Mbi 600 njerëz dyshohet se kanë vdekur pas një tërmeti me magnitudë 6.0 që goditi Afganistanin lindor pranë kufirit me Pakistanin,të dielën në mbrëmje.

Më shumë se 1 mijë e 300 persona janë plagosur ka bërë të ditur përmes një deklarate Ministria e Brendshme talebane, shkruan BBC.

Operacionet e shpëtimit janë ende në vijim ndërsa raportet nga zonat e prekura tregojnë edhe për dëme të mëdha materiale.

Tërmeti u regjistrua në orën 23:47 të së dielës, me epiqendrën rreth 27 km në verilindje të qytetit Jalalabad dhe me një thellësi vetëm 8 km, sipas Shërbimit Gjeologjik të SHBA-së. Një tjetër tërmet me magnitudë 4.5 goditi të njëjtën zonë vetëm 20 minuta më pas.

Abu Obeida, një zëdhënës i krahut të armatosur të Hamasit, u vra në një sulm ajror në qytetin e Gazës, njoftuan autoritetet izraelite.

Ministri i Mbrojtjes, Israel Katz, përgëzoi Forcat e Mbrojtjes të Izraelit (IDF) dhe agjencinë e sigurisë për “performancën e tyre të përsosur” në një postim në platformën X.

Katz paralajmëroi sot se shumë nga partnerët kriminelë të Obeida do të jenë në shënjestër të intensifikimit të fushatës në Gaza, duke iu referuar planit të miratuar së fundmi nga Izraeli për të pushtuar qytetin e Gazës.

IDF dhe agjencia e sigurisë izraelite në një deklaratë të përbashkët thanë se operacioni ishte i mundur për shkak të inteligjencës së mëparshme të mbledhur që identifikoi vendstrehimin e Obeida.

Pesë raketa goditën katin e dytë dhe të tretë të ndërtesës nga dy drejtime të ndryshme, duke synuar apartamentin ku ndodhej klinika dentare.

Hamasi nuk e ka konfirmuar vdekjen e zëdhënësit të tij, por grupi militant palestinez ka thënë më parë se dhjetëra civilë u vranë në sulmet izraelite në një ndërtesë banimi.

Obeida ishte ndër të paktët anëtarë të lartë të mbetur të krahut ushtarak Hamas para sulmit të 7 tetorit 2023 ndaj Izraelit.

Gjatë dy vjetëve të fundit, Obeida (40) ka mbajtur një seri fjalimesh antiIzrael në emër të krahut të armatosur të Hamasit, Brigadave al-Qassam. Në atë që mund të ketë qenë fjalimi i tij i fundit të premten, Obeida tha se fati i pengjeve të mbetura izraelite do të ishte i njëjtë me atë të anëtarëve të Hamasit, duke paralajmëruar Izraelin kundër pushtimit të Gazës.

Papa Leoni XIV ka bërë thirrje edhe një herë për një armëpushim të menjëhershëm në Ukrainë, duke i nxitur udhëheqësit botërorë të përqafojnë dialogun dhe paqen, ndërsa Rusia vazhdon të intensifikojë sulmet e saj ndaj qyteteve ukrainase, raporton Vatican News të dielën.

Duke folur në Angelus të së dielës në Romë, Papa tha: “Zëri i armëve duhet të heshtë dhe zëri i vëllazërisë dhe drejtësisë duhet të mbizotërojë.”

Ai ripërtëriu afërsinë e tij me popullin ukrainas, duke u ankuar për “shkatërrimin dhe vdekjen e vazhdueshme” të shkaktuar nga lufta dhe i inkurajoi njerëzit të mos i nënshtrohen indiferencës. Në vend të kësaj, ai nxiti lutje dhe “veprime konkrete bamirësie”, duke përsëritur thirrjen e tij për armëpushiml.

“Është koha që ata që janë në pushtet të braktisin logjikën e armëve dhe të ndjekin rrugën e negociatave dhe paqes, me mbështetjen e bashkësisë ndërkombëtare”, tha ai.

Papa Leo u lut gjithashtu për viktimat e një të shtëne me armë në një shkollë katolike në Minneapolis, Minesota. Ai gjithashtu kujtoi vdekjen e të paktën 69 personave pasi një anije që mbante emigrantë të parregullt u fundos në brigjet e Mauritanisë.

“Kjo tragjedi vdekjeprurëse përsëritet çdo ditë në të gjithë botën. Le të lutemi që Zoti të na mësojë, si individë dhe si shoqëri, ta zbatojmë plotësisht fjalën e tij”, tha ai.

Një gjykatë apeli në Shtetet e Bashkuara ka shpallur shumicën e tarifave të vendosura nga presidenti Donald Trump si të paligjshme. Vendimi përfshin tarifat e “reciproke” që Trumpi kishte vendosur për shumicën e shteteve në botë, si dhe ato të vendosura mbi Kinën, Meksikën dhe Kanadanë.

Gjykata e Apelit për Qarkun Federal hodhi poshtë argumentin e administratës Trump se tarifat ishin të lejuara nga një ligj i fuqive ndërkombëtare, i cili jep mundësinë për masa ekonomike në rast urgjence. Sipas gjykatës, vendosja e tarifave ishte e pavlefshme dhe në kundërshtim me ligjin.

Ky vendim nuk do të hyjë në fuqi deri më 14 tetor, për t’i dhënë administratës Trump kohë të apelonte çështjen në Gjykatën Supreme të Shteteve të Bashkuara.

Përmes një deklarate, Trumpi e ka kritikuar vendimin, duke theksuar se, nëse ky vendim mbetet në fuqi, mund të ketë pasoja të rënda për ekonominë e SHBA-së. “Nëse mbetet në fuqi, vendimi do ta shkatërronte SHBA-në,” ka thënë ai.