Vetëm një ditë para seancës konstituive të legjislaturës së nëntë të Kuvendit të Kosovës, Lëvizja Vetëvendosje – partia fituese e zgjedhjeve të 9 shkurtit ende nuk e ka bërë publik emrin e kandidatit për kryetar të Kuvendit, pozitë që i takon sipas rezultatit zgjedhor.

Seanca pritet të mbahet nesër, e martë, më 15 prill në ora 10:00, ndërsa rendi i ditës përmban katër pika kryesore.

Fillimisht, do të formohet Komisioni i Përkohshëm për verifikimin e kuorumit dhe të mandateve të deputetëve të sapozgjedhur. Më pas do të bëhet betimi i deputetëve të rinj.

Punimet e seancës, deri në zgjedhjen e kryetarit të Kuvendit, do të drejtohen nga deputeti më i vjetër në moshë, Avni Dehari nga Vetëvendosje, i asistuar nga deputetja më e re në moshë, Sala Jashari nga Partia Demokratike e Kosovës.

Zgjedhja e kryetarit të Kuvendit është paraparë si pika e tretë e rendit të ditës, ndërsa më pas do të bëhet edhe zgjedhja e nënkryetarëve, të cilët së bashku me kryetarin do të përbëjnë Kryesinë e Kuvendit.

Ish-shefja e grupit parlamentar të Vetëvendosjes, Mimoza Kusari-Lila, ka deklaruar se partisë së saj i mungojnë dy vota për të arritur shumicën e thjeshtë prej 61 deputetësh. Ajo ka thënë se përfshirë tri votat e Nismës Socialdemokrate, Vetëvendosje do të ishte afër shumicës, dhe se Fatmir Limaj ka shprehur gatishmëri për bashkëpunim, por marrëveshja nuk është finalizuar ende.

Në zgjedhjet e 9 shkurtit, Lëvizja Vetëvendosje ka dalë e para me 42.3% të votave dhe ka siguruar 48 ulëse në Kuvend. Kjo nuk është e mjaftueshme për të formuar vetë qeverinë, ndaj janë të nevojshme koalicione. Kryetari i VV-së, Albin Kurti, ka zhvilluar takime me përfaqësues të partive të komuniteteve joshumicë dhe ka ftuar në konsultime edhe Lidhjen Demokratike të Kosovës, e cila ka refuzuar ftesën.

Sipas rezultateve të zgjedhjeve, PDK ka siguruar 24 deputetë, LDK 20, ndërsa koalicioni AAK-Nisma ka 8 ulëse në Kuvend.

Deputeti i Aleancës për Ardhmërinë e Kosovës, Bekë Berisha, pas regjistrimit të tij si deputet në Kuvendin e Kosovës, tha se ende nuk ka një qëndrim të prerë për zhvillimet e ardhshme, por shtoi se Kuvendi duhet të konstituohet.

“Nuk e di, duhet të takohemi me deputetët dhe të diskutojmë. Sa i përket qeverisë, nuk më duket e mundur për momentin, por Kuvendi do të duhej të konstituohej,” deklaroi Berisha.

Ai shtoi se AAK ka qëndrime të qarta në lidhje me krijimin e një qeverie të udhëhequr nga opozita, duke përmendur edhe bashkëpunimin e mundshëm me Nismën.

“Nuk kam biseduar me Nismën, sepse bisedimet po i udhëheq dikush tjetër. Kam besuar se koalicioni me Nismën do të ishte i frytshëm, dhe në ato që kemi folur – për të ndërtuar një qeveri opozitare që e kthen vendin për së mbari. Kam besuar fuqishëm. Ndoshta është thyer besa, por të shohim” tha ai.

Deputeti i Partisë Demokratike të Kosovës, Mergim Lushtaku, tha se PDK nuk do të marrë pjesë në votimin për Kuvendin, përderisa nuk ka një zgjidhje të qëndrueshme për vendin, duke theksuar mbështetjen për kandidaturën e Bedri Hamzës si kryeministër.

“Sigurisht që qëndrimet e mia janë edhe ato të PDK-së, ne nuk do të marrim pjesë në votim derisa nuk kemi një zgjidhje të qëndrueshme për Kosovën. Edhe sigurisht që zgjidhja e qëndrueshme për Kosovën është zgjedhja e kryeministrit Bedri Hamza si udhëheqës i qeverisë së Kosovës edhe mendoj që do të krijohet edhe stabiliteti edhe qëndrueshmëria në vend” tha Lushtaku.

Ai shtoi se janë bërë thirrje të vazhdueshme ndaj partive tjera politike për të qëndruar në përputhje me premtimet publike sa i përket refuzimit të një mandati të tretë për kryeministrin aktual.

“Nuk ka asnjë dakordim konkret por besoj që mbetet në qëndrueshmërinë dhe premtimet publike që kanë bërë. Besoj që e ka bërë të qartë PDK se ne kemi pozitën që na ka besuar edhe qytetari i vendit në mundësinë e dytë në formimin e qeverisë, besoj që ne qëndrojmë në premtimet tona” u shpreh Lushtaku.

Deputeti nga radhët e Partisë për Liri, Drejtësi dhe Mbijetesë, Nenad Rashiq, tha se nuk është optimist se do të votohet nesër qeveria e re, duke theksuar se opsioni më i mirë në këtë moment është që partia më e madhe Lëvizja Vetëvendosje të marrë përgjegjësinë për krijimin e qeverisë.

Ai deklaratën e bëri pas regjistrimit si deputet në Kuvendin e Kosovës, një ditë para seancës konstituive të këtij institucioni.

“Nuk jam optimist se do të votojmë nesër. Nuk është hera parë që mund të ndodhë një ngërç i shkurtër. Ju rikujtoj se më 2014 kemi pasur një situatë të tillë. Atëherë po ashtu kam qenë deputet, por pas dy apo tre muajve u zgjidh ajo krizë. Edhe këtë rast po konsideroj që varianti më i mirë do të ishte që partia më e madhe të formojë qeverinë, sepse çdo opsion tjetër do të komplikonte shumë më shumë procesin, qoftë demokratizimit, qoftë afrimit të Kosovës drejt BE-së. Opsioni më i mirë në këtë moment është partia më e madhe të marrë përgjegjësinë për udhëheqje. Rregullat tregojnë se partia me e madhe, në këtë rast VV-ja ka të drejtën e propozimit të kryeparlamentarit. Nuk e shoh ndonjë problem në atë aspekt. Besoj për krijimin e një qeverie, në të cilën partia më e madhe, kjo është me rëndësi që të kuptohet, partia që e ka marr pothuajse gjysmë e ulëseve që i takojnë komunitete shqiptar, normalisht që është adresa e duhur për krijimin e institucioneve”, tha Rashiq.

Ministri në detyrë për Komunitete dhe Kthim u ndal në shantazhet e Serbisë ndaj tij dhe bashkëpartiakëve të tij.

 “Për shantazh janë prej 2013-ës. Nuk është diçka e re. Qe 12 vjet po shantazhojnë. E di që ka ndodhur prej fillimit dhe po ndodh prapë ndaj politikës të cilën e përfaqësoj unë. Ndaj bashkëpunëtorëve të mi, shumë herë ka ndodhur t’i ndalin në kufij, katër orë orë duhet të pritur atje. Do intervista informative, siç thonë ata, qoftë në Polici në Serbi, qoftë në BIA. Prandaj, kjo për mua nuk është gjë e re. Partia politike që është aksidentalisht në pushtet tash në Serbi e keqpërdornin çdo mënyrë, jo vetëm ne si politikan, po çdo qytetar serb që jeton këtu. Keni pasur rastin që të shohim pardje që ndodhi demonstrata, mitingu i madh në Serbi, krejt ata njerëz që kanë shkuar nga Kosova kanë qenë të shantazhuar. Secili prej tyre. Të gjithë ata që kanë shkuar në Beograd kanë qenë të shantazhuar. Njerëzit këtu gjatë këtyre 12-13 vjetëve në një kontinuitet janë maltretuar nga ana e eminencës, hijes në aspektin e udhëheqjes së politikës që është dirigjuara nga ana e regjimit të Beogradit”, tha Rashiq.