

Published
4 years agoon
By
Betim GashiPak më shumë se një muaj qëkur rrëzuan nga pushteti Qeverinë e mbështetur nga Perëndimi në Kabul, sunduesit e rinj të Afganistanit, talibanët, tani po përballen me armikun e brendshëm, i cili po përdor shumë taktika të sulmeve të cilat i kanë praktikuar vetë talibanët.
Grupi ekstremist i Shtetit Islamik (IS) paraqet kërcënim serioz për Afganistanin.
Sulmi vdekjeprurës në aeroportin e Kabulit, muajin e kaluar, dhe një seri sulmesh me bomba në qytetin Xhalalabad, që u morën përsipër nga IS-i, shpërfaqin kërcënimin për stabilitetin e vendit nga grupet militante, dhe talibanëve do t’u duhet të merren me këtë situatë, shkruan Reuters.
Zëdhënësi i talibanëve, Zabihullah Mujahid, këtë javë e ka minimizuar kërcënimin duke thënë se IS-i nuk ka prezencë aktive në Afganistan.
Por, komandantët talibanë në terren nuk e shpërfillin aq lehtë kërcënimin nga militantët e këtij grupi ekstremist.
Dy anëtarë të shërbimeve të inteligjencës të talibanëve të cilët hetuan disa nga sulmet e fundit në Xhalalabad thanë se taktikat që përdori IS-i dëshmojnë se ky grup mbetet një rrezik, edhe nëse nuk ka numër të mjaftueshëm të luftëtarëve dhe burime tjera që do t’i përdorte për të marrë nën kontrolll territorin.
Në sulme u përdorën bomba që ngjiten me magnet, të cilat vendosen kryesisht poshtë veturave. Ato kishin në shënjestër militantët talibanë. Të njëjtin lloj të sulmeve e kishin përdorur edhe talibanët kur sulmonin zyrtarët dhe pjesëtarët e forcave të sigurisë si dhe figurat e shoqërisë civile në përpjekje për të destabilizuar Qeverinë e mbështetur nga Perëndimi.
“Ne jemi të shqetësuar me përdorimin e këtyre bombave ngjitëse, të cilat ne i përdornim dikur për të sulmuar armiqtë tanë në Kabul. Ne jemi të shqetësuar për udhëheqjen tonë pasi ata mund të jenë cak i sulmeve”, tha një nga zyrtarët e inteligjencës talibane.
Çfarë është Shteti Islamik i Khorasanit?
Shtetit Islamik në Azinë Qendrore, u shfaq disa muaj pasi luftëtarët kryesorë të grupit pushtuan Sirinë dhe Irakun, duke krijuar një kalifat të vetëshpallur ose perandori islamike, në verën e vitit 2014. Në Siri dhe Irak, u desh që forca vendase dhe ndërkombëtare të detyrohen të luftojnë gjatë pesë vjetëve pasuese, për ta rrëzuar kalifatin. Dega e tij në Afganistan, e ka marrë emrin nga Provinca Khorasan, një rajon që mbulon pjesën më të madhe të Afganistanit, Iranit dhe Azisë Qendrore gjatë mesjetës.
Ky grup njihet edhe si ISK ose IS-K.
Që nga viti 2018, grupi e ka humbur fuqinë pas një sërë humbjesh të rënda të shkaktuara si nga talibanët ashtu edhe nga forcat amerikane.
Të mërkurën, forcat talibane të sigurisë në Nangarhar thanë se kishin vrarë tre anëtarë të IS-it.
“Struktura e tyre kryesore është shpartalluar dhe ata tani janë ndarë në grupe të vogla përmes së cilave kryejnë sulme”, tha një zyrtar i inteligjencës.
Ka kohë që talibanët kanë bërë premtime se nuk do të lejojnë që territori i Afganistanit të përdoret për sulme ndaj vendeve tjera.
Megjithatë, analistët perëndimorë thonë se kthimi i talibanëve në pushtet u ka dhënë hov grupeve ekstremiste siç janë: IS-K dhe Al Kaida.
Al Kaida e shndërroi Afganistanin në një bazë të veten kur talibanët ishin në pushtet në fund të viteve 90-ta.
“Kthimi i talibanëve në pushtet në Afganistan paraqet një fitore të madhe për islamistët”, tha Rohan Gunaratna, profesor i studimeve të sigurisë në Universitetin Nanyang të Singaporit.
“Ata kanë festuar për kthimin e talibanëve. Unë mendoj se Afganistani është teatër i ri”, tha ai.
Ende nuk dihet shumë sesi funksionon IS-K por besohet se grupi tërheq shumë luftetarë në rradhët e veta nga talibanët apo nga versionin pakistanez i talibanëve, i njohur si TTP.
Grupi ka luftuar talibanët dhe gjithashtu mbështet një Kalifat global sipas ligjit islamik, në kontrast me talibanët të cilët këmbëngulin se nuk kanë ndonjë interes jashtë Afganistanit.
Shumica e analistëve, si dhe Kombet e Bashkuara, vlerësojnë se ISI-K ka më pak se 2,000 luftëtarë, krahasuar me 100,000 sa kanë në dispozicion talibanët.
Mendohet se rradhët e IS-K janë shtuar pasi talibanët i liruan të burgosurit kur morën kontrollin në Afganistan.
Sipas një raporti të muajit qershor të Këshillit të Sigurimit të OKB-së, lidhjet financiare dhe logjistike të IS-K me organizatën e saj bazë në Siri janë dobësuar, megjithëse ata ruajnë disa kanale komunikimi.
“Financimi i IS-it për degën në Afganistan besohet se ka rënë në mënyrë efektive”, thuhej në raport.
Sidoqoftë, raporti tha se sinjalet e përçarjeve brenda talibanëve, të cilat tashmë kanë filluar të shfaqen, mund të inkurajojnë më shumë luftëtarë të largohen nga rradhët e talibanëve.
“Grupi IS-K mbetet aktiv dhe i rrezikshëm. Veçanërisht nëse është në gjendje që duke marrë një pozicion si grupi i vetëm që kundërshton talibanët dhe në këtë mënyrë të tërheq në rradhët e veta talibanët e pakënaqur dhe militantë të tjerë”, tha OKB.
You may like
Aktualitet
I kapen 38 qese kokainë një personi në Prishtinë
Published
1 hour agoon
August 27, 2025By
UBT News
Policia e Kosovë në Prishtinë ka njoftuar se ka gjetur tek një person 38 qese substanca që dyshohet të jenë lëndë narkotike të llojit kokainë.
Policia njofton se droga është gjetur tek drejtuesi i një veture gjatë kontrolleve të rregullta ka në rrugën “Ahmet Krasniqi” në kryeqytet.
“I dyshuari menjëherë është proceduar më tej dhe ndaj tij janë ndërmarrë veprimet e nevojshme ligjore dhe hetimore”, thuhet në një njoftim të policisë.
Bota
Vetoja e presidentit polak kundër ndihmave për refugjatët ukrainas shkakton stuhi politike
Published
1 hour agoon
August 27, 2025By
UBT News
Presidenti i Polonisë, Karol Nawrocki, i cili është një nga aleatët më të afërt të Kievit në luftën kundër pushtuesit rus. e ka përdorur veton kundër një projektligji për ndihma për refugjatët ukrainas, duke shkaktuar stuhi politike në këtë vend të Evropës Qendrore.
Nawrocki, i cili shpesh ka ngritur çështje të ndërlikuara historike midis Varshavës dhe Kievit, e përdori të martën veton ndaj një projektligji që, duke filluar nga 1 tetori, do t’ua mohonte refugjatëve ukrainas në Poloni të drejtën për të punuar.
Sipas kritikëve, ky veprim i tij do të bëjë që refugjatët të bëjnë punë të padeklaruar dhe Qeveria polake do të humbë të ardhura nga taksat si pasojë.
Të hënën, Nawrocki paraqiti gjithashtu plane për ta kufizuar qasjen e refugjatëve ukrainas në përfitimet për fëmijë dhe kujdesin shëndetësor.
I zgjedhur pas një fushate që pasqyronte disa prej politikave të presidentit amerikan, Donald Trump, Nawrocki ka premtuar një politikë “Polonia e Para”, duke përfshirë vendosjen e kufizimeve për të drejtat e të huajve në vendin që është anëtar i BE-së dhe NATO-s.
Politikani konservator u zgjodh pasi mposhti ngushtësisht në rundin e dytë kryetarin liberal të Varshavës, Rafal Trzaskowski, në zgjedhjet e 1 qershorit.
Rezultati i zgjedhjeve përbënte një goditje të rëndë për kryeministrin Donald Tusk, i cili është aleat i ngushtë i Trzaskowskit dhe mbështetës i zëshëm i Ukrainës.
Edhe vetë Nawrocki ka shprehur mbështetje për Ukrainën në luftën kundër forcave pushtuese ruse. Por, ai ka thënë se i është kundër anëtarësimit të Ukrainës në NATO, një qëndrim që duket se polakë po e ndajnë gjithnjë e më shumë.
Megjithëse në përgjithësi e mbështesin betejën e Kievit kundër Rusisë, shumë polakëve u ka humbur durimi me fluksin e rreth 1.5 milionë refugjatëve të luftës nga Ukraina dhe kostot e lidhura me ta.
Vendimet e Nawrockit kanë nxitur kritika nga mbështetësit e Ukrainës brenda Qeverisë polake.
“Vendimi i tij minon stabilitetin e ekonomisë, kohezionin social, detyrimet ndërkombëtare të Polonisë dhe sigurinë e të gjithë vendit”, thuhet në një deklaratë të Ministrisë së Brendshme të Polonisë.
Ministria shtoi se vendimi për të vënë veton ndaj projektligjit për ndihmën për refugjatët ukrainas mund të krijojë shpenzime shtesë prej 2.18 miliardë dollarësh, duke ushtruar trysni shtesë mbi një buxhet tashmë të tendosur.
Bota
Trump: Nëse Rusia nuk lëviz drejt paqes, shpallim luftë ekonomike
Published
1 hour agoon
August 27, 2025By
UBT News
Presidenti i Shteteve të Bashkuara, Donald Trump, sërish e ka hedhur poshtë mundësinë e ndonjë takimi së shpejti mes udhëheqësve rusë dhe ukrainas, si dhe ka folur për mundësinë e sanksioneve të reja ndaj Moskës, megjithëse tha se edhe pala ukrainase është në faj.
“Unë dua që lufta të përfundojë. “Ajo që e kam në mendje është shumë, shumë serioze, nëse më duhet ta bëj. Por, dua ta shoh duke përfunduar”, theksoi ai. Ne duam përfundimin e saj. Ne kemi sanksione ekonomike”, u tha Trump gazetarëve të martën në Shtëpinë e Bardhë.
Trump shtoi: “Nuk do të jetë një luftë botërore, por do të jetë një luftë ekonomike. Një luftë ekonomike do të jetë e keqe, dhe do të jetë e keqe për Rusinë, dhe unë nuk e dua këtë”.
Ka kohë që Trump e përdor kërcënimin me sanksione ekonomike apo tarifa të larta kundër vendeve të tjera në çështje ndërkombëtare.
Ai ka paralajmëruar por ende nuk ka vendosur masa ekonomike kundër Moskës, megjithëse SHBA-ja dhe Perëndimi kanë vendosur një sërë sanksionesh të rënda ndaj Rusisë prej se ajo e filloi pushtimi e plotë të Ukrainës në shkurt të vitit 2022.
“Mendoj se, në shumë mënyra, ai [presidenti rus Vladimir Putin] është aty. Ndonjëherë ai është aty dhe [presidenti ukrainas Volodymyr Zelensky nuk është aty. As Zelensky nuk është plotësisht i pafajshëm. Unë kaloj shumë mirë me të tani, por kemi marrëdhënie shumë më ndryshme sepse tani nuk po ia japim asnjë qindarkë Ukrainës”, tha Trump, duke iu referuar një marrëveshjeje ku anëtarët e NATO-s blejnë armë amerikane për t’u përdorur nga Kievi”, nënvizoi ai.
Trump gjithashtu la të kuptohej për mundësinë e masave kundër Kievit, por nuk dha hollësi.
“Unë kam marrëdhënie shumë të mira me Putinin. Nëse mund t’i shpëtoj mijëra njerëz nga vdekja përmes sanksioneve ndaj Rusisë ose Ukrainës ose kujtdo tjetër, është mirë”, shtoi ai.
Kur u pyet për refuzimin e Putinit për t’u takuar ballë për ballë me Zelenskyn dhe për dyshimet e Kremlinit mbi legjitimitetin e udhëheqësit ukrainas, Trump tha se nuk ka rëndësi çfarë thonë rusët sepse të gjithë po bëjnë shfaqje.
Rusia ka vazhduar me pushtimin e plotë të Ukrainës pa ndërprerje pas takimeve të Trumpit me Putinin në Alaskë, më 15 gusht, dhe me Zelenskyn dhe liderët evropianë në Shtëpinë e Bardhë tri ditë më vonë.
Trump, i cili që prej se e mori detyrën në janar ka kërkuar ta ndërmjetësojë përfundimin e luftës, i përdori ato takime për ta organizuar një takim ballë për ballë mes Putinit dhe Zelenskyt, të cilët nuk janë takuar që nga viti 2019.
Zelensky – i cili ka kërkuar një takim të tillë me Putinin – më 26 gusht tha se Turqia, vendet e Gjirit ose shtetet evropiane mund të shërbejnë si mikpritës të çdo takimi që ai mund të mbajë me Putinin.
Aktualitet
Oda Amerikane diskuton tarifat 0% për mallrat amerikane
Published
2 hours agoon
August 27, 2025By
UBT News
Oda Ekonomike Amerikane në Kosovë do të mbajë një forum me temën “Largimi i barrierave, ndikimi ekonomik i tarifave 0% për mallrat amerikane”, që synon të trajtojë përfitimet ekonomike dhe ndikimin e drejtpërdrejtë të politikave të tregtisë së lirë ndërmjet Shteteve të Bashkuara të Amerikës dhe Kosovës.
Ngjarja do të zhvillohet në selinë e Odës Amerikane, më 26 gusht 2025, në ora 15:30, dhe pritet të mbledhë përfaqësues të institucioneve shtetërore, bizneseve vendore, investitorëve dhe përfaqësuesve diplomatikë.
Forumi do të ofrojë një hapësirë për diskutim të politikave aktuale tregtare dhe mundësive që krijohen për bizneset vendore përmes heqjes së barrierave dhe aplikimit të tarifave 0% për mallrat amerikane.

Ditë kyçe për Barcelonën në afatin e transferimeve

Real Madridi synon rikthimin e Nico Paz në vitin 2026

I kapen 38 qese kokainë një personi në Prishtinë

E ardhmja e Vinicius Junior te Real Madridi mbetet e pasigurt

Akuzohen nga Italia si pjesëtarë të grupeve kriminale, arrestohen tre persona në Fier

Barcelona refuzon të shesë Fermin Lopezin, pavarësisht interesimit të Chelseat

Leon Avdullahu zgjedh Kosovën, Shaqiri: Kishim folur për këtë

Vetoja e presidentit polak kundër ndihmave për refugjatët ukrainas shkakton stuhi politike

Trump: Nëse Rusia nuk lëviz drejt paqes, shpallim luftë ekonomike
Të kërkuara
-
Lajmet nga UBT3 months ago
UBT organizon debat rreth zgjerimit të BE-së dhe ruajtjes së vlerave evropiane
-
Lajmet nga UBT3 months ago
UBT – Institucioni privat me më së shumti programe të akredituara nga Agjencia e Akreditimit të Kosovës
-
Lajmet nga UBT3 months ago
UBT rilicencohet nga MAShTI për ofrimin e arsimit profesional në katër drejtime të rëndësishme shëndetësore
-
Kërkime2 months ago
Profesori i UBT-së, Musa Sabedini, publikon punim shkencor në revistën ndërkombëtare JGPSCD në SHBA