E ardhmja e Erling Haalandit te Manchester City mund të jetë e pasigurt, nëse klubi anglez përballet me sanksione të rënda për shkeljet e dyshuara financiare në Ligën Premier.

Sulmuesi norvegjez vazhdon të jetë një nga lojtarët kryesorë të “Citizens”, ndërsa këtë sezon ka regjistruar nëntë gola në nëntë xhirot e para të kampionatit anglez. Ai ka kontratë me klubin deri në vitin 2034, por mundësia e largimit të tij nuk është përjashtuar as nga babai i tij, Alf-Inge Haaland.

Ky i fundit ka folur për situatën që po kalon Manchester City, duke theksuar se fillimisht duhet pritur vendimi përfundimtar lidhur me çështjen financiare të klubit.

“Mendoj se duhet të presim rezultatin e apelit. Mund të përfundojë shpejt, megjithëse ka tifozë, klube rivale dhe, mbi të gjitha, gazetarë që po e synojnë Cityn tani. Pra, thjesht duhet të presim dhe të shohim se cili do të jetë rezultati i apelit”, deklaroi Alf-Inge.

Ai shtoi se Manchester City beson në pafajësinë e tij dhe se për momentin Erling është i përqendruar vetëm te futbolli.

“City beson se ka prova të forta për të vërtetuar pafajësinë e tij dhe mendoj se është më mirë të presim vendimin. Erling po mendon vetëm të luajë sa më shumë futboll dhe është i përqendruar në këtë. Mendoj se jemi kryesisht ne, jashtë fushës, që mendojmë pak më shumë për këtë”, u shpreh ai.

Në rast se Manchester City përballet me masa të rënda sportive, përfshirë edhe mundësinë e rënies nga kategoria, Haaland pritet të jetë njëri prej emrave më të kërkuar në tregun e transferimeve.

Në mesin e klubeve që mund të shfaqin interesim për shërbimet e tij përmendet edhe Real Madridi. Gjiganti spanjoll prej kohësh e ka vlerësuar sulmuesin norvegjez, ndërsa prania e Kylian Mbappes në repartin ofensiv do të mundësonte krijimin e një dysheje të jashtëzakonshme sulmuese.

Megjithatë, për momentin, gjithçka mbetet në nivelin e spekulimeve, pasi Haaland ka kontratë afatgjatë me Manchester Cityn dhe nuk ka sinjale zyrtare për një largim të mundshëm.

D.L

Ish-portieri i Real Madridit, Santi Canizares, ka kritikuar ashpër sulmuesin Vinicius Junior, duke e cilësuar rinovimin e kontratës së brazilianit si një gabim nga ana e klubit madrilen.

Canizares, i cili kishte kundërshtuar vazhdimin e bashkëpunimit me Viniciusin që verën e kaluar, beson se sulmuesi e ka shteruar vlerën e tij te “Los Blancos” dhe se sjellja e tij po ndikon negativisht në imazhin e klubit.

“Ndoshta jam i vetmi që mendon kështu, por e konsideroj këtë vendim një gabim. Për mua, rinovimi i kontratës së Viniciusit ishte gabim, sepse lojtari e kishte shteruar plotësisht vlerën e tij. Gjithashtu, nuk mendoj se oferta e Arsenalit ishte reale”, deklaroi Canizares.

Ish-portieri spanjoll zbuloi se kishte shpresuar që Reali të mos ia rinovonte kontratën brazilianit, në mënyrë që ai të largohej si lojtar i lirë në verën e vitit 2027.

“Shpresoja që Real Madridi të mos ia rinovonte kontratën dhe që Vinicius të largohej si lojtar i lirë në verën e vitit 2027, pasi e kishte shteruar vlerën e tij. Nuk do të kishte pasur asnjë problem me këtë”, u shpreh ai.

Canizares gjithashtu vuri në pikëpyetje mundësinë e transferimit të Viniciusit te Arsenali, duke theksuar se pengesa, sipas tij, nuk lidhet me cilësitë futbollistike të brazilianit, por me karakterin dhe sjelljen e tij.

“Nuk shoh asnjë mundësi që ai të shitet te Arsenali, jo për shkak të aftësive të tij, por sepse është një i ri me shumë probleme dhe jo çdo klub e dëshiron atë”, deklaroi spanjolli.

Ai shtoi se klubet e mëdha i kushtojnë rëndësi të veçantë edhe imazhit të tyre, duke krahasuar mundësinë e transferimit të Viniciusit me atë të lojtarit Diomande.

Kritikat e ish-portierit nuk u ndalën vetëm te rinovimi i kontratës, pasi ai e konsideroi gjithashtu gabim vendimin për ta aktivizuar brazilianin në fushë.

“Rinovimi i kontratës së tij është gabim, por aktivizimi i tij në ndeshje është një gabim i dyfishtë. Ai e ka shteruar vlerën e tij. E transferuat me një çmim të ulët, ju dha një përfitim të madh dhe fitoi dy Liga të Kampionëve me ju.

Shpresoj që të gjitha marrëveshjet të jenë kaq të suksesshme, por kjo çështje tashmë ka përfunduar”, përfundoi Canizares.

D.L

Skuadra e Trepçës është nisur drejt Gjermanisë, ku të mërkurën do ta zhvillojë ndeshjen e radhës në kuadër të FIBA Europe Cup.

Kampionët e Kosovës do të përballen në qytetin e Trierit, me fillim nga ora 20:00, në një tjetër sfidë të rëndësishme në arenën evropiane.

Klubi mitrovicas ka bërë të ditur se edhe në këtë udhëtim do ta ketë pranë mbështetjen e bashkatdhetarëve shqiptarë, të cilët vazhdimisht i qëndrojnë afër skuadrës, pavarësisht vendit ku zhvillohen ndeshjet.

Trepça synon të përfaqësojë denjësisht basketbollin kosovar dhe të kërkojë një tjetër rezultat pozitiv në garat evropiane.

“Një qytet, një dashni, një Trepçë”, është mesazhi i klubit para kësaj përballjeje.

D.L

West Ham United ka njoftuar zyrtarisht ndërprerjen e bashkëpunimit me trajnerin Nuno Espírito Santo, me efekt të menjëhershëm.

Vendimi është marrë nga Bordi i Drejtorëve pas një vlerësimi të fillimit të sezonit në Kampionatin EFL, duke konstatuar se skuadra ka nevojë për ndryshime në stolin e trajnerit.

Përveç Nuno Espírito Santos, klubin e kanë lënë edhe ndihmëstrajneri Rui Pedro Silva dhe trajneri i portierëve Rui Barbosa.

Në njoftimin zyrtar, West Ham ka falënderuar të tre për punën dhe përkushtimin e treguar gjatë periudhës së tyre në klub, ndërsa ka konfirmuar se ka nisur tashmë procesin për gjetjen e trajnerit të ri.

Deri në emërimin e trajnerit të ri, përgjegjësinë për përgatitjen e skuadrës do ta marrin përkohësisht Mark Noble, Steve Potts dhe Gerard Prenderville.

Ata do të drejtojnë ekipin në përballjen e radhës ndaj Cardiff City, e planifikuar për nesër mbrëma në kuadër të Kampionatit EFL.

Klubi londinez ka bërë të ditur se nuk do të japë komente të tjera lidhur me këtë çështje deri në zyrtarizimin e trajnerit të ri.

D.L