Studentët e Fakultetit të Menaxhmentit, Biznesit dhe Ekonomisë (MBE) në nivel Master në UBT patën një përvojë të veçantë akademike përmes një ligjërate të hapur dhe interaktive mbi Influencer Marketing, me pjesëmarrjen e dy figurave të njohura në fushën e mediave dhe marketingut digjital: influenceren Donna Gorani Sylaj dhe gazetarin dhe influencerin Lindrit Zogaj.

Në kuadër të lëndës Menaxhimi i Marketingut, të udhëhequr nga Prof. Gonxhe Beqiri, aktiviteti u karakterizua nga një qasje praktike dhe bashkëkohore, duke i afruar studentët me realitetin e industrisë së marketingut digjital dhe ekonomisë së krijuesve të përmbajtjes.

Gjatë sesionit, të ftuarit ndanë përvoja konkrete nga puna e tyre profesionale, duke trajtuar aspekte të rëndësishme të funksionimit të Influencer Marketing, ndërtimit të strategjive efektive, bashkëpunimit me bizneset dhe arritjes së objektivave të fushatave digjitale. Një vëmendje e veçantë iu kushtua edhe sfidave të kësaj industrie, si dhe avantazheve që sjell angazhimi profesional në këtë fushë dinamike.

Donna Gorani Sylaj theksoi rëndësinë e konsistencës, autenticitetit dhe përgjegjësisë profesionale në krijimin e përmbajtjes, duke ndarë gjithashtu përvojën e saj ndërkombëtare dhe tranzicionin drejt tregut lokal. Ndërkohë, Lindrit Zogaj solli një perspektivë të gjerë mbi rolin e mediave, ndikimin e komunikimit digjital dhe përgjegjësitë që kanë krijuesit e përmbajtjes në raport me publikun dhe institucionet.

Një pjesë e rëndësishme e diskutimit iu kushtua edhe aspektit ligjor dhe fiskal të veprimtarisë së influencerëve, përfshirë përmbushjen e obligimeve si taksapagues dhe rëndësinë e formalizimit të aktivitetit profesional në këtë industri në rritje.

Studentët treguan interes të lartë gjatë gjithë ligjëratës, duke marrë pjesë aktivisht në diskutime dhe duke adresuar pyetje mbi praktikat reale të tregut, strategjitë e suksesit dhe mundësitë e zhvillimit të karrierës në fushën e marketingut digjital.

Fakulteti MBE në UBT vazhdon të promovojë aktivitete të tilla praktike dhe bashkëkohore, duke lidhur teorinë akademike me eksperiencën reale të industrisë dhe duke u ofruar studentëve mundësi të drejtpërdrejta për të mësuar nga profesionistë aktivë të tregut.

Në kuadër të aktiviteteve praktike dhe bashkëpunimeve profesionale të Fakultetit të Psikologjisë në UBT, studentët zhvilluan një vizitë studimore në ambientet e Alma Academy, duke përjetuar një eksperiencë të vlefshme akademike dhe profesionale.

Kjo vizitë u shndërrua në një platformë të rëndësishme bashkëbisedimi dhe shkëmbimi përvojash mes studentëve dhe profesionistëve të fushës së psikologjisë, duke krijuar mundësi për diskutim mbi zhvillimin profesional, praktikat bashkëkohore dhe rolin e psikologut në komunitet.

Gjatë qëndrimit në Alma Academy, studentët patën mundësinë të njihen më nga afër me qasjet edukative dhe praktikat mbështetëse që synojnë zhvillimin personal dhe profesional të të rinjve, duke reflektuar rëndësinë e integrimit të teorisë me praktikën në fushën e psikologjisë.

Përmes këtij aktiviteti, u theksua rëndësia e bashkëpunimeve ndërinstitucionale në forcimin e aftësive praktike të studentëve dhe në përgatitjen e tyre për tregun e punës, veçanërisht në një fushë dinamike si psikologjia, ku ndërveprimi njerëzor dhe përvoja praktike janë thelbësore.

Fakulteti i Psikologjisë në UBT vazhdon të promovojë aktivitete të tilla profesionale dhe vizita studimore, duke u ofruar studentëve mundësi të drejtpërdrejta për të mësuar nga praktika reale dhe për të ndërtuar ura bashkëpunimi me institucione dhe organizata që veprojnë në fushën e edukimit dhe zhvillimit njerëzor.

Në kuadër të përkushtimit të UBT-së për të ndërlidhur njohuritë teorike me praktikën profesionale dhe zhvillimet më të fundit teknologjike, studentët e vitit të dytë nga drejtimi Shkenca Kompjuterike dhe Inxhinieri realizuan një vizitë studimore në KREN, nën udhëheqjen e Prof. Dr. Vehbi Sofiu.

Vizita kishte për qëllim avancimin e njohurive praktike të studentëve në fushën e sistemeve dhe sinjaleve, si dhe njohjen me teknologjitë moderne të monitorimit, analizimit dhe menaxhimit të radiofrekuencave (RF), të cilat përbëjnë një komponent kyç në industrinë bashkëkohore të komunikimit dhe teknologjisë.

Studentët u pritën nga koordinatori Atif Bashani, i cili prezantoi në mënyrë të detajuar infrastrukturën teknologjike të laboratorit modern RF (Radio-Frequency Laboratory) në hapësirat e KREN-it. Gjatë prezantimit, studentët u njohën me sistemet inteligjente të monitorimit të sinjaleve, sensorët e avancuar RF, antenat profesionale dhe serverët e dedikuar për identifikimin dhe lokalizimin në kohë reale të pajisjeve që emitojnë sinjale përmes analizës së brezit frekuencor.

Një rëndësi e veçantë iu kushtua edhe aplikacioneve softuerike të specializuara që përdoren për monitorimin, analizimin dhe menaxhimin e frekuencave dhe sinjaleve në kohë reale, duke demonstruar integrimin e teknologjive moderne në sistemet inteligjente të komunikimit.

Gjatë demonstrimeve praktike, studentët patën mundësinë të shohin nga afër mënyrën e funksionimit të sistemeve RF, lidhjen ndërmjet sensorëve dhe softuerëve analitikë, si dhe procesimin e impulseve dhe parametrave të komunikimit sipas standardeve bashkëkohore teknologjike.

Përmes kësaj eksperience praktike, studentët kuptuan më mirë rëndësinë e analizës së sinjaleve, optimizimit të performancës së rrjeteve të komunikimit dhe rolit të teknologjive inteligjente në funksionimin e sistemeve moderne të informacionit dhe telekomunikimit.

Përvoja të tilla studimore jo vetëm që rrisin interaktivitetin në procesin mësimor, por edhe fuqizojnë kompetencat profesionale të studentëve, duke i bërë ata më të gatshëm për karrierë në industri të avancuara teknologjike dhe sisteme inteligjente të së ardhmes.

Në një atmosferë që ndërthurte traditën, inovacionin dhe bashkëpunimin profesional, në ambientet e Parkut të Inovacionit dhe Trajnimeve (ITP) në Prizren u mbajt edicioni i radhës i “Panairit të Ushqimit”, organizuar nga Fakulteti i Shkencave të Ushqimit dhe Bioteknologjisë në UBT. Ky aktivitet, që tashmë është shndërruar në një platformë të rëndësishme akademike dhe profesionale, mblodhi studentë, profesorë, ekspertë të industrisë ushqimore, përfaqësues institucionesh dhe biznese vendore e ndërkombëtare.

Në prani të Rektorit të UBT-së, Edmond Hajrizi, nënkryetarit të Komunës së Prizrenit, Furkan Bytyç, kryetarit të Shoqatës ESNAF, Varis Xhejlani, dekanit të Fakultetit Shkenca të Ushqimit dhe Bioteknologji në UBT, Fidan Feka, përfaqësuesve të industrisë dhe stafit akademik, panairi dëshmoi edhe një herë rolin që UBT po luan në ndërlidhjen e dijes me praktikën dhe tregun e punës.

Studentët prezantuan produkte ushqimore tradicionale dhe inovative, të realizuara përmes punës praktike në laboratorët modernë të UBT-së, duke demonstruar njohuritë profesionale dhe kreativitetin e tyre në fushën e teknologjisë ushqimore dhe bioteknologjisë. Vizitorët patën mundësi të shijojnë produkte të ndryshme, të njihen me teknikat moderne të përpunimit ushqimor dhe të shohin nga afër standardet profesionale që po ndërtohen në këtë program studimi.

Në fjalën e tij, Rektori i UBT-së, Prof. Dr. Edmond Hajrizi, e cilësoi këtë aktivitet si një organizim natyrshëm të ndërtuar mes universitetit, komunës dhe industrisë.

“Ky është një organizim organik. Edhe komuna, edhe industria, edhe ne po bashkohemi natyrshëm sepse e dimë rëndësinë që ka zhvillimi i kësaj fushe. Është krijuar një format shumë i mirë, sidomos me ardhjen e kompanive të ndryshme këtu. Ia vlen të kemi një momentum të tillë dhe shpresoj që në vitet e ardhshme të na bashkëngjiten edhe më shumë qytetarë. Prizreni dhe i gjithë rajoni janë konfirmim i traditës dhe zhvillimit në industrinë ushqimore”, tha ai.

Ndërkaq, drejtori i Qendrës së UBT-së në Prizren, Vehbi Sofiu, theksoi se panairi tashmë është bërë pjesë tradicionale e aktiviteteve akademike në këtë qendër.

“Ky është viti i katërt që ky panair organizohet dhe tashmë është shndërruar në një ngjarje tradicionale, e cila po merr përmasa gjithnjë e më të mëdha në lidhjen e shkencës, njohurive profesionale dhe industrisë”, u shpreh ai.

Drejtori i Institutit të Forenzikës në UBT, profesori Cengiz Cesko, vlerësoi zhvillimin që ka marrë aktiviteti ndër vite.

“Sot po dëshmojmë rritjen e një ideje dhe të një emri. Kur kemi filluar, gjithçka ishte më e thjeshtë dhe më modeste. Tash ky është një aktivitet gjithnjë në rritje falë punës dhe angazhimit të secilit student. Është një aktivitet ku bashkohen shkenca, dija, praktika dhe teoria”, deklaroi ai.

Panairi përfshiu gjithashtu prezantime nga kompani të industrisë ushqimore, takime networking ndërmjet studentëve dhe sektorit privat, shpërndarje të certifikatave dhe diskutime mbi trendet moderne në teknologjinë ushqimore, sigurinë ushqimore dhe ushqyerjen e shëndetshme.