Në një ceremoni solemne të mbajtur në Parkun Shkencor, Inovativ dhe Teknologjik të UBT-së, në Lipjan, UBT ndau çmimin më të lartë institucional Honorary Degree – Excellence in Leadership për liderin dhe politikanin e njohur kanadez, Tony Clement.

Ky çmim i veçantë vjen si njohje për kontributin e tij të jashtëzakonshëm në fushën e udhëheqjes, inovacionit politik dhe bashkëpunimit ndërkombëtar.

Në ceremoni ishte i pranishëm edhe Rektori i UBT-së, Prof. Dr. Edmond Hajrizi, i cili tha se ky çmim përfaqëson një nderim të veçantë për një personalitet me një përvojë të thellë në lidership dhe, njëkohësisht, për një mik të çmuar të Kosovës.

“Përmes këtij çmimi ne po nderojmë jo vetëm një personalitet me përvojë të pasur në lidership, por edhe një mik të Kosovës, i cili ka mbështetur vazhdimisht avancimin e vlerave demokratike dhe zhvillimin ndërkombëtar”, tha Rektori Hajrizi.

Në vijim të ceremonisë, Rektori Hajrizi theksoi se figura e Clement është shembulli më i qartë i një udhëheqësi që përmes vizionit, risisë dhe përkushtimit ndaj së mirës së përbashkët ka krijuar ndikim të qëndrueshëm.

“Clement është shembulli më i mirë se si lidershipi vizionar, inovacioni dhe përkushtimi ndaj të mirës publike mund të krijojnë ndikim afatgjatë. Me këtë çmim, ne duam të inspirojmë brezat e rinj që të ndjekin rrugën e lidershipit të përgjegjshëm dhe bashkëpunimit global”.

Clement, gjatë fjalës së tij, theksoi se ndjehej veçanërisht i nderuar për çmimin nga një institucion që përfaqëson përparimin, edukimin cilësor dhe të ardhmen. Ai vlerësoi Kosovën dhe UBT-në si shembuj të përkushtimit të sinqertë ndaj zhvillimit dhe integrimit ndërkombëtar, duke shprehur bindjen se këto vlera janë themeli i një bote më të bashkuar dhe të drejtë.

“Është një privilegj i madh të pranoj këtë nderim nga një institucion që përfaqëson të ardhmen, përparimin dhe edukimin cilësor. Kosova dhe UBT janë shembuj të fuqishëm të përkushtimit ndaj zhvillimit dhe integrimit global”, tha Clement.

Në përmbyllje të fjalës së tij, Clement u shpreh se ky ishte nderimi i tij i parë i këtij lloji, të cilin e konsideronte si një pikënisje të një marrëdhënieje të re dhe të veçantë me UBT-në.

“Ky është nderimi im i parë i këtij lloji dhe e konsideroj si një lidhje të veçantë që sapo është krijuar mes meje dhe UBT-së. Do të jem krenar të jem pjesë e komunitetit tuaj dhe do të përpiqem të kontribuoj përtej këtij momenti simbolik”.

Tony Clement ka mbajtur disa nga pozitat më të larta në qeverinë e Kanadasë, përfshirë ministrin e Shëndetësisë dhe ministrin e Industrisë, dhe ka qenë një zë i fuqishëm në mbështetje të bashkëpunimeve ndërkombëtare dhe reformave të thella politike dhe ekonomike.

Me këtë çmim, UBT vazhdon traditën e tij për të nderuar personalitete të shquara që kanë lënë gjurmë në udhëheqje, arsim dhe shoqëri.

Në Universitetin e Kırıkkale-s në Turqi u mbajt Kongresi i 9-të Ndërkombëtar i Infermierisë Forenzike, i cili mblodhi studiues, akademikë dhe profesionistë nga vende të ndryshme për të diskutuar zhvillimet më të fundit në fushën e infermierisë dhe shkencave forenzike.

Ky kongres u organizua në bashkëpunim me Universitetin Katip Çelebi të Izmirit, Universitetin Bozok të Yozgatit, dhe Shoqatën e Shkencëtarëve Forenzikë të Turqisë, ndërkohë që UBT mori pjesë si universitet partner, duke u dalluar me prezencën dhe kontributin e tij shkencor.

UBT u përfaqësua nga Prof. Dr. Cengiz Çesko, i cili mbajti një prezantim shkencor në fushën e tij të ekspertizës. Prezantimi u prit me interes dhe vlerësim të lartë nga pjesëmarrësit, duke reflektuar profesionalizmin dhe përvojën akademike të UBT-së në fushat e shkencave forenzike dhe atyre shëndetësore.

Ndër figurat e rëndësishme të pranishme në këtë kongres ishin edhe Prorektori i Universitetit të Kırıkkale-s, Prof. Dr. Mehmet Başalan, dhe Rektori i Universitetit Bozok të Yozgatit, Prof. Dr. Evren Yaşar. Në emër të UBT-së, Prof. Dr. Cengiz Çesko u dorëzoi atyre dhurata simbolike – një gjest që u vlerësua si shprehje e respektit institucional dhe thellimit të bashkëpunimit akademik ndërkombëtar.

Pjesëmarrje aktive në organizimin dhe zhvillimin e kongresit pati edhe Prof. Dr. Hamit Hancı, Kryetar i Shoqatës së Shkencëtarëve Forenzikë, i cili kontribuoi ndjeshëm në pasurimin e sesioneve shkencore dhe tërë programit kongresual.

Gjuha zyrtare e kongresit ishte turqishtja dhe anglishtja, ndërsa ngjarja ofroi një platformë të vlefshme për shkëmbim të njohurive dhe përvoja ndërkombëtare në fushën e infermierisë forenzike, duke nxitur lidhje të reja akademike dhe profesionale në këtë fushë me rëndësi të veçantë.

Ju njoftojmë me kënaqësi se UBT do të organizojë një ngjarje të veçantë më 21.05.2025, në Parkun Shkencor, Inovativ dhe Teknologjik të UBT-së, në Lipjan, ku do të mirëpresim Tony Clement, udhëheqës publik i shquar me përvojë të gjerë në politikat dhe qeverisjen shëndetësore në Kanada, dhe përtej.

Në kuadër të kësaj ngjarjeje, z. Clement do të mbajë një ligjëratë publike me temën: “Ndërtimi i urave: Mësime mbi lidershipin, inovacionin dhe bashkëpunimin mes Kanadasë dhe Kosovës”, si dhe do të nderohet nga UBT me Honorary Degree “Excellence in Leadership” për kontributin e tij të jashtëzakonshëm në shëndetësi, inovacion dhe zhvillim ekonomik.

Ngjarja do të përfshijë edhe një vizitë në kampus.

Ju ftojmë të merrni pjesë në këtë ceremoni të rëndësishme.

Rektori i UBT-së, Prof. Dr. Edmond Hajrizi, po merr pjesë në Javën Ndërkombëtare të Bashkëpunimit Akademik, e cila po mbahet në Universitetin Teknik të Sofjes (TU-Sofia).

Në këtë aktivitet të rëndësishëm ndërkombëtar, Rektori Hajrizi shoqërohet nga një delegacion prej pesë anëtarësh nga UBT, përfshirë profesorë dhe studiues të fushave të ndryshme, të cilët kanë mbajtur prezantime dhe kanë shkëmbyer përvoja me përfaqësues të universiteteve nga Evropa, Amerika Latine dhe rajoni i Ballkanit.

Rektori Hajrizi ka zhvilluar takime me Rektorin e TU-Sofia, Prof. Dr. Georgi Venkov, Zëvendësrektoren Prof. Dr. Lidia Galabova, si dhe me drejtoreshën e programit Erasmus+ në Bullgari dhe përfaqësues të tjerë të institucioneve akademike partnere.

Rektori Hajrizi mbajti një prezantim mbi vizionin dhe qasjen e UBT-së si një institut lider në arsim, i cili ndërthur arsimin, kërkimin shkencor dhe zhvillimin teknologjik në mënyrë të integruar. Ndërsa, Prof. Dr. Zhilbert Tafa, zhvilloi një prezantim rreth temës “Insights and Research in IoT” dhe Prof. Dr. Besnik Qehaja prezantoi hulumtime të reja në fushën e menaxhimit dhe inovacionit.

Delegacioni i UBT-së u bë pjesë aktive e paneleve dhe ligjëratave të shumta, ku trajtuan tema aktuale si: inteligjenca artificiale, algoritmet për edukim të personalizuar, digjitalizimi i arsimit, IoT dhe zhvillimet në rrjetet e avancuara 6G.