Policia e Kosovës ka raportuar për disa raste të dhunës në familje të evidentuara gjatë 11 dhe 12 gushtit në Podujevë, Prishtinë, Klinë, Pejë dhe Mitrovicë të Jugut.

Në Podujevë, dy persona të dyshuar meshkuj dyshohet se kanë ushtruar dhunë ndaj një gruaje, e cila është dërguar për trajtim mjekësor në QKUK. Pas intervistimit, me vendim të prokurorit, të dyshuarit janë dërguar në mbajtje.

Në Prishtinë janë raportuar dy raste. Në njërin prej tyre, një grua, shtetase e huaj, dhe një burrë kosovar, në gjendje të dehur, kanë sulmuar njëri-tjetrin dhe kanë pësuar lëndime. Të dy kanë marrë trajtim mjekësor, ndërsa policia ka konfiskuar edhe një thikë. Pas konsultimit me prokurorin, të dy janë liruar në procedurë të rregullt. Në rastin tjetër, një burrë është arrestuar nën dyshimin se ka ushtruar dhunë psikike ndaj dy grave. Ai është liruar me vendim të prokurorit, ndërsa rasti vazhdon në procedurë të rregullt.

Në Klinë, një person është arrestuar pasi dyshohet se ka frikësuar një viktimë me thikë. Me vendim të prokurorit, i dyshuari është dërguar në mbajtje.

Në Pejë, një shtetas i Maqedonisë së Veriut është shoqëruar në stacionin policor nën dyshimin për ushtrim të dhunës psikike ndaj një gruaje kosovare. Pas intervistimit, palët janë liruar dhe rasti do të trajtohet në procedurë të rregullt.

Ndërsa në Mitrovicë të Jugut, një grua dyshohet se ka kanosur me thikë një burrë dhe më pas e ka hedhur thikën, duke goditur një tjetër grua. Viktima ka marrë trajtim mjekësor. Pas intervistimit, me vendim të prokurorit, palët janë liruar dhe rasti vazhdon në procedurë të rregullt./A.K/

Një ekspozitë në Salzburg, kushtuar 270-vjetorit të lindjes së Wolfgang Amadeus Mozartit, ka përfunduar në qendër të vëmendjes pas një serie vjedhjesh të pazakonta.

Nga gjithsej 320 statuja të arta që paraqesin Mozartin së bashku me qenin e tij, Pimperl, janë zhdukur plot 210. Veprat janë krijuar nga artisti gjerman Ottmar Horl dhe ishin vendosur në kopshtin përpara shtëpisë së dikurshme të Mozartit, në hapësirat e banimit dhe në disa pavijone të ekspozitës.

Vjedhjet kanë nisur që në ditët e para të ekspozitës. Më shumë se 80 statuja janë zhdukur vetëm gjatë dy javëve të para, duke bërë që artisti të dyshojë se nuk bëhet fjalë thjesht për vizitorë që i kanë marrë si suvenire, por për një vjedhje të organizuar.

Edhe pse statujat janë të arta në pamje, vlera e tyre nuk është veçanërisht e lartë. Secila ishte planifikuar të shitej pas përfundimit të ekspozitës për rreth 100 euro. Organizatorët kishin përgatitur edhe disa statuja rezervë, por jo aq sa për të zëvendësuar numrin e madh të veprave të vjedhura.

Ekspozita do të qëndrojë e hapur deri më 30 gusht, pavarësisht humbjeve të konsiderueshme.

Kjo nuk është hera e parë që veprat e Ottmar Horl bëhen objekt vjedhjeje. Artisti ka treguar se më herët, në Bayreuth të Gjermanisë, iu vodh e gjithë një ekspozitë me figura të kompozitorit Richard Wagner.

Mozarti, një nga kompozitorët më të njohur në historinë e muzikës, lindi më 27 janar 1756 në Salzburg. Përmes këtyre statujave, Horl synoi të paraqiste një anë më njerëzore dhe më të afërt të tij, duke e shfaqur kompozitorin në shoqërinë e qenit të tij Pimperl./A.K/

Ariana Grande ka nxitur spekulimet për një rikthim të mundshëm në lidhje me ish të dashurin e saj, balerinin Ricky Alvarez.

Këngëtarja ka publikuar në Instagram fotografi të përbashkëta me Alvarez, pak kohë pas ndarjes nga aktori Ethan Slater në fillim të vitit 2026. Alvarez, i cili ka qenë pjesë e trupës së balerinëve të Grande gjatë turneut “Honeymoon” në vitin 2015, kishte qenë në lidhje me këngëtaren nga viti 2015 deri në vitin 2016.

Pas ndarjes, të dy kishin ruajtur një marrëdhënie miqësore, por paraqitjet e fundit së bashku kanë bërë që fansat të dyshojnë se raporti mes tyre mund të ketë marrë sërish një kthesë romantike.

Në dy fotografitë e fundit të publikuara nga Grande, Alvarez shfaqet pranë saj dhe këngëtarja e ka etiketuar në të dyja. Për më tepër, ai është parë shpesh në shoqërinë e saj gjatë javëve të fundit, përfshirë në Florida dhe në një nga koncertet e saj në Austin.

Edhe ndryshimet që Grande ka bërë gjatë performancave të fundit në tekstin e këngës së saj “Thank U, Next” kanë tërhequr vëmendjen e fansave. Në një prej interpretimeve, ajo këndoi një version që lë të kuptohet se ajo dhe Ricky “gjithmonë gjejnë rrugën për t’u rikthyer te njëri-tjetri”, duke shtuar edhe më shumë spekulimet.

Grande më herët ishte në lidhje me aktorin e Broadwayt, Ethan Slater, të cilin e njohu gjatë xhirimeve të filmit “Wicked”. Pas përfundimit të asaj lidhjeje, vëmendja është rikthyer te raporti i saj me Alvarez.

Megjithatë, as Ariana Grande dhe as Ricky Alvarez nuk kanë konfirmuar zyrtarisht se janë rikthyer në një lidhje romantike./A.K/

Bashkimi Evropian i Transmetuesve (EBU) ka ndryshuar rregullat për organizimin e Eurovisionit, duke përcaktuar se vendi fitues nuk do ta ketë më automatikisht të drejtën për të pritur edicionin e ardhshëm të konkursit.

Sipas rregullave të reja, organizimi mund t’i hiqet transmetuesit të vendit fitues nëse situata në shtet ose në rajon vlerësohet si e papërshtatshme për zhvillimin e sigurt dhe normal të Eurovisionit. Në vlerësim do të merren parasysh faktorë si konfliktet e armatosura, situatat e ndjeshme gjeopolitike apo rreziqe të tjera që mund të ndikojnë në sigurinë e artistëve, delegacioneve dhe stafit.

Në raste të tilla, EBU mund t’ia besojë organizimin një transmetuesi tjetër pjesëmarrës, i cili do të marrë përsipër përgjegjësinë për zhvillimin e konkursit dhe pritjen e delegacioneve ndërkombëtare.

Një precedent i tillë tashmë ekziston. Ukraina fitoi Eurovisionin në vitin 2022, por për shkak të luftës me Rusinë dhe shqetësimeve të sigurisë, konkursi i vitit 2023 nuk mund të organizohej në Ukrainë. Edicioni u mbajt në Liverpool të Mbretërisë së Bashkuar, nga BBC në bashkëpunim me transmetuesin ukrainas.

Rregullat e reja synojnë të krijojnë një kuadër më të qartë për raste të tilla. Edhe kur nuk ka një konflikt të drejtpërdrejtë, por ekzistojnë rrethana që mund të cenojnë sigurinë ose stabilitetin e eventit, EBU mund të kryejë vlerësime të pavarura para se të marrë vendimin.

Kështu, nga tani e tutje, fitorja në Eurovision nuk nënkupton automatikisht edhe organizimin e edicionit pasardhës. Siguria, stabiliteti dhe mundësia për zhvillimin normal të konkursit do të jenë ndër faktorët kryesorë në përcaktimin e vendit pritës./A.K/