Sport

Tahirukaj, Gegaj dhe Zogaj do të luajnë në elitat e Zvicrës dhe Suedisë

Published

2 months ago

June 16, 2026

UBTNews

Tre hendbollistë të Kombëtares së Kosovës, Drenit Tahirukaj, Leonard Gegaj dhe Shaban Zogaj, do të paraqiten sezonin e ardhshëm në ligat elitare të Zvicrës dhe Suedisë, duke shënuar një tjetër hap të rëndësishëm në karrierat e tyre.

Majtaku Drenit Tahirukaj ka kompletuar transferimin te skuadra zvicerane Wacker Thun, një prej ekipeve të elitës së hendbollit në Zvicër. Ai ka nënshkruar kontratë deri në vitin 2029, pasi kaloi me sukses sezonet e fundit te Chenois Geneve në kategorinë e dytë zvicerane.

“Jam i lumtur që u realizua transferimi dhe që do të garoj në Superligë me Wacker Thun. Gjatë diskutimeve, kam kuptuar shpejt se mentaliteti dhe synimet e klubit më përshtaten shumë. Jam i entuziazmuar për ekipin e ri dhe do të bëj çdo gjë për të kontribuar në një edicion të suksesshëm”, ka deklaruar Tahirukaj.

Ndërkohë, në elitën suedeze do të luajnë Leonard Gegaj dhe Shaban Zogaj.

Gegaj ka siguruar promovimin në Handbollsligan me skuadrën Lugi, e cila rikthehet në elitë pas dy sezoneve të kaluara në kategorinë e dytë. Hendbollisti kosovar ishte ndër lojtarët më të dalluar të ekipit gjatë sezonit të kaluar dhe ka vazhduar kontratën me klubin edhe për dy vjet të tjera.

Edhe Shaban Zogaj do të jetë pjesë e Superligës së Suedisë, pasi më herët kishte siguruar transferimin te Amo për sezonin 2026/27. Pas një periudhe të vështirë me lëndime, Zogaj synon të dëshmojë potencialin e tij në një nga kampionatet më cilësore të hendbollit skandinav.

Paraqitja e tre reprezentuesve kosovarë në ligat elitare evropiane konsiderohet një sukses i rëndësishëm për hendbollin e Kosovës dhe një tregues i rritjes së vazhdueshme të lojtarëve kosovarë në arenën ndërkombëtare.

D.L

Lajmet

Laura Fazliu fiton medaljen e argjendtë, Kosovën e çon në medaljen e pestë

Published

16 hours ago

August 29, 2026

UBTNews

Xhudistja kosovare Laura Fazliu ka fituar medaljen e argjendtë në kategorinë deri në 63 kilogramë, duke i siguruar Kosovës medaljen e pestë në këtë garë.

Fazliu arriti deri në finale, ku u përball me italianen Carlotta Avanzato, por u mposht në duelin për medaljen e artë dhe u desh të kënaqej me të argjendtën.

Kjo është medalja e katërt e Kosovës në xhudo dhe e pesta në total për vendin tonë.

Sport

Fatjona Kasapi i sjell Kosovës medaljen e dytë në “Taranto 2026”

Published

2 days ago

August 28, 2026

UBTNews

Fatjona Kasapi ka fituar medaljen e bronztë në Lojërat Mesdhetare “Taranto 2026”.

Xhudistja kosovare ka siguruar podiumin në kategorinë deri në 52 kilogramë, duke i sjellë Kosovës medaljen e parë në xhudo në këtë edicion.

Kjo është medalja e dytë për Kosovën në “Taranto 2026”, pas medaljes së artë të fituar nga boksierja Donjeta Sadiku.

Kosova tani pret edhe paraqitjet e tjera në xhudo, ku disa garues kosovarë janë në luftë për medalje.

D.L

Sport

Kosova pëson tjetër humbje të thellë në Lojërat Mesdhetare

Published

2 days ago

August 28, 2026

UBTNews

Hendbollistet e Kosovës kanë pësuar edhe një humbje të thellë në Lojërat Mesdhetare “Taranto 2026”.

Të premten, në Fasano, Kosova u mposht bindshëm nga Tunizia me rezultatin 38:10.

Hendbollistet kosovare patën vështirësi të mëdha në sulm, duke realizuar vetëm tre gola gjatë 30 minutave të pjesës së parë.

As në pjesën e dytë situata nuk ndryshoi shumë, pasi Kosova, e drejtuar nga përzgjedhësi kroat Nenad Shoshtariq, nuk arriti të rivalizojë me Tunizinë.

Për Kosovën kjo ishte humbja e katërt rresht në Lojërat Mesdhetare.

Angjelina Krasniqi ishte golashënuesja më e mirë e Kosovës me katër gola. Nga dy gola shënuan Elsa Kongjeli dhe Samanda Konjuhaj, ndërsa nga një gol realizuan Vanesa Kastrati dhe Aurea Konjuvca.

Kosova në “Taranto 2026” po paraqitet me një ekip të përbërë kryesisht nga hendbolliste të reja.

Në ndeshjen e parë të Grupit A, Kosova pësoi humbje 35:20 nga Algjeria. Në duelin e dytë u mposht 40:20 nga Greqia, ndërsa në ndeshjen e tretë humbi 38:21 nga Italia.

Ndeshjen e fundit në fazën e grupeve, Kosova do ta zhvillojë të dielën nga ora 17:30, kur përballet me Maqedoninë e Veriut.

D.L