Sekretari i Shtetit i SHBA-së, Marco Rubio, ka shprehur mbështetje të plotë për një projektligj të senatorit republikan Lindsey Graham, i cili propozon një raund të ri sanksionesh të ashpra ndaj Rusisë dhe partnerëve të saj tregtarë, raportoi revista New Lines.

Sipas burimit, Rubio është një nga përkrahësit më të zëshëm të projektligjit dhe po punon për miratimin e tij në Senat. “Vini re se si Rubio i ngre sanksionet në një bazë pothuajse të përditshme. Ai dëshiron që Kongresi të miratojë projektligjin Graham sepse ka një shumicë në Senat që nuk i nënshtrohet vetos dhe kjo do të prishte çdo rivendosje të marrëdhënieve me Moskën”, citohet të ketë thënë burimi diplomatik.

Projektligji, i paraqitur në fillim të prillit nga Graham dhe senatori demokrat Richard Blumenthal, përfshin vendosjen e sanksioneve parësore dhe dytësore ndaj Rusisë nëse Moska refuzon propozimet e Uashingtonit për zgjidhjen e konfliktit në Ukrainë. Ai parashikon gjithashtu tarifa importi deri në 500% për mallrat nga vendet që vazhdojnë të blejnë naftë, gaz ose uranium nga Rusia.

Megjithatë, presidenti aktual i SHBA-së, Donald Trump, sipas New Lines, e kundërshton këtë nismë. Ai është shprehur kundër një vendimi të tillë në këtë fazë, duke reflektuar një qëndrim më të kujdesshëm lidhur me përshkallëzimin e mëtejshëm të tensioneve me Moskën.

Ndërkohë, Graham, i cili është përfshirë në listën e Rusisë për persona të shpallur terroristë dhe ekstremistë, vazhdon të jetë një nga figurat më të ashpra në Kongres për sa i përket qëndrimit ndaj Kremlinit.

Projektligji po trajtohet si një test i rëndësishëm për qëndrimin e ardhshëm të SHBA-së ndaj Rusisë dhe politikave të saj energjetike, në një kohë kur lufta në Ukrainë dhe ndikimi ekonomik global i saj vazhdojnë të jenë në qendër të vëmendjes ndërkombëtare.

Ministrat e Financave dhe guvernatorët e bankave qendrore të vendeve të G7-s [grupi i shtatë shteteve më të industrializuara të botës] janë pajtuar gjatë një takimi në Kanadanë perëndimore se Rusia mund të përballet me sanksione shtesë, nëse ajo i reziston një nisme për një armëpushim në luftën e saj në Ukrainë.

Shefat e Financave të G7-s kanë dënuar “luftën brutale” të Rusisë nëpërmjet një komunikate më 22 maj, në fund të takimit të tyre, dhe kanë thënë se nëse përpjekjet për të arritur një armëpushim dështojnë, ata do t’i shqyrtojnë të gjitha opsionet e mundshme, përfshirë “një shtim të mëtejmë të sanksioneve”.

Komunikata ka thënë, po ashtu, se asetet sovrane të Rusisë, që mbahen në juridiksionet e vendeve të G7-s, do të mbeten të ngrira derisa Moska t’i japë fund luftës dhe të paguajë për dëmet që ia ka shkaktuar Ukrainës.

Ministrat janë zotuar edhe që të punojnë bashkë që të sigurojnë se asnjë vend apo entitet që financon apo furnizon “makinerinë rus të luftës” nuk do të mund përfitojnë nga rindërtimi i Ukrainës.

“Ky është një qëndrim shumë i fortë”, ka thënë ministri kanadez i Financave, Francois-Philippe Champagne, duke e quajtur një shtyllë thelbësore të komunikatës, e cila nuk ka përmendur Kinën apo vendet e tjera që akuzohen se e furnizojnë Rusinë me komponentë kritikë.

Takimi i ministrave në Malet Shkëmbore Kanadeze i ka paraprirë një samiti të G7-s që do të mbahet në mes të qershorit, në një resort të afërt malor. Presidenti i Shteteve të Bashkuara të Amerikës, Donald Trump, do të marrë pjesë në këtë samit, ka konfirmuar Shtëpia e Bardhë më 22 maj.

Në takim mori pjesë edhe ministri ukrainas i Financave, Serhiy Marchenko, i cili i bëri thirrje G7-s që të vazhdojë trysninë ndaj Rusisë.

Presidenti ukrainas, Volodymyr Zelensky, nuk e ka përmendur takimin e G7-s në videoadresimin e tij në mbrëmje, por ka thënë se Ukraina është e gatshme t’i ndërmarrë “hapat më të shpejtë të mundshëm” për t’i dhënë fund luftës.

“Ukraina nuk është e interesuar ta zgjasë luftën, por të përgatitet për çfarëdo zhvillimi. Është e qartë për botën se është faji i Rusisë që lufta ende po vazhdon”, ka thënë ai. “Ne të gjithë, nga ana jonë, po i bëjmë të gjitha punët e nevojshme përgatitore. Ajo që nevojitet është gatishmëri reciproke nga Rusia – dhe ajo nuk ekziston tani”.

Përpjekjet diplomatike për t’i dhënë fund konfliktit janë përshpejtuar, ndërsa zyrtarët rusë dhe ukrainas javën e kaluar kanë zhvilluar bisedimet e tyre të para të drejtpërdrejta pas më shumë se tre vjetësh.

Por, Kremlini ka thënë më 22 maj se “ende nuk ka pajtim” për bisedimet e reja për paqe me Ukrainën, duke hedhur poshtë raportimet se dy vendet do të zhvillojnë së shpejti negociata në Vatikan.

Trump ka biseduar përmes telefonit me presidentin rus, Vladimir Putin, më 19 maj, në një përpjekje për t’i dhënë fund, siç është shprehur ai, “kasaphanës” – por as telefonata, e as bisedimet e mëhershme të drejtpërdrejta nuk shtynë Rusinë të bëjë lëshime./REL/

Kreu i Organizatës Botërore të Shëndetësisë, Tedros Adhanom Ghebreyesus, i bëri thirrje Izraelit që të tregojë mëshirë dhe të ndalojë përdorimin e ushqimit dhe furnizimeve mjekësore si armë në konfliktin në Gaza.

Ai theksoi se lufta po dëmtonte vetë Izraelin dhe nuk do të sjellë një zgjidhje të përhershme.

Në asamblenë vjetore të OBSH-së, Ghebreyesus u shpreh:

“Ju mund të imagjinoni se si njerëzit po vuajnë. Është vërtet e gabuar të përdorësh ushqimin si armë. Është shumë e gabuar të përdorësh furnizime mjekësore si armë.”

Sipas mediave ndërkombëtare, Kombet e Bashkuara nisën dje shpërndarjen e ndihmave në Gaza, me rreth 90 kamionë që kaluan kufirin për të mbështetur civilët në nevojë.

Kreu i OBSH-së theksoi gjithashtu se vetëm një zgjidhje politike mund të sjellë një paqe të qëndrueshme. Ai apeloi:

“Ju lutem, a mund të keni mëshirë? Është mirë për ju dhe është mirë për palestinezët. Është mirë për njerëzimin.”

Departamenti i Shtetit Amerikan njoftoi të enjten se do të vendosë sanksione të reja ndaj Sudanit, pas zbulimeve se ushtria sudaneze ka përdorur armë kimike gjatë konfliktit të vazhdueshëm civil kundër Forcave të Mbështetjes së Shpejtë (RSF) në vitin e kaluar.

Sipas një deklarate të zëdhënëses Tammy Bruce, eksportet amerikane drejt Sudanit do të kufizohen dhe do të vendosen masa të reja për kufizimin e huamarrjes financiare. Këto masa do të hyjnë në fuqi më 6 qershor.

“ShBA-të i bëjnë thirrje qeverisë së Sudanit të ndërpresë përdorimin e të gjitha armëve kimike dhe të përmbushë detyrimet e saj sipas Konventës për Armët Kimike”, thuhet në deklaratë, duke iu referuar traktatit ndërkombëtar që ndalon prodhimin dhe përdorimin e armëve të tilla.

Ndonëse nuk janë dhënë detaje të plota për armët kimike të përdorura, New York Times raportoi në janar se Sudani kishte përdorur gaz klori në dy raste të veçanta — një substancë që shkakton dëme të mëdha në sistemin respirator dhe mund të jetë fatale.

Lufta civile në Sudan ka hyrë në vitin e dytë, që nga shpërthimi i konfliktit ndërmjet ushtrisë sudaneze dhe grupit paramilitar RSF, që luftojnë për kontrollin e vendit. Deri tani, mbi 150,000 persona kanë humbur jetën dhe miliona të tjerë janë zhvendosur nga shtëpitë e tyre.

Në muajt e fundit, ushtria ka rimarrë kontrollin mbi kryeqytetin Khartum, por përleshjet vijojnë në pjesë të tjera të vendit.

Zyrtarët sudanezë nuk kanë dhënë ende një reagim zyrtar ndaj veprimeve të SHBA-së, ndërsa BBC njoftoi se ka kontaktuar autoritetet për një përgjigje.

Zbulimet për përdorimin e armëve kimike shtojnë shqetësimet për përshkallëzimin e konfliktit dhe përfshirjen e metodave të ndaluara ndërkombëtarisht në një luftë tashmë të përgjakshme. Bashkësia ndërkombëtare po bën thirrje për përgjegjësi dhe ndalimin e dhunës, ndërsa krizat humanitare në vend thellohen gjithnjë e më shumë.