Përfaqësuesja e Kosovës ka nisur dje përgatitjet për ndeshjet e radhës në kuadër të Ligës së Kombeve.

Në ditën e parë të grumbullimit, futbollistët që kishin zhvilluar ndeshje me klubet e tyre gjatë fundjavës iu nënshtruan një programi rigjenerues në palestër.

Ndërkohë, pjesa tjetër e futbollistëve zhvilloi seancën stërvitore në stadiumin “Fadil Vokrri”, duke nisur përgatitjet për sfidat e ardhshme.

Dardanët do të vazhdojnë me intensitet përgatitjet gjatë ditëve në vijim, me fokus te ndeshjet e radhës në Ligën e Kombeve.

D.L

Federata e Futbollit të Izraelit ka reaguar ashpër ndaj deklaratave të përzgjedhësit të Irlandës, Heimir Hallgrimsson, duke i cilësuar ato si “marrëzi, injorancë dhe hipokrizi”.

Përplasja verbale ka ndodhur në prag të dy ndeshjeve të Ligës së Kombeve mes Irlandës dhe Izraelit, të cilat janë shoqëruar me debate të shumta për shkak të situatës në Gaza.

Gjatë konferencës për media, Hallgrimsson u pyet se si synon ta mbajë ekipin të përqendruar te futbolli, në një kohë kur në Irlandë janë shtuar thirrjet për bojkotimin e ndeshjeve për shkak të zhvillimeve në Gaza.

Përzgjedhësi irlandez u përgjigj:

“E kam thënë tashmë, ne nuk po luajmë me gjenocidin, por kundër gjenocidit. Po luajmë kundër Izraelit, nuk po luajmë me Izraelin”.

Federata e Futbollit të Izraelit reagoi menjëherë përmes profilit të saj zyrtar në rrjetin social X, duke iu kundërpërgjigjur në mënyrë të drejtpërdrejtë trajnerit irlandez.

“Ne kemi kontribuar në botë dhe njerëzimin në shumë fusha, duke fituar një numër mbresëlënës të çmimeve Nobel”.

Në reagimin e federatës izraelite më tej thuhej:

“Fatkeqësisht, ende nuk kemi gjetur një kurë për marrëzinë, injorancën dhe hipokrizinë që tregon trajneri i kombëtares irlandeze”.

Federata vazhdoi me një tjetër deklaratë të drejtpërdrejtë ndaj Hallgrimssonit:

“Ne nuk po luajmë me injorancën, hipokrizinë dhe marrëzinë. Po luajmë kundër një trajneri që i mishëron ato”.

Dy përballjet mes Irlandës dhe Izraelit do të zhvillohen në terrene neutrale. Izraeli do të jetë nikoqir në Debrecen të Hungarisë më 27 shtator, ndërsa ndeshja e kthimit, ku Irlanda do të jetë skuadra pritëse, do të luhet në Baçka Topolë të Serbisë më 4 tetor.

Në Irlandë, prej muajsh është zhvilluar një fushatë për bojkotimin e këtyre ndeshjeve. Më shumë se 160 sportistë irlandezë kanë nënshkruar një letër të hapur, përmes së cilës u kanë bërë thirrje futbollistëve të kombëtares që të veprojnë sipas ndërgjegjes së tyre dhe të refuzojnë të luajnë.

Megjithatë, Federata Irlandeze e Futbollit (FAI) votoi në një asamble të jashtëzakonshme në korrik që ndeshjet të zhvillohen.

Hallgrimsson ka konfirmuar se disa prej futbollistëve ndihen në siklet për shkak të situatës, por ka theksuar se fakti që ata janë paraqitur në grumbullim tregon, sipas tij, një frymë të veçantë ekipore në rrethana të vështira.

D.L

Kombëtarja e Irlandës do të jetë pa dy lojtarë në ndeshjen e parë të fazës së grupeve të Ligës së Kombeve ndaj Kosovës, e cila do të zhvillohet në Prishtinë të enjten mbrëma, nga ora 20:45.

Përzgjedhësi i Irlandës, Heimir Hallgrimsson, ka vendosur të ftojë mesfushorin e St. Mirren, Killian Phillips, në skuadrën për katër ndeshjet e Ligës së Kombeve.

Thirrja e Phillips vjen pas tërheqjes nga grumbullimi të Jamie McGrath dhe Harvey Vale. Të dy mesfushorët, që aktivizohen te Hibernian dhe Queens Park Rangers, respektivisht, kanë pësuar lëndime gjatë ndeshjeve me klubet e tyre në fundjavë.

Phillips pritet t’i bashkohet skuadrës në Dublin gjatë ditës së sotme, përpara nisjes drejt Prishtinës, ku Irlanda do të përballet me Kosovën të enjten, më 24 shtator.

Pas sfidës në Prishtinë, Irlanda do të udhëtojë drejt Debrecenit të Hungarisë, ku do të përballet me Izraelin. Më pas, skuadra irlandeze do të rikthehet në Dublin për ndeshjen ndaj Austrisë, e cila do të zhvillohet në stadiumin “Aviva”.

Aventura e këtij afati do të mbyllet me një tjetër përballje ndaj Izraelit, këtë herë në Baçka Topola të Serbisë.

D.L

Rasti i Granit Xhakës ka marrë përmasa të mëdha në Zvicër dhe në mediat ndërkombëtare, pasi kapiteni i përfaqësueses helvetike pranoi publikisht se kishte siguruar një certifikatë të falsifikuar vaksinimi kundër COVID-19. Ngjarja ka nxitur reagime të shumta, ndërsa Prokuroria Publike e Lucernit tashmë ka nisur hetime zyrtare ndaj tij për dyshimet rreth falsifikimit të dokumenteve, me futbollistin që pritet të merret në pyetje nga autoritetet në fillim të muajit të ardhshëm.

Pasi lajmi u bë publik nga mediat zvicerane, vetë Xhaka reagoi përmes një postimi në rrjetet sociale, ku e pranoi sigurimin e certifikatës, e cilësoi veprimin si një gabim të rëndë dhe kërkoi falje publike. Pranimi i tij i dha një dimension të ri procesit, duke hapur një debat të gjerë mbi pasojat ligjore dhe të ardhmen e tij me kombëtaren. Sipas analizave mediatike në Zvicër, nëse shpallet fajtor, Xhaka mund të përballet me gjobë financiare, ndërsa dënimi me burgim, ndonëse i parashikuar në teori nga ligji deri në pesë vjet, konsiderohet si një mundësi thuajse e pamundur.

Lajmi ka bërë jehonë të madhe edhe në mediumet më të njohura ndërkombëtare si “BBC”, “Reuters” dhe “The Guardian”. Ndërkohë, mediat zvicerane si “Blick”, “SRF” dhe “20 Minuten” po diskutojnë hapur nëse Xhaka duhet të vazhdojë ta mbajë shiritin e kapitenit apo të largohet nga përfaqësuesja. Në mes të këtij presioni, Federata Zvicerane e Futbollit dhe presidenti Peter Knabel kanë konfirmuar se është vendosur që Xhaka të mbetet jashtë grumbullimit aktual në Turqi dhe të mungojë në katër ndeshjet e ardhshme të Ligës së Kombeve, me qëllim që të ruhet qetësia brenda ekipit deri në një rivlerësim të dytë të situatës.

D.L