Ministri i Jashtëm i Iranit, Abbas Araqchi, pritet të zhvillojë një takim zyrtar me presidentin rus Vladimir Putin gjatë një vizite në Moskë, mes përshkallëzimit të tensioneve në Lindjen e Mesme.

Sipas deklaratave të vetë Araqchit, Irani dhe Rusia po koordinojnë qëndrimet e tyre mbi zhvillimet e fundit në rajon. Lajmi u konfirmua edhe nga agjencia ruse Interfax, e cila citoi ndihmësin e Kremlinit, Yuri Ushakov, duke thënë se takimi do të fokusohet në zhvillimet gjeopolitike dhe bashkëpunimin strategjik mes dy vendeve.

Rusia dhe Irani kanë forcuar aleancën e tyre në vitet e fundit, duke nënshkruar një marrëveshje partneriteti strategjik në janar. Ndërkohë, Irani ka furnizuar Rusinë me dronë për përdorim në luftën e saj në Ukrainë, një lëvizje që ka tërhequr kritika të ashpra nga Perëndimi.

Në një tjetër zhvillim nga Irani, Forcat e Armatosura iraniane paralajmëruan Shtetet e Bashkuara për pasoja të rënda pas sulmeve ajrore të fundit. “Sulmet e tyre kanë zgjeruar gamën e objektivave legjitime për ne,” deklaroi një zëdhënës i Shtabit Qendror Khatam al-Anbiya. Komandanti Ebrahim Zolfaqari, në një deklaratë që përfundoi në gjuhën angleze, tha: “Z. Trump, bixhozxhi, ju mund ta filloni këtë luftë, por ne do ta përfundojmë atë.”

Ndërkohë, situata në Iran duket të jetë e unifikuar në reagim. Korrespondentët e Skynews nga Irani deklarojnë se për herë të parë në dekada, ekziston një “solidaritet i paparë” në mesin e popullit iranian.

“Tani të gjithë kërkojnë një përgjigje të ashpër, veçanërisht kundër Izraelit,” shkruan Skyneës duke cituar korrenspodentin Emad Anshenas nga Teherani.

Sipas gazetarit, tensionet aktuale kanë ringjallur një ndjenjë patriotike që nuk ishte parë që nga koha e luftës Iran-Irak, dhe brenda vendit po rriten thirrjet për avancimin e programit bërthamor.

Ushtria izraelite njoftoi se Irani nisi një valë të dytë sulmesh me raketa ndaj Izraelit, transmeton Anadolu.

Në një deklaratë me shkrim nga ushtria izraelite, thuhet se sirenat po bien në shumë pjesë të Izraelit për shkak të raketave të lëshuara nga Irani.

Në deklaratë u bëhet thirrje njerëzve të mos largohen nga strehimoret e tyre për shkak të raketave të lëshuara nga Irani dhe se ata duhet të qëndrojnë në zona të mbrojtura deri në njoftim të mëtejshëm.

Pas deklaratës që theksonte se sistemet e mbrojtjes ajrore po përpiqen të kapnin raketat, sirenat u aktivizuan në Izraelin qendror, veçanërisht në Tel Aviv.

Pak para këtij sulmi, ushtria izraelite njoftoi se Irani kishte lëshuar raketa në Izraelin verior.

– Konflikti që filloi me sulmet e dhunshme të Izraelit ndaj Iranit

Më 13 qershor, Izraeli nisi sulme në shkallë të gjerë duke synuar objektet bërthamore në qytete të ndryshme në Iran, si dhe komandën e lartë ushtarake.

Në Iran, Shefi i Shtabit të Përgjithshëm, Komandanti i Përgjithshëm i Korpusit të Gardës Revolucionare, disa komandantë të lartë dhe 9 shkencëtarë bërthamorë u vranë në sulme.

Ministria iraniane e Shëndetësisë njoftoi më 21 qershor se numri i përgjithshëm i viktimave civile në sulmet izraelite ishte 430 dhe numri i të plagosurve tejkaloi 3.500.

Zyra e Kryeministrit izraelit raportoi se 24 persona u vranë dhe 1.272 u plagosën në hakmarrjet e kryera nga ushtria iraniane.

Shumë vende, veçanërisht Turqia, dënuan sulmet e Izraelit.

Sekretari i Shtetit i SHBA-së, Marco Rubio, i ka bërë thirrje Kinës të parandalojë Iranin nga mbyllja e Ngushticës së Hormuzit, një nga rrugët më të rëndësishme të transportit detar në botë, sipas BBC.

Komentet e tij erdhën pasi televizioni shtetëror iranian ”Press TV” raportoi se parlamenti kishte miratuar një plan për të mbyllur ngushticën, por shtoi se vendimi përfundimtar i takon Këshillit Suprem të Sigurisë Kombëtare.

Çdo ndërprerje e furnizimit me naftë do të kishte pasoja të thella për ekonominë.

Kina në veçanti është blerësi më i madh në botë i naftës iraniane dhe ka një marrëdhënie të ngushtë me Teheranin.

Çmimet e naftës u rritën pas sulmit të SHBA-së në zonat bërthamore iraniane, me çmimin e naftës së papërpunuar Brent që arriti nivelin më të lartë në pesë muaj.

“Unë e nxis qeverinë kineze në Pekin t’i telefonojë ata për këtë, sepse ata varen shumë nga Ngushtica e Hormuzit për naftën e tyre”, tha Marco Rubio në një intervistë me Fox News.

Rreth 20% e naftës botërore kalon nëpër Ngushticën e Hormuzit, me prodhuesit kryesorë të naftës dhe gazit në Lindjen e Mesme që përdorin rrugën ujore për të transportuar energji nga rajoni.

Çdo përpjekje për të ndërprerë operacionet në ngushticë mund të rrisë ndjeshëm çmimet globale të naftës.

Ato u rritën në nivelin më të lartë që nga janari, me çmimin e naftës së papërpunuar Brent që arriti në 78,89 dollarë për fuçi që nga ora 23:22 GMT e së dielës.

Kostoja e naftës së papërpunuar ndikon në gjithçka, nga mbushja e makinës deri te çmimi i ushqimeve në supermarket.

Kina në veçanti blen më shumë naftë nga Irani sesa çdo vend tjetër – me importet e saj të naftës nga Irani që tejkaluan 1,8 milionë fuçi në ditë muajin e kaluar, sipas të dhënave nga firma e ndjekjes së anijeve ”Vortexa”.

Ekonomitë e tjera të mëdha aziatike, përfshirë Indinë, Japoninë dhe Korenë e Jugut, gjithashtu mbështeten shumë në naftën bruto që kalon nëpër Ngushticë./atsh

Sekretari i Shtetit i SHBA-së, Marco Rubio ka paralajmëruar Iranin se hakmarrja kundër forcave amerikane do të ishte gabimi më i keq që vendi ka bërë ndonjëherë.

”Ata janë plotësisht të cenueshëm. Ata nuk kontrollojnë hapësirën e tyre ajrore, ata nuk mund ta mbrojnë hapësirën e tyre ajrore. Ata as nuk mund t’i mbrojnë udhëheqësit e tyre”, tha Rubio për Fox News, pas sulmeve shkatërruese të SHBA-së në objektet bërthamore iraniane.

SHBA-ja shënjestroi lokacionet bërthamore të Iranit me gjashtë bomba shkatërruese bunker të hedhura në objektin Fordo me bombardues të fshehtë B-2, së bashku me dhjetëra sulme me raketa balistike të lëshuara nga nëndetëset në objektet Natanz dhe Isfahan.

Rubio tha se Irani duhet të “zgjohet” dhe të ndjekë zhvillimin legjitim të energjisë bërthamore mbi programet e armëve. Ai tha se oferta bërthamore e SHBA-së mbetet në tryezë dhe se ata janë “të përgatitur të flasin me ta nesër dhe të fillojnë të punojnë për këtë”./atsh