Me rritjen e çmimeve të pajisjeve, rrobave dhe lodrave për fëmijë, shumë prindër po zgjedhin artikuj të dorës së dytë ose të trashëguar.

Megjithatë, ekspertët paralajmërojnë se disa produkte, edhe pse duken në gjendje të mirë, mund të jenë të rrezikshme për sigurinë e fëmijëve, shkruan Daily Mail.

Sediljet e makinave

Sediljet e përdorura janë të rrezikshme, sidomos nëse kanë qenë pjesë e një aksidenti. Dëmtime të brendshme të padukshme, si mikroçarjet, kompromentojnë sigurinë, ndërsa rripat e sigurimit dobësohen me kalimin e kohës. Modelet e vjetra nuk i përmbushin standardet e reja, mungesa e udhëzimeve origjinale rrit rrezikun e instalimit të gabuar. 22% e prindërve përdorin sedilje makine të dorës së dytë.

Dyshekë të përdorur

Dyshekët mund të jenë të rrezikshëm, veçanërisht nëse nuk janë përdorur nga një familje e besueshme. Lullaby Trust paralajmëron se përdorimi rrit rrezikun e sindromës së vdekjes së papritur të foshnjave. Nëse përdorni dyshek të përdorur, sigurohuni të ketë mbulesë të papërshkueshme nga uji, të jetë pastruar dhe tharë, i fortë dhe i sheshtë, e të përshtatet në mënyrë të sigurt në krevatin e foshnjës.

Helmetat

Ashtu si sediljet e makinave, helmetat nuk duhet blerë të dorës së dytë. Edhe pse duken të padëmtuara, nuk ka mënyrë për të verifikuar nëse kanë pësuar goditje që dobësojnë strukturën e tyre. Një helmetë e re garanton siguri, ndërsa një e përdorur mund të jetë e rrezikshme.

Çfarë mund të blihet me siguri të dorës së dytë?

Disa artikuj konsiderohen të sigurt për t’u blerë të dorës së dytë, për sa kohë që janë në gjendje të mirë dhe plotësojnë standardet e sigurisë. Këto përfshijnë karroca fëmijësh, djepë, porta sigurie për shkallët dhe mobilje për fëmijë.

Me kujdes shtesë, konsideroni blerjen e lodrave, rrobave, shisheve, pompave të gjirit e monitorëve të foshnjave. /A.Z/UBT News/

Ndërsa afrohen muajt e ftohtë, tharja e çarçafëve brenda shtëpisë shpesh kthehet në sfidë.

Edhe pse mund të përfitoni nga një ditë me diell dhe erë për t’i tharë jashtë, shumica e njerëzve preferojnë t’i vendosin në tharëse rrobash.

Për shkak të faturave të larta të energjisë, familjet përpiqen të shmangin përdorimin e tharëses elektrike, gjë që bën që çarçafët të marrin shumë kohë për t’u tharë plotësisht. Eksperti i gjumit Martin Seeley, ka ndarë disa këshilla për t’i tharë çarçafët shpejt pa shpenzuar energji.

Lani çarçafët në mëngjes

“Lani në mëngjes, që të kenë gjithë ditën për t’u tharë” – këshillon Seeley. “Nëse i lani në mbrëmje, ajri më i ftohtë ngadalëson tharjen.”

Prandaj, është më mirë t’i lani para mesditës për të përfituar nga ngrohtësia dhe qarkullimi më i mirë i ajrit gjatë ditës.

Përdorni ciklin shtesë të shtrydhjes

Një shtrydhje shtesë në lavatriçe mund të largojë deri 30% më shumë ujë, duke përshpejtuar ndjeshëm procesin e tharjes.

Tundini çarçafët para se t’i varni

Para se t’i varni, tundini mirë çarçafët. Kjo ndihmon që fijet të ndahen dhe ajri të qarkullojë më lehtë, duke parandaluar grumbullimin e lagështisë dhe aromat e pakëndshme.

Provoni “trukun me peshqir”

Seeley tha: “Vendosni një peshqir të thatë mbi një sipërfaqe, shtroni sipër tij çarçafin e lagur e rrotulloni bashkë si ‘Swiss roll’. Shtypni pak mbi të që peshqiri të përthithë ujin.” Më pas hapeni dhe vareni pranë një vendi të ngrohtë ose me qarkullim ajri – kjo metodë është e dobishme në ditët e ftohta e me lagështi.

Zgjidhni materiale që thahen shpejt

Për muajt e dimrit, preferoni çarçafë prej bambuje, mikrofibre ose përzierje polikoton, pasi janë më të lehta e thahen më shpejt se pambuku klasik, të përshtatshme nëse doni t’i lani dhe t’i përdorni po atë ditë. /A.Z/UBT News/