“NATO duhet të jetë një forcë edhe më vdekjeprurëse”. Kështu është shprehur Sekretari i ri i Mbrojtjes i Shteteve të Bashkuara, Pete Hegseth në vizitën e tij të parë në Europë. I pranishëm në Samitin e Brukselit për luftën në Ukrainë, Shefi i Pentagonit i ka bërë thirrje NATO-s të ndryshojë kursin.

“NATO duhet të jetë një forcë më e fortë, më vdekjeprurëse – jo një klub diplomatik”, shkroi ai në X.

Shefi i ri i Pentagonit ndodhet në Bruksel për vizitën e tij inauguruese. Ai donte të merrte pjesë në një takim të ministrave të Mbrojtjes të më shumë se 50 vendeve që mbështesin Ukrainën në selinë e NATO-s pasdite.

I ashtuquajturi grupi i kontaktit takohet për herë të parë nën udhëheqjen e Britanisë së Madhe, pasi SHBA nën Presidentin Donald Trump hoqën dorë nga drejtimi i tij. Të martën, Hegseth vizitoi bazat ushtarake amerikane në Gjermani. Atje ai njoftoi se donte të fliste “qartë” me aleatët e NATO-s.

Presidenti Donald Trump ka “të drejtë” kur kërkon investime në mbrojtje prej pesë për qind të prodhimit të brendshëm bruto (PBB)nga evropianët, tha shefi i ri i Pentagonit në Shtutgart. Vetë Evropa duhet të kontribuojë më së shumti në mbrojtjen e fqinjësisë së saj, tha ai, duke iu referuar Ukrainës.

Hegseth hodhi poshtë frikën për një tërheqje të rreth 100,000 trupave amerikane nga Evropa. “Nuk ka aktualisht asnjë plan në përgatitje për të shkurtuar ndonjë gjë”, theksoi ai.

Megjithatë, SHBA-ja dëshironte të “rivlerësonte praninë e saj ushtarake në mbarë botën” në mënyrë që të ishte në gjendje të përqendrohej më shumë në ambiciet e Kinës në Indo-Paqësorin.

Hegsesh gjithashtu bëri të ditur se Shtetet e Bashkuara nuk do të dërgojnë trupa ushtarake në Ukrainë. Sakaq, burime diplomatike për Agjencinë Ndërkombëtare të Lajmeve Reuters, bëjnë me dije se, administrata Trump planifikon të nxisë aleatët evropianë që të blejnë më shumë armë amerikane për Ukrainën përpara bisedimeve të mundshme të paqes me Moskën, një veprim që mund të përmirësojë pozicionin negociator të Kievit.

Plani, nëse zyrtarizohet, do të ofrojë njëfarë sigurie për liderët ukrainas, të cilët janë shqetësuar se presidenti Donald Trump mund të bllokojë ndihmën e mëtejshme për vendin, ushtria e të cilit ka humbur ngadalë territorin nën sulmin e ashpër rus në lindje. Vendet evropiane më parë kishin blerë armë amerikane për Ukrainën gjatë administratës së Bidenit.

Parlamenti i Armenisë ka miratuar një projektligj për fillimin e procesit të anëtarësimit të vendit në Bashkimin Evropian, sipas transmetimit të seancës.

“Për miratimin e projektligjit votuan gjithsej 63 deputetë, vendimi është marrë”, tha kryetari i parlamentit Alen Simonyan.

Ndërkohë, Aleanca e Armenisë opozitare dhe Aleanca Unë kam Nderin e kanë cilësuar këtë projektligj si “farsë” dhe kanë refuzuar të marrin pjesë në votim. Sipas opozitës, qëllimi i projektligjit nuk është anëtarësimi në BE, por zgjedhja e Turqisë si garanci sigurie.

Më herët, kryeministri armen Nikol Pashinyan tha se kjo nuk do të garantonte anëtarësimin automatik të Armenisë në BE, pasi çështja do të kërkonte një referendum. Ministri i Jashtëm Ararat Mirzoyan vuri në dukje se projektligji ishte një nismë publike që kishte mbledhur numrin e kërkuar të nënshkrimeve.

Nga ana tjetër, zëvendëskryeministri rus Alexey Overchuk tha se Rusia e sheh diskutimin e këtij projektligji si fillimin e daljes së mundshme të Armenisë nga Bashkimi Ekonomik Euroaziatik (EAEU).

Sipas tij, anëtarësimi në BE do të ishte i papajtueshëm me pjesëmarrjen e vendit në EAEU. Ndërkohë, ministri armen i ekonomisë Gevorg Papoyan tha se Jerevani nuk ka ndërmend të largohet nga EAEU. Sipas tij, Armenia duhet të vazhdojë të forcojë dhe zhvillojë marrëdhëniet e saj me EAEU, duke nxitur në të njëjtën kohë marrëdhëniet me vendet e tjera.

Presidenti Donald Trump bëri një dalje të rrallë në Zyrën Ovale të martën me këshilltarin e tij më të fuqishëm, Elon Musk përpara se të nënshkruante një urdhër ekzekutiv për të vazhduar zvogëlimin e përmasave të qeverisë federale.

Agjencia e lajmeve Associated Press arriti të sigurojë një dokument të Shtëpisë së Bardhë lidhur me urdhrin ekzekutiv që synon të çojë përpara punën e zotit Musk për uljen e shpenzimeve qeveritare përmes Departamentit të Efikasitetit të Qeverisë, shkurtimisht DOGE.

Zoti Musk tha se në qeverinë federale ka disa punonjës të mirë, por ata duhet të mbajnë përgjegjësi për punën që bëjnë, ndërsa e quajti burokracinë federale degë të katërt të pushtetit të “pazgjedhur me anë të votës”

“Populli votoi për një reformë të madhe në qeveri dhe kjo po ndodh”, tha ai. “Kjo nënkupton demokracinë”.

Kjo është hera e parë që zoti Musk u pyet nga gazetarët që kur iu bashkua administratës së Presidentit Trump si një punonjës i posaçëm me ndikim të gjerë mbi agjencitë federale. Ai është gjithashtu individi më i pasur në botë dhe pronar i platformës sociale X.

Zoti Musk është kritikuar për një detyrë shumë të fuqishme dhe nuk ka mbikëqyrje. Pavarësisht shqetësimeve për pak transparencë, zoti Musk e cilësoi veten si një libër të hapur.

Në dokumentin e Shtëpisë së Bardhë thuhet se “agjencitë do të ndërmarrin plane për reduktimin e punonjësve federalë në shkallë të gjerë dhe do të përcaktojnë se cilët përbërës të agjencisë (ose vetë agjencitë) mund të eliminohen ose bashkohen për shkak se funksionet e tyre nuk kërkohen në bazë të ligjit”.

Dokumenti gjithashtu thotë se agjencitë duhet të “punësojnë jo më shumë se një punonjës për çdo katër që largohen nga qeveria federale”. Përjashtime ka në rastet kur bëhet fjalë për imigracionin, zbatimin e ligjit dhe sigurinë publike.

Presidenti Trump dhe zoti Elon Musk po u kërkojnë punonjësve federalë që të japin dorëheqjen në këmbim të stimujve financiarë, ndonëse plani i tyre është në pritje ndërsa një gjykatës shqyrton ligjshmërinë e tij.

Në bazë të planit, punonjësit që japin dorëheqjen do të paguhen deri më 30 shtator. Zyrtarë të administratës thanë se më shumë se 65,000 punonjës e kanë pranuar ofertën.

Ukraina është gati të japë territore për Rusinë. Këtë fakt e ka bërë të ditur Presidenti i Ukrainës, Volodymyr Zelenskyy, gjatë një interviste për median e njohur britanike “The Guardian”.

Zelenskyy e lidh fatin e Ukrainës me angazhimin e Donald Trump dhe se nëse ky i fundit e ul Rusinë në negociata, atëherë Kievi do të japë territore, por këtë herë në formën e një shkëmbimi me Rusinë.

“Nëse Trump arrin të ulë Ukrainën dhe Rusinë në tryezën e bisedimeve, atëherë Ukrainë planifikon t’i ofronj Rusisë një shkëmbim të drejtpërdrejtë territori, duke hequr dorë nga toka që Kievi ka mbajtur në rajonin Kursk të Rusisë. Ne do të shkëmbejmë një territor me një tjetër. Nuk e di se kë territor por do të shohim. Por të gjitha territoret tona janë të rëndësishme për ne, nuk ka prioritet”, deklaroi Zelensky.

Sipas Zelensky, siguria e Ukrainës do të varet vetëm nëse në lojë janë edhe Shtetet e Bashkuara, pasi BE pa SHBA nuk mjafton. Nëse Donald Trump tërheq mbështetjen e SHBA-së për Ukrainën, Evropa e vetme nuk do të jetë në gjendje të kapërcejë hendekun. Ka zëra që thonë se Evropa mund të ofrojë garanci sigurie pa amerikanët, dhe unë gjithmonë them jo. Garancitë e sigurisë pa Amerikën nuk janë garanci reale të sigurisë”, u shpreh Zelensky.

Zelensky do të udhëtojë në Konferencën e Sigurisë në Mynih, ku ai pret të takojë zëvendëspresidentin e SHBA, JD Vance, një nga armiqtë ndaj Ukrainës në rrethin e brendshëm të Trump.

Në konferencën e vitit të kaluar, Vance, asokohe senator, refuzoi të takonte Zelenskyy dhe ai më parë ka thënë se nuk i intereson vërtet se çfarë ndodh me Ukrainën, në një mënyrë apo në tjetrën.