Me rastin e Ditës Ndërkombëtare të Fëmijëve – 1 Qershori – studentët e Departamentit të Psikologjisë në UBT, Kosovare Hamiti dhe Shqipe Shala, së bashku me studentin e Aktrimit, Denis Arifi, organizuan një aktivitet të veçantë dhe tejet të gëzueshëm për fëmijët e moshave të ndryshme, në bashkëpunim me nxënësit e gjimnazit pjesë e klubit tonë.

Ky aktivitet, i mbajtur në një atmosferë festive, kishte për qëllim krijimin e një hapësire të sigurt, edukative dhe argëtuese, ku fëmijët mund të ndiheshin të lirë për të shprehur emocionet dhe kreativitetin e tyre. Në fokus ishte zhvillimi emocional dhe social i fëmijëve, përmes metodave të përdorura në psikologjinë zhvillimore dhe edukative.

Aktivitetet e organizuara përfshinë:

Vizatime dhe pikturime kreative – ku fëmijët patën mundësinë të shprehin imagjinatën e tyre përmes ngjyrave dhe formave.

Këndime dhe recitime – që i inkurajuan fëmijët të shfaqin talentin dhe guximin e tyre para të tjerëve.

Pikturim fytyrash, lojëra interaktive dhe animime – që krijuan një ambient të gjallë dhe argëtues.

Atmosfera përgjatë gjithë ditës ishte pozitive dhe e mbushur me muzikë, buzëqeshje dhe emocione të sinqerta. Angazhimi i studentëve dhe anëtarëve të klubit ishte maksimal, duke treguar përkushtim të lartë dhe dashuri të thellë për fëmijët dhe komunitetin.

UBT ka lansuar zyrtarisht kampanjën për të rinjtë shqiptarë në Mal të Zi, duke i hapur atyre mundësi të jashtëzakonshme për të ndjekur arsim cilësor dhe të avancuar në institucionin më inovativ të arsimit të lartë në rajon.

Në kuadër të kësaj kampanje, të rinjtë shqiptarë nga Mali i Zi ftohen të regjistrohen në një gamë të gjerë programesh studimi që përfshijnë fushat më kërkuese, si: Shkencat Kompjuterike, Inxhinierinë, Arkitekturën, Bioteknologjinë, Shkencat Mjekësore, Menaxhimin, Turizmin, Artin, Mediat, Dizajnin, Politikën dhe të Drejtën.

UBT ofron një ambient studimi modern dhe ndërkombëtar, ku studentët kanë mundësi të zhvillojnë njohuritë dhe aftësitë e tyre përmes laboratorëve të pajisur me teknologjinë më të fundit, qendrave kërkimore dhe një platforme unike si UBT Smart City, e cila përçon bashkimin e inovacionit shkencor me jetën studentore.

Kjo kampanjë synon të forcojë lidhjet ndërkufitare dhe të sjellë më pranë komunitetit akademik shqiptar në Mal të Zi ofertën cilësore të UBT-së, që përfshin:

• Diplomë me vlerë ndërkombëtare, e njohur në Evropë dhe ShBA;
• Staf akademik me përvojë ndërkombëtare dhe qasje moderne në mësimdhënie;
• Infrastrukturë bashkëkohore dhe hapësira kreative për zhvillimin personal dhe profesional të studentëve;
• Mundësi mobiliteti dhe shkëmbimesh akademike me mbi 500 institucione në botë;
• Fokus në punësimin e shpejtë dhe aftësimin profesional, ku mbi 98% e studentëve gjejnë punë gjatë apo menjëherë pas përfundimit të studimeve.

UBT i fton të gjithë të rinjtë shqiptarë në Mal të Zi të regjistrohen dhe të bëhen pjesë e një komuniteti akademik që synon përparim, dije dhe sukses në shkallë ndërkombëtare.

Ka filluar me shumë gjallëri edicioni i dytë i Javës së Artit dhe Dizajnit në UBT, një ngjarje tashmë tradicionale që i kushtohet krijimtarisë, mendimit kritik dhe bashkëpunimit ndërdisiplinor në fushën e artit vizual, dizajnit dhe mediave digjitale.

Studentët e departamenteve përkatëse kanë mundësi të prezantojnë publikisht punimet e tyre – nga instalacionet bashkëkohore deri te dizajnet grafike dhe projektet multimediale – në një ekspozitë e cila do të zgjasë deri më 5 qershor 2025 në Parkun Shkencor, Inovativ dhe Teknologjik të UBT-së, në Lipjan.

Në kuadër të aktiviteteve të kësaj jave, u mbajt edhe një diskutim i veçantë mbi kritikën e artit, me pjesëmarrjen e Shkëlzen Maliqit, njohës i thellë i filozofisë së artit dhe kritikës kulturore, Dardan Lutës, profesor dhe artist vizual, Burim Berishës, artist dhe ligjërues, si dhe Ariana Gjonit, Dekane e Fakultetit të Artit dhe Dizajnit në UBT.

Diskutimi solli perspektiva të ndryshme mbi rolin dhe ndikimin e kritikës në zhvillimin e artit në Kosovë dhe më gjerë, duke theksuar nevojën për diskurs publik të strukturuar rreth artit, qoftë në media, akademi apo hapësira kulturore. Panelistët ndanë përvojat e tyre mbi zhvillimin e kritikës artistike në kontekstin lokal dhe global, si dhe rëndësinë që ajo ka në formësimin e vlerësimeve, skenës artistike dhe edukimit estetik të publikut.

Në hapje të aktivitetit, Dekania Ariana Gjoni theksoi rëndësinë që kjo javë ka për studentët: “Java e Artit dhe Dizajnit në UBT është një platformë unike që bashkon studentë, profesorë dhe profesionistë kreativë për të prezantuar punën e tyre dhe për të ndarë ide të reja. Ky edicion i dytë shënon përkushtimin tonë për të ndërtuar një komunitet krijues, inovativ dhe ndërdisiplinor që promovon artin dhe dizajnin si forcë ndryshimi në shoqëri”.

Ndërsa profesori Dardan Luta, në fjalën e tij, shtoi: “Ka fryma të ndryshme që mund t’i shohin të gjithë ata që na vizitojnë. Kampusi është kthyer në një vend ku ekspozohen fusha të ndryshme multimediale dhe artistike. Ekspozita zgjat deri të enjten dhe i ftoj të gjithë të mos e humbin këtë përvojë”.

Ekspozita e hapur gjatë gjithë javës ofron një pasqyrë të punëve më të mira të studentëve – që përfshijnë piktura, skulptura, instalacione, projekte digjitale dhe dizajn grafik – dhe është një dëshmi e standardeve gjithnjë në rritje që po kultivohen në këtë fakultet.

UBT, përmes aktiviteteve si Java e Artit dhe Dizajnit, edhe njëherë dëshmon përkushtimin e tij të palëkundur për të krijuar hapësira të reja për dialog, krijimtari dhe përfshirje, duke ndërtuar ura të forta mes studentëve, profesionistëve dhe komunitetit më të gjerë artistik. /A.Zeneli/UBT News/

Në UBT u bë hapja zyrtare e edicionit të dytë të Javës së Artit dhe Dizajnit. Në këtë ngjarje të rëndësishme morën pjesë Rektori i UBT-së, Prof. Dr. Edmond Hajrizi, dekania e Fakultetit të Artit dhe Dizajnit, Ariana Gjoni, përfaqësues të departamenteve të ndryshme, profesorë, studentë dhe mysafirë të shumtë nga fusha e artit dhe kulturës.

Rektori Hajrizi theksoi rëndësinë e këtij aktiviteti për zhvillimin dhe promovimin e artit në nivel lokal dhe ndërkombëtar. Ai u shpreh se “Java e Artit dhe Dizajnit është një mundësi për të nxitur dialogun krijues ndërmjet artistëve, studentëve dhe profesionistëve, duke përkrahur inovacionin dhe pasionin për artin në çdo formë. Kjo iniciativë ndihmon në ngritjen e një platforme të fuqishme, që bashkon kulturën, teknologjinë dhe edukimin”.

Ndërkaq, dekania Gjoni falënderoi të gjithë pjesëmarrësit dhe theksoi se “Fakulteti i Artit dhe Dizajnit në UBT është i përkushtuar për të ofruar një ambient ku talenti dhe kreativiteti fuqizohen. Java e Artit dhe Dizajnit sjell së bashku studentët dhe ekspertët nga fushat e ndryshme të artit, për të krijuar një dialog të gjallë dhe frymëzues për të ardhmen e artit dhe kulturës në vendin tonë”.

Ky aktivitet i organizuar nga Fakulteti i Artit dhe Dizajnit në UBT përfshin departamentet e Dizajnit të Integruar, Artit dhe Medias Digjitale, Aktrimit dhe Muzikës Moderne, Prodhimit Digjital dhe Menaxhimit. Java e Artit dhe Dizajnit përbëhet nga një program i pasur me ekspozita, punëtori kreative, performanca muzikore dhe diskutime të hapura që synojnë kultivimin dhe mbështetjen e krijimit të një rrjeti të gjerë lokal dhe global të krijuesve dhe profesionistëve të artit.

Ngjarja synon të nxisë bashkëpunimin ndërdisiplinor dhe të frymëzojë studentët dhe profesionistët për të eksploruar mundësi të reja në fushën e artit dhe dizajnit, duke forcuar lidhjet mes komuniteteve artistike dhe akademike.

Java e Artit dhe Dizajnit do të vazhdojë për disa ditë me aktivitete të ndryshme, duke sjellë në fokus inovacionin, traditën dhe diversitetin e kulturës bashkëkohore.