 ballë goditi brigjet e Filipineve jugore.

Epiqendra e tërmetit ishte rreth 62 km në juglindje të qytetit Manay, në rajonin Mindanao, në një thellësi prej 22 km.

Qendra e Paralajmërimit për Cunami në Paqësor me seli në SHBA tha se valë deri në 3 metra ishin të mundshme në rajon, me paralajmërimin që mbulonte edhe rajonet Sulawesi dhe Papua të Indonezisë.

Instituti Filipinez i Vullkanologjisë dhe Sizmologjisë tha se priste dëme dhe lëkundje pasuese.

Presidenti fiLipinas, Ferdinand Marcos, tha se autoritetet po vlerësonin situatën në terren.

“Operacionet e kërkim-shpëtimit dhe ndihmës po përgatiten tashmë dhe do të nisin sapo të jetë e sigurt për ta bërë këtë. Po punojmë pa ndërprerje për të siguruar që ndihma të arrijë tek të gjithë ata që kanë nevojë. Le të vazhdojmë të kujdesemi për njëri-tjetrin dhe të lutemi për sigurinë e të gjithë bashkatdhetarëve tanë”, shtoi presidenti.

Ndryshe, tërmeti është ndër më të fuqishmit që kanë goditur “Unazën e Zjarrit” të Paqësorit vitet e fundit, një zonë që ka më shumë se 800 tërmete çdo vit./S.K/EO/

Continue Reading

Lajmet

Trump: I kam dhënë fund 8 konflikteve, por nuk e bëra për Nobelin

Published

on

Presidenti amerikan Donald Trump ka deklaruar se i ka dhënë fund 8 konflikteve në të gjithë botën, por këtë gjë nuk e ka bërë për të fituar Nobelin e Paqes.

Në pritjen që i bëri Presidentit të Finlandës, Alexander Stubb, Trump u shpreh se askush në histori nuk i ka dhënë fund tetë luftërave në nëntë muaj.

“Por, ata që japin Çmimin Nobel e dinë vetë punën e tyre. Janë të zotë në atë që bëjnë, mirëpo askush në histori nuk i ka dhënë fund tetë luftërave në nëntë muaj. Nuk e bëra për të fituar çmimin. E bëra për të shpëtuar shumë jetë”, u shpreh Trump.

Në fakt, konfliktet për të cilat flet Donald Trump nuk janë 8, por 7. Armeni-Azerbajxhan, Republika Demokratike e Kongos-Ruanda, Izrael-Iran, Indi-Pakistan, Kamboxhia-Tajlandë, Egjipt-Etiopi, si dhe një marrëveshje e pjesshme midis Serbisë dhe Kosovës, gjatë mandatit të tij të parë presidencial./S.K/KP/A2

Continue Reading

Lajmet

Owen: ​Mbi 1.27 milion njerëz flenë rrugëve të Evropës çdo natë

Published

on

Zëvendës-drejtoresha e Federatës së Organizatave Kombëtare që Punojnë me të Pastrehët në Evropë, Ruth Owen tha se sipas të dhënave të fundit evropiane, më shumë se 1.27 milion njerëz flenë në rrugë ose strehimore në të gjithë Evropën çdo natë.

Duke shënuar Ditën Botërore të Pastrehëve, Owen tha se mungesa e strehimit është shndërruar në krizë të thellë, sidomos në qytetet e mëdha.

“Përveç gjumit në rrugë dhe qëndrimit në akomodim për njerëzit e pastrehë, kjo do të përfshinte gjëra të tilla si qëndrimi me familjen dhe miqtë sepse nuk keni ku të shkoni tjetër, dhe kjo arrin në pothuajse 5% të popullsisë së BE-së (që) kanë përjetuar një formë të mungesës së strehimit në jetën e tyre.”, tha ajo.

Ajo shtoi se mungesa e strehimit është përkeqësuar në shumë qytete evropiane, duke përmendur Brukselin si një nga shembujt më të zymtë.

“Mendoj se hera e parë që u numërua popullsia e pastrehë në Bruksel ishte në vitin 2008, dhe ishte rreth 1.700 njerëz. Dhe tani është më shumë se 10.000. Njëra prej tyre është padyshim kostoja e strehimit në qytet,” vlerësoi ajo.

Gjermania ka popullsinë më të madhe të pastrehë në Evropë, me rreth 530.000 njerëz, tha Owen, duke shtuar se shifra pasqyron si një regjistrim gjithëpërfshirës ashtu edhe një përkufizim të gjerë të mungesës së strehimit.

Në Francë, numri i të pastrehëve u rrit me 20 mijë vitin e kaluar për të arritur në 350 mijë, sipas një raporti të vitit 2025 nga Fondacioni për të Pastrehët. Raporti përmendi ngecjen në ndërtimin e banesave, rritjen e çmimeve të qirave dhe mungesën e veprimeve qeveritare si faktorë kryesorë nxitës.

Gjithashtu tha se 2.7 milionë njerëz janë duke pritur për strehim publik në Francë, por vetëm 393 mijë prej tyre u ndanë për strehim të tillë në vitin 2023.

Raporti theksoi se deri më sot nuk janë ndërmarrë hapa të rëndësishëm për të zgjidhur problemin e strehimit dhe ky problem mund të thellohet si rezultat i mungesës së vullnetit politik të shkaktuar nga krizat e vazhdueshme qeveritare.

Raporti tha se numri i personave të pastrehë u rrit me 130 për qind gjatë periudhës 2002-2022, duke vënë në dukje se numri i personave të pastrehë, i cili u regjistrua 330.000 vitin e kaluar, është rritur me 20.000 këtë vit, për të arritur në total prej 350.000.

Si zgjidhje për mungesën e strehimit, Owen rekomandoi rritjen e iniciativave të strehimit publik dhe rregullimin e tregut të strehimit.

“Mendoj se duhet ta bëjmë strehimin më të përballueshëm për njerëzit me të ardhura shumë të ulëta, duke përfshirë rregullimin e tregut të strehimit, ndërtimin e banesave publike dhe ofrimin e mbështetjes së të ardhurave për familjet. Finlanda është një histori e vërtetë suksesi. Ajo e uli popullsinë e saj të pastrehë nga rreth 20 mijë në 3 mijë gjatë dy dekadave,”, përfundoi ajo.

Continue Reading

Të kërkuara