Sport

Trajneri i Gjeorgjisë: Ndeshja ndaj Kosovës nuk do të jetë e lehtë për ne

Trajneri i GJeorgjisë, e cilësoi Kosovën si kundërshtarë të fortë që nuk duhet të nënvlerësohet.

Published

4 years ago

October 5, 2021

UBT news

Kombëtarja e Kosovës do ta vazhdojë ëndrrën për kualifikim në Kampionatin Botëror “Katar 2022”, ku këtë muaj do të zhvillojë dy ndeshje, njërën si mysafirë kundër Suedisë dhe tjetrën si vendas kundër Gjeorgjisë.

Ndeshja e parë kundër Suedisë do të zhvillohet më datën 9 tetor në stadiumin “Friends Arena”, kurse ndeshjen e dytë ndaj Gjeorgjisë, “Dardanët” do ta zhvillojnë më 12 tetor si vendas në stadiumin “Fadil Vokrri”, përcjell KosovaPress.

Para ndeshjes mes Kosovës e Gjeorgjisë, trajneri i kësaj të fundit ka mbajtur një konferencë për media, ku e cilësoi Kosovën si kundërshtarë të fortë që nuk duhet të nënvlerësohet.

“Duke e konsideruar kompozimin e kosovarëve, ku lojtarët e tyre luajnë në Napoli, Lazio, Roma dhe skuadra të tjera të mëdha, ne ende nuk kemi lojtarë që luajnë në këto lloje të skuadrave. Ne punojmë shumë dhe shpresojmë që në të ardhmen lojtarët tonë të luajnë në klube dhe liga më të forta, ky është qëllimi jonë”, tha Sagnol.

“Sidoqoftë, duhet shumë punë për ta arritur këtë gjë. Kur ne luajmë kundër një kombëtareje që lojtarët e saj luajnë në nivelet më të larta, nuk mund të themi që një ndeshje si kjo do të jetë e lehtë për ne, dhe ky është fakt”, shtoi trajneri i Gjeorgjisë.

Kombëtarja e Kosovës dhe ajo e Gjeorgjisë gjenden në Grupin B së bashku me kombëtaret e tjera si ajo e Spanjës, Greqisë dhe Suedisë.

Sa i përket renditjes, Kosova pozicionohet në vendin e katërt me katër pikë, dy më pak se Greqia në vend të tretë, kurse Gjeorgjia zë vendin e fundit në tabelë me vetëm një pikë të arkëtuar.

Sport

Champions League, City dhe Chelsea luftojnë për rikthim

Published

14 hours ago

March 17, 2026

UBTNews

Manchester City dhe Chelsea, përballen me një mision shumë të vështirë për të siguruar kualifikimin në çerekfinale të UEFA Champions League.

Të dy skuadrat pësuan humbje të thella në ndeshjet e para, City u mposht 3:0 nga Real Madrid në “Santiago Bernabeu”, ndërsa Chelsea humbi 5:2 ndaj Paris Saint-Germain në Paris. Ndeshjet e kthimit zhvillohen sot nga ora 21:00.

Përmbysja e disavantazheve të tilla ndaj skuadrave si Real Madridi dhe PSG konsiderohet shumë e vështirë, duke pasur parasysh cilësinë dhe përvojën e tyre në garat evropiane. Megjithatë, te City mbizotëron besimi. Kapiteni Bernardo Silva theksoi se skuadra do të luftojë deri në fund, pavarësisht rezultatit të parë negativ.

Nga ana tjetër, Chelsea synon reagim në shtëpi, edhe pse përballet me mungesën e kapitenit Reece James për shkak të lëndimit. Trajneri Liam Rosenior ka kërkuar përqendrim maksimal dhe shmangie të gabimeve ndaj kampionit në fuqi.

Në kampin e PSG-së, Ousmane Dembele theksoi se skuadra e tij do të hyjë në fushë për fitore, duke paralajmëruar një tjetër ndeshje të fortë ndaj londinezëve.

Në takimet e tjera, Sporting CP përballet me Bodo/Glimt, ku norvegjezët kanë epërsi 3:0 nga ndeshja e parë. Ndërkohë, Arsenal FC dhe Bayer Leverkusen nisin nga barazimi 1:1, duke lënë gjithçka të hapur për kualifikim.

Sport

Sfida e fortë në Romë për karatistët kosovarë

Published

17 hours ago

March 17, 2026

UBTNews

Ka përfunduar gara prestigjioze Karate 1 Premier League Rome 2026, e mbajtur në Romë, Itali, ku morën pjesë edhe përfaqësuesit e Federatës të Karatesë së Kosovës.

Në këtë turne të nivelit më të lartë botëror, ku garojnë vetëm 32 sportistët më të mirë në secilën kategori, Kosovën e përfaqësuan Islam Selmani në kategorinë -60 kg dhe Betim Maliqi në kategorinë -75 kg.

Selmani nuk arriti të vazhdojë garën për shkak të një lëndimi që pësoi gjatë fazës së grupeve, ndërsa Maliqi pati paraqitje solide, por nuk arriti të kalojë këtë fazë të garës.

Për të dy garuesit, kjo ishte hera e parë që merrnin pjesë në një kompeticion të këtij niveli. Në këtë aktivitet, ata u shoqëruan nga trajneri i përfaqësueses, Agron Tosuni.

Federata e Karatesë e Kosovës u ka uruar sportistëve suksese në garat e ardhshme dhe rezultate edhe më të mira në skenën ndërkombëtare.

Sport

Humbje për Agnesa Veselin në “Montenegro Cup”

Published

17 hours ago

March 17, 2026

UBTNews

Në kuadër të turneut ndërkombëtar Montenegro Cup, që po zhvillohet në Budva, Mali i Zi, boksierja Agnesa Veseli u paraqit në kategorinë 51 kg.

Ajo u përball me ukrainasen Sofia Turbnina, por nuk arriti të sigurojë fitore në këtë duel.

Turneu po mbledh boksierë të rinj nga vende të ndryshme të Evropës dhe shërben si një mundësi e rëndësishme për fitimin e përvojës ndërkombëtare dhe zhvillimin e tyre në arenën sportive.

Sport

Goditje për Neymarin, mbetet jashtë Brazilit

Published

18 hours ago

March 17, 2026

UBTNews

Neymar Jr ka reaguar me zhgënjim pasi nuk është përfshirë në listën e fundit të Kombëtarja e Brazilit.

Sulmuesi i Santos FC pranoi se ndihet i mërzitur dhe i trishtuar për këtë vendim, por theksoi se do të vazhdojë të punojë për t’u rikthyer në formën më të mirë.

Ish-lojtari i FC Barcelona dhe Paris Saint-Germain ndau një mesazh emocional, ku nënvizoi se përjashtimi nuk e ndryshon fokusin e tij. Ai u shpreh se do të vazhdojë të përqendrohet në përmirësimin e përditshëm përmes stërvitjes dhe ndeshjeve.

“Jam i mërzitur dhe i trishtuar që nuk jam thirrur, por fokusi mbetet i njëjtë: ditë pas dite, stërvitje pas stërvitjeje, ndeshje pas ndeshjeje,” është shprehur Neymar.

Mungesa e tij në listë lidhet kryesisht me problemet e fundit fizike dhe periudhën e gjatë të rikuperimit, të cilat kanë ndikuar në ritmin dhe formën e tij në fushë. Për këtë arsye, stafi teknik i Brazilit ka vendosur të mbështetet te lojtarët që aktualisht janë në formë optimale.

Ndërkohë, në përfaqësuesen braziliane po zhvillohet edhe një proces rinovimi, ku gjithnjë e më shumë hapësirë po u jepet futbollistëve të rinj, në funksion të ndërtimit të skuadrës për sfidat e ardhshme madhore.