Protothema, e vërteta është se konferenca mes Dendias dhe Cavusoglu u duk si finale tenisi.
Gjatë vizitës së ministrit të Jashtëm grek, Nikos Dendias dhe homologut të tij turk, Mevlut Cavusoglu, në Ankara pati tensione të vazhdueshme në konferencën e tyre të përbashkët për shtyp.
Mediat helene janë ndalur dhe kanë analizuar se çfarë ndodhi të enjten. Në fakt, askush në Athinë nuk kishte ndonjë pritshmëri të madhe për vizitën e ministrit grek, Nikos Dendias.
Sjellja e Erdogan herët e kaluara, por edhe rritja e provokimeve gjatë 24 orëve të fundit, bënte që të mos pritej shumë nga ky event. Prandaj nga autoritetet më të larta të politikës greke kishte vetëm një urdhër të qartë: Përgjigjuni në rast provokimeve. Në fakt, shkruan Protothema, e vërteta është se konferenca mes Dendias dhe Cavusoglu u duk si finale tenisi.
“Nikos Dendias shënoi larg nga shtëpia”, thekson Protothema dhe këtë sipas saj e bëri duke dhënë përgjigje të qarta, publike dhe duke treguar pozicionin grek. “Sikleti dhe tronditja në fytyrën e stoikut Mevlut Cavusoglu, nuk le dyshime se Dendias ka marrë një pikë”, shkruan më tej Protothema. Sipas mediave helene, Dendias është provokuar më herët nga homologu i tij, por edhe Presidenti Recep Tayip Erdogan. “Por për habinë e tyre, ai u përgjigj”, thotë Protothema duke thënë se kjo lëvizje e shmangu që të bëhej peng i Erdogan.
Madje qëndrimi i Dendias është pritur pozitivisht edhe nga partia më e madhe opozitare SYRIZA. Pavarësisht kësaj, ata kanë kërkuar që të bëhet publike se çfarë është diskutuar mes Dendias dhe Cavusoglu.
Çfarë ndodh në Turqi?
Ndërkohë edhe në mediat turke, kjo ngjarje është pasqyruar gjatë. TRT shkruan se Cavusoglu në këtë takim ka thënë se mosmarrëveshjet mes dy palëve mund të zgjidhen me dialog. Megjithatë, tensioni mes palëve u pa në konferencën për shtyp. Shkak, sipas medias turke, u bë deklarata e Dendias, që sipas tyre, akuzonte Turqinë për ngjarjet në detin Mesdhe dhe çështjen e emigrantëve.
“Pozicioni i Greqisë është i qartë dhe nuk është hera e parë që po e dëgjon”, tha Dendias gjatë konferencës që zgjati 35 minuta.
Por kjo solli reagimin e Cavusoglu. “Nëse akuzoni rëndë vendin dhe popullin tim para mediave unë duhet të jem në pozitat që t’i përgjigjem kësaj. Nëse doni që të vazhdojmë tensionet ne mundemi. Ju nuk lejoni minoritetin turk në Greqi që ta quajnë veten turq. I thërrisni myslimanë. Nëse e quajnë veten turq, janë turq, ju duhet ta njihni këtë”, tha ai.
Ai theksoi se Ankara është e aftë që të mbrojë të drejtat e Turqisë dhe anës turke në Mesdheun Lindor. Megjithatë edhe pse mes palëve pati tensione, Dendias ftoi Cavusoglu që të vizitojë Athinën.
Kthim në shtëpi i Dendias
Takimin e parë, ministri grek Dendias e pati me kryeministrin e tij, Kyriakos Mitsotakis. Ai e ka informuar për çdo gjë që është diskutuar në takimet me Erdogan dhe Cavusoglu.
Sipas burimeve të Protothema, Mitsotakis është shprehur i kënaqur me mënyrën se si Dendias ka përballuar situatën. “Ministri i Jashtëm pati një bisedë të gjerë me kryeministrin”, thanë burimet për Protothema./tvklan.al
Papa Leo XIV po përgatitet të udhëtojë në Liban më vonë këtë vit, në atë që mund të jetë udhëtimi i tij i parë jashtë vendit që nga zgjedhja si kreu i Kishës Katolike në maj.
Arqipeshkvi Paul Sayah, zëvendës i liderit më të lartë katolik të Libanit, i tha BBC-së se Vatikani po studion udhëtimin, por Kisha ende po pret datat zyrtare.
Kjo vizitë do të shënonte një moment të rëndësishëm për Papën e parë amerikan, i cili ka bërë thirrje të përsëritura për paqe në Lindjen e Mesme dhe bashkëjetesë ndërfetare.
“Libani është një vend multikulturor dhe multifetar dhe është një vend dialogu”, tha ipeshkvi Sayah. Është një nga mjediset e rralla ku myslimanët dhe të krishterët jetojnë së bashku duke respektuar njëri-tjetrin.. kështu që dërgon një mesazh për rajonin” tha ai.
Ka pasur spekulime mbi destinacionin e parë ndërkombëtar të Papës Leo, pasi udhëtimet e hershme papale shpesh përcaktojnë tonin e pontifikatit.
Udhëtimi i parë i madh jashtë Romës i Papës së ndjerë Françesku, në ishullin italian Lampedusa në 2013, vendosi fokusin e tij mbi migracionin dhe komunitetet e margjinalizuara.
Në dekadat e fundit, udhëtimet jashtë vendit janë bërë thelbësore për papatinë, duke lejuar papët të lidhen me katolikët në mbarë botën, të shpërndajnë mesazhin e tyre dhe të angazhohen në diplomaci.
Gjatë 12 viteve të tij si pontif, Françesku vizitoi 68 vende në 47 udhëtime të huaja, shpesh duke zgjedhur destinacione në periferitë e botës, të cilat ai i përshkroi si periferitë e Kishës.
Të paktën pesë persona kanë humbur jetën pasi shirat e rrëmbyeshme goditën rajonin autonom të Mongolisë së Brendshme të Kinës veriore, raporton sot agjencia Xinhua News duke cituar autoritetet.
Tre persona të tjerë u gjetën të vdekur në ujërat e përmbytjeve të martën në rrethin Dongsheng të qytetit. Autoritetet lokale thuhet se po kryejnë hetime dhe po merren me pasojat.
Zhvillimi erdhi ndërsa Selia Shtetërore e Kontrollit të Përmbytjeve dhe Ndihmës për Thatësira e Kinës lëshoi një përgjigje emergjente të Nivelit IV për kontrollin e përmbytjeve të enjten në provincat Liaoning, Sichuan dhe Yunnan për shkak të reshjeve të rrëmbyeshme të pritura.
Meteorologët parashikojnë shira ose stuhi intensive në rajon nga e enjtja deri të premten, me disa zona që përballen me shira të rrëmbyeshëm. Sistemi i reagimit ndaj emergjencave i Kinës ka katër nivele, ku Niveli i parë është më i rëndi, transmeton KosovaPress.
Të shtunën e kaluar, të paktën tetë persona u vranë dhe katër u zhdukën pasi një përmbytje e menjëhershme përfshiu një vend kampingu të shtunën vonë në zonën e sipërme të një lumi në Urad Rear Banner në qytetin Bayannur në rajonin autonom të Mongolisë së Brendshme.
Gjyqtari i famshëm amerikan dhe ylli i mediave sociale, Frank Caprio ka vdekur në moshën 88 vjeç, njoftoi familja e tij. Vdekja e tij pas një diagnoze me kancer në pankreas u njoftua në llogarinë e tij zyrtare në Instagram, ku ai u kujtua për ngrohtësinë dhe besimin e palëkundur në mirësinë e njerëzve, raporton BBC.
David Caprio, djali i tij, falënderoi fansat për dashurinë dhe mbështetjen e tyre dhe u bëri thirrje njerëzve të përhapin pak mirësi në kujtim të babait të tij.
“I dashur për dhembshurinë dhe humorin e tij në sallën e gjyqit, videot e gjyqtarit Caprio duke kryesuar çështjet në shfaqjen e tij të famshme Caught in Providence kanë pasur miliarda shikime në mediat sociale, duke i dhënë atij titullin gjyqtari më i mirë në botë”, tha Caprio.
Në një deklaratë në Instagram drejtuar 3.4 milionë ndjekësve të tij, gjyqtari Caprio u kujtua për aktet e panumërta të mirësisë që frymëzoi në punën e tij.
Gjykatësi Caprio kishte kryesuar mijëra çështje në qytetin e tij të lindjes, Providence, Rhode Island, përpara se të niste një karrierë televizive.
Kompania që ishte pas Caught in Providence, Debmar-Mercury, i bëri homazh markës unike të dhembshurisë dhe qasjes së shëndoshë të gjyqtarit Caprio.
Donald Trump synon t’ua lërë Rusisë dhe Ukrainës organizimin e një takimi mes liderëve të tyre pa luajtur vetë një rol direkt për momentin, sipas zyrtarëve të administratës të njohur me situatën, duke bërë një hap prapa nga negociatat për t’i dhënë fund pushtimit rus të Ukrainës.
Hapi i radhës, sipas Trump-it, për t’i dhënë fund luftës në Ukrainë mbetet një takim dypalësh mes presidentit rus, Vladimir Putin, dhe presidentit ukrainas, Volodymyr Zelensky, thanë zyrtarët.
Trump u ka thënë këshilltarëve ditët e fundit se ai synon të organizojë një takim trepalësh me dy liderët vetëm pasi ata të kenë zhvilluar fillimisht një takim mes tyre, megjithëse mbetet e paqartë nëse ky takim fillestar do të ndodhë dhe Trump nuk ka ndërmend të përfshihet në atë përpjekje.
Në një intervistë telefonike me drejtuesin e talk-show Mark Levin në WABC të martën, Trump tha gjithashtu se mendonte se do të ishte më mirë që Putin dhe Zelenskyy të takoheshin pa të në fillim. “Unë thjesht dua të shoh se çfarë do të ndodhë në takim. Pra, ata janë në proces e sipër për ta organizuar dhe ne do të shohim se çfarë do të ndodhë.”
Hezitimi i Trump-it për t’i shtyrë Putin-in dhe Zelensky-në drejt një takimi vjen ndërsa ai ka pranuar ditët e fundit se përfundimi i luftës në Ukrainë ka qenë më i vështirë sesa kishte parashikuar, pasi vitin e kaluar në fushatë kishte thënë se mund ta arrinte për 24 orë.
Që atëherë, ai ka kërkuar një marrëveshje të shpejtë paqeje pasi afati i vendosur prej tij për Rusinë që t’i jepte fund luftës skadoi këtë muaj dhe tha pas takimeve me Zelenskyy-në dhe liderët europianë në Shtëpinë e Bardhë të hënën se kishte ndërmarrë hapa për një takim dypalësh.