Më 28 maj, ambientet e UBT-së në Lipjan do të jenë mikpritëse e një ngjarjeje të veçantë artistike me karakter multidisiplinar, të titulluar “Saldimi i Librave”. Kjo ngjarje synon të ndërthurë poezinë, performancën dhe artin vizual në një mesazh të fuqishëm simbolik: “1+1=11”, duke ftuar të pranishmit në reflektim mbi fuqinë e bashkimit, krijimit dhe ndjeshmërisë së brendshme.

Programi nis në ora 11:30, në hapësirat e Bibliotekës së UBT-së, me një Lexim Skenik, ku artistët do të interpretojnë poezi dhe tekste që shprehin emocione të thella njerëzore dhe ide kreative.

Më pas, në ora 12:00, në Objektin I, do të hapet një Ekspozitë Artistike, ku do të prezantohen punime të realizuara posaçërisht për këtë projekt.

Ngjarja është konceptuar nga profesori Orhan Kerkezi, ndërsa dizajni dhe ilustrimet janë punuar nga Deniza Gafuri. Në këtë aktivitet marrin pjesë një grup i talentuar studentësh dhe artistësh të rinj: Deniza Gafuri, Dimër, Berna Kosova, Jona Brahimi, Art Çibukçiu, Rea Dana, Diellza Salicana, Arjona Aliu, Dëshira Bytyçi, Olt Broqi dhe Melisa Mustafa.

“Saldimi i Librave” është një thirrje për të bashkuar fjalën dhe figurën në një formë të re komunikimi artistik, që sfidon mendimin tradicional dhe shtron pyetje mbi identitetin, kolektivitetin dhe ndjeshmërinë në kohën moderne.

Studentët e vitit të dytë të programit Dizajn i Integruar në UBT, nën udhëheqjen e profesorëve Ardita Rizvanolli, Rajan Arapi dhe Arbresha Hoxha, realizuan një vizitë studimore në qytetin e Pejës, në kuadër të zhvillimit praktik të njohurive të fituara gjatë studimeve.

Pjesa e parë e vizitës u zhvillua në Shtypshkronjën “Dukagjini”, një prej emrave më të njohur në industrinë e shtypshkrimit në vend. Studentët patën mundësi të ndjekin nga afër të gjitha etapat e prodhimit grafik – nga konceptimi dhe dizajnimi i produktit, përgatitja për shtyp, procesi i printimit, prerja, deri te lidhja përfundimtare. Kjo përvojë praktike u vlerësua si shumë e rëndësishme për të kuptuar ndërthurjen mes dizajnit, teknologjisë dhe realizimit përfundimtar të një produkti të printuar.

Përfaqësuesit e shtypshkronjës u treguan të hapur dhe bashkëpunues, duke ofruar sqarime të detajuara dhe duke iu përgjigjur me përkushtim pyetjeve të studentëve.

Gjatë qëndrimit në Pejë, studentët vizituan gjithashtu Galerinë e Arteve, ku ishte e hapur ekspozita e artistit Orof Fetah Krypa. Ekspozita përmbante punime grafike të cilat pasuruan ndjeshëm përvojën kulturore dhe artistike të studentëve, duke ndihmuar në zgjerimin e perceptimit vizual dhe estetik që është thelbësor për një dizajner të integruar.

Kjo vizitë u konceptua si pjesë e angazhimit të programit të Dizajnit të Integruar për të kombinuar teorinë me praktikën, duke iu ofruar studentëve mundësi konkrete për të ndërtuar përvojë reale dhe kontakte profesionale në fushën e dizajnit, prodhimit dhe artit.

Studentët e vitit të dytë të Fakultetit të Psikologjisë në UBT, nën udhëheqjen e profesoreshës Diana Sejdiu Shala, realizuan një vizitë studimore në kuadër të lëndës “Psikologji e Edukimit”. Vizita u zhvillua në ambientet e Shkollës Fillore dhe të Mesme të Ulët “Qamil Batalli” në Prishtinë, në bashkëpunim me drejtorin e shkollës, Liridon Maliqi.

Qëllimi i kësaj vizite ishte të ofrojë për studentët një përvojë praktike në lidhje me rolin dhe përgjegjësitë e psikologut shkollor. Gjatë vizitës, ata patën rastin të ndjekin një ligjëratë mbi funksionimin e grupit të ndërmjetësimit brenda shkollës – një iniciativë që synon ndërtimin e një rrjeti ndërmjetësuesish për të përmirësuar ambientin shkollor, për të adresuar konfliktet në mënyrë konstruktive, dhe për të nxitur një kulturë bashkëpunimi mes nxënësve.

Po ashtu, pjesë e diskutimit ishte edhe struktura pedagogjike e shkollës, duke përfshirë qasjen e personalizuar ndaj nxënësve nga grupet parafillore deri te klasat më të larta. U theksua rëndësia e zhvillimit të aftësive bazë dhe socializimit në moshat e hershme, ndërsa në klasat më të avancuara fokusi zhvendoset te ndërtimi i mendimit kritik dhe thellimi i njohurive.

Studentët u informuan gjithashtu për organizimin e qëndrimit gjithëditor në shkollë, që përfshin mësimin aktiv, pushimet, dhe mbështetjen psikologjike, duke kontribuar në krijimin e një ambienti të shëndetshëm dhe gjithëpërfshirës për zhvillimin e nxënësve.

Në këtë kontekst, u vlerësua edhe roli i bibliotekës së shkollës, e cila funksionon si një qendër burimesh edukative për nxënësit dhe mësimdhënësit. Ajo ndihmon në promovimin e leximit, hulumtimit të pavarur dhe zhvillimit akademik e personal të nxënësve gjatë gjithë vitit shkollor.

Kjo vizitë u konsiderua si një mundësi e vlefshme për studentët që të pasurojnë njohuritë teorike me përvojë praktike dhe të njihen nga afër me mjedisin shkollor dhe sfidat e profesionit të psikologut në arsim.

Fakulteti i Inxhinierisë së Ndërtimit në UBT organizoi një tryezë diskutimi me temë “Siguria në komunikacionin rrugor”, ku morën pjesë përfaqësues nga institucione të ndryshme, ekspertë dhe studentë.

Dekani Visar Krelani falenderoi të gjithë të pranishmit për angazhimin dhe interesimin ndaj kësaj teme kaq të rëndësishme për sigurinë e trafikut në Kosovë.

Ministri i Infrastrukturës, Milaim Ahmetaj, theksoi rëndësinë e përfshirjes së përmirësimit të infrastrukturës rrugore, edukimit dhe ndërgjegjësimit të drejtuesve të automjeteve si faktorë kyç për reduktimin e aksidenteve dhe u shpreh i hapur për diskutime dhe bashkëpunim të mëtejshëm.

Përfaqësuesi i Policisë së Kosovës, Jeton Rexhepi, dha informacion mbi objektivat e Policisë në fushën e sigurisë rrugore, duke prezantuar planin vjetor dhe strategjinë pesëvjeçare të zbatimit të masave për parandalimin e aksidenteve. Sipas tij, gjatë vitit 2024 është vërejtur një rënie e aksidenteve, ndërsa në tremujorin e parë të vitit 2025 janë regjistruar më pak aksidente me fatalitete, megjithëse janë raportuar dëme materiale më të mëdha.

Profesor Nol Dedaj, ekspert i komunikacionit nga UBT, foli për faktorët e rrezikut në komunikacion dhe nënvizoi nevojën që institucionet të angazhohen më shumë në organizimin e konferencave dhe projekteve kërkimore për sigurinë rrugore.

Astrit Zejnullahu nga Trafiku Urban dhe profesor Beni Gizolli theksuan rëndësinë e uljes së aksidenteve dhe organizimin e leksioneve të dedikuara për këtë temë, si dhe bashkëpunimin me institucionet për krijimin e politikave që garantojnë një mjedis urban më të sigurt.

Profesor Visar Baxhuku vuri në pah rëndësinë e pjesës së jetueshmërisë në sigurinë rrugore dhe ndikimin e transportit në stilin e jetës së qytetarëve. Ai prezantoi aplikime moderne si semaforët inteligjentë, njohjen automatike të distancës, sistemet e zgjeruara të parkimit dhe përdorimin e inteligjencës artificiale për zbatimin e ligjit në trafik.

Studentët e Fakultetit të Inxhinierisë së Ndërtimit, bashkë me përfaqësues të Policisë së Kosovës, shpërndanë broshura vetëdijësuese për sigurinë në komunikacionin rrugor, me qëllim rritjen e ndërgjegjësimit dhe promovimin e sjelljeve të sigurta në trafikun rrugor.