Policia e Kosovës ka arrestuar në dy raste të ndara dy persona në Prishtinë dhe Obiliq, të cilët kërkohen me nga dy urdhëresa aktive të gjykatës.

Personi F.S. (24), është arrestuar në Obiliq, pasi është i dënuar me katër vjet e dy muaj për veprat vjedhje.

Ndërsa V.K. (42), është arrestuar në Prishtinë, pasi është i dënuar me tri vjet për blerje, posedim, shpërndarje dhe shitje të paautorizuar e narkotikëve, substancave psikotrope dhe analoge, thuhet në njoftimin e Policisë së Kosovës.

Këshilli i Mbrojtjes dhe Sigurisë Kombëtare të Ukrainës shpalli sot një vendim të rëndësishëm, duke ndaluar ushtarët dhe zyrtarët e qeverisë nga përdorimi i aplikacionit Telegram në pajisjet e tyre elektronike për arsye sigurie.

Në një njoftim zyrtar, Këshilli theksoi se “vendimi përfshin ndalimin e instalimit dhe përdorimit të Telegramit në pajisjet zyrtare të përfaqësuesve të qeverisë, personelit ushtarak, punonjësve në sektorin e sigurisë dhe mbrojtjes, si dhe në kompanitë që operojnë në infrastrukturën kritike,” duke bërë përjashtime të vogla për situata specifike.

Ky vendim erdhi pas një takimi të rëndësishëm ku u diskutuan kërcënimet e sigurisë kombëtare që lidhen me përdorimin e aplikacioneve të tilla. Telegram, i themeluar nga rus Pavel Durov, është një aplikacion i njohur për dërgimin e mesazheve, por që është kritikuar për potencialin e tij për abuzim dhe për rrezikun që paraqet për informacione të ndjeshme.

Autoritetet ukrainase kanë shprehur shqetësime se përdorimi i Telegramit mund të rrisë riskun e spiunazhit dhe rrjedhjes së informacionit të ndjeshëm, duke e bërë këtë masë të domosdoshme për ruajtjen e sigurisë kombëtare./UBTNews/

Kryeministri Albin Kurti është takuar sot në Bruksel me drejtorin e përgjithshëm për Zgjerim Gert Jan Koopman, me të cilin diskutoi mbi procesin e integrimit të Kosovës në BE, përfshirë perspektivën për avancimin e kandidaturës për anëtarësim në kontekstin aktual evropian.

Në takim u trajtuan edhe çështje tjera të ndërlidhura me procesin e zgjerimit të BE-së në rajonin e Ballkanit Perëndimor, mes të cilave edhe për nevojën e funksionalizimit të Tregut të Përbashkët Rajonal, mbi parimet e pjesëmarrjes së barabartë për të gjitha shtetet e rajonit.

Kurti tha se Kosova është e interesuar që Tregu i Përbashkët Rajonal të funksionalizohet, sidomos tani kur shënohet 10-vjetori i Procesit të Berlinit, dhe shtoi se kjo duhet arritur duke avancuar në drejtimin e afrimit të rajonit me standardet evropiane, si ato në fushën e ekonomisë, ashtu edhe ato në fushën e demokracisë dhe sundimit të ligjit. Ai theksoi se për Kosovën pengesat aktuale në progresin e saj kanë të bëjnë me situatën e sigurisë dhe kërcënimin e vazhdueshëm që vjen nga Serbia, dhe të cilin tha se Kosova kërkon ta adresojë në bashkëpunim me partnerët perëndimorë, pikërisht për shkak të lidhjeve shumta dhe të ngushta të Serbisë me Rusinë.

Duke folur për procesin e dialogut Kosovë-Serbi që është proces i ndarë, por që ka ndikim në zgjerimin e BE-së, Kurti tha se Kosova vazhdimisht ka qenë palë konstruktive dhe se e ka në interes përmbylljen e këtij procesi.

Kosova riafirmon përkushtimin e saj për procesin e normalizimit të marrëdhënieve mes Kosovës dhe Serbisë dhe zotohet për angazhim konstruktiv në proces për ta çuar atë shpejt përpara. Në këtë kontekst, Kosova zotohet që plotësisht të zbatojë të gjitha obligimet respektive që dalin nga marrëveshja bazike për rrugën drejt normalizimit dhe aneksi zbatues i saj, përfshirë aty të gjitha marrëveshjet e kaluara të dialogut. Detajet e implementimit do të diskutohen në dialog nën lehtësimin e BE-së, tha kryeministri Kurti.

Në takim, po ashtu, u diskutua edhe fillimi i zbatimit të Planit të Rritjes, si instrument i Komisionit Evropian i krijuar për t’i dhënë shtysë të madhe afrimit sa më të shpejtë dhe përmbajtjesor të vendeve të Ballkanit Perëndimor me BE-në.

Ndërsa, Koopman porositi se përkushtimi i institucioneve evropiane në Bruksel për integrimin e Kosovës dhe Ballkanit Perëndimor në BE është i fortë dhe do të vazhdojë të jetë i tillë edhe me përbërjen e ardhshme të Komisionit Evropian.

Një person është plagosur mëngjesin e sotëm te tregu i gjelbër në Mitrovicë, ndërsa pas trajtimit në spitalin e këtij qyteti, është dërguar në Qendrën Klinike Universitare të Kosovës në Prishtinë. Megjithatë viktima edhe pas përpjekjeve maksimale nga stafi i Klinikës Emergjente nuk ka arritur t’i mbijetoj plagës. Kjo është konfirmuar nga zëdhënësi i QKUK-së, Shpend Fazliu.

“Zyra për informim e QKUK-së, ju konfirmon se përkundër përpjekjeve maksimale nga stafi i Klinikës Emergjente, një person i plagosur në Mitrovicë, nuk ka arritur të mbijetojë, për shkak të plagëve që ka pasur dhe gjendjes së rënduar shëndetësore”, shtoi Fazliu.

Ndërsa lajmin për gjuajtjen me armë zjarri dhe plagosjen e një personi e ka konfirmuar zëdhënësi i policisë në Mitrovicë, Avni Zahiti. Ai nuk ka pranuar të flasë para kamerës me arsyetimin se nuk ka informacione të mjaftueshme, por ka bërë të ditur përmes telefonit rrethanat e përgjithshme të këtij incidenti pa dhënë detaje.

“Një person është lënduar nga arma e zjarrit të premten rreth orës 09:42 në Mitrovicë të Jugut. Rasti ka ndodhur në rrugën ‘Fatime Hetemi’ dhe se i plagosuri, i cili është i moshës madhore, është dërguar për tretman mjekësor”, ka thënë Zahiti.

Dëshmitarët e rastit kanë rrëfyer se pak kanë parë nga ngjarja, përveç që kanë dëgjuar të shtëna zjarri, sepse siç thanë ata, gjithçka ka ndodhur shumë shpejtë.

Reshit Musaj, i cili punon në furrën krejt afër vendit ku ka ndodhur ngjarja, tha se ka dëgjuar disa të shtëna nga arma e zjarrit dhe se gjithçka është zhvilluar shumë shpejt, ndërsa gëzhojat e plumbave kanë depërtuar edhe në lokalin ku punon.

“Fillimisht kemi dëgjuar të shtëna, sepse kemi qenë duke punuar në punëtori poshtë. Kur kemi dalë lart kemi parë një person të plagosur. Ka qenë në këmbë të veta, por në shpinë ka pasur gjakderdhje… Dorasin nuk e kemi parë… Shumë shpejtë ka ndodhë, derisa kam dalë nalt e kam pa vetëm të lënduarin dhe kam pa predhat në lokal… Besoj 4-5 (të shtëna kam dëgjuar)”, theksoi Musaj.

Në anën tjetër, Gëzim Berisha, u.d. të drejtorit mjekësor në spitalin ‘Sami Haxhibeqiri’ në Mitrovicë, u shpreh se pacienti është pranuar i lënduar me armë zjarri dhe me dy plagë në gjoks. Sipas tij, gjendja e pacientit është serioze dhe pas trajtimit dhe pas marrjes së masave të nevojshme, ai është dërguar në QKUK.

“Sot në orën 09:45 në emergjencën e spitalit të Mitrovicës është sjellur një pacient i lënduar me armë zjarri me dy plagë në gjoks. I kemi marrë të gjitha masat e nevojshme reanimatore dhe pas stabilizimit të gjendjes shëndetësore, pacienti është udhëzuar në QKUK për trajtimin e tij… Gjendja është serioze, stabile ka qenë, shpresoj se do të vazhdojë mirë”, tha Berisha.