Futbollisti Lucas Trejo po përballet me një humbje të madhe familjare, pasi bashkëshortja e tij, Yanina Maranella, së bashku me dy fëmijët e tyre Aarón Trejo dhe Ainhoa Trejo, janë konfirmuar ndër viktimat e tërmeteve shkatërruese që goditën Venezuelën javën e kaluar.

Sipas klubit të tij C.S. Marítimo de La Guaira, i cili e kishte afruar Trejon në muajin shkurt, familja e tij është në mesin e mbi 1,400 viktimave të regjistruara nga fatkeqësia natyrore. Klubi ka shprehur ngushëllimet përmes një deklarate publike në rrjetet sociale, duke theksuar dhimbjen e madhe që ka goditur lojtarin dhe komunitetin sportiv.

“Në këtë moment dhimbjeje të madhe, lutemi për prehjen e shpirtrave të tyre dhe për forcën e Lucas-it dhe familjes së tij për ta përballuar këtë tragjedi”, thuhet në reagimin e klubit, i cili i ka ofruar mbështetje të plotë futbollistit 38-vjeçar.

Trejo ndodhej në Karakas në një kamp stërvitor me ekipin e tij në momentin kur ndodhën tërmetet me magnitudë 7.2 dhe 7.5 ballë. Ai është kthyer menjëherë në shtëpinë e tij në La Guaira, zonën më të goditur nga fatkeqësia.

Sipas dëshmive të familjarëve, situata në vendngjarje ka qenë e rëndë dhe ndërtesa ku jetonte familja është shkatërruar pothuajse plotësisht. Ende nuk është konfirmuar nëse familja ndodhej brenda banesës në momentin e tërmeteve.

Në operacionet e kërkimit është përfshirë edhe ish-futbollisti Edson Tortolero, i cili ka ndihmuar në gërmimet e mbetura dhe ka shprehur ngushëllime për familjen e viktimave. Ai e ka cilësuar ngjarjen si një nga tragjeditë më të rënda që ka përjetuar komuniteti sportiv në vend.

Ndërkohë, një tjetër futbollist, Héctor Bello, ka humbur bashkëshorten e tij Andrea Bello, e cila sipas raportimeve ka vdekur duke mbrojtur vajzën e tyre 20-muajshe gjatë tërmeteve. Bello e ka përshkruar atë si “heroinën e tij”, duke premtuar se do t’ia tregojë vajzës historinë e saj kur të rritet.

Autoritetet venezueliane vazhdojnë operacionet e kërkim-shpëtimit, ndërsa bilanci i viktimave dhe i dëmeve materiale mbetet shumë i rëndë./A.K/

Ushtruesja e detyrës së presidentes, Albulena Haxhiu, ka kërkuar zyrtarisht nga Bashkimi Evropian që progresi i Kosovës në zbatimin e reformave të vlerësohet me hapa konkretë, duke kërkuar avancimin drejt statusit të vendit kandidat dhe hapjen e negociatave për anëtarësim.

Këto kërkesa Haxhiu i shprehu gjatë një takimi me Valentina Supertin, drejtoreshën për Ballkanin Perëndimor në Komisionin Evropian, e cila po zhvillon vizitën e saj të parë në Kosovë.

Sipas njoftimit nga Zyra e Presidentes, në takim u vlerësua mbështetja e vazhdueshme e BE-së, e cila është përkthyer në reforma dhe institucione demokratike. Haxhiu bëri të ditur se vendi po i zbaton me seriozitet obligimet nga Agjenda e Reformave dhe Plani i Rritjes, duke mbajtur një kurs të qartë dhe të harmonizuar plotësisht me politikën e jashtme dhe të sigurisë të BE-së.

Përveç integrimit evropian, në takim u diskutua edhe për bashkëpunimin rajonal dhe zbatimin e marrëveshjeve të Procesit të Berlinit. Në këtë pikë, Haxhiu potencoi se Kosova duhet të trajtohet si partnere e barabartë në çdo sferë, përfshirë përfaqësimin, tregtinë, digjitalizimin dhe qasjen në iniciativat e tregut të përbashkët. /E.A/

UBT ka hapur zyrtarisht regjistrimet për vitin e ri akademik, duke ftuar maturantët dhe të gjithë të rinjtë që synojnë të ndërtojnë një karrierë të suksesshme të bëhen pjesë e institucionit lider në arsimin e lartë në Kosovë dhe rajon.

UBT vazhdon të ofrojë një model të veçantë të studimit, ku arsimi cilësor ndërthuret me teknologjinë, inovacionin, kërkimin shkencor dhe përvojën praktike, duke përgatitur studentët për tregun modern të punës dhe sfidat globale.

Studentët që zgjedhin UBT-në përfitojnë nga mbi 50 programe dhe më shumë se 150 fusha specializimesh studimi në nivelet Bachelor dhe Master, të ndërtuara sipas standardeve më të larta ndërkombëtare dhe të orientuara drejt profesioneve më të kërkuara të së tashmes dhe së ardhmes.

Përmes laboratorëve modernë, UBT Smart City, bashkëpunimeve me universitete prestigjioze ndërkombëtare, mobilitetit akademik dhe partneriteteve me industrinë, UBT krijon një ekosistem të plotë ku teoria shndërrohet në praktikë dhe idetë në projekte konkrete.

Në UBT, studentët zhvillojnë kompetenca profesionale, aftësi lidershipi, kulturë inovative dhe përvojë ndërkombëtare, duke u bërë pjesë e një komuniteti akademik që për më shumë se një çerek shekulli ka nxjerrë mijëra profesionistë të suksesshëm në Kosovë, rajon dhe botë.

Të gjithë të interesuarit mund të aplikojnë online dhe të sjellin dokumentacionin e nevojshëm për regjistrim në qendrat e UBT-së.

Profesionin që ëndërron e gjen në UBT.

APLIKO TANI ONLINE!

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

 Foto: Presidenti amerikan Bill Klinton

 30 qershor 1993

Shqipëria dënon dëbimin e keqtrajtimin masiv të shqiptarëve nga Greqia

Shqipëria, ka dënuar dëbimin masiv të qytetarëve të Shqipërisë që po qëndronin si emigrantë në Greqi.

Njoftohet se gjatë pak ditëve, autoritetet greke, arrestuan, dëbuan, keqtrajtuan dhe plaçkitën më se 9.000 qytetarë shqiptarë, një shumicë e tyre me viza dhe dokumente të rregullta.

Në një intervistë për Radiotelevizionin Shqiptar, presidenti i Republikës së Shqipërisë tha dje se shkaqe kryesore të këtij dëbimi, janë lidhjet e Greqisë me Serbinë, humbjen që pësuan qarqet shoveniste greke në lidhje me problemin maqedonas, si edhe ethet elektorale që po shfaqen në Greqi.

Ndërsa Ministria e Jashtme e Shqipërisë, përmes një deklarate të shpallur dje, dënoi dëbimin masiv të qytetarëve shqiptarë dhe provokacionin e më se 300 qytetarëve grekë para ambasadës së Shqipërisë në Athinë. “Qarqet politike e klerikale shoveniste në Greqi, po i fryjnë me qëllim një histerie antishqiptare për të mbuluar ndërhyrjet sistematike në punët e brendshme të Shqipërisë dhe për të maskuar përpjekjet e vazhdueshme të helenizimit të Shqipërisë dhe të popullit shqiptar”. Provokacionin para ambasadës së Shqipërisë, Ministria për Punë të Jashtme e vlerësoi si provokacion fashist. Në deklaratë tërhiqet vërejtja se qeveria shqiptare do të dijë të mbrojë me forcën dhe mjetet e duhura të drejtat dhe sovranitetin kombëtar dhe nuk do të lejojë askë që të luaj me interesat e shenjta të Shqipërisë”.

Njoftohet se dje Tirana e thirri për konsultime ambasadorin e saj në Greqi.

Gjatë një takimi të Safet Zhulalit, Ministër i Mbrojtjes së Shqipërisë me Kryekomandantin e Forcave Aleate të NATO-s, admiralin Xhervin Borda, pasi kërkoi dërgimin e forcave ndërkombëtare në Kosovë, ku gjendja e krijuar nga shovenistët serbë është shumë e rëndë, foli për incidentin e kryer më 26 qershor në kufi me Maqedoninë, dëbimin e refugjatëve shqiptarë nga Greqia dhe tha se me këto aksione influencon dhe koordinon Millosheviçi me të gjitha forcat proserbe për ta destabilizuar edhe më shumë situatën në Ballkan.

30 qershor 1994

Iu ndërpre rryma elektrike 34 fshatrave në Prizren

Siç bëjnë të ditur organet kompetente, mbrëmë dhe sot iu ndërpre rryma elektrike 34 fshatrave të Prizrenit.

Pa rrymë elektrike kanë mbetur fshatrat Billushë, Hoça e Qytetit, Lubiqeva, Leskoveci, Lezi, Kushnini, Jeshkova, Vlashnja, Murrademi, Kobanja e Re, Grazhdaniku, Landovica, Gjonaj, Tupeci, Grazhdaniku, Zymi, Karashëngjergji, Krajku, Bregdrilli, Lukinji, Romaja, Dedaj, Kabashi, Lugishta, Kushnini, Krusha e Vogël, Krusha e Madhe, Randobrava, Pirana, Zojzi, Medveci, Mamusha, Serbica e Ulët dhe e Epërme. Vetëm në qytet ka rrymë.

Preteksti i shkyqjes, thonë, është mospagesa e rrymës për këta muajt e fundit, njofton Komisioni për Informim i Degës së LDk-së në Prizren.

30 qershor 1995

Klinton: Shqipëria luan rol të rëndësishëm për stabilitetin në rajon

Në kuadrin e reagimeve të shumta pozitive lidhur me pranimin e Shqipërisë në Këshillin e Evropës, radiostacioni i “Zërit të Amerikës” njoftoi mbrëmë se presidenti amerikan Bill Klinton i dërgoi një letër anëtarit të Dhomës së Përfaqësuesve të Kongresit Amerikan Eliot Engël, me të cilën mbështet fuqimisht zhvillimin e një vizite në Shtëpinë e Bardhë nga presidenti i Shqipërisë Sali Berisha.

Në mes të tjerash, presidenti Klinton përkrah fuqimisht përpjekjet që po bën Shqipëria në rrethana shumë të vështira për të krijuar një shoqëri të hapur e demokratike dhe për të vënë bazat e ekonomisë së tregut.

“Presidenti Berisha ka luajtur rol kyç në përpjekjet e vendit të tij gjatë periudhës së vështirë kalimtare për t’u çliruar nga prangat e regjimit të gjatë komunist. Siç keni vënë re edhe ju, i drejtohet presidenti Klinton ligjëdhënsit Engël, mund të them me plot të drejtë se Shqipëria luan një rol shumë të rëndësishëm për ruajtjen e stabilitetit në rajon. Shpresoj se takimi ynë me presidentin Berisha, do të ndihmojë për vazhdimin e reformave demokratike dhe ekonomike në Shqipëri, si dhe për nxitjen e stabilitetit në rajon, thuhet në letrën e presidentit Klinton dërguar kongresistit Eliot Engëll.

30 qershor 1997

Dy të vdekur dhe katër të plagosur në Fier

Grupe të armatosura kanë vrarë dy veta dhe kanë plagosur katër të tjerë në dy incidente të veçanta të dielën në mbrëmje në Fier, në përfundim të ditës së zgjedhjeve, njofton AFP, duke u referuar në burimet policore.

Sipas policisë, rreth orës 22. 00, një veturë që transportonte një kufomë në Tiranë nga Vlora u mor në shënjestër. Dy vetë që gjendeshin në automjet u vranë, ndërsa një polic nga Vlora që i shoqëronte u plagos. Megjithatë, nuk përjashtohet mundësia që ky incident të jetë një larje hesapesh.

Pak me herët, elementë të armatosur hapën zjarr rreth orës 21. 30 kundër bashkisë duke plagosur tre vetë, ndërmjet të cilëve një nëpunës bashkiak. Partia Demokratike (PD) publikoi një komunikatë se të tre të plagosurit ishin anetarët e saj dhe se ky atentat kishte motive politike.

Dje pasdite, kryetari i një komisioni elektoral në Kurjan u vra nga një anëtar i familjes së një kundërshtari socialist, përfundon njoftimi.

30 qershor 1998

Të vrarë e të plagosur në Hade, fshatarët janë larguar nga shtëpitë, në Bardh vazhdojnë përleshjet

Forcat serbe ndërmorën dje një sulm masiv kundër lokalitetit të Bardhit të Madh (Bellaqevcit) me pretekst të rikthimit të kontrollit serb në Mihjen Siparfaqësore të thëngjillit, nga e cila u vetëlarguan punëtorët dhe rojet serbe javën e kaluar. Mirëpo është e qartë se sulmet serbe kanë dalë edhe jashtë hapësirës së zonës industriale të termocentraleve “Kosova”. Janë sulmuar fshatrat Hade, Dardhishtë, Bardh i Madh, Lismir, Palaj, e tjerë.

Sulmi i djeshëm vazhdoi gjatë natës dhe po vazhdon edhe sot. Forcat serbe, pasi kanë vënë një gjendje të shtetrrethimit në një zonë të gjerë në komunat e Obiliqit e Fushë Kosovës, tentuan të depërtoninin përmes një shtegu në mes Hades dhe Dobrosellës në Bellaqevc. Ky fshat ka rreth 800 shtëpi, ndërsa javën e fundit janë bërë përgatitje për ta lëshuar në punë edhe mihjen sipërfaqësore të thëngjillit.

Në orën 02:00 pas mesnate forcat serbe kanë shkrepur në Bardh 14 raketa ‘kaçusha’. Ndërsa prej anës së Dobrosellës janë granatuar lagjet e Gjigollëve dhe Kostanicëve në Bardh të Madh.

Janë dëmtuar nga granatimet shumë shtëpi të Gjigollëve dhe Kostanicëve.

Në orën 13:00 një dëshmitar nga Bardhi i Madh i tha QIK-ut se luftimet po vazhdonin dhe se nuk ishin të vërteta pohimet serbe se gjoja është pushtuar ky fshat dhe kompkeksi industrial.

Gjatë ditës së djeshme forcat serbe e kanë granatuar edhe fshatin Hade. Nga një granatë e shkrepur në mesin e fshatarëve, u plagosën Ismet Preniqi (49), Fatmir Preniqi (33), Zymer Preniqi (37), Selman Preniqi (51) dhe Salih Preniqi (58) që të gjithë nga Hadja. Po në këtë fshat, në oborrin e shtëpisë së Ibrahim Morinës, nga një granatë tjetër thuhet se janë vrarë tre të rinj dhe dy të tjerë janë plagosur.

Hadja është fshat me rreth 250 shtëpi dhe gjatë graantimeve janë qëlluar disa shtëpi. Nga frika shumica e banorëve të këtij fshati janë larguar në drejtim të Drenicës. Ndërsa sot në orën 05:00 kanë filluar sërish sulmet kundër këtij fshati.

Gjendje e rëndë ka mbretëruar dje dhe sot edhe në fshatin Palaj, me rreth 40 shtëpi. Banorët e këtij fshati kanë mbetur ende peng. Gjatë ditës së djeshme janë mbajtur të bllokuar edhe banorët e fshatit Lismir. Dje në mëngjes në këtë fshat u vra një fëmijë dhe u plagos një burrë. Në orët e mbrëmjes, shumë lismiras janë larguar nga fshati.

Ndërsa pas mesnatës, nga shtëpitë e veta janë larguar banorët e fshatrave Pomozotin, Bardh i Madh, Graboc i Ulët dhe Graboc i Madh në drejtim të Drenicës.

Sipas mediave serbe, së paku 8 të vrarë në brezin kufitar me Shqipërinë

Mediat serbe, duke cituar burime të ushtrisë jugosllave, njoftuan se së paku 8 shqiptarë janë vrarë sot në brezin kufitar Shqipëri-Kosovë, në veriperëndim të Gjakovës.

Në njoftim thuhet se një grup i shqiptarëve të armatosur sot në mëngjes sulmoi me pushkë automatike dhe minahedhës rojet kufitare të cilat iu përgjigjën sulmit.

Prishtinë: Policia serbe plagosi Ylber Topallin dhe një kalimtar rasti

Sot në mesditë, në afërsi të ndërtesës së gjykatës së instaluar serbe në Prishtinë, në një vend shumë të frekuentuar, policia serbe plagosi dy veta.

Dëshmitarë të rastit thanë se një shqiptar i paraburgosur kishte ikur derisa po dërgohej nga policia në gjykatë. Tre gardianë dhe një polic u vunë në ndjekje të tij dhe pas disa metrash shtinë drejt me tij me armë. Personi që po ikte u plagos, ndërsa plumbat qëlluan edhe një kalimtar të rastit, i cili u dërgua në spital.

I ikuri që u plagos dukej shumë i keqtrajtuar. Edhe në gjendje të plagosur ai iku edhe disa metra. Mirëpo me të shpejtë ai u zu nga policët dhe u fut në veturën e policisë.

Forca të mëdha të policisë bllokuan me të shpejtë të gjitha rrugët rreth vendit të ngjarjes. U ndalua qarkullimi i veturave dhe i qytetarëve dhe u keqtrajtuan disa kalimtarë rasti. Gjatë kësaj kohe kalimtarë rasti hynë në shitore dhe pastaj mbetën të mbyllur për një kohë prej bllokimit të policisë.

Dëshmitarët nuk mundën të mësojnë identitetin e të ikurit që u plagos nga policia. Një aktivist i Degës së LDK-së në Ferizaj i tha personi i plagosur mund të jetë Ylber Topalli, rreth 30- vjeç, nga Gremja e Ferizajt, kryetar i Nëndegës së LDK-së në fshatin e tij.

Policia i ka thënë babait të tij Ylberit se ‘djali i tij ka ikur, dhe se policia ka shtënë në të me armë. Nuk dimë çka ka ndodhur me të, i kanë thënë policët babait të Ylberit.

Ylber Topalli është arrestuar në shtëpinë e vet në Greme në mëngjes më 25 qershor. Atë ditë policia ka arrestuar edhe të afërmin e tij, Enver Topallin, ish i dënuar politik. Një ditë më vonë policia bastisi edhe disa shtëpi në këtë fshat, ndërsa në Ferizaj dhe ën disa fshatra të tjera policia arrestoi disa veprimtarë të LDK-së e të KMDLNJ-së.