Aktualitet

Talibanët: Dijetarët islamikë do të vendosin për rolin e grave në vendin tonë

Published

5 years ago

August 19, 2021

UBT news

Një udhëheqës i lartë taliban i ka thënë agjencisë Reuters se roli i grave në Afganistan, përfshirë të drejtën e tyre për punë dhe arsimim dhe mënyrën se si duhet të vishen, do të vendoset përfundimisht nga një këshill dijetarësh islamikë.

“Nëse vajzat do të lejohen ose jo të shkojnë në shkollë do të vendosin dijetarët tanë”, tha Waheedullah Hashimi, i cili ka qasje në vendimmarrjen e grupit.

“Ata do të vendosin nëse gratë duhet të mbajnë hixhab, burka, abaya apo tjerat. Kjo varet nga ata”, ka thënë ai.

Hixhabi është një shall që mbulon kokën, burka është një veshje përmes së cilës mbulohet gjithë trupi duke lënë vetëm sytë e pambuluar, ndërsa abaya është një veshje që e lë fytyrën të pambuluar.

Të martën, zëdhënësi kryesor i talibanëve, Zabihullah Mujahid, tha në një konferencë për media në Kabul se gratë do të lejohen të punojnë dhe studiojnë dhe “do të jenë shumë aktive në shoqëri, por brenda kornizës së ligjeve të Islamit”.

Talibanët e sunduan Afganistanin midis viteve 1996 dhe 2001. Ata nuk i lejuan gratë të punonin, vajzat nuk lejoheshin të ndiqnin shkollën dhe gratë duhej të mbulonin fytyrat dhe të shoqëroheshin nga një i afërm mashkull, nëse donin të dilnin nga shtëpitë e tyre.

Ato që shkelën rregullat ndonjëherë u dënuan me rrahje publike nga policia fetare e talibanëve.

Pasi morën kontrollin e Afganistanit pas 20 vjetësh të prezencës së huaj ushtarake, talibanët tani janë nën vëzhgimin e udhëheqësve perëndimorë nëse kanë ndryshuar, përfshirë edhe mënyrën se si i trajtojnë vajzat dhe gratë.

“Ne do ta gjykojmë këtë regjim bazuar në veprimet e tij dhe jo nga fjalët e tij, në qëndrimin e tij ndaj terrorizmit, krimit dhe narkotikëve, si dhe të drejtave të vajzave për arsimim”, tha kryeministri britanik Boris Johnson të mërkurën.

Të mërkurën (18 gusht) Shtetet e Bashkuara, Bashkimi Evropian dhe 19 vende tjera, përshirë Shqipërinë dhe Maqedoninë e Veriut, kanë nënshkruar një deklaratë të përbashkët përmes së cilës u bëhet thirrje talibanëve që të respektojnë të drejtat dhe sigurinë e grave dhe vajzave afgane.

Këto vende shpresin shqetësimin e thellë për situatën në të cilën gjenden gratë dhe vajzat afgane, përkatësisht sa i takon të drejtave të tyre për arsimim, punën dhe lirinë e lëvizjes.

Deklarata u lëshua tre ditë pasi talibanët hynë në kryeqytetin e Afganistanit, Kabul dhe rrëzuan qeverinë e mbështetur nga Perëndimi./REL/

Kronikë e zezë

Shtrenjtohet nafta në Kosovë, ja çmimet e tavanit për sot

Published

32 minutes ago

July 16, 2026

UBTNews

Ministria e Industrisë, Ndërmarrësisë dhe Tregtisë ka publikuar çmimet tavan të lejuara për shitjen e derivateve të naftës për datën 16 korrik.

Sipas vendimit të fundit, çmimi i naftës ka pësuar rritje për dy centë në krahasim me ditën e mërkurë, duke arritur në 1.56 euro për litër.

Ndërkaq, çmimet e tjera kanë mbetur të pandryshuara.

Benzina do të vazhdojë të shitet me 1.40 euro për litër, ndërsa çmimi maksimal i lejuar për gazin mbetet 0.60 euro për litër.

Çmimet e reja hyjnë në fuqi nga ora 10:00 dhe do të jenë valide për 24 orët e ardhshme. /E.A/

Lajmet

PrizrenFest rikthehet me edicionin e pestë, sjell artistë nga tetë shtete

Published

36 minutes ago

July 16, 2026

UBT News

Qyteti i Prizrenit do të mirëpresë edicionin e pestë të Festivalit Ndërkombëtar të Teatrit në Ambient të Hapur – PrizrenFest, i cili do të mbahet nga 21 deri më 27 korrik 2026.

Me karakter ndërkombëtar, festivali do ta shndërrojë Prizrenin në një qendër të artit skenik, duke sjellë shfaqje teatrore, aktivitete artistike dhe programe kulturore në hapësira të ndryshme historike të qytetit.

Në programin e këtij viti do të marrin pjesë trupa teatrore dhe artistë nga Kosova, Spanja, Franca, Brazili, Turqia, Italia, Sllovenia dhe Maqedonia e Veriut.

Përveç shfaqjeve teatrore, PrizrenFest do të ofrojë edhe punëtori për fëmijë, koncerte dhe aktivitete të tjera kulturore, duke krijuar një program të larmishëm për publikun.

Përmes këtij festivali, organizatorët synojnë të promovojnë artin skenik në hapësira të hapura, të forcojnë identitetin kulturor të Prizrenit dhe ta konsolidojnë qytetin si një destinacion të rëndësishëm në skenën ndërkombëtare të festivaleve artistike./A.K/

Lajmet

Kanoset pas një mosmarrëveshjeje në Gjakovë, arrestohet i dyshuari

Published

44 minutes ago

July 16, 2026

UBTNews

Një person është arrestuar nga Policia e Kosovës në rrugën “Ymer Pula” në Gjakovë, nën dyshimin për organizim të skemave piramidale, bixhoz të paligjshëm dhe kanosje.

Sipas raportit 24-orësh të Policisë, rasti ka ndodhur pasditen e së mërkurës, ku pas një mosmarrëveshjeje të çastit, i dyshuari ka kërcënuar viktimën.

Pas denoncimit, policia ka prangosur të dyshuarin dhe pas intervistimit, me vendim të prokurorit të shtetit, ai është liruar për t’u hetuar në procedurë të rregullt. /E.A/

Lajmet

Dyshohet se helmoi klientët, intervistohet pronari në Han të Elezit

Published

53 minutes ago

July 16, 2026

UBTNews

Një pronar lokali është intervistuar nga Policia e Kosovës në Han të Elezit, nën dyshimin për prodhim dhe vënie në qarkullim të artikujve të dëmshëm ushqimor. Sipas raportit 24-orësh të Policisë, rasti ka ndodhur më 13 korrik, ndërsa intervistimi i të dyshuarit është bërë dje.

Dyshimet e para raportojnë se disa persona janë helmuar pasi kanë konsumuar ushqim në lokalin e të dyshuarit. Lidhur me rastin është njoftuar prokurori i shtetit, i cili ka autorizuar inicimin e lëndës, ndërsa hetimet po vazhdojnë për të zbardhur plotësisht rrethanat e këtij helmimi.

Ndërkohë, për këtë situatë Klinika Infektive bëri të ditur se po trajton një fluks pacientësh të helmuar nga ushqimi, ku mes 31 të hospitalizuarve janë edhe pesë persona nga komuna e Hanit të Elezit.

Këta të fundit kanë deklaruar se kanë konsumuar ushqim në të njëjtin lokacion, gjë që lidhet drejtpërdrejt me rastin që po hetohet nga policia. Sipas klinikës, pas analizave të hollësishme laboratorike, 11 raste të këtij fluksi tashmë kanë rezultuar pozitivë me bakterin Salmonella Enteritidis./E.A/