Sot shënohet 82-vjetori i lindjes së intelektualit, filozofit dhe veprimtarit të shquar Ukshin Hoti. Me këtë rast, Komisioni Qeveritar për Persona të Zhdukur ka organizuar një sërë aktivitetesh përkujtimore, kulturore dhe akademike në Krushë të Madhe, për të nderuar figurën e tij dhe për të rikujtuar angazhimin e pandalshëm për zbardhjen e fatit dhe vendndodhjes së tij.

Në orët e paradites, familjarë, përfaqësues institucionalë dhe qytetarë vizituan Shtëpinë Muze të Ukshin Hotit, duke sjellë homazhe dhe kujtime për jetën dhe veprën e tij. Më pas, në po të njëjtin vend, u mbajt një tribunë ku u diskutua mbi kontributin e tij filozofik, politik dhe kombëtar.

Në kuadër të aktivitetit përkujtimor, gjatë ditës u mbajt edhe një ceremoni për nder të ditëlindjes së tij, ku pjesëmarrësit ritheksuan domosdoshmërinë për zbardhjen e fatit të Ukshin Hotit, i cili u zhduk në mënyrë misterioze në vitin 1999, pas lirimit nga burgu i Dubravës.

Në orët e mbrëmjes, do të hapet një ekspozitë me fotografi të rralla që dokumentojnë jetën e tij dhe angazhimin për çështjen kombëtare. Aktivitetet përmbyllen me ceremoninë e ndarjes së dekoratës komunale “Ukshin Hoti”, një simbolikë nderimi për figurat që kanë lënë gjurmë në historinë dhe ndërgjegjen kolektive të vendit.

Presidentja e Republikës së Kosovës, Vjosa Osmani, sot nis një vizitë zyrtare në kryeqytetin hungarez, Budapest.

Në shenjë mirëseardhjeje për Presidenten Osmani, një nga urat kryesore të qytetit është zbukuruar me flamuj të Kosovës, duke i dhënë kësaj vizite një simbolikë të veçantë.

Kjo është vizita e dytë zyrtare e Osmanit në Hungari, pas asaj të realizuar në nëntor të vitit të kaluar.

Seanca e 33-të për konstituimin e Kuvendit të Kosovës mbahet sot nga ora 10:00.

Kjo seancë vjen pas dështimit të mbledhjes së kaluar, ku mungesa e votave pengoi formimin e komisionit të fshehtë.

Në seancën e 32-të, kryesuesi Avni Dehari ndërpreu punimet menjëherë pas konstatimit se nuk ishte arritur shumica e nevojshme për të ecur përpara me procedurat.

Rendi i ditës mbetet i njëjtë, ndërsa vëmendja është përqendruar në atë nëse deputetët do të arrijnë të gjejnë konsensus për të zhbllokuar këtë proces të stërzgjatur.

Gjykata Themelore në Prishtinë ka liruar të hënën serbin Gavrillo Millosavleviqin, të akuzuar për krime lufte kundër popullatës civile, gjatë kohës së luftës në Kosovë.

Gjykatësi Vesel Ismaili ka deklaruar se nuk është vërtetuar se i dyshuari – në cilësinë e zyrtarit në burgun e Dubravës – e ka kryer veprën penale për të cilën akuzohej, dhe kështu i është ndërprerë edhe masa e paraburgimit, ka raportuar mediumi i specializuar për fushën e sundimit të ligjit në Kosovë, Betimi për Drejtësi.

Atij i ishte ngritur aktakuza më 29 nëntor të vitit 2023 dhe në të përmendej se Millosavleviq, bashkë me disa persona tjera, kishte vrarë, rrahur, maltretuar dhe torturuar të burgosurit civilë shqiptarë.

Sipas aktakuzës, ai kishte qenë pjesë e grupit të ushtarëve serbë, të cilët kishin gjuajtur në drejtim të të burgosurve me mitralozë, mortajë dhe armë tjera, në një operacion të nisur më 22 maj 1999 deri më 24 maj 1999, si pasojë e të cilit ishin vrarë 109 të burgosur.

Në shkurt të vitit 2024, nga akuza për krime lufte ishte liruar edhe serbin tjetër Zllatan Arsiniqi, i cili akuzohej se me pjesëtarë të policisë serbe dhe grupeve paramilitare në kohë lufte, kishte marrë pjesë në dëbimin dhe shpërnguljen me dhunë të banorëve të Kamenicës.

Fondi për të Drejtën Humanitare pati vlerësuar në rastin e Arsiniqit se trupi gjykues i Gjykatës Themelore në Prishtinë, kishte mbajtur proces të drejtë gjyqësor.

Në luftën e viteve 1998-1999 në Kosovë besohet se janë vrarë mbi 13.000 civilë, ndërsa mijëra të tjerë janë zhdukur. Të pagjetur, edhe sot e kësaj dite, mbeten mbi 1.600 persona – shumica prej të cilëve shqiptarë./REL