Bruno Mars u lind më 8 tetor 1985 në një familje artistësh në Honolulu, SHBA. Babai i tij ishte perkusionist dhe nëna këngëtare dhe kërcimtare.

Që në moshë të vogël, u ekspozua ndaj muzikës dhe performancave, duke interpretuar në grupin familjar që në moshën katër vjeç.

Pas përfundimit të shkollës së mesme, ai u transferua në Los Angeles për të ndjekur një karrierë muzikore, si kompozitor dhe producent për artistë të tjerë. Para se të bëhej këngëtar, Bruno bashkëpunoi me: Flo Rida, Travie McCoy dhe K’naan, duke shkruar dhe prodhuar hite si:

“Right Round” (Flo Rida ft. Ke$ha)

“Billionaire” (Travie McCoy ft. Bruno Mars)

“Wavin’ Flag” (K’naan)

Debuti i tij solo erdhi me EP-në It’s Better If You Don’t Understand dhe albumin “Doo-Wops & Hooligans” (2010), që përfshinte hitet:

“Just the Way You Are”

“Grenade”

“The Lazy Song”

Këto këngë e bënë atë një yll global dhe i sollën çmime të shumta Grammy.

Suksesi ndërkombëtar

Në 2012, Mars publikoi albumin “Unorthodox Jukebox”, me këngë si:

“Locked Out of Heaven”

“When I Was Your Man”

“Treasure”

Ky album e konsolidoi si një nga artistët më të kompletuar të dekadës. Ai ka performuar në Super Bowl Halftime Show në 2014 dhe 2016, duke qenë pjesë e një nga ngjarjet më të ndjekura televizive në SHBA.

Epoka “24K Magic” dhe Silk Sonic

Në vitin 2016, Bruno publikoi “24K Magic”, një sukses ndërkombëtar që përfshinte këngë si:

“24K Magic”

“That’s What I Like”

“Versace on the Floor”

Ky projekt i solli 7 Grammy, përfshirë “Albumin e Vitit”. Në vitin 2021, ai formoi duon Silk Sonic me Anderson .Paak. Albumi An Evening with Silk Sonic përfshiu superhitin “Leave the Door Open”, që fitoi çmime të shumta Grammy.

Bruno Mars njihet për energjinë e tij në skenë, vokalin e fuqishëm dhe kombinimin e zhanreve të ndryshme si pop, funk, soul dhe R&B, dhe sot mbush 40 vite jetë.

Ai është një nga artistët më të suksesshëm të viteve 2010-2020, me miliona albume të shitura dhe një numër të madh çmimesh ndërkombëtare. /A.Z/UBT News/

Denise Richards ka dëshmuar në gjykatë kundër ish-bashkëshortit të saj, Aaron Phypers, gjatë një seance dëgjimore që lidhej me urdhrin e përkohshëm të mbrojtjes që ajo kishte kërkuar ndaj tij.

Gjatë dëshmisë, ajo foli për abuzimin e dyshuar gjatë martesës, duke deklaruar me lot në sy se Phypers shpesh e kishte kërcënuar me jetë.

“Ai më thoshte se do të më hidhte nga dritarja ose nga ballkoni i hotelit. Ai gati sa nuk më vrau,” tha ajo.

Richards shpjegoi rrethanat që çuan në ndarje, duke treguar se gjithçka kishte nisur pasi i kërkoi Phypers të largohej nga shtëpia.

“Ai u zemërua, ishte i paqëndrueshëm. Sapo isha shëruar nga një lifting i fytyrës e kisha ende qepje pas veshëve. Ai më kapi për krahësh, më bërtiti dhe më ofendoi, duke më quajtur ‘mashtruese dhe gënjeshtare’,” dëshmoi aktorja.

Sipas Richards, situata u keqësua ditën pas incidentit, kur Phypers dhe babai i tij hynë në dhomën ku ajo po flinte dhe e kërcënuan se do të publikonin foto nudo të saj.

Ajo pretendon se Phypers e goditi, ndonëse ai e ka mohuar akuzën. Ajo rrëfeu disa episode tjera të dhunshme, duke thënë se ish-bashkëshorti e kishte goditur në fytyrë dhe në kokë, si dhe e kishte kërcënuar me vrasje.

Aktorja shtoi se Phypers e kishte akuzuar për tradhti, pasi pretendonte se kishte gjetur mesazhe në telefonin e saj që tregonin për një lidhje jashtëmartesore diçka që ai nuk e pranoi. /A.Z/UBT News/

Pas më shumë se dy dekadash nga fushata ikonike për Chanel No. 5, e realizuar nga regjisori Baz Luhrmann, Nicole Kidman rikthehet si ambasadore e shtëpisë së modës Chanel.

Aktorja fituese e Oscar-it do të bëjë paraqitjen e saj të parë në sfilatën debutuese të Matthieu Blazy si drejtor kreativ i Chanel, ku do të shfaqet me një këmishë të bardhë mashkullore dhe xhinse të gjera, pjesë e koleksionit shumë të pritur.

Kidman ka qenë figurë e hershme që e ktheu një sfilatë mode në një ngjarje të pop kulturës, kur mori pjesë në shfaqjen e pranverës 2005 të Chanel të organizuar nga Karl Lagerfeld.

Ajo ka mbetur pjesë e pandashme e historisë së Chanel, duke e veshur edhe në Met Gala 2023 fustanin nga fushata e vitit 2004.

Në një deklaratë për WWD, Kidman u shpreh: “Jam e emocionuar që po bashkohem sërish me Chanel, këtë herë nën vizionin e Matthieu Blazy. Chanel ka ditur gjithmonë si të nderojë gratë me inteligjencë dhe elegancë.”

Ndërsa Blazy, i cili më parë e ka veshur aktoren gjatë kohës së tij te Bottega Veneta, shtoi: “Nicole është mishërimi i gruas Chanel, e lirë dhe gjithmonë në ndryshim. Është një ëndërr të punoj sërish me të.”

Presidenti Bruno Pavlovsky, theksoi se marka synon të prezantojë fytyra të reja, pa lënë pas ambasadorët e saj besnikë. /A.Z/UBT News/

Ke Turner Jr., djali i legjendarëve të muzikës Tina dhe Ike Turner, ka ndërruar jetë në moshën 67-vjeçare, vetëm një ditë pas ditëlindjes së tij.

Lajmin e konfirmoi kushërira e tij, Jacqueline Bullock, për TMZ, duke treguar se Ike Jr. ndërroi jetë në një spital në Los Angeles si pasojë e dëmtimit të veshkave.

“Me hidhërim të madh njoftojmë ndarjen nga jeta të kushëririt tim, Ike Turner Jr.,” tha Bullock për “Page Six”.

Ajo shtoi se ai ishte më shumë se një kushëri për të, një vëlla me të cilin rritën së bashku në familjen e famshme Turner. Bullock zbuloi se shëndeti i Ike Jr. ishte përkeqësuar vitet e fundit për shkak të problemeve me zemrën dhe një goditjeje në tru muajin e kaluar.

Kunata e tij, Afida Turner, bëri homazh për të në Instagram: “Pusho në paqe, Ike Jr. Ishe i mrekullueshëm, kunat. Jam e lumtur që fola me ty në telefon para se të ikje. Të dua, u prehtë në paqe.”

Ike Jr. ishte një nga dy djemtë e adoptuar të Tinës nga lidhja me Ike Turner dhe ndjeki hapat e prindërve në muzikë si pjesë e grupit tribut The Love Thang Band, me vokalisten Sweet Randi Love.

Ai fitoi një çmim Grammy për punën në albumin e vitit 2006, “Risin’ With The Blues”, që fitoi kategorinë për Albumin më të Mirë Tradicional të Bluesit.

Tina dhe Ike rritën katër fëmijë, ndërsa Tina ishte nënë e një djali, Raymond Craig, të cilin e ka me muzikantin Raymond Hill. Ke Turner Jr. mbetet pjesë e trashëgimisë së familjes Turner, duke lënë pas talentin dhe ndikimin e tij të pashlyeshëm në muzikë. /A.Z/UBT News/