Bota është në pritje të takimit trepalësh të nivelit të lartë ndërmjet Rusisë, Ukrainës dhe Turqisë, që do të zhvillohet sot në provincën jugore të Antalias, si pjesë e përpjekjeve të Ankarasë për të ndërmjetësuar midis vendeve ndërluftuese.

Ministri i Jashtëm turk Mevlut Çavushoglu njoftoi takimin mes ministrit të Jashtëm rus, Sergei Lavrov dhe homologut të tij ukrainas, Dmytro Kuleba të hënën e kaluar duke thënë se ”ne do ta mbajmë këtë takim në një format trepalësh në Antalia, të enjten, më 10 mars”.

Ai do të marrë pjesë në takim pasi të dy liderët kanë kërkuar praninë e tij, tha ministri duke shtuar se ai do të bashkojë zyrtarët e nivelit të lartë rus dhe ukrainas për herë të parë që nga fillimi i luftës më 24 shkurt.

Duke shprehur shpresën se takimi do të jetë një pikë kthese dhe hap i rëndësishëm drejt paqes dhe stabilitetit, ministri i Jashtëm turk tha se Ankaraja do të vazhdojë të bëjë përpjekje për një paqe të qëndrueshme.

”Që kur Rusia nisi sulmin e saj ndaj Ukrainës, Turqia ka marrë pjesë në përpjekje diplomatike aktive për të bashkuar palët përkatëse”, tha Çavushoglu duke shtuar se presidenti Recep Tayyip Erdogan ka bërë 19 telefonata me homologët e tij.

”Edhe unë kam zhvilluar rreth 40 telefonata”, shtoi ministri.

”Gjatë kësaj periudhe, unë fola me ministrin e Jashtëm ukrainas, Dmytro Kuleba gjashtë herë dhe ministrin e Jashtëm rus Sergei Lavrov katër herë, pa përfshirë bisedat tona me SMS”, shtoi ai.

Sipas ministrit, Kuleba dëshironte një takim të drejtpërdrejtë midis presidentit Volodymyr Zelensky dhe homologut të tij rus Vladimir Putin, sepse ky i fundit merr vendimet përfundimtare.

Delegacionet ruse dhe ukrainase janë takuar tri herë në qytetin bjellorus Brest, më i fundit të hënën.

Delegacioni i Moskës udhëhiqej nga këshilltari presidencial rus, Vladimir Medinsky, ndërsa ai i Kievit nga Mikhail Podolyak, këshilltari i Zelenskyt.

Pas takimit, Podolyak deklaroi në Twitter se bisedimet rezultuan në hapa të vegjël pozitivë për krijimin e korridoreve humanitare.

Moska ka kushte të ndryshme për t’i dhënë fund luftës në Ukrainë.

Ajo dëshiron që Ukraina të ndryshojë Kushtetutën e saj për të deklaruar pa mëdyshje se Kievi nuk do të bashkohet me asnjë aleancë dhe se Krimea është territor rus.

Në shkurt të vitit 2019, parlamenti i Ukrainës miratoi amendamentet në Kushtetutë që parashikojnë aspiratën e Ukrainës për t’u bashkuar me NATO-n.

Kievi dëshiron që lufta në territorin e tij të përfundojë dhe trupat ruse të tërhiqen plotësisht nga toka ukrainase, duke përfshirë Krimenë, Donetskun dhe Luhanskun.

Raundi i parë i negociatave u zhvillua më 28 shkurt në Gomel të Bjellorusisë, pranë kufirit me Ukrainën dhe zgjati pesë orë.

I dyti nga bisedimet e paqes u zhvillua më 3 mars dhe i treti më 7 mars në Brest.

Rusia njoftoi herët të hënën se do të shpallte një armëpushim të përkohshëm në kryeqytetin ukrainas Kiev dhe qytetet Mariupol, Kharkiv dhe Sumy për të siguruar evakuimin e civilëve.

Lufta e Rusisë kundër Ukrainës, e cila filloi më 24 shkurt, provokoi reagime të ashpra ndërkombëtare dhe çoi në sanksione serioze kundër Moskës.

Të paktën 474 civilë janë vrarë dhe 861 janë plagosur në Ukrainë që nga fillimi i luftës dhe më shumë se 2,15 milionë qytetarë janë larguar nga Ukraina.