Në kuadër të lëndës Marketingu Digjital në Fakultetin e Menaxhimit, Biznesit dhe Ekonomisë (MBE) të UBT-së, u mbajt një ligjëratë tematike me Gentian Retkocerin, përfaqësues i kompanisë së njohur të marketingut Bling Marketing. Aktiviteti u organizua nga profesoresha Gonxhe Beqiri, në bashkëpunim me Zyrën për Produkte dhe Zhvillim Profesional, duke ofruar një mundësi të çmuar për studentët që të lidhin teorinë me praktikën.

Ligjërata u përqendrua në prezantimin e projektit inovativ Creative Spark for SMEs, pjesë e nismës më të gjerë për Industrinë Kreative, një bashkëpunim mes UNDP-së dhe UBT-së. Gentian Retkoceri ndau me studentët qëllimet kryesore të projektit, duke theksuar rëndësinë e përfshirjes së marketingut digjital në zhvillimin e ndërmarrjeve të vogla dhe të mesme (SMEs). Në mënyrë të veçantë, ai u fokusua në mundësitë që ky projekt ofron për studentët e UBT-së, duke përfshirë punën praktike (internship) si një mënyrë për të fituar përvojë reale në projekte marketingu, angazhimin në aktivitete krijuese me qëllim zhvillimin e aftësive praktike dhe kreative të studentëve, si dhe përfitimet për karrierën, duke e parë këtë projekt si një trampolinë për të hyrë në botën profesionale të marketingut.

Ligjërata u shoqërua me një sesion të pasur pyetje-përgjigjesh, ku studentët parashtruan pyetje mbi procedurat e aplikimit për punë praktike, rëndësinë strategjike të marketingut digjital për bizneset e vogla dhe projektet konkrete të realizuara nga Bling Marketing. Gentian Retkoceri ndau përvoja të tij personale dhe sfidat e tregut të marketingut, duke inkurajuar studentët të jenë aktivë dhe të marrin iniciativa në projekte praktike. Ky aktivitet u vlerësua lart nga studentët, të cilët përfituan informacione të drejtpërdrejta nga një profesionist i fushës dhe u frymëzuan për të eksploruar mundësi të reja në botën e marketingut digjital.

Ligjërata ishte një shembull i bashkëpunimit të frytshëm midis industrisë dhe arsimit, duke forcuar vizionin e UBT-së për t’i pajisur studentët me aftësi të kërkuara në tregun e punës. Në përfundim, Gentian Retkoceri falënderoi UBT-në për bashkëpunimin dhe angazhimin në zhvillimin profesional të studentëve, ndërsa profesorja Gonxhe Beqiri theksoi rëndësinë e këtyre aktiviteteve për të përgatitur liderët e ardhshëm në menaxhim dhe marketing./UBTNews/

 

 

Fakulteti i Inxhinierisë së Ndërtimit dhe Infrastrukturës në UBT dhe Ndërmarrja Publike Banesore (NPB) kanë nënshkruar një Memorandum Bashkëpunimi, i cili hap një kapitull të ri për bashkëpunimin akademik dhe kërkimor ndërmjet dy institucioneve. Memorandumi synon të forcojë lidhjet ndërinstitucionale dhe të krijojë mundësi të reja për zhvillimin e projekteve inovative, si dhe përmirësimin e kurrikulave edukative.

Në kuadër të këtij memorandumi, palët janë dakorduar për një bashkëpunim të ngushtë në disa aspekte kyçe të zhvillimit akademik dhe profesional, me një fokus të veçantë në shkëmbimin e përvojave dhe implementimin e mundësive praktike për studentët e UBT-së. Kjo marrëveshje mbështet zhvillimin e projekteve dhe aktiviteteve shkencore, duke kontribuar në ngritjen e kapaciteteve të stafit të Ndërmarrjes Publike Banesore.

Pikat kryesore të Memorandumit përfshijnë shkëmbimin e përvojave dhe praktikave profesionale për studentët e UBT-së në NPB. Praktikat do të realizohen në përputhje me planin mësimor dhe kërkesat e programeve të lëndëve përkatëse. Po ashtu, UBT do të ofrojë mundësi trajnimi për stafin e NPB-së, duke ndihmuar në avancimin e aftësive profesionale të tij.

Memorandumi parashikon zhvillimin e projekteve kërkimore të përbashkëta, ku të dyja palët do të kontribuojnë për avancimin e dijes dhe teknologjive të reja në fushat e infrastrukturës dhe ndërtimit. Nëse është e nevojshme, palët mund të arrijnë një marrëveshje shtesë për testimin e materialeve në laboratorët përkatës. UBT do të ofrojë mundësi trajnimesh dhe zhvillimi për stafin e NPB-së, me qëllim ngritjen e kapaciteteve profesionale të punonjësve. Këto trajnime do të zhvillohen në përputhje me një politikë të përbashkët, të miratuar paraprakisht nga të dy institucionet.

Pikë tjetër ishte edhe përfshirja e institucioneve për të ofruar hapësira dhe pajisje të nevojshme për realizimin e qëllimeve të përfshira në këtë memorandum, duke siguruar kushte optimale për zhvillimin e aktiviteteve të përbashkëta.

Në përmbyllje të këtij eventi, Visar Krelani, Dekan i Fakultetit të Inxhinierisë së Ndërtimit dhe Infrastrukturës, së bashku me Arton Berishën, kryeshefin e NPB dhe Erand Tahirin, udhëheqësin e Divizionit për Infrastrukturë në NPB dhe ish-student të UBT-së, shprehën angazhimin e tyre të plotë për zhvillimin e këtij bashkëpunimi. Ata u shprehën të gatshëm të vazhdojnë përpjekjet e tyre për ta çuar përpara këtë marrëveshje dhe për të kontribuar në avancimin e industrive të ndërtimit dhe infrastrukturës në Kosovë.

Dekani i Fakultetit, Visar Krelani, duke theksuar intensitetin e bashkëpunimit midis UBT-së dhe NPB-së, theksoi rëndësinë e ofrimit të mundësive për praktika për studentët, përveç punës teorike. Profesori tha se, është thelbësore që studentët të përfitojnë nga praktika në mënyrë që të zhvillojnë aftësitë e tyre profesionale. Krelani nënvizoi se shumë institucione të Kosovës udhëhiqen nga profesorë dhe ish-studentë të UBT-së, të cilët kanë dëshmuar sukses dhe profesionalizëm në fusha të ndryshme.

“Ky bashkëpunim është një shembull i qartë se si partneritetet mes akademisë dhe industrisë mund të transformojnë përvojën e studentëve dhe të sjellin vlera konkrete për shoqërinë”, theksoi Prof. Dr. Visar Krelani gjatë ceremonisë së nënshkrimit.

“Ju përgëzoj për arritjet e jashtëzakonshme dhe për imazhin e fortë që keni ndërtuar si një institucion kredibil. Pas diskutimeve të zhvilluara, jemi të gatshëm dhe entuziastë për të vijuar bashkëpunimin tonë. Ne jemi të hapur dhe të angazhuar, sepse si ndërmarrje kemi nisur të zhvillohemi jashtë modelit tradicional, duke u zgjeruar dhe duke u bërë partnerë kryesorë me institucionet më të rëndësishme në Kosovë. Ky është një hap i rëndësishëm në rrugëtimin tonë drejt një të ardhmeje më të ndritur”, u shpreh kryeshefi i NPB-së Arton Berisha.

Profesorët Hazir Çadraku, Hysen Ahmeti, Edon Maliqi dhe Blerta Retkoceri theksuan rëndësinë e implementimit të praktikës për studentët dhe shprehën mbështetje të plotë për realizimin e këtij bashkëpunimi, duke e konsideruar atë si një mundësi të shkëlqyer për zhvillimin e aftësive praktike dhe profesionale të studentëve. Profesori Çadraku theksoi se beson në koordinimin e çështjeve dhe ngritjen e kapaciteteve të studentëve, sepse përkushtimi ndaj studentëve bën që të mbarten detyra dhe përgjegjësi me profesionalizëm./UBTNews/

 

 

 

 

Studentët e UBT-së kanë pasur mundësinë të përjetojnë një udhëtim të paharrueshëm në disa nga qytetet më të bukura dhe historike të Evropës. Ky udhëtim u organizua dhe u udhëhoq nga profesorët Ajhan Bajmaku dhe Bashkim Shala, duke përfshirë ndalesa në disa prej qyteteve më të njohura dhe më të rëndësishme të Evropës.

Verona, Itali

Verona ishte një mundësi spontane që studentët nuk e humbën. Duke mbërritur më herët në Itali, ata shfrytëzuan rastin për të eksploruar qendrën historike të qytetit. Arkitektura e Veronës dhe atmosfera e saj romantike lanë mbresa të thella, duke përfshirë vizita në sheshet kryesore dhe ndërtesat e vjetra me vlera të rralla kulturore.

Venedik, Itali

Vizita në Venedik nisi me analizimin e fasadave dhe objekteve historike, duke ndjekur rrugët ujore deri te qendra, në Sheshin San Marco. Studentët u njohën me historinë e qytetit, arkitekturën unike dhe sistemin inovativ të transportit ujor. Kjo eksperiencë shërbeu si frymëzim për shumë prej tyre, sidomos për ata që studiojnë arkitekturë dhe infrastrukturë urbane.

Paris, Francë

Udhëtimi në Paris filloi me një vizitë te Kulla e Ajfellit, simboli i qytetit dhe një mrekulli inxhinierike. Studentët shijuan pamjet panoramike dhe kapën momente të veçanta me fotografi në afërsi të muzeut të Arkitekturës.

Vizita vazhdoi në Palais de Tokyo, një muze bashkëkohor i artit, ku studentët u njohën me punimet e artistëve të njohur dhe eksploruan instalacione dhe hapësira inovative. Një tjetër ndalesë ishte Pompidou Center, i famshëm për arkitekturën e tij futuriste, projektuar nga Richard Rogers dhe Renzo Piano. Ky muze ishte një mundësi për studentët që të përjetonin ndërthurjen e artit dhe teknologjisë.

Delft, Holandë

Në Delft, vizita ishte e përqendruar te Universiteti i Arkitekturës, një nga më të njohurit në Evropë. Studentët eksploruan laboratorët e pajisur me teknologji moderne dhe studimet e realizuara nga studentët vendas. Një veçori e vizitës ishte ligjërata nga profesori i njohur Mark Pimlott, i cili ndau këshilla dhe eksperienca mbi dizajnin e enterierit. Vizita vazhdoi te Fakulteti i Dizajnit Industrial, ku studentët panë proceset e zhvillimit të patentimeve të makinerive dhe produkteve që kanë ndikim të gjerë në tregun evropian.

Rotterdam, Holandë

Pas vizitave në qytetet e tjera, udhëtimi vazhdoi në Rotterdam, një qytet i njohur për arkitekturën moderne dhe urbane. Studentët eksploruan qendrën e qytetit, ku kombinimi i traditës dhe modernitetit është evident në çdo hap. Një nga pikat kryesore të vizitës ishte Tregu i Gjelbër i Qytetit, një strukturë ikonike e projektuar nga studioja ndërkombëtare MVRDV, e cila është e njohur për qasjen vizionare ndaj arkitekturës urbane. Ky treg ofron një shembull të shkëlqyer të mënyrës se si arkitektura bashkëkohore mund të krijojë hapësira funksionale dhe estetike për komunitetin.

Amsterdam, Holandë

Vizita në Amsterdam filloi me eksplorimin e Stedelijk Museum, një qendër ikonike arti dhe dizajni, e projektuar nga studioja e mirënjohur Benthem Crouwel Architects. Ky muze ofron një koleksion të pasur të artit modern dhe bashkëkohor. Pas kësaj, studentët vizituan Muzeun Vincent van Gogh, ku patën mundësinë të shohin nga afër disa prej veprave më të famshme të piktorit legjendar dhe të përjetojnë një udhëtim të jashtëzakonshëm në botën e artit dhe kreativitetit.

 

Berlin, Gjermani

Në Berlin, vizita filloi me Portën e Triumfit (Brandenburger Tor), një nga simbolet më të njohura të qytetit dhe një monument historik. Më pas, studentët eksploruan Peizazhin Përkujtimor të Holokaustit, një vepër emocionuese dhe domethënëse e arkitektit Peter Eisenman, që reflekton mbi historinë dhe kujtesën kolektive. Vizita vazhdoi në Muzeun e Filmit, ku studentët patën mundësinë të mësojnë më shumë rreth industrisë së filmit dhe festivaleve të famshme si Berlinalja, duke ndjerë atmosferën historike të Berlinit.

Pragë, Çeki

Vizita në Pragë filloi me eksplorimin e Qytetit të Vjetër, një nga zonat më historike dhe piktoreske të qytetit. Si pjesë e kësaj, studentët vizituan ndërtesën ikonike Dancing House, një kryevepër arkitekturore e krijuar nga Frank Gehry, e njohur për format e saj unike dhe dinamike. Më pas, udhëtimi vazhdoi drejt Urës së Karlit (Charles Bridge), një nga atraksionet më të famshme dhe të dashura të Pragës, që ofron një peizazh magjepsës të qytetit dhe lumit Vltava. Kjo vizitë i dha studentëve një përvojë të veçantë në zemrën kulturore të Pragës.

Vjenë, Austri

Eurotripi përfundoi në Universitetin e Vjenës, ku studentët patën mundësinë të bashkëpunojnë me profesorët Skender Kosumi dhe Tomas Dilinger. Ata morën pjesë në diskutime dhe aktivitete që shtriheshin nga arkitektura deri te teknologjitë moderne. Vjena, me trashëgiminë e saj të pasur kulturore dhe institucionet arsimore të nivelit të lartë, ishte një pikë kulminante e këtij udhëtimi.

Ky Eurotrip konfirmoi edhe një herë përkushtimin e UBT-së për të ofruar mundësi që i pasurojnë studentët jo vetëm me dije teorike, por edhe me përvoja praktike dhe kulturore të rëndësishme. Vizitat në këto qytete të njohura evropiane ndihmuan studentët të zgjeronin horizontet e tyre, duke u frymëzuar nga arkitektura, arti dhe kultura e pasur që ofron secila prej tyre./UBTNews/